Rev 6 | KjiSC | STEP | Na mato ghu ara, ia Rekahana Sipisipi ne hio kaini ia va kenuna zago va kakapata, ka ira vitu zago va kakapatana. Ianimu tuna ghe nake nomohi nga ara kaike ghu ka ira rodana va vuha dolidi ngengene taghe saduru ta ghuana, “!Meha!” ne ghua ghinagu.

Revelation of John 6

Ira Zago Va Kakapata.

1 Na mato ghu ara, ia Rekahana Sipisipi ne hio kaini ia va kenuna zago va kakapata, ka ira vitu zago va kakapatana. Ianimu tuna ghe nake nomohi nga ara kaike ghu ka ira rodana va vuha dolidi ngengene taghe saduru ta ghuana, “!Meha!” ne ghua ghinagu. 2 Na mato lao ghu, nato fini laoi ghu kaike hose ta ghiho tetuna aianimu. Noni ta haghei ani neke posini kaike bokala, nia kaike tarapae ginitaukela neke va vonaina ka pauna ani e ghua. Manei neke ghahe kave lao taghe kaike mane magara ta mala la paufuri keha magara, neke ghua.

3 Ka ia hio kaini ia va paluna zago va kakapata ia Rekahana Sipisipi, ara nake nomohi ia va paluna va vuha ta doli kahe ghuana iahi, “!Meha!” 4 Kaike hose ta busaka neke la kave mehana. Ia ta haghe ka manei mu neke vanani mana mala hio kai bule ka malau iahi peka mala va magararira ia noni ta vari atuatunguna ghu maneri. Kaike leghahai leboto sisilufu mala magara, dike vananina.

5 Ka ia hio kaini ia va litona zago va kakapata ia Rekahana Sipisipi, ara nake nomohi ia va litona va vuha dolina kahe ghuana iahi, “!Meha!” neke ghua. !Na mato lao ghu ara, nato fini laoi ghu aianimu kaike hose ta sisibe! Ia ta mala haghei hose ani neke posini kaike sekele ka kamena ani. 6 Ianimu tuna ghe nake nomohi nga taghe kaike leo ta ghuana ka vari hoataidi rodana va vuha dolidi ari kahe ghuana iahi, “!Kaike kilo ka falaona witi, ba lito kilo ka falaona bali mu e malana kaike ravata tabara. Ghe oka ngovalari ghu ira heke olivi nia ira heke gerepi e ghua!”

7 Ka ia hio kaini ia va rodanana zago va kakapatana, ara nake nomohi ia leona ia va rodanana va vuha dolina kahe ghuana iahi, “!Meha!” neke ghua. 8 !Na mato lao ghu, ara nake fini laoi aianimu kaike hose ta gegha seaga! Babaolonana ia ta haghe mu, Leme, nia ia malau ka ira ta leme tuna ge leghu namoi ghu leghuna mo, neke ghua. Maneri palu mu dike hio mana mala mana kaputina kaike hori ka ira rodana horina malau iahi peka mala vari atunguna ka leboto sisilufu mala magara, ka songe, ka leghu kokolodi fogara nga nia tagukava mauke ta mamaghuana nga, e ghua.

9 Ka ia hio kaini manei ia va gahana zago va kakapata, ara nake fini ka pekana ia sopebeana ira tarungadi ira dike atunguriro vununa maneri dike va hohoghonai dike tuturi ghini kave ghu ia saorona God. 10 Maneri dike kudo va fafaa ghua lao iahi, “Agho Lod God ta torai mana nia ta maduana nia ta hohoghona. ?Ka nihani ghe go fateri nga agho ira noni ka malau iahi peka go va kilasari ghu vununa maneri dike atungu ghairo?” 11 Ianimu tuna ghe neke sopai vanadi lao poko sodu ta ghiho nga God ira tarunga neke va kahe ghidi ghu, “Ghau o afa birusuna laona e vuhai dufu ghu ia fafata ta atungu va hokotori maneri ira keha tahimu ta riva vanagu ara.”

12 Ara nake mato ma neke hio kaini ghu ia va onomona zago va kakapata ia Rekahana Sipisipi. Kaike leghahai kuzo neke auna. Ia taunu neke age sisibe taghe poko muko hihingo ta riva ghini ka kalana gouti, nia ia kamotona hihile tuna taghe busaka geke age ghua ghu busakanana neke ghua. 13 Nia ira babaghunu ka kolangana tuna, gedi ke riufu hinae meha ghu ka malau iahi peka, taghe fuadi figi ta zoghu hinae ka kaike heke figi ta kuzoi kaike dafe ta gigima, ta ghuana. 14 Ia kolanga mu neke pipidui taghe kaike buka vividuhu neke ghua hio ghaheina ka neke auno nia ira leghu vuhuku nga nia ghizuna nga tuna gedi ke rizu ghahe ghu ka ira mala audi dike ghua. 15 Leleghonana ira mane ginitaukela, ira mane ginitau, ira mane kenudi ka ia punugara, ira ta taghotagho, ira ta torai mana, ira noni mala varituhu nia ira noni ta kalasa, e ghua, dike poika haroharo ka ira lianga nia ka vari hoataidi ira ghahipa leghaha ka ira vuhuku e ghua. 16 Maneri dike kudo lao ka ira vuhuku nia ka ira ghahipa leghaha, “Ghau o riufu meha fatemai o poika ghai ghu ka ia hihilina ia ta nohe ka ia nonohe ginitaukela, nia ka ia haala ia Rekahana Sipisipi, e ghua. 17 Vununa ia leghahai ravatana haala ka maneri palu to dufu meha. ?Hei ghu ta boka taga tetuina?”