Rev 8 | KjiSC | STEP | Ia Rekahana Sipisipi ne hio kaini ghu ia va vituna zago va kakapatana buka vividuhu, neke age au ia vanemoho ka malauo God fate fatana kaike fotana aoa.

Revelation of John 8

Ia Vituna Va Kakapata Neke Hio Kaini

1 Ia Rekahana Sipisipi ne hio kaini ghu ia va vituna zago va kakapatana buka vividuhu, neke age au ia vanemoho ka malauo God fate fatana kaike fotana aoa. 2 Nia ara nake finiri ira vitu engizeli taremehadi vitu kufili dike tetu ka kenuna God.

3 Kaike engizelini neke posini kaike sosa ta golu mala saliga inisenisi, neke meha tetu ka ia sopebeana. Manei neke hio tehi inisenisi mala nakai varighara taremehadira ira tarai ka ira nona noni God, neke oranga kave laori ghu ka ia sopebeana ta golu ta nohe ka kenuna ia nonohe ginitaukela. 4 Ia gufuna ia inisenisi taremehadi ira tarai ka ira noni God dike vona lao ka God sipana ka ia kamena engizeli. 5 Ianimu tuna ghe neke hioi nga ia engizeli ia sosa mala saliga inisenisi neke va foudu ghini lao ghu ka totoina sopebeana ani, neke kai hinae mehai ghu ka malau iahi peka. Ka fafata ianimu neke age au keha leghahai sorukaike nia gululudi saduru, kafilidi kapi nia kuzo, e ghua.

Ira Kufili

6 Ianimu tuna ghe dike va tana ufu va nakeleri nga ira vitu kufili ira vitu engizeli.

7 Ka ia ufui ia nona kufili ia engizeli ta kenu, kipedi aisi nia totoi ta heni taremehana busaka e ghua dike oranga hinae mehara ka malau iahi peka. Kaikeu ka ira lito horina malau iahi peka neke saliga purukutu. Kaikeu ka leleghu lito dolidi heke dike saliga purukutu, nia ia kamotona sesehu ta dodoli geke saliga purukutu haro ghu, neke ghua.

8 Ka ia ufui ia nona kufili ia va paluna engizeli, kaike leghutau taghe leghahai vuhuku ta burungu e ghua neke riufu laona ka ia tahi gilio. Kaikeu ka ira lito fofotaina ia tahi neke fihiki ka busaka. 9 Kaikeu ka leleghu lito va vuha dolidi ka ia giliona tahi dike leme nia kaikeu ka leleghu lito vaka dike toraina muko.

10 Ia va litona engizeli ne ufui ghu ia nona kufili, kaike leghahai babaghunu ta pelara taghe zirangana kaike gasi e ghua neke zoghu sipana ka kolangana neke riufu lao ghu ka kaikeu ka leleghu lito ketuhu leghaha nia kaikeu ka leleghu lito ketuhu futu, e ghua. 11 Babaolonana babaghunu ianimu ghu mu, Minga. Manei neke va mingai kaike pelona ka ira lito pelona ira ketuhu dike leme ghu tehi noni dike ketuhuro ka ketuhu ta minga ianimu.

12 Ia va rodanana engizeli ne ufui ghu ia nona kufili, neke age hapata va mukoi kaikeu ka ira lito fofotaina ia taunu, kaikeu ka ira lito fofotaina ia hihile nia kaike babaghunu ka leleghu lito babaghunu e ghua. Kaikeu ka ira sopa litolito fofotaidi fegala maneri dike age deo fegaladi. Kaike fofotaina ka ira lito fofotaina ravata neke deo fegalana, nia kaike fofotaina molamo ka ira lito fofotaina redu neke deo fegalana.

13 Na mato vona ghu ara, nake nomohi kaike sinagi, neke alava fateni ka kolangana ngengene va fafaa ghuana iahi: “Lelemeana, Lelemeana, Lelemeana ka ghau haroharo ta au ka malau iahi peka, vununa dito ufuri la ira nodi kufili ira keha lito engizeli e age muko laoni ka ghau.”