Rev 9 | KjiSC | STEP | Ia va gahana engizeli ne ufui ghu ia nona kufili, ara nake finini kaike babaghunu neke zoghu sipana ka kolangana neke hinae meha ghu ka malau iahi peka. Babaghunu iahi dike vanani maneri kaike kii mala tobehena ia golava ta lao gilioni.

Revelation of John 9

1 Ia va gahana engizeli ne ufui ghu ia nona kufili, ara nake finini kaike babaghunu neke zoghu sipana ka kolangana neke hinae meha ghu ka malau iahi peka. Babaghunu iahi dike vanani maneri kaike kii mala tobehena ia golava ta lao gilioni. 2 Ia babaghunu ne tobehi ghu ia golava ta lao gilioni, gufu ta tuta taghe sipana ka kaike totoi leghaha e ghua neke la kave mehana neke va nagoromi ghu ia taunu nia ia kolanga.

3 Ianimu tuna ghe dike la kave meha nga ira tehi kupo ka gufu ani dike la hinae meha ghu ka malau iahi peka. God neke vanadi mana taghe ia ta auri ira nodi uke tetehi mala va vavahagala nonina. 4 God neke va kahe ghidi taka ngovalarira ghu ira sesehuna ia kava, ba ira heke ba ira keha leghutau ta kodolo, nga ira noni dike deorio ia zago ka God ka ira raedi lama dike ngovalarira. 5 God e deo geke va malumuri ghu ira kupo ta atungurira noni irahi, nga neke va malumuri ma ta va vavahagalarira ka giliodi gaha hihile. Ka ia va vavahagalari ira noni maneri, taghe ia vavahagala ta vanadi kaike nona uke tetehi e ghua, dike va ghilaghilaina maneri. 6 Ka ravata iranimu, ira noni edi age hadu leme ghatu, ghe e deo age dufuidina. Maneri edi age hagala ghini ia leme, ghe maneri e deo gedi boka age leme ghu.

7 Ira kupo mu taghe fifinidi ira hose ta va tanai magara, dike ghua. Maneri dike va vonari ka paudi ari keha leghutau taghe tarapae ginitaukela ta golu edi ghua, nia ira hihilidi tuna taghe fifinidi hihilidi noni, dike ghua. 8 Ira kaladi mu taghe kaladi ira fotati dike ghua, nia ira hingadi tuna, taghe hingadi ira laioni gedi ghua ghu, dike ghua. 9 Maneri dike va vona pokotini aeana mala magara, nia ia babaraba ka ira laedi tuna taghe gurumadi ira purududi tehi hose ta korohori ira mala haghe ka ia magara gedi ghua ghu, dike ghua. 10 Maneri dike kuru sekudi taghe nona uke tetehi dike ghua, dike kuru huhungudi ghu mala vavahagalarira ira noni ka giliodi gaha hihile. 11 Mane ginitaukeladira maneri mu, ia engizelina ia golava ta lao gilioni. Babaolonana manei ka Hiburu mu Abadoni, nia ka Giriki mu Apolioni e ghua, fafahakanana mu, “ia ta Huhuara,” e ghua.

12 Ia va kenuna lelemeana mu to fuludu, nia keha palu Lelemeanani ta mehara nga.

13 Ianimu tuna ghe neke ufui nga ia nona kufili ia va onomona engizeli, nake nomohi ghu ara kaike leo la mehana ka ira rodana gegehona ia sopebeana ta golu ta au ka kenuna God. 14 Ia leo neke ngengene ghua lao iahi ka ia va onomona engizeli ta kurui kufili: “O fudaha kaveri agho ira rodana engizeli ta piligari ari ka ia leghahai ketuhuna Iuferetisi.” 15 Ira rodana engizeli neke va tanariro God malana toraina aoa iahi nia ravata iahi nia hihile iahi nia komuhu iahi e ghua, neke fudaha kaveri ia va onomona engizeli mala atungina kaike noni ka leleghu lito noni ka ira leghu noni nga ka malau iahi peka. 16 Maneri dike va kahe ghinagu ta dufuna ka palu ghobi feferi (200,000,000) mu ira mane magara ka ira rodana engizeli.

17 Ka ia hahaima nake fininio, ara nake finiri ira hose nia ira dike hagheriro e ghua. Ira ta hagheri hose ari mu dike va vona pokotini ta aeana ta busaka dovara, ta bolou dumisi nia ta heko, e ghua. Paudi hose ari mu taghe paudi laioni dike ghua, la kave meha tuna ka mangadi ari totoi, gufu, nia ghahipa ta heko ta saliga, e ghua. 18 Ia totoi, ia gufu nia ia ghahipa ta heko ta saliga dike kave meharo ka ira mangadi ira hose, dike atunguri kaike noni ka leleghu lito noni ka ia kamotona noni. 19 Gigimana ka ira hose mu neke au ka ira mangadi nia ka ira sekudi e ghua, vununa ira sekudi mu taghe adogho ta kuru paudi mala va bakorarira ira noni, dike ghua.

20 Ghe ira noni dike deoro lemedira ka va kilasa irahi, dike deo ngama taghuru kairira ira sasakedi. Maneri deo gedi ke nodo ghu va totoana ghidira ira nazahi, nia ira nguzunguzu ta riva ghidi ka golu, siliva, barasi, ghahipa, nia heke e ghua, ira taka boka fifini ghu, nonomoho ghu, nia ghaghahe ghu, e ghua. 21 E deo haro gedi ke taghuru kairi ghu ira sasakedi vari atungu, ira nodi basa, ira zave lao meha, nia ira sisiko, e ghua.