Romans 1

Ira Ungene Veha Ka Polo

1Leta iahi mu sipana ka ara Polo ia nona noniriva Zisas Kraes neke kudoauno mala kaike mane nonomohona, neke hio nenemauo ghu malanana ia Nonomoho Ta Veha ka God. 2God neke naiungene ghini Nonomoho Ta Veha iahi sepaoni ka heve neke kangavariro ira nona porofeti ka giliodi ira Kakangava Ta Maduana. 3Nonomoho ta veha iahi mu e ghini ia Tuuna, neke pagusu laono ka Deveti ka ia au noni manei. 4Nia ia Tarunga Ta Maduana haro, neke kahe kave va gigimai ta Tuunana God mu Zisas ka ia tetuleghu manei ka ia leme: Zisas Kraes ia noda Lod. 5Vununa ka ia leme Kraes vanaguna ara, neke vanagu kakato ghu God riva iahi ka ia mane nonomoho ta mala kudo noni ka hoatadi ira leghu noni taka Ziu nga, malanana ia leghu puhi ta la meha ka ia va hohoghona, mala va vonavonaina Kraes.

6Nia ghau haro e ghua, no auna ka giliodi ira ta kudori, ta mala nonana Zisas Kraes. 7Ka ghau haroharo aiamuhu Romu ta namaha ghini ghau God, ta kudo ghau ghu ta mala nona nonina taghonai: Ara na tarai fangai God ia noda Mama nia ia Lod Zisas Kraes e vanamu ghu ia varisute ta va meha kakatoi nia bule.

Vereverena Kudo Veha

8Ta kenuna mu, ara na kudo vehai ia nogu God ka Zisas Kraes ghini ghauna ghau haroharo, vununa ia nomu va hohoghona to kahe kavei ka malau kamoto iahi peka. 9God ta riva vanani iahi ara ka hihingogu kamoto ini ka ia tuturi beana ghini ia Nonomoho ta Veha ghinina ia Tuuna, e avohi mo ta ngana ghau tuduna ara 10ka ira nogu tarai leleghu fafata; nia ghatunaina ara na tarai fangai ka ia nona lao nanafa God, ta tobehe vanaguna ia hangana mala mehana ara ka ghau. 11Ara na hagalai meha fini ghau fuludu, a boka mala vanamu ghu ia kaikadolo ta sipa meha ka ia Tarunga ta Maduana mala va gigima ghauna. 12Ianimu ghu mu, mala ghau nia ara, da boka vari va gigimai ghu ka ira noda va hohoghona ta sopai kuru ghita.

13Ara na kabai ghini ghau ta avohina ghau taremehagu noni kiloau, nake vato ghinina ara tehi fafatani mala age sigho ghini ghauna, (ghe keha leghutaura neke va gogohauna dufu ghu ghatunaina) mala ga boka hio hagheleri la ka ia va hohoghona kehara ka vari hoataimu ghau ira taka Ziu ghu nake ghua, taghe nato ke riva ghinio la ka vari hoataidi ira keha noni taka Ziu ghu. 14God neke vanagu riva iahi mala toka ghidira ira noni ta ngengene Giriki nia ira noni taka ngengene Giriki ghu; ira ta avoavoho nia ira taka sikolu va veha ghu, e ghua. 15Vununa God neke vanagu riva iahi, na toraina kabai ghini ghu molamo ara ta tuturi beana ghinina ia Nonomoho Ta Veha ka ghau ta au aiamuhu Romu.

16Ara mu e deo ga haghava ghini ghegu ghu ia Nonomoho Ta Veha, vununa ia Nonomoho Ta Veha mu ia mana ka God malana ia hio va doliri ira leghu noni ta va hohoghona nga: ghai ira Ziu nake kusu nomohina, ianimu tuna ghe neke ghua nga ghau ira noni taka Ziu ghu. 17Vununa ia Nonomoho Ta Veha ne va podoli ia ghaghahena ta riva ghini God mala nai va lotoro ghitana ka ia nahalina taghonai. Ghaghahena ianimu ghu mu, e tataniga ka va hohoghona e va nonoghana ghu ka va hohoghona, taghe ia ta kahei la ka ira kakangava Ta Maduana: “Ia noni ta lotoro ka ia nahalina God mu e age aui doli hohoghona, vununa manei ne va hohoghona ka God,” ▼

▼1:17 Habakuku 2:4

ia ta ghua.

Ia Haala Ka God Ghini Ia Muko Ka Noni

18Ia haala ka God mu manei ne va podoli ka malaunao fate ghidira ira ta sasake nia ta muko puhidi, ta va gogohari taghodi mala avohina ia hohoghona ghinina God. 19Vununa ia hohoghona ta boka mala avohi ghinina God mu to avohi maneri, vununa God neto va podolo vanadi va veha. 20Vununa ka ia tataniga va vuhaini malau iahi peka, ira leghutau dike poikaro ghinina God—ia mana ta toghunai ka manei nia ira puhina ta maduana e ghua—edi podolo kave va veha ka ira vahina leghutau neke va vuhariro nga manei. E deo ghu boka kaheina maneri mu di zea ghini ghedi God, ta ghuana.

21Vununa maneri geta dike avohi mo God ghe, e deo gedi ke va totoana ghini ghu, ba helahela ghini ghu manei taghe God ta ghua ghinina, nia maneri deo gedi ke kudo vehai ghu, e ghua, nga dike tehiri ngangana ta kingo ghinina God, dike nagoromo ghu ira nganganadi. 22Geta dike kahei ghu maneri ta avoavohona taghodi ghe, maneri dike kingo. 23Maneri e deo gedi ke va totoana ghini ghu God ia ta varanga nia au toghunai, nga dike va totoana ghidi ira nguzunguzu dike riva ghidiro, taghe a’audi noni, ira memeha, nia ira pusi meusu, nia ira va vuha ta tagu taghe adoghori, totoliri, ira ta ghua mo.

24Ianimu la ghe ne va leghu ghidi lao nga God ta riva ghidira maneri ira leghutau ta sota ta ngagungagu ghidi ira hihingodi, di riva ghidi ghu ira leghutau ta hahaghavadi ka ira tinidi vari taghodi. 25Maneri dike pake ghedi va hohoghonaina heve ia ta hohoghona ghinina God, dike va hohoghonari ghu ira leghutau ta sesebodi. Maneri dike va totoana ghidi nia va vonavonari ira leghutau neke riva ghidiro God, nga deo gedi ke va totoana ghini ghu God neke riva ghidiro ira vahina leghutau nga. Manei kakaike lama mu ta fata mala helahela ghini fuludaina! Amen.

26Vununa ka iahi, neke va leghu ghidi lao ghu God ka ira lao hihingo ta hahaghavadi. Ira fotati ka maneri ghe, dike deo gedi kabai epu taremehadi ghu ira mane, nga dike kabai epu taremehadi ma ira fotati. 27Ira mane dike ghua molamo ianimu. Maneri dike deo gedi kabai epu taremehadi ghu ira fotati, nga dike toraina nonoro ghidi ma ira mane mo. Ira mane dike riva ghidi ira riva ta hahaghavadi ka ira keha mane dike hioi ghu ia va kilasa ta fata mala hioina maneri ka ira muko dike riva ghidiro.

28Kehanani mu, vununa maneri deo gedi ke ngana va kuru lighoronai ghu ta mala suteina ia avoavoho ghinina God, neke va leghu ghidi ghu manei ira nganganadi ta deo lighorodi, mala riva ghidira ira leghutau ta deo ge veha ghu ka maneri mala riva ghidira. 29Maneri mu dike fouduri ira vahina kokolodi muko nga, sasake nga, ngagungagu nga, nia kikipana, e ghua. Maneri edi fouduri kakabai, vari atungu, vari magara, sesebo nia konokono, e ghua. Maneri mu edi vari turi poika, 30edi vari ungene va muko, hakohako ghini God, maneri edika heluhelu ghidi ghu kehara, va varavaranga nia helahela ghidi taghodi, maneri edi va surari ira ghaghahedi mala rivai muko nia maneri edi va huhughuri ira nodi uke nia nodi mama. 31Maneri edi kingo, maneri e deo gedi suteri ghu ira nodi naiungene, edi deori namaha, edi deori dudumana, e ghua. 32Maneri geta avohi ghu ia lotorona nai puhi ta gigima ka God, ia ta kahei heiri ira ta riva ghidi kokolodi leghutau irahi mu edi fata ta mala lemena ia ta ghua ghe, eka ghua ghu ma leghutau irahi ta riva ghidi ma ta aura ghu maneri, nga edi ungene vehari molamo heiri ira ta riva ghidi leghutau irahi.