Rom 11 | KjiSC | STEP | Notohona ghu ka ara mu: ?heve, God neke sokeri ira nona noni taghonai ira Ziu? !Toraina deo hohoghona! Ara taghogu mu noni Isiraeli, nake pagusu meha ghu ka Ebarahamu, ka ia butubutu Benizemeni.

Romans 11

Ia Dudumana Ka God Ka Ira Noni Isiraeli

1 Notohona ghu ka ara mu: ?heve, God neke sokeri ira nona noni taghonai ira Ziu? !Toraina deo hohoghona! Ara taghogu mu noni Isiraeli, nake pagusu meha ghu ka Ebarahamu, ka ia butubutu Benizemeni.

2 God e deo geke sokeri ghu ira nona noni taghona neke faeteriro ka ia tatanigaina. ?Heve, e deo go avohi ghu ghau heve ne kaheina ka ira Kakangava Ta Maduana ghinina Ilaiza ia porofeti? Manei neke nominomi lao ka God ghidira ira nonidi Isiraeli kahe ghuana iahi, 3 “Lod, maneri dito ke atunguri ira nou porofeti nia dike huarari ira nou sopebeana, e ghua. Ara lama nato auna, di ghorevaha ghinagu ghu mala atunguauna,” ^{▼▼11:3 1 Ginitaukela 19:10, 14} neke ghuao.

4 ?Heve neke ghua ghu God ungene tughuina manei? God neke kahe ghua iahi, “!Deo, ara nato ke nai vanagu mo taghogughi vitu togha noni dito ke deoro gedi ke va totoana lao ghu ka god Baala!” ^{▼▼11:4 1 Ginitaukela 19:18} Neke ghua.

5 E ghua haroma ghu ghatunaina; keharau ma ka ira noni Ziu neke faeterira ka ia nona varisute ta va meha kakatoi. 6 God neke faeteri maneri, vununa ka ia nona varisute ta va meha kakatoi, nia God e deo geke faeteri ghu maneri vununa ka heve dike riva ghidiro maneri. Geke faeteri la God ka heve dike riva ghidiro maneri, ianimu ghu mu ia fafaete ka God e deo geke meha ghu ka ia varisute ta va meha kakatoi manei. 7 ?Heve ghu tuna? Ira noni Isiraeli dike hadui ia ghaghahena ta mala nai va lotorori ka ia nahalina God, ghe maneri e deo gedi ke dufui ghu. Keharau ma ka ira noni neke faeteriro lama God gedi hadu dufui ghu dike ghua. Nga ira keha haroharo mu dike age kaputu ira hihingodi, 8 taghe ia ta kahei la ka ira Kakangava Ta Maduana,
“God ne va nagoromori ira nganganadi nia ira hihingodi.
E dufu ghu ka ravata iahi,
manei neto ke bakisiri ira hibadi mala deo ghu fifinidira,
nia neto ke kaputuri ira talingadi mala deo ghu nonomohodira,” ^{▼▼11:8 Ngengene 29:4; Aesaea 29:10} ia ta ghua.

9 Nia Deveti ne kahe ghua iahi,
“Va malumuri ira nodi tevo ta foudu ka ghano ta veha, mala meha taghe kaike mamutu mala sakomorira, taghe kaike mala va hakeri maneri tadi nganai ghu di veha mo vahina leghutau nga, ta ghuana.
Va malumuri ira veha ka maneri ta va sinabererira, nia va malumuri ta hioina maneri ia va kilasa ta fata mala hioina maneri.
10 Va malumuri ira hibadi ta age kivira, e deo ghu boka fifinidira;
nia va malumuri ta va vavahagalana ka ira mamarutana ta dufuri maneri,” ^{▼▼11:10 Samu 69:22,23} ia ta ghua.

Ia Hio Va Doliri Ira Noni Taka Ziu Ghu

11 Ara ake notohoni. ?Heve, vununa ira Ziu dike sinabere dike riufu ghu, e deo ghu boka ke tetu vona take leghuna ghu ka God? !Toraina deo kalasu kai! Maneri dike huhughu neke va malumi ghu God ia hio va doli ta boka hioina Ira Taka Ziu ghu, mala va kakabairira ira noni Isiraeli. 12 Vununa ira Ziu dike sasake dike sokei ghu ia hio va doli ka God, neke va beanari ghu God ira noni taka Ziu ghu. Nia ka ia fihiki leghudi ka God ira noni Ziu ta va hohoghona ghu ka Kraes, God e age va beana laorini ira leghu noni nga ka malau iahi peka. 13 Ara na kaheri leghu irahi nga, sughavona ghu ka ghau ira noni taka Ziu ghu. God neto ke nakaiau ara taghe kaike mane nonomoho maladira ira noni taka Ziu ghu. Ka nganganagu ini ara mu, riva iahi ka ara mu kaike riva ta tongovona fuludu, vununa 14 ara na kabai ghini ta va kakabairira ira noni Isiraeli ka ia foforuna doli ta taghoi ghau ira noni taka Ziu ghu, a boka mala hio va doliri ghu kehara ka maneri. 15 Vununa ia sokeri maneri mu fafahakanana, God ne vanadi ia hio va doli malau kamoto iahi peka, e age toraina namanama fuludu laoni ghu hio leghurira God ira noni Ziu. Iahi mu taghe ta ghua nia manei ne va doli leghuri leghuna ia leme ka maneri, e ghua. 16 Ia keha pelona falao ta heni ta mala kudoveha taghe ira fua kenudi neto beana la, ianimu ghu mu ia kamotona falao ta heni e beana haroma; nia hei neto nai nenema vanani la God ira zagharana kaike heke, ianimu ira hobona, e nona molamo manei. Ira noni Ziu mu edi ghua molamo ianimu. Vununa Ebarahamu, Aesake nia Zekopu mu nona noni beana God, ira rekaha ka maneri mu edi nona noni beana haro ghu molamo God. 17 Ira noni Ziu mu taghe kaike heke olivi ia ta numa ghini God e ghua. Nia ira noni Ziu ta deo gedi va hohoghona ghu tuna mu, taghe ira hobodi ta kodaka kaveri God ka heke ianimu edi ghua. Ghau ira taka Ziu ghu mu, taghe ira hobona kaike heke olivi mauke o ghua. God neke numa va kapata ghau lao ghu ka ira malau neke kodaka kaveriro manei ira hobodi. Ianimu lamu ghe no hiori nga ghau ira leghutau neke naiungene ghidiro God ka Ebarahamu nia ia pagusu ka manei e ghua. 18 Oka nganai la ghu ghau ira noni taka Ziu ghu, taghomu mo no tongovona fuludu laorira ira hobodi neke kodaka kaveriro God ta ghuana. Vununa ghau e deo go vanadi doli ghu ira zagharana heke, nga ira zagharana heke mo di vanamu dolina ghau.

19 O age kahe ghua tuna iahi e ghua ghau ira taka Ziu ghu, “Ira hobodi mu dike guto kairi a mala kuruau malau ghu ara,” o ghua. 20 Ianimu e hohoghona mamu. Ghe neke guto kairi nga mu, vununa maneri deo gedi ke va hohoghona ghu, nia ghau go tetu ghu ka ia va hohoghona, e ghua. Oka hadu varanga ghini la ghu, nga o maughemu. 21 ?Neto kodaka kairi la God ira hobo vuhadi meha, heve, manei e deo ge boka riva ghini haro ghu ianimu ka agho?

22 Ghita da finini aiahi taghe heve ne ghua varisutena nia vari va kilasana ka God. Manei e va kilasari heiri ira dike riufuro, nga manei e varisute ka ghau ira ta va ghighiu ma ta au ghu ka ia varisute manei. Nga noto deo la, ghau haro e age kodaka kai ghau. 23 Nia dito nodo la maneri ira Ziu deona gedi va hohoghona ghu, God eke age numa va kapata leghu laori maneri ka ira malau neke kodaka kaveriro manei.

24 Vununa neto ke lao hihingona la God ta hio ghauna ghau noke hobo vuhana mehao ia heke olivi mauke, mala numa va kapata lao ghauna ka ia nona heke taghona, e toraina nanamo laoni ka God mu take hiorira ira hobodi neke kodaka kairiro take numa va kapata laorira ghu ka ia heke olivi dike vuha mehao hobodi iranimu.

Ia Dudumana Ka God Mu E Maladi Ira Noni Haroharo

25 Ghau taremehagu noni kiloau, ara na kabai ghini ghau ta va fafahakina leghutau ta marutana va fafahakana iahi, mala oka va varavaranga ghau la ghu taghomu. Keha noni Ziura dike toraina kaputu ira hihingodi, ghe maneri edi age au ghua ma ianimu e age vuhai dufu ghu ia fafata ta meha haroharo ka taghona God ira noni taka Ziu ghu neke faeteriro manei. 26 Ia kamotona Isiraeli e age hio va doliri ghu ghatu. Taghe ia ta kahei la ka ira Kakangava Ta Maduana,
“Ia Va Doli e la meha ani Zerusalemu;
mala hio kairira ira leghu sasake nga ka ira pagusu Zekopu.
27 Nia iahi mu nogu varivehaina ara taremehadi maneri,
ka ia age kai haza tadi ara ira sasakedi.” ^{▼▼11:27 Aesaea 59:20,21; Aesaea 27:9; Zeremaea 31:33,34}

28 Tehi nonidi Isiraeli mu edi kana ka ia Nonomoho Ta Veha ghatunaina, o veha ghini ghu iahi ghau ira noni taka Ziu ghu. Ne ghua mo ianimu ghe, God ne namaha ghidi ngama maneri, vununa manei neke faeterira mu Ebarahamu, Aesake nia Zekopu e ghua, ira faadi maneri. 29 God e deo ge age holari ghu ia nona ngangana ghidira heiri neke faeteriro. Nia manei e deo ge age hio kai tadi ghu ira leghutau ta veha neke vanadiro, e ghua. 30 Sepao, ghau ira noni taka Ziu ghu noke huhughi God, ghe ghatunaina mu ghau noto hioi ia dudumana ka God, vununa ira noni Ziu dike huhughu. 31 Taghe iala molamo, vununa ka ia dudumana ta hioi ghau, di huhughi ghu God ghatunaina ira noni Ziu, mala maneri molamo edi hioi ghu ia dudumana ka God. 32 Vununa God neto ke va pipiligari ira noni haroharo ka ia huhughu maneri, e mala boka dudumana ghidi ghu manei maneri haroharo.

33 !Ka faa leghaha fuludura ira nona taghotagho God nia ira nona ngangana ta lotoro nia ira nona avoavoho e ghua! !Ka marutana vanadara ghita mala va fafahakarira ira lao nanafa ka manei nia ira puhina manei e ghua! 34 Taghe ia ta kahei la ka ira Kakangava Ta Maduana: “Hei ghu mu ta avohina ia nganganana ia Lod? ?Hei mu ta boka vanani tatanganana manei?” ^{▼▼11:34 Aesaea 40:13} 35 “?Nia hei mo mu neto ke vanani va tehi fuludu laona God, ta mala ke boka lifu leghurira ghu manei?” ^{▼▼11:35 Zobu 41:11} 36 Vununa vahina leghutau nga mu neke va vuhari God nia vahina leghutau nga mu edi au meha ka ia mana manei nia vahina leghutau nga mu e malana manei, e ghua. Vanani God ia varanga, ta au toghunai. Amen.