Rom 12 | KjiSC | STEP | E ghua ghu ghau taremehagu noni kiloau, vununa God ne dudumana ghini ghita nia namaha ghini ghita, a fanga va gigima ghau ghu ara ta vananina God ira dolimu kamoto taghe kaike veala dolina ta beana nia veha vanani God ta ghuana. Iahi lamu ia ghaghahena ta hohoghona mala va totoana ghini manei.

Romans 12

Doli Ka Ia Riva Vanani God

1 E ghua ghu ghau taremehagu noni kiloau, vununa God ne dudumana ghini ghita nia namaha ghini ghita, a fanga va gigima ghau ghu ara ta vananina God ira dolimu kamoto taghe kaike veala dolina ta beana nia veha vanani God ta ghuana. Iahi lamu ia ghaghahena ta hohoghona mala va totoana ghini manei. 2 Oka leghuri ghu ira doli bongihehe ka malau iahi peka, nga o va malumi God ta toraina holara ghauna e mala vanamu foforuna ngangana ghu manei. Ianimu tuna ghe go hio avoavoho nga ghinina ia lao nanafa ka God malamuna ghau- ia ta veha, lotoro nia veha vanani manei.

3 Vununa ka ia nona varisute God ta vanagu kakato manei, a kahei ghu ara ka ghau haroharo: Oka va ngana ghinigho ghu taghou ta veha fuludu laoina ia papala ta toraina aui agho, nga o hohoghou ka ia va fafahakigho taghou, leghuina ia tahuna nou va hohoghona neke vananighono God. 4 Taghe ta ghua la ghita ka ira sopai tinida, ta tehi ira leghu pelona nga ta sopai nodi riva, 5 taghe iala e ghua ghu mu ia tinina Kraes. Ghita ira leghu noni ta va hohoghona nga mu ira leghu pelona nga ia tinina manei. Ghita haroharo mu sopai noda riva, da toraina riva mala vari tokai ghu. 6 Ghita mu da kuru ghita sopai kaikadolo leghuina ia varisute ta vanada kakato. Kaikadolona ka kaike mane neto mala tuturi ghini la ia nonomoho ka God, manei geala e riva ghini, leghuina ia va hohoghona ta kurui manei. 7 Neto mala riva vari tokai la, manei e toraina riva vari tokai. Neto mala vari va kakahei la, manei e toraina vari va kakahei; 8 neto mala va gigimari la ira keha, manei e toraina vari va gigimai; neto mala tufari la ira ta malanga, manei e toraina tufari ka ia varisute ira ta malanga; neto mala babatu la, manei e toraina riva va gigima ka ia babatu; neto mala vari dudumanai la, manei e toraina vari dudumanai taremehana va manemane.

Namaha

9 Ghau o toraina namaha ghidi ira keha ka ia hohoghona. O hakohako ghini heve ia ta muko; o posi va gima ka heve ia ta veha. 10 O vari namahai ghemu taghe tatahina haro ta ghuana, nia o vari va vonavona ka ia va manemane. 11 Oka toali ghu ka kaike fafata tei ghu, nga o kuhana ghini leghuina ia Tarunga ta Maduana mala riva vananina ia Lod.

12 Ghau o va ghazaghaza ka rangerange, o au vanemoho ma ka giliodi ira mamarutana nia o tarai leleghu fafata, e ghua. 13 O tufari ghedi ira noni ka God ta malanga nia o tobeheri ira sugamu ka ira noni mehadi.

14 O va beanari heiri ira ta ngovangovala ghau; o tarai fangai God e va beanari ghu; oka ungene va mukori ghu. 15 Va ghazaghaza taremehadi ira ta va ghazaghaza; muko hihingo taremehadi ira ta muko hihingodi. 16 O au ka ia bule taremehadi ira keha noni haroharo. Oka hadu varanga ghu, nga o lao hihingomu ta au parekete taremehadira ira keha noni gare. Oka va ngana ghini ghau ghu taghomu ta avoavohona.

17 Ghau oka lifu leghu muko ghu ka hei noni neke va riva ghini ghau mukoro. O banabana, o riva ghidi ghu heve ira ta lotoro ka ira hibadi ira leghu noni nga. 18 O riva ghidi vahina ta bokari nga ghau, mala au taremehadira ira noni haroharo ka bule.

19 Ghau taremehagu noni kiloau, oka vari holarai muko ghu, nga o nai vanani ia haala ka God ta riva ghinina ianimu. Vununa ka ira Kakangava Ta Maduana ne kahe ghua iahi,
“Ara ta age va vavahagalarira;
ara ta age lilifu leghuna,” ^{▼▼12:19 Ngengene 32:35} ne ghua ia Lod.

20 Oka riva ghini ghu ianimu, nga riva ghidi taghe ira ta kaheri ka ira Kakangava Ta Maduana mo:
“Neto nona liha la ia kana ka agho, o valihai ghena;
Neto parangoso la manei, o vanani keha leghutau mala ketuhu,
vununa ka ia riva ghini ghau iahi, ghau o toraina age va haghavi manei ghatu.” ^{▼▼12:20 Tatangana 25:21,22} 21 Oka va malumi ghu ia muko ta paufu ghauna, nga o paufi ia muko ka veha.