Rom 13 | KjiSC | STEP | Ira leghu noni nga mu, edi toraina ungene nonomoho ka ira ta kururi mana mala kopu ka ia gaumani, vununa leghu mana mala kopu nga mu, e sipa meha ka God. Heiri ira ta au ka papalana mana mala kopu ianimu ghu mu, God neto ke nai laorina aianimu.

Romans 13

Va Vonavonari Ira Noni Ta Kururi Mana Mala Kopu

1 Ira leghu noni nga mu, edi toraina ungene nonomoho ka ira ta kururi mana mala kopu ka ia gaumani, vununa leghu mana mala kopu nga mu, e sipa meha ka God. Heiri ira ta au ka papalana mana mala kopu ianimu ghu mu, God neto ke nai laorina aianimu. 2 Heiri ira ta taga tetui ia mana mala kopu ka ia gaumani mu, di taga tetui ghu heve neto ke va tetuio God, nia age hioi tuna ia va kilasa ghatu, edi ghua. 3 Heiri ira ta riva va lotoro mu, edika maughedi la ghu ka ira ta auri mana mala kopu, nga ira ta riva va muko mo mu geala ta maughedira. Ghau o riva ghidi ma ghu heve ira ta lotoro, edi age va vonavona ghau ghu maneri. 4 Vununa maneri mu nona noni riva God, edi riva malana ghu ia veha ka ghau. Nga noto riva va muko la ghau, o maughemu, vununa maneri edi kururi ia mana mala va kilasa ghau. Maneri mu nona noniriva God edi kururi ghu ia mana ka manei mala va kilasarira ira noni ta riva va muko. 5 Ianimu la ghe ne fafahaka nga ta mala leghurira ghau ira ta auri mana mala kopu ka ia gaumani—ia ta mala peloho ghini ghau ia va kilasa, nia vununa ianimu lamu lotorona ngangana ta mala riva ghinina ghau, e ghua.

6 Ne ghua mamu ghe no kai takisi haro nga molamo ghau, vununa ira ta auri mana mala kopu ka ia gaumani mu nona noniriva God, edi au kopu ghu ka ia kamotona fafata maneri mala fini kopu ghidira ira noni. 7 Ghau o vanadi ira ta auri mana mala kopu ka ia gaumani heve di fanga ghauna maneri ta mala vanadira: Ghau o kai takisi nia ira keha kakaini ka ia gaumani, nia ghau o heluhelu ghidi nia va vonavonari maneri haroharo.

O Namaha, Vununa Ia Ravata To Namo

8 Ghau o tabarari ira leghu kaoni nga ka ghau, nga kaoni ta mala au ma ta laona ghu mu, ia vari namahai lama, vununa hei ia ta namaha ghidi ira keha noni taremehana mu neto leghui ia vetula. 9 Ira ungene va gigima, “Oka zave kunui ghu kerauau,” “Oka vari atungu ghu,” “Oka sisiko ghu,” “Oka kulukulu ghu,” ^{▼▼13:9 Kave 20:13-15,17; Ngengene 5:17-19; Ngengene 5:21} ira ta ghua, nia heve keha ungene va gigima ta aurani e ghua mu, edi au ma ka kaike ungene va gigima iahi lama: “O namaha ghini ia keha noni taremehau, taghe ta ghua ghinigho nia la taghou,” ^{▼▼13:9 Hiama 19:18} ia ta ghua. 10 Namaha mu e deo muko ta va riva ghinina ia keha noni taremehana. Namaha ghidira ira keha noni mu ne leghui ghu heve ia ta kabai ghini ia kamotona vetula ka God ta mala riva ghinina ghita.

11 Ghau o toraina riva ghini iahi, vununa ghau no avohi mo ia fafata to meha malamuna ghau mala baghununa ka ia epu, vununa ia fafata mala hio va doli ghita to namo laoni ghatunaina fuludu laoina ka ia kusu va hohoghonada ghita. 12 Ia redu to namo ghahe fuludu age; ia ravatana hio va doli to namo dufu aiahi. Ghita da nai hazari ghu ira riva ka ia nagoromo da va vonari ghu ira leghutau mala magara ka ia fegala. 13 Ghita da toraina au va lotoro, taghe ta ghua la ka ia fegalana ravata. Daka holara ghu ka ira mahai varighara leghaha ta muko nia ka ira ketuhu gogosu, nia ka ira leghu kokolodi zave lao meha nga, nia ka ira magara nia kakabai, e ghua. 14 Nga o va poko ghau taghomu ka ia Lod Zisas Kraes, nia oka va malumu ghau ghu taghomughi ta nganarira ira ghaghahedi ta mala veha vanani ira lao hihingo ta sasake ka ia vilahi.