Rom 14 | KjiSC | STEP | Hio namahari ira ta paeke ka ia va hohoghona, nia ghau oka vari tuufuai taremehadi ghu maneri ghidira heve di muko ba lotoro ira ta ghua ghidi maneri ka ira nganganadi.

Romans 14

Oka Vari Kahe Va Muko Ghu

1 Hio namahari ira ta paeke ka ia va hohoghona, nia ghau oka vari tuufuai taremehadi ghu maneri ghidira heve di muko ba lotoro ira ta ghua ghidi maneri ka ira nganganadi. 2 Ia va hohoghona ka kaike noni, e va malumi taghonai ta mahairira vahina leghutau nga, nga ia keha noni ta paeke ia va hohoghona ka manei mu, eka mahairi ghu ira vilahi ta mala veala. 3 Ia noni ta mahairi vahina leghutau nga mu eka puina mato va hinaei ghu hei ia ta deo ge mahairi ghu vahina leghutau nga, nia hei ia taka mahairi ghu vahina leghutau nga mu eka puina makuti ghu ia noni ta mahairi vahina leghutau nga e ghua, vununa God neto ke va kaikei manei taremehadi ira noni ka taghona. 4 ?Hei mu agho ta fateini ia nona noniriva ia keha? Manei mu e kuru nona faghina mo mala va kahe ghinina ne zea ba lotoro manei ta ghuana. Manei mu e age riva ghidi ira leghutau ta lotoro, vununa ia Lod e age toka ghini manei.

5 Kaike noni e nganai kaike ravata e tongovona fuludu laoi ia keha ravata; keha nonina ge nganai ghu ta varifatara leghu ravata nga, e ghua. Ira noni geala edi sopai riva ghidi vona va veha ira nganganadi. 6 Manei ia ta ngana va tongovonai kaike ravata mu, ne riva ghini ka ia va vonavonai ia Lod. Manei ia ta mahairi leghu kokolodi nga mu, ne riva ghini ka ia va vonavonai ia Lod, vununa manei ne kudo vehai God ka ia ghano. Nia manei ia ta pake ghena mahairira ira keha leghutau mu, ne riva ghini ka ia va vonavonai ia Lod ne kudo vehai ghu God. 7 E deo hei ka ghita mu ne doli vananina taghonai kakaike, nia e deo hei ka ghita mu ne leme vananina taghonai kakaike, e ghua. 8 Dato doli la ghita, da doli mala veha vanani ia Lod; nia dato leme la ghita, da leme mala au taremehanana ia Lod. Ghita mu nona ghu ia Lod, geta leme, ba doli ghita. 9 Vununa ka toraina va fafahaka iahi lamu neke lemena nia doli leghuna Kraes, mala meha Lod na ka ira ta leme nia ta doli, e ghua.

10 ?No heve ghu ghe, no fatei nga ghau ia keha tahimu? ?Ba, ne heve ghe, no fini va hinaei nga ghau mu ia keha tahimu? Vununa ghita haroharo mu da age tetu ka kenuna ia nonohe mala varifate ka God. 11 Vununa ira Kakangava Ta Maduana di kahe ghua iahi,
“Taghe ia ta hohoghona la ta dolina ara,” ne ghua ia Lod,
“leghu kunu nga edi age torongaghituturu hinae ka kenugu ara,
nia leghu lalame nga edi age helahela ghini God.” ^{▼▼14:11 Aesaea 45:23}

12 Ghita haroharo mu, da age sopai va fafahaka vanani ghu God ghatu ghidira heve dake riva ghidiro. 13 Ghita geala daka fate ghita la ghu vari taghodai. Nga o riva ghini vona va veha ia nganganau, oka mala riva ghidi la ghu heve ira ta age va sinabereri nia va riufuri ira keha ta va hohoghona.

14 Taghe ka ia parekete taremehana ara ia Lod Zisas, na toraina va hohoghonai ghu ara ta deona ge sota ghu mu taghonai ia ghano. Nga hei noni neto va hohoghonari la ta sotana keha ghanora ghe, ge sota nga ka manei mu ghano iranimu. 15 Neto zea vanani la ia tahiu, vununa ka ghinina heve ia ta mahaini agho, agho mu to deo go au ghu ka ia doliu ta namaha. Oka va mukoi ghu ka ia ghano ta mahaini agho ia tahiu neke leme vananino Kraes. 16 Ia leghutau ne veha ia ta ghua ka nganganau nia agho neto muko la ka ia nganganana ia keha noni ta va hohoghona, agho oka riva ghini ghu. E deo ge veha ghu ta kaheina ira keha noni di muko ira puhidi ira noni kiloau, ta ghuana. 17 Vununa ia Ravutu ka God mu eka ghini ghu ia mahai gheu nia ia ketuhu gheu, nga e ghini ia au ka ia doli ta lotoro, bule nia va ghazaghaza ta meha ka ia Tarunga Ta Maduana. 18 Noto riva vanani la agho Kraes ka ghaghahena doli iahi, God e age veha vanani ka agho nia ira keha noni gedi ungene vehaigho ghu, e ghua. 19 Ghita da va sisiva riva ghidi tudu ghu ira leghutau ta va meha bule nia ta toka mala vari va gigimaina.

20 Oka va mukoi ghu ia riva ka God ka ia ghinina ma ia ghano. Vahina ghano nga mu edi mamalahu, ghe e zea ka ia noni ta mahainina heve leghutau ta ghuana ma, ia ta va sinaberei ia keha noni. 21 E veha fuludu lao taka mahairira ghu ira vilahi ta mala veala, ba taka ketuhu waenina ghu, ba, taka riva ghidira ghu keha leghutaurani neto age va riufi la ia tahiu. 22 Heve leghutau ta ghuana ta va hohoghonaina ghu agho ghidira leghutau irahi mu, o sutei ka vari hoataiu taghoughi nia God, e ghua. Ia noni ta riva ghini heve ia ta avohi manei ne lotoro mo ia ta ghua mu, e deo ge age nganai ghu ta hotoina muko. Manei e hioi ia va beana. 23 Nga neto ngana palupalu ghini la manei ia ghano ta mahaini mu, manei mu to rivai sasake, vununa ia mahai ka manei e deo ge meha ghu ka ia va hohoghona; vahina leghutau nga ta deo ge la meha ghu ka va hohoghona mu, e sasake.