Rom 15 | KjiSC | STEP | Ghita ira ta gigima ka ia va hohoghona mu da toraina ngana hetari ira ta paeke, da hure toka ghidi ghu ka ira ta tahuri maneri. Ghita geala daka va manemane ghita ghu taghodai.

Romans 15

Au Mala Veha Vanadi Ira Keha Noni

1 Ghita ira ta gigima ka ia va hohoghona mu da toraina ngana hetari ira ta paeke, da hure toka ghidi ghu ka ira ta tahuri maneri. Ghita geala daka va manemane ghita ghu taghodai. 2 Nga ghita geala da va manemaneri ira keha taremehada noni ta va hohoghona, malana ia veha ka maneri, toka ghidira ta mala gigimana ka ia Lod. 3 Vununa Kraes na ghe, neke deona geke va manemanei ghu taghonai. Taghe ia ta kahei la ka ira Kakangava Ta Maduana, “Ira va kinakina ka ira ta va kinakinaigho to dufu haro molamo ka ara,” ^{▼▼15:3 Samu 69:9} ia ta ghua. 4 Vahina leghutau neke kangavariro nga ka ira Kakangava Ta Maduana mu, neke kangavari mala va kakahe ghini ghita, mala gada boka la mo kuru ghitana rangerange ka ia au afa nia va gigimarira ira nganganada ta vanada ira Kakangava Ta Maduana.

5 Nai vanani God ia ta va mehai ia au afa nia ia vari va gigima, e toka ghini ghau ghu ta kaike auna ka ia bule leghuina ia nai malaba ka Kraes Zisas, 6 mala ghau haroharo o boka varighara ghu ka kaike ngangana mo, helahela ghinina nia va varangina God ia nona Mama ia noda Lod Zisas Kraes.

7 O vari hio namahai ghemu ghu, taghe neke ghuao la Kraes neke hio namaha ghau no. Noto riva ghini la ghau iahi, ira keha noni edi age va varangi God. 8 Vununa ara a va kahe ghini ghau ghu neke meha kaike manerivana Kraes ka ira noni Ziu, mala va podolina ia hohoghona ka God, va ghuduvurira ira nona naiungene neke vanadiro manei Ebarahamu, Aesake nia Zekopu, e ghua, 9 mala ira noni taka Ziu ghu edi boka age va varangi ghu God malana ia dudumana ka manei, taghe ia ta kahei la ka ira Kakangava Ta Maduana:
“Ara a age helahela ghinigho ghu ka vari hoataidi ira noni taka Ziu ghu;
Ara a age koze helahela ghini ia babaolou,” ^{▼▼15:9 2 Samueli 22:50; Samu 18:49} ia ta ghua.

10 Nia manei ne kaheini iahi,
“Va ghazaghaza taremehadi ira nona noni, ghau ira Noni Taka Ziu ghu,” ^{▼▼15:10 Ngengene 32:43}

11 Nia iahini ne kaheina,
“Helahela ghini ia Lod ghau leghu butubutu noni taka Ziu nga;
nia koze helahela ghini manei ghau leghu butubutu noni nga.” ^{▼▼15:11 Samu 117:1}

12 Nia kehanani, Aesaea ne kahei iahi,
“Kaike pagusuna meha Zese e la meha ghatu,
e age kopuna ghidi ghu manei ira noni taka Ziu ghu.
Maneri edi age rangerange ka manei.” ^{▼▼15:12 Aesaea 11:10}

13 Nai vanani ia God ia ta va rangerange ghau, e va foudu ghau ghu ka leghu va ghazaghaza nga nia bule nga, ka ia fafata va hohoghonai ghau manei, mala go boka la mo go foudu luavura taremehana rangerange ghu ka ia mana ia Tarunga ta Maduana.

Polo Ia Maneriva Ka ira Noni Taka Ziu Ghu

14 Ghau taremehagu noni kiloau, ara taghoguna na va hohoghonaina ta foudui vehana mo taghomughi, hokoto ka avoavoho, nia ta boka va kakahe ghini ghauna mo vari taghomughi, e ghua. 15 Ara nato ke kakangava vanamu ghidi keha va fafahakara deona gake maughegu ghu. Ara nake riva ghini iahi mala ke va ngana ghini ghau leghuna, vununa God neke vanagu riva ta namanama iahi, 16 ta mala kaike nona nonirivana Kraes Zisas vanadira ira noni taka Ziu ghu. Ara mu na riva taghe kaike hiama na ghua, mala tuturi beana ghinina ia Nonomoho Ta Veha ka God, mala ira noni taka Ziu ghu edi boka meha taghe kaike veala ta veha vanani God edi ghua ghu, vununa ia Tarunga ta Maduana ne va maduanarira. 17 Ka ia parekete taremehana Kraes Zisas, na hadu varanga ghini ghu ia nogu riva vanani God. 18 Ara e deo ga kabai turi va varangari ghu keha leghutaura, nga heve neto ke riva ghidiro lama Kraes ka ia va rivau ara ta batu ghidi ghu ira noni taka Ziu ghu mala leghuina God ka ira heve nato ke kaheri nia riva ghidiro ara. 19 Nia ara nake riva ghidi ira hahaima ka ia mana ia Tarunga ta Maduana, e ghua. Ara nato ke tuturi beana ghini va hokoto ghu ia Nonomoho Ta Veha ka Kraes sipana Zerusalemu ta hio kamoto dufu laoina ghu Ilirikamu.

20 Toraina lao hihingona ka ara leleghu fafata mu, ia ta mala tuturi beana ghini ia Nonomoho Ta Veha ka ira malau ta deo nga gedi avohi ghu Kraes, mala aka la riva la ghu ka ira malau dito ke kusu la tataniga ghinio ia kiloau kehara. 21 Nga taghe ta kaheini la ira Kakangava Ta Maduana,
“Heiri dike deoro gedi ke va kahe ghidi ghu ghinina manei, edi age fifini,
nia heiri dito ke deoro nonomohodira mu, edi age va fafahaka.” ^{▼▼15:21 Aesaea 52:15}

22 Vununa ara na rugusi fuludu tuturi beanana ka keha malau irahi, ne va gogohau ghu ta meha sigho ghini ghauna ara.

Ia Vatovato Ka Polo Mala Sigho Ghinina Romu

23 Ghe ghatunaina mu to deo keha malaurani ta mala la rivana ara ka hori irahi, nia vununa ka tehi komuhuni ara nato ke puina hagalai age fini ghau e ghua, 24 na vato ghini ghu ta mala sigho ghini ghau harona ka ia lao ara Sipeni. Ara na rangerange ta kusu age sigho ghini ghauna ghau, ghe ga lao nga Sipeni nia ta mala toka ghinaguna ghau ka ia ghahe lao ara aianimu ka leghuna tato au va ghazaghaza varighara taremehamuo ara kaike birusuna fafata tei.

25 Nga ghatunaina mu, ara na ghahe lao nga aianihi Zerusalemu riva toka ghidira ira nona noni God aianimu. 26 Vununa ka ira ta va hohoghona aianihi Masedonia nia Akaea e ghua, dike veha vanadi ta riva ghidi varigharara keha kakai maladira ira ta kuma ka ira noni ta va hohoghona ani Zerusalemu. 27 Maneri dike puina veha vanadi riva ghinina, vununa maneri mu geala edi mala toka ghidi mamu maneri. Vununa ira noni taka Ziu ghu dito ke hio kakatoi ia Nonomoho Ta Veha ka ira Ziu, maneri geala edi fata mo ghu ta toka ghidira ira Ziu ka nodi kakai iranimu. 28 Nato va hokoti ghu ara riva iahi, ka ia la va dufui ta hioi ghu maneri kakai iahi, ara a meha sigho ghini ghau mo aiamuhu ka ia ghahe vai laogu Sipeni. 29 Ka ia la mehagu ara ka ghau, ara na avohi mo ta la mehana ara taremehana ia kamotona va beana ka Kraes malamuna ghau.

30 Ghau taremehagu noni kiloau, ara na va ohiohi ghau ka ia noda Lod Zisas Kraes nia ka ia namaha ia Tarunga, ta holara tarai va gigima taremehagu laona ka God malaguna ara. 31 Tarai fangai God, e mala age hio va doliau ghu ka ira noni taka va hohoghona ghu aianihi Zudia nia ia riva toka ka ara aianihi Zerusalemu e age veha vanadi ghu ira nona noni God aianimu e ghua. 32 Ianimu tuna ghe ga boka la meha nga ara ka ghau ka ia hihingo ta va ghazaghaza ka ia lao nanafa God, gada age vari va gigimai ghu.

33 Ia God na bule e au taremehamu ghau haroharo. Amen.