Rom 16 | KjiSC | STEP | Ara na kabai ghini ghau ta avohina ia tahida fotati Fibi, kaike noniriva ka ia kiloau ani Kenikerea.

Romans 16

Ira Nona Ungene Veha Polo Vanadi Ira Nona Baere

1 Ara na kabai ghini ghau ta avohina ia tahida fotati Fibi, kaike noniriva ka ia kiloau ani Kenikerea. 2 Ara na fanga ghau ta hio namahina manei ka ia Lod ka kaike ghaghahena ta fatadi ira noni ka God, o toka ghini ghu ka keha leghutau ta kabai ghidi manei ka ghau, vununa manei neke kaike leghahai toka neke meha ghu ka tehi noni nia ka ara haro, e ghua.

3 O vanadi nogu ungene veha idi Pirisila ghe Akuila ira ta riva taremehagu ara vananina Kraes Zisas. 4 Maneri palu dike nairi ira dolidi ka leme doli vanaguna ara. Ara na toraina kudo vehari ghu maneri palu, nia di ghua haro molamo ira leghu kiloau nga ka ira noni taka Ziu ghu, e ghua. 5 O vanadi nogu ungene veha haro molamo ira ta va hohoghona ta varighara mala va totoanana ka sugadi ani maneri palu.

Nia o vanani nogu ungene veha ia nogu mane baere kenuna Epainetosi e ghua, ia neke kusu va hohoghonao ka Kraes ka ia babarana Esia. 6 O vanani nogu ungene veha Mere, neke toraina riva ngazuluaio vanamuna ghau. 7 Vanadi nogu ungene veha idi ka Anidoronikosi ghe Iunia ira palu noni Ziu taghe ara la, dike au taremehaguro ka pipiliga. Ira mane nonomoho dike va vonavonari maneri palu, nia maneri palu mo dike kusu va hohoghonara ka Kraes ghe neke ara nga. 8 O vanani nogu ungene veha Amipiliatosi ia ta namaha ghini ara ka ia Lod. 9 O vanani nogu ungene veha Urubanosi ia ta riva varighara ghita vananina Kraes, nia ka Satakusi ia mane baere ta namaha ghini ara, e ghua.

10 Nogu ungene veha ka Apeleisi ia mane ta va podoli taghonai ta torai va hohoghonana ka Kraes. Nia vanadi nogu ungene veha idi ira noni ta va hohoghona ta au ka ia suga Arisitobulosi, e ghua. 11 Nogu ungene veha ka Herodioni ia mane taremehagu noni Ziu. Nogu ungene veha ka ira noni ta va hohoghona ta au ka ia suga Narakisasi, e ghua. 12 O vanadi nogu ungene veha haro Turufaina ghe Turufosa, ira fotati dike riva ngazuluaio vananina ia Lod. Nogu ungene veha ka Perisisi ia ta namaha ghini ara, ia keha fotati ta torai riva ngazuluai vanani ia Lod. 13 Nogu ungene veha ka Rufusi neke faete kaveio ia Lod ta torai mala nonana taghonai, nia ka nona uke e ghua, taghe kaike tuuna neke ghua ghinagu neke mehao ghu ara.

14 Nogu ungene veha ka Asinikiritasi, Filigoni, Hemesi, Patorobasi, Hemasi nia ira ta va hohoghona ta au taremehadi maneri, e ghua. 15 Nogu ungene veha ka Filologasi ghe Iulia, Neireusi ghe ia kerana fotati, nia Olumupasi nia ira leghu nona noni nga God ta au tarai taremehadi, e ghua. 16 O vari ungene veha ka ia angoho beana. ^{▼▼16:16 “Vari angoho beana” mu taghe nodi ghaghahena vari ungene veha ira noni ka fafata ianimu} Ira leghu kiloau nga ka Kraes, di va ghahe age nodi ungene veha ka ghau.

17 Ghau taremehagu noni kiloau, ara na va ohiohi ghau ta fifini va veha ghauna taghomu ka heiri ira ta rivai fofota, va gogoha ghauna ka ia nomu va hohoghona ka ia huhari ira vari va kakahei noke hioriro ghau. O au va ilolo ka maneri. 18 Vununa kokolodi noni ta ghuara irahi mu, edika riva vanani ghu Kraes ia noda Lod. Maneri mu edi hagala ghidi ma ira nodi lao hihingo taghodighi. Ka ira ngengenedi ta va lemelemei nia lomoso, maneri edi rivai sesebo mala hio va hohoghona ka ira noni ta kalasa ghedi ka muko. 19 Ira leghu noni nga mu dito ke nomoho ghini ta ungene nonomohona ghau ka God, na faa vanagu va ghazaghaza ghu ara ghini ghauna ghau; ghe ara na kabai ghini ghau ta avoavohona, ghinina heve ia ta veha, nia ta kalasana ka heve ia ta muko, e ghua. 20 Ia God na bule e deo ge mamahuge ghu, age va mukoina Satana ka pekadi tabalamu nira ghau. Ara na tarai e age vanamu ghu ia Lod Zisas Kraes ia varisute ta vanada kakato. 21 Timoti ia ta riva taremehagu ara ne va age nona ungene veha ka ghau, nia taghe iala Lukiosi, Zesoni nia Sosipatarosi, ira taremehagu noni Ziu, e ghua. 22 Ara Teretiosi, nake kangava hinaeio leta iahi, na ungene veha ghau ka ia Lod.

23 Gaiosi ne va age nona ungene veha ka ghau. Manei lamu ne hio namahauna ara ka sugana ini nia aiahi haro ta meha taraina ia kamotona kiloau, e ghua. Erasitasi ia mane ta kopunai rongo ka ia malau leghaha nia Kuaratosi ia mane taremehada ta va hohoghona e ghua, di va age nodi ungene veha.

Ia Tarai Va Nonoghana Ka Polo

24 – 25 !Ghita da va varangi ghu God! Manei mu e boka va tetu nadu ghau mo ka ia nomu va hohoghona, leghuina ia Nonomoho ta Veha ta tuturi beana ghini ara ghinina Zisas Kraes nia leghuina ia podolona ia hohoghona ta poika, neke poikao ka ira tehi komuhu dike to fuludu agero sepao. 26 Ghe ghatunaina mu ia hohoghona neto ke va podolo kavei ka ira kakangavadi ira porofeti nia ka ia ungene va gigima ia God ta au toghunai e ghua, mala ira leghu noni nga edi va hohoghona ghu nia leghui ghu manei, e ghua. 27 !Vanani ia kaikena God ta avoavoho, ia varanga toghunai ka Zisas Kraes! Amen.