Rom 3 | KjiSC | STEP | ?Heve ghu mu veha ta auna noto noni Ziu la agho, ba heve mu veha ta auna ka ia papahe va ghilaghila?

Romans 3

God E Hoghona Ma E Au Ghu

1 ?Heve ghu mu veha ta auna noto noni Ziu la agho, ba heve mu veha ta auna ka ia papahe va ghilaghila? 2 Uve, tehi fuludu vehara ka ira leghu ghaghahedi nga. Ta kenuna mu God neke vanadi ira noni Ziu ira nona ngengene.

3 E hohoghona mu dike naiungenena ira noni Ziu mala leghurira ira ngengene ka God, ghe kehara ka maneri deo gedi ke riva ghini ghu ianimu. ?Heve ghu? ?Vununa ne ghua ianimu, heve, God deo ge age riva ghini ghu heve neke naiungene ghinio? 4 !Toraina deo hohoghona! Geta sesebo ghu heiri haroharo ka malau iahi peka ghe, God e hohoghona tudu ma. Taghe ia ta kahei la ka ia Kakangava Ta Maduana ghinina God,
“Maneri edi age kahei ta hohoghodira heve ira ta kaheri agho,
nia agho o age paufuri maneri ka giliona ia koti,” ^{▼▼3:4 Samu 51:4} ia ta ghua.

5 ?Ghe ira muko ka ghita neto va podolo kavei la ta lotorona God, heve tada age kaheina ghita ghatu? ?Ne deo ge totonu ghu God ka ia va mehai ka ghita ia haala ka manei, da ghua ghu? (Iahi mu suna ngangana ma ka noni.) 6 Toraina deo! ?Neto deo la God ge totonu ghu, heve e ghua God ge boka fatei nga malau iahi peka? 7 Ghe haeba kehara edi soni vari tuufuai nga kahe ghuadira iahi, “?Ia taka hohoghogu ghu ara neto va podolo va vehai la ia hohoghona ka God va faa laoinani ia varanga ka manei, ne heve ghe ara mu kaike noni ta kuru sasakegu ne ghua ghinagu nga God?” 8 ?Heve ghu ghe noka kahe ghua nga iahi, “!Aria da riva ghidi ghu keha leghutau ta muko e meha ghu keha veha!” noka ghua nga. Keha nonira na kahei ghai ianimu di ghua ngovala ghaina. Heiri ta kahe ghua irahi mu, e fatadi ta va kilasarira.

E Deo Hei Ta Lotorona

9 ?Heve da ghua ghu tuna tada kahe va nonoghanana ghita? ?Heve, ghita ira noni Ziu mu da veha fuluduri ghu ira keha noni? !Toraina deo kalasu kai! Ara nato kusu va podoli ta au haroharona ira Ziu ghe ira taka Ziu ghu ka pekana ia mana ia sasake. 10 Taghe ia ta kahei la ka ira Kakangava Ta Maduana,
“E deo kaikeu ta lotorona,
geta kaike tei ghu ghe deo ma.
11 E deo kaikeu ta torai avoavoho hohoghonana;
e deo kaikeu ta haduina God.
12 Maneri haroharo dito age fihiki ghahe;
maneri haroharo dito age deo lighorodi.
E deo kaikeu ta rivai vehana,
kaike tei ghu ghe deo ma.” ^{▼▼3:12 Samu 14:1-3; 53:1-3; Ekelesiesiti 7:20}
13 “Ira mangadi mu edi boe taghe toavana beku ta tobehe.
Ira lalamedi edi fouduai sesebo.” ^{▼▼3:13 Samu 5:9}
“Ia lelemeana ka ira adogho ne au ka ira pepeudi.” ^{▼▼3:13 Samu 140:3}
14 “Ira mangadi edi foudui vari tibiri nia haala.” ^{▼▼3:14 Samu 10:7}
15 “Ira ghahedi edi teretere mala vari atunguna.
16 Hae ghe hae ta laona maneri edi nai hinae ngongovala nia vavahagala,
17 nia ia ghaghahena bule, e deo gedi avohi ghu maneri.” ^{▼▼3:17 Asaea 59:7,8}
18 “Maneri e deo ma gedi maughini ghu God.” ^{▼▼3:18 Samu 36:1}

19 Ghita da avohi ghu ghatunaina mu, heve tei ta kaheina ia vetula mu ne kahei manei ka heiri ira ta au ka pekana ia vetula, mala va nodorira ta kaheina maneri deo gedi ke rivai muko ghu taghodi ta ghuana, nia mala va podolina malau kamoto iahi peka ta hotoina muko ka ia nahalina God, e ghua. 20 Ianimu la ghe ne deo nga kaike noni ghu ta age lotorona ka ia nahalina manei ka ia leghui ia vetula; nga ka ia vetula mu da meha avohina ghita dato ke sasakena ghita.

Ka Ia Va Hohoghona Ta Mehana Ia Lotoro

21 Ghe ghatunaina God neto va podolo vanada ia hangana ta mala nai va lotoro ghitana ka ia nahalina manei, ianimu ghu mu eka ghua ghu ka ia ta leghui ia vetula, taghe ia ta turi ghini la ia vetula ka Mosese nia ira Porofeti. 22 Nai va lotoro ghita iahi ka ia nahalina God mu e meha ka ia va hohoghona ghita ka Zisas Kraes. Iahi mu e hohoghona ghu ka heiri haroharo ta va hohoghona, geta hei agho. 23 Vununa ira leghu noni nga dito ke sasake, di hau ghu ka ia puhina God ia ta pelara varanga, 24 ghe God ka ia nona varisute ta va meha kakatoi, ne nai va lotoro ghita haroharo ka ia nahalina taghonai, ka Zisas Kraes ia ta va kalasa ghita ka ira sasakeda. 25 God neke va mehai Zisas taghe kaike veala malanana ia kai hazadi ira sasake ka ia va hohoghonai ia busakana. Manei neke riva ghini iahi mala va podolina ia nona totonuna, vununa ka ia au afa manei, neke deo ghu va kilasarira ira noni ka ira sasakedi sepa dike riva ghidiro maneri. 26 Nia manei neke va mehai Zisas taghe kaike veala mala va podolina ia nona totonuna ka fafata iahi ghatunaina ka ia kahe kavei manei ta lotorona ira ta rivai sasake ka ia nahalina, vununa maneri dike va hohoghona ka Zisas.

27 ?Heve ghu ta boka va varavaranga ghinina ghita? !Deo ma! ?Ne heve nga? ?Vununa heve, da leghui ghita ia vetula? Deo. Nga vununa ghita da va hohoghona. 28 Vununa ta avohina ghita mu ia noni e meha lotoro ka ia nahalina God ka ia va hohoghona, nga eka ghua ghu ka ia leghui ia vetula. 29 ?Heve? ?God mu e God maladi ma ghu ira noni Ziu lama? ?Manei mu eka God haro ghu ka ira noni taka Ziu ghu? Uve, manei mu God haroma ka ira noni taka Ziu ghu, 30 vununa kaike God mo mu ta auna, ia ta age nai va lotorori ira Ziu ka ia va hohoghona nia ka va hohoghona haro ianimu lama, ta nai va lotororira ira noni taka Ziu ghu, e ghua. 31 ?Heve ghu? ?Ghita da nai kaini ghu ia vetula ka va hohoghona iahi? !Toraina deo! Vununa ka ia va hohoghona ghita mu, ghita da toraina va ghuduvi ia vetula.