Romans 4

Ebarahamu Ne Meha Lotoro Ka Ia Va Hohoghona

1?Heve ghu tada age kaheina ghita ira Ziu neke hadu kaveina Ebarahamu ia faada ghita ira Ziu ghinina ia ghaghahena mala au va lotoro ka ia nahalina God? 2Neto ke ghua la ka ira riva neke nai va lotorina Ebarahamu, manei e aui keha leghutau ta mala hadu varanga ghidira, ghe eka ghua ghu ka kenuna God. 3Vununa ira Kakangava Ta Maduana ne kaheina, “Ebarahamu neke va hohoghonai God, neke tahoi ghu God taghe ta lotorona manei,” ne ghua.

4Neto riva la ia mane, ira tabarana mu eka namaha tufana ghu ka manei, nga leghutau neke hio ghini tabara. 5Ghe God mu taghe ianimu eka ghua ghu ta riva ghinina ka ghita ira noni ta sasake. Heve ne va lotoro ghitana ghita ka ira nahalina God mu, eka ghua ghu ira riva ta veha ka ghita, nga vununa ghita da va hohoghona.

6Deveti neke kahe ghua haro molamo iahi turi ghinina ia va beana ka hei ia ta tahoi God mala nai va lotorina, geta deo ghu manei ge riva ghu mala hioina,
7“Ka beana ghedira heiri ira ta kai haza tadi ira huhughu ka maneri,
nia tato tamunu tadiro ira sasakedi.
8Ka beana ghenara ia noni
ta toraina deo ge raghe leghu tana ghu God ira sasakena.” ▼

▼4:8 Samu 32:1,2

9?Va beana ta turi ghini iahi Deveti mu, e maladi ma ira Ziu lama, ba, e maladi haroma ira taka Ziu ghu? Ghita dato ke kahei ma to meha ghu taghe neke lotorona Ebarahamu tahoina God, vununa manei neke va hohoghonai God. 10?Ghe nihao mu God meha nai va lotorina Ebarahamu? ?Leghuna ia papahe va ghilaghila manei, ba, kenuna ia hioi manei ia papahe va ghilaghila? !Eka ghua mo ka ia leghuna papahe va ghilaghila, nga kenuna ia papahe va ghilaghila! 11Nia manei neke hioi ia papahe va ghilaghila taghe kaike zago, mala va podolona ia nai va lotori neke kuruino manei ka ia va hohoghona ka neke deo no nga manei geke papahe va ghilaghila ghu. E ghua ghe, ge meha nodi mama nga manei mu heiri haroharo ta va hohoghona, ghe dike deoro gedi papahe va ghilaghila ghu. Ne nai va lotorori nga mu vununa ka ia nodi va hohoghona. 12Nia manei mu nodi mama molamo ira ta papahe va ghilaghila, ira taka suna papahe va ghilaghila kakato ma ghu, nga dike kururi harono molamo ia kokolona va hohoghona neke kuruio la Ebarahamu, ghe neke papahe va ghilaghilano nga manei.

Ia Naiungene Mu E Hioi Ka Ia Va Hohoghona

13Ia naiungene ka God mala vananina Ebarahamu nia ira pagusu ka manei e ghua malau iahi peka, eka au mo ka ia leghui ia vetula ka God, nga ka ia au va lotoro ka ia nahalina God ia ta meha ka ia va hohoghona. 14Ia naiungene ka God mu neto maladi lama heiri ira ta leghui ia vetula ka God, ia va hohoghona mu e deo fafahakana ma nia ia naiungene ka God ge deo lighorona ghu e ghua, 15vununa vetula mu e va mehai ia va kilasa. Nia hae ta deona ge au ghu ia vetula mu e deo vetula ta huhughina.

16Ianimu la ghe ne meha nga ia naiungene ka ia va hohoghona, mala ka ia varisute ta va meha kakatoi, edi boka torai hioi ghu ira pagusu ka Ebarahamu. Naiungene iahi mu eka maladi ma ghu ira ta leghui ia vetula, nga ka heiri haro ta auri va hohoghona taghe Ebarahamu la, ira ta ghua. Manei mu ia noda mama ghita haroharo. 17Taghe ia ta au la ka ira Kakangava ta Maduana, “Ara nato nakaigho ta mala kaike nodi mamana ira tehi soloso,” ▼

▼4:17 Tatanigaina17:5

ia ta ghua. Manei mu noda mamana ghita ka ia nahalina God, ka ia ta va hohoghonai manei- ia God ta vanadi doli ira ta leme nia neke va vuhariro ira leghutau dike deoro gedi au ghu sepao, e ghua.

18Geta deo mo geke au ghu ia fafahakana ta mala rangerange ghe, Ebarahamu neke va hohoghona nia rangerange, neke meha nodi mama ghu ira tehi soloso taghe neke va kahe ghinio la, “Ira pagusu ka agho edi age tehi taghe ira babaghunu edi ghua ghu,” ▼

▼4:18 Tatanigaina 15:5

ia ta ghua. 19Nia ia va hohoghona ka Ebarahamu e deo geke paeke ghu, geta avohi mo ghu manei neke torai mamanekusuna taghonai mala meha kaike mama na ka neke to namo kaike ghobi komuhunao nia ka neke to au sasahakao Sera, e ghua.

20Ne ghua mo ianimu ghe, manei e deo geke ngana palupalu ghini ghu ia naiungene ka God, nga neke age hio gigima ka ia nona va hohoghona, neke va varangi ghu manei God, 21toraina avoho va vehaina ta kuruina mana God mala riva ghinina heve neke naiungene ghinio. 22Ne ghua mamu iahi ghe ne kahei nga, “God neke tahoi taghe ta lotorona manei,” ne ghua nga.

23Ira ngengene, “neke tahoi taghe ta lotorona manei,” ia ta ghua mu eka kangavi malana mo Ebarahamu kakaike lama, 24nga neke malada haro molamo ghita ta age taho ghita God taghe ta lotorona, dato va hohoghonai la ghita manei ia neke va tetu leghuio ka leme Zisas ia noda Lod. 25Vununa ka ira sasakeda ghita, God neke vanada meha Zisas mala lemena, nia manei neke va tetu doli leghui e ghua, mala nai va lotoro ghitana ka ia nahalina God.