Rom 5 | KjiSC | STEP | Vununa ghatunaina mu God neto nai va lotoro ghita ka ia nahalina taghonai ka ia va hohoghona, da kuru ghita ghu bule taremehana God ka ia noda Lod Zisas Kraes.

Romans 5

Ia Va Hohoghona E Va Meha Va Ghazaghaza

1 Vununa ghatunaina mu God neto nai va lotoro ghita ka ia nahalina taghonai ka ia va hohoghona, da kuru ghita ghu bule taremehana God ka ia noda Lod Zisas Kraes. 2 Vununa ghita da va hohoghonai Zisas Kraes, ne va avoavoho ghita ghu ghinina ia varisute ka God ta va meha kakatoi, ta aui iahi ghita ghatunaina. Nia ghita da va ghazaghaza, vununa ghita da rangerange ta age au taremehanana God ka ia nona pelarana varanga.

3 Eka ghua ghu ma ianimu lama, nga ghita da va ghazaghaza molamo ka ira vavahagala ghita, vununa ghita da avohi ia vavahagala mu e va au nadu ghita e lao ghu; 4 ia tetu va nadu mu e vanada puhi ta lotoro, nia ia puhi ta lotoro ge vanada rangerange ghu, e ghua. 5 Nia rangerange mu eka va haghava ghita ghu, vununa God neto ke ghasolo vanada meha ia nona namaha ka hihingoda idi ka ia Tarunga ta Maduana ia neto ke vanada mehao manei.

6 Ka ia dake deo ghita gigimano nga ghita, neke leme vanada ghu Kraes ghita ira noni dake deono gada leghui ghu God. 7 Eka suri au ghu mu ta age leme vananina kaike noni ta lotoro hei noni. Ghe haeba kehara edi oho’oho mo bana nga ta mala leme vananina kaike noni ta veha. 8 Ghe God neke va podolo vanada ia nona namaha taghonai vanadana ghita ka iahi: Ka ia dake au ghita sasakeo ngama ghita, neke leme vanada ghu Kraes. 9 Vununa ghita toke nai va lotoro ghita ghatunaina ka ia busakana, da toraina avohi ghu ghita ta toraina age hio va doli ghitana manei ka ia haala God. 10 Vununa dato ke hioi ghita ia bule taremehana God ka ia lemena ia Tuuna ka ia fafata dake kanao ka God ghita, da toraina avohi ghu ta age hio va doli ghitana ka ia dolina Kraes ka ia au ka bule ghita taremehana manei! 11 Eka ghua la ghu iahi lama ne ghuana, nga ghita mu da va ghazaghaza molamo ka God ka ia noda Lod Zisas Kraes, ka manei dato ke hioio ghita ia bule taremehana God.

Adamu Ghe Kraes

12 Ka ia sasake neke riva ghinio Adamu, neke au ghu ia sasake ka malau iahi peka, va mehaina ia leme. Ianimu la ghe neke riraha nga ia leme ka ira noni haroharo, vununa leghu noni nga dike rivai sasake. 13 Ia sasake mu toke kusu au ka malau iahi peka, ghe neke vanani nga God ia vetula Mosese. Ghe taghe sasake e deo geke ghua ghu va ngana ghinina, vununa neke deo vetula ta auna. 14 Geta ghua mo ghe, leme mu toke tetu kopu tatanigai ka ia fafata Adamu dufu ghu ka ia fafata Mosese, geta ghua ghu ka heiri dike deoro gedi rivai sasake ghu ka ia deo ge leghui ghu kaike ungene va gigima ghu, taghe neke ghuao la Adamu. Manei mu totoghalena Kraes ia neke mala mehao nga. 15 Ghe ia kaikadolo ka God mu taghe ia sasake ka Adamu eka ghua ghu. Vununa tehi noni iranimu dike lemera ka ia sasakena mane iahi, ghe ia varisute ta va meha kakatoi God nia ia kaikadolo neke mehao ka ia varisute neke va meha kakatoio ia kaike mane Zisas Kraes mu e faa fuludu laoni. 16 Nia ia kaikadolo ka God mu taghe neke la au mehao ka ia sasakena ia kaike mane eka ghua ghu: Ia varifate mu neke leghui kaike sasake, neke va mehai ghu ia va kilasa, nga ia kaikadolo ka God mu neke va mehai ia nai va lotoro noni geta tehi ghu ira sasakedi maneri. 17 Vununa ia mana ka ia leme neto tetu kopu la ka kaike mane ianimu ka ia sasakena ia kaike mane, e faa laoni mu ia varisute ta va meha kakatoi God nia ia nona kaikadolona au va lotoro, vununa heiri haroharo ta hioi ianimu edi age tetu kopu ka doli iahi ka ia kaike mane Zisas Kraes.

18 Leleghonana mu, taghe neke au mehao la ka kaike sasake ia va kilasa maladi leghu noni nga e ghua, e ghua ghu molamo ka ia kaike riva ta lotoro neke riva ghinio Kraes, neke nai va lotorori ghu ka ia nahalina God vanadi dolina ira noni. 19 Vununa taghe ka ia huhughu la ia kaike mane neke va sasakeriro ira tehi noni e ghua, e ghua ghu molamo ka ia ungene nonomoho ia kaike mane, e age nai va lotorori haro ghu tehi noni.

20 Neke va mehai nga ia vetula mu, mala ira leghu noni nga edi boka finini ghu taghe heve dike ghua rivai sasakedira maneri, neke ghua. Ghe taghe ka ia fafata dike suufuro ira noni rivai sasakedira mu, ia varisute ta va meha kakatoi God neke meha faa fuludu laoni. 21 Mala taghe dike ghuao la ira leghu noni nga dike auro ka pekana sasake dike hioio ia leme e ghua, da au ghu ghita ghatunaina ka pekana ia varisute ta va meha kakatoi God, va lotoro ghitana ka kenuna God mala hio mehaina ia doli soduai ka Zisas Kraes ia noda Lod.