Rom 6 | KjiSC | STEP | ?Heve ghu tuna mu ta kaheina ghita? ?Ghita da age rivai sasake ma da age ghu, e mala faa ghu ia varisute ta va meha kakatoi, no ghua?

Romans 6

Doli Ka Ia Parekete varighara Taremehana Kraes

1 ?Heve ghu tuna mu ta kaheina ghita? ?Ghita da age rivai sasake ma da age ghu, e mala faa ghu ia varisute ta va meha kakatoi, no ghua? 2 !Toraina deo hohoghona! Ghita mu dake leme, to ghahe kaini ghu ia sasake, heve ghu ghe gada boka au nga gada lao ghu ghita ka giliona manei? 3 ?E deo go avohi ghu ghau mu, ghita haroharo dake parekete taremehanao Kraes Zisas ka ia seselebeana mu, dake parekete taremehana manei ka ia leme manei, ta ghuana? 4 Ghita mu dake gilu ghini ghita taremehana ghu manei ka ia seselebeana, parekete taremehanana ka leme, mala taghe neke ghuao la Kraes neke va tetu leghuio ka ia leme ka ia varanga ia Mama, da ghua haro ghu ghita auna ka ia foforuna doli.

5 Taghe iahi dato ke ghua la ghita au vari parekete taremehanana ka ia leme manei, ghita da toraina age au parekete taremehana haro molamo ka ia tetuleghu manei. 6 Vununa ghita da avohi neke tupila ghinina ka ia hekefalahata taremehana manei ia a’auda sepa, mala va nodorira ira puhida ta muko, e deo ghu ia sasake age paufu ghita ma ta auna ghu, 7 vununa hei ia neto ke leme taremehanao Kraes mu, neto ke va kalasi ka ia mana ia sasake. 8 Dato ke leme taremehana la ghita Kraes, ghita da va hohoghonai ta age au taremehana harona molamo ghita manei ghatu. 9 Ghita da avohi, vununa Kraes neke to va tetu leghui ka ia leme, e deo ghu manei boka ke leme leghunani; ia leme e deoi mana mala paufina manei. 10 Ka ia lemena manei, kaike fafata mo neke lemena manei mala paufina ia mana ka ia sasake; nga ia doli ta aui manei mu, manei ne au malana ia varanga ka God. 11 Taghe iala o ghua ghu taho ghauna taghomu ta lemena ka ia mana ia sasake, ghe boka au malana mo ia varanga ka God ka Zisas Kraes. 12 Oka va malumi la ghu ia sasake ta paufurira tinimu nira, ta leghurira ghu ghau ira lao hihingo ta muko ka manei.

13 Oka va malumu vanani lao ghu ia sasake ira leghu pelona nga tiniu nia, taghe leghutau nona ia muko taghua ghidira, nga o naigho taghou malana God, taghe ira dike va tetu leghuriro ka leme, laona ka ia doli; nia o nai vanani lao manei ira keha pelona tiniu nia, taghe leghutau nona ia lotoro ta ghua ghidira. 14 Vununa sasake mu e deo ge age nou faghina ghu agho vununa agho e deo go au ghu ka pekana vetula, nga ka pekana ia varisute ta va meha kakatoi.

Ira Nona Mala Varituhu Ia Lotoro

15 ?Heve ghu tuna? ?Ghita da age rivai sasake ghu, vununa ta deo ini gada au ghu ka pekana vetula tada au ini ghu ka pekana ia varisute ta va meha kakatoi? !E toraina deo hohoghona! 16 ?E deo go avohi ghu ghau mu, ka ia ta nai ghau lao taghomu ka kehara mala nomohori taghe noni mala varituhu ta ghuana, ghau mu noni mala varituhu vanani hei ia ta nomohi ghau ta ghuana—geta noni mala varituhu vananina ghu ia sasake ia ta ghuduvu ka leme, ba vanani ghu ia ungene nonomoho ia ta ghuduvu ka lotoro? 17 !Ghe kudo vehai God! Geta fani noni mala varituhu mo ghau ka sasake ghe, ghatunaina mu ghau noto ke toraina leghui ka hihingomu nira ia ghaghahena vari va kakahei nake vanamuo ghai. 18 Ghau mu to va kalasa ghau ka sasake noto meha noni mala varituhu ghu ka ia lotoro.

19 Ara na ngengene ka ia turi noni mala va fafahakana, vununa ghau mu noni ma, no paeke ghu. Taghe noke fani ghuao la va malumurira ira keha pelona tiniu nia, mala varituhuna ka ia sota nia ka ia muko ta fuludu lao, o ghua ghu, o nai vanani lao ghu ghatunaina mala varituhuna ka ia lotoro maladira ira riva ta maduana. 20 Ka ia noke noni mala varituhu vananio ghau ia sasake, eka ghua ghu ia lotoro neke auleghu ghini ghauna. 21 ?Heve mu veha noke hioina ghau ka fafata ianimu ka ira leghutau ta haghava ghidi ghemu ghatunaina? Leghutau iranimu dike sabara ka leme. 22 Ghe ghatunaina manei neto va kalasa ghau ka sasake, noto ke meha noni mala varituhu vanani ghu God, nia ia veha ta hioi ghau mu ia ta va maduana ghau, leleghonana ghu mu, doli soduai. 23 Vununa ia tabarana sasake mu leme, nga ia kaikadolo ka God mu, doli soduai ka Zisas Kraes ia noda Lod.