Rom 7 | KjiSC | STEP | ?Ghau tahiguro—ghau ira noni ta avohi ia vetula—e deo go avohi ghu ghau mu ia vetula e kurui mana ka fatena kaike noni ka ia fafata dolina lama manei, ta ghuana?

Romans 7

Ghita Mu Kalasa Ka Ia Vetula

1 ?Ghau tahiguro—ghau ira noni ta avohi ia vetula—e deo go avohi ghu ghau mu ia vetula e kurui mana ka fatena kaike noni ka ia fafata dolina lama manei, ta ghuana? 2 Taghe ka ia varihio la. Ia fotati neto varihio la, ia vetula e parekete va gimai manei ka ia keranau ka ia dolina manei. Nga neto leme la ia keranau mu, ia fotati eto age kalasa ka ia vetulana varihio. 3 Taghe neto varihio la ghu fotati ini ka keha manena mo, ka ia fafata ta doli nga ia keranau, manei mu ne zave kunui ia kusu keranau. Nga neto leme la ia keranau mu, fotati iahi to kalasa ghena ka vetula ianimu, e deo ghu ge zave kunui ghu keranau neto varihio la manei ka keha manena.

4 E ghua ghu ghau tahighuro, ghatunaina ghau to deo go au ghu ka pekana ia vetula, vununa ghau no parekete taremehana Kraes ka leme, o mala boka nona ghu manei neke va tetu leghuio ka ia leme, mala boka fua vanani riva ta vehana ghita God. 5 Vununa ka ia dake leghuriro nga ghita ira puhida noni ta sasake, ia vetula neke va gigimari ira lao hihingo ta muko ka giliodi tinida idi ghita, mala fuai riva ta mukona, neke ghuduvuo ka leme. 6 Ghe ghatunaina mu ghita dato kalasa ka ia vetula, vununa ghita deo gada au ghu ka pekana ia vetula neke piliga va gima ghitao. Ghatunaina mu ghita da boka riva vanani ghu God ka ia nona ghaghahena ta foforu ia Tarunga Ta Maduana, nga eka ghua ghu ka ia ghaghahena vetula sepa Mosese ia ta kangavi.

Ia Vetula Ka God Ne Va Podolo kaveri Ira Sasake Ka Ghita

7 ?Heve ghu tuna, tada kaheina ghita? Vetula ianimu ne sasake, da ghua? !Toraina deo hohoghona! Toraina hohoghonana mu, ia vetula mo neke va podolo vanaguna sasakegu idi. Ara e deo hae ta boka avohina kulukulu ini mu e muko ta ghuana, geke deo la ge kahei ghu ia vetula, “Oka kulukulu ghu” ^{▼▼7:7 Kave 20:17; Ngengene 5:21} ta ghuana. 8 !Ghe ia sasake ne hioi ungene va gigima iahi mala va ghusu vonarira leghu kokolodi lao hihingo ghinina nga ia kulukulu ka giliogu ara! Geke deo la aunana ia vetula, ia sasake mu e kaike leghutau lemena ma.

9 Sepaoni, ara nake au ma deona gake va fafahaki ghu ia vetula. Ara e deo gake haghava ghegu ghu riva ghidira ira leghutau ta muko. Nga ka ia meha avohigu ara ia ungene va gigima taka mala riva ghidira ghu ara keha leghutaura mu, ia sasake neke doli meha, neke hio laoau ghu ka ia leme ta deo va nonoghana. 10 Nake hadu kaveina ara mu, ira toraina ungene va gigima ka God neke mala va podolo vanaguo ia hangana ta lao ka ia doli soduai lamu, neke va podolo vanaguna ta leghuina ara ia hangana ta lao ka ia leme ta deo va nonoghana. 11 Vununa ia sasake neke finini ka ia ungene va gigima ia ghaghahena ta mala seke ghinagu ara, ne batu ghinagu lao ghu ka ia leme. 12 Ia vetula mu e maduana, nia ia ungene va gigima mu e maduana, lotoro nia veha, e ghua. 13 ?Heve, ia vetula ta veha neke va meha vanagu leme ara? !E toraina deo hohoghona! Ia sasake mo neke atunguauna ara ka ia mala riva ia ungene va gigima ta veha. Ghatunaina ghita da boka finini ghu ta toraina muko fuluduna ia sasake.

14 Ghita da avohi ia vetula mu neke sipa meha ka ia Tarunga ta Maduana, nga na rivai sasake nga ara mu, vununa ara mu noni ma. Ara mu taghe ta riva vanani ia sasake a ghua ghu, taghe ta ghua la kaike noni mala varituhu ia ta riva vanani ia nona manefaa. 15 Ara e deo ga va fafahakari ghu riva idi ka taghogughi. Vununa ara e deo ga riva ghini ghu heve ia ta kabai ghini ara, nga ia toraina leghutau ta hakohako ghini ghegu mo na riva ghinina ara. 16 Ara nato riva ghini la ghu heve ia ta toraina avohi ara ne zea ia ta ghua, iahi mu ne va podoli ne veha mo ia vetula ta ghuana ara. 17 Eka torai ara la ghu mu na riva ghinina leghutau iahi; nga ia sasake ta au iahi ka gilioguna ara mo.

18 Ara na avohi ghu ta deona kaike veha ghu ta auna ka giliogu ara, ianimu ghu mu ka ira puhigu noni ta sasake ara. Vununa ia lao hihingo ta mala riva ghinina heve ia ta veha ne au mo ka ara, nga ia gigima ta mala la riva ghini mu ne deona. 19 Vununa ara e deo ga riva ghini ghu ia veha ta kabai ghini ara, nga ia muko ta pake ghini ghegu ara mo mu na riva ghini ma na auna ghu ara. 20 Nato riva ghini la ghu ara heve ia ta deo ga kabai riva ghini ghu, eka ghua la ghu ara na riva ghinina, nga sasake ta au ini ka giliogu ara mo.

21 Iahi mu heve na riva ghini tuduna ara. Nato kabai toraina riva ghini la ara heve ia ta veha, ara a riva ghidi ira leghutau ta muko mo. 22 Ara na va manemane ghini ia vetula ka God ka hihingogu kamoto ini. 23 Ghe ara na finini keha vetulanani ta rivana ka giliogu ara; ia vetula ta taga tetui ia vetula ta veha ta au ka nganganagu ini, ianimu ne va kaike noni pipiligauna ka pekana ia vetulana sasake ta riva ka giliogu ini ara. 24 !Ka noni muko hihingogura ara! ?Hei mu ta age hio va doliauna ara ka tini iahi, ta hio lao au ini ka leme? 25 !Ara na kudo vehai God ia ta riva ghini iahi ka ia noda Lod Zisas Kraes! Ka nganganagu ini ara na toraina kabai leghui ghu ia vetula ka God, ghe vununa ka ira puhigu ta sasake, ara mu kaike noni mala varituhu ghu ka pekana ia vetulana sasake.