Romans 8

Doli Giliona Ia Tarunga

1Ianimu la ghe ge deo nga age faterina nia va kilasarira God ira noni ta nona Kraes Zisas, 2vununa ia mana ka ia Tarunga ta Maduana ia ta va meha vanada doli ka ia au parekete taremehana Zisas Kraes neto va kalasau ka ia mana ia sasake ia ta sabara ka leme. 3Ia vetula ka ira Ziu neke deo ge boka hio va doli ghita ghu, vununa ka ira puhida ghita noni ta sasake. God neke hio va doli ghita ghu ka ia tuhu mehai ia Tuuna taghonai ka ia tini ta varifata ka tinida ta sasake idi ghita, malana kaike veala maladira ira sasakedi ira noni, neke hio kave ghita ghu manei ka ia mana ia sasake ka ghaghahena ianimu. 4God neke riva ghini iahi da mala kuru ghita ghu ghita ia ghaghahena doli ta lotoro ta kahe va gigimari ka ia vetula, ta deona ghu ghita leghurira ira lao hihingo ka ia vilahi, nga ghita da au leghuri ira lao hihingo ka ia Tarunga ta Maduana mo.

5Heiri ira ta au leghuri ira puhi noni ta sasake mu edi ngana laori tudu ira leghutau ta kabai ghidi ia vilahi, nga heiri ira ta au leghui ia Tarunga ta Maduana mu, edi ngana laori tudu ira leghutau ta veha vanani ia Tarunga ta Maduana. 6Neto auleghu ghini la nganganau nia ia puhiu noni ta sasake, e au ia leme. Nga neto auleghu ghini la nganganau nia ia Tarunga Ta Maduana, e au ia doli nia bule. 7Ia nganganana noni ta sasake mu, e taga tetui God. Manei mu eka leghui ghu ia vetula ka God, nia toraina deo hohoghona ge boka leghui ghu, e ghua. 8Heiri ira ta leleghu ka ira puhi noni ta sasake mu, maneri e deo gedi boka va manemanei ghu God.

9Ghau mu e deo ge auleghu ghini ghau ghu ia puhi ta sasake, nga ia Tarunga ta Maduana ne auleghu ghini ghauna neto au la ia Tarunga ka God ka giliomu ghau. Nia hei neto deo la ge kurui ghu ia Tarunga ka Kraes, manei mu eka nona ghu Kraes. 10Ghe neto au la Kraes ka giliomu ghau, geta age leme ghu tinimu nira vununa ka sasake ghe, ia Tarunga e vanamu doli mo, vununa God neto ke nai va lotoro ghau ka ia nahalina taghonai. 11Nia neto au la ka giliomu ghau ia Tarunga ka God neke va tetu leghuio Zisas ka ia leme, manei neke va tetu leghuio Kraes ka ia leme e age va tetu leghuri molamo tinimu ta boka nogha nira. Manei e riva ghini iahi ka ia mana ia Tarunga ta Maduana ia ta au ka giliomu ghau.

12Ghau taremehagu noni kiloau, ghita mu e kuru ghita keha leghutau ta toraina mala riva ghidi ghita, ghe iahi mu eka mala leghui ghu ia puhina noni ta sasake. 13Vununa noto au la ka ira puhi ta sasake, ghau o age leme. Nga noto va lemeri la ghau ira riva ta sasake ka ia mana ia Tarunga Ta Maduana mu, ghau o age doli ghemu, 14vununa heiri ira ta babatu ghidi ia Tarunga ka God mu, edi tuuna God.

15Vununa ghau e deo goke hioi ghu kaike tarunga taghe kaike noni mala varituhu ta mamaghu ia ta ghua ghini ghau, nga noke hioi ia Tarunga ta Maduana no meha nona rekaha ghu ghau God, ka ia ta kudo ghua age iahi ghita ka manei, “!Mama, nogu Mama!” ta ghuana. 16Taghonai ia Tarunga ta Maduana ne parekete taremehana ia tarunga ka ghita ne turi ghini kave ghu ta nona rekahana God mu ghita. 17Nia vununa ghita mu da nona rekaha manei, da age taghori ghu ghita mu ira veha ta suteri manei maladira ira nona noni, nia ghita da age tagho taremehana haro molamo Kraes heve neto ke nai vananina manei God, e ghua; vununa dato holara va vavahagala taremehana la ghita Kraes, ghita da age holara taremehana molamo manei ka ia nona pelarana varanga.

Ia Varanga Keha Nareo

18Ara na ngana laori vavahagala irahi ka ghita ghatunaina ta deona ge fata ghu va fata ghini taremehana laona ia pelarana varanga ia ta age va podolo vanada ghatu. 19Ia kamotona ta va vuhari di afa taremehana kuhana ghini va podolorira God ira toraina nona rekaha. 20Vununa ira leghu neke va vuhariro nga God, manei neke lao nanafa ghini mala meha deo fafahakadira, ghe dike faeti ta mala ghuana ianimu taghodighi, eka ghua mo. Nga God neke lao nanafa ghini ta mala ghuana ianimu 21mala va kalasarira ka boe nia leme ira vahina leghutau neke va vuhariro nga. God neke riva ghini iahi mala ira leghutau neke va vuhariro edi kalasa ghu taghe ta ghua la ira nona rekaha ta kalasa. 22Ghita da avohi mo vahidi leghutau neke va vuhariro nga, dito ke vavahagala taremehana kirikarata ma dike mehana ghu, taghe ira kirikaratana va doli rekaha ta ghua ma ta dufuna ghu ghatunaina. 23Eka ghua ghu ma ira vahina ta va vuhari nga mu di vavahagalara, nga ghita dato ke hioio ia Tarunga ta Maduana taghe kaike va kenuna kaikadolo ka God mu, da vavahagalana ka giliodaidi ka ia kuhanai afa ghini God mala meha toraina va nona rekaha ghitana taghonai nia taremehadi ira foforudi tinida neke naiungene vanadao manei, e ghua. 24Vununa God neke hio va doli ghita, da rangerangeri ghu ira leghutau ta veha neke naiungene ghidi vanadao manei. Dato ke kusu hiori la ghita heve ira ta rangerange ageri ghita, e deo fafahakana ta rangerange laori ta auna ghu ghita. Vununa e deo hei mu ta age rangerange ghinina heve neto ke kusu hioina manei. 25Nga dato rangerangei la ghita heve ia ta deo nga ge kuru ghita ghu mu, ghita da au afa ghini ma da au ghu.

26Taghe iala e ghua ia Tarunga ta Maduana toka ghini ghitana, vununa ghita da paeke. Ghita deo gada avohi ghu heve ta mala tarai ghinina ghita, ghe taghonai ia Tarunga ta Maduana e tarai fanga vanadana ka God ka ira ngengene ta deo gada boka va fafahakari ghu ghita. 27Nia God ia ta hadu sukuri hihingoda idi ghita, e avohi ia nganganana ia Tarunga ta Maduana, vununa ia Tarunga ta Maduana e tarai, leghuina ia lao nanafa ka God maladira ira ta va hohoghona. 28Nia ghita da avohi ka ira vahina leghutau ta dufu ghita nga mu, God e riva malana ia veha ka heiri ira ta namaha ghini manei neke faeteriro, vununa ianimu lamu neke leghuina ia nona lao nanafa. 29Ka heiri neke kusu avohoriro God ka ia tatanigaina, manei neke faete nenemari molamo ta mala meha taghe ia Tuuna ta ghuana maneri, mala ia Tuuna e mala meha doli kenuna ghu ka ira leghu tatahina nga ka giliona kaike butubutu. 30Nia heiri neke kusu faete nenemariro, manei neke kudori; heiri neke kudoriro, manei neke nai va lotorori taremehana taghonai neke tufa ghini ghu ka maneri ia nona varanga.

E deo Ta Boka Fota Ghitana Ka Ia Nona Namaha God

31?Heve ghu tuna ta age kaheina ghita mu ghidira leghutau ta veha irahi? ?Neto malada la ghita God, hei ghu mu ta boka tetu kaputu ghitana ghita? 32Manei neke deo ghe ge posi leghui ghu ia Tuuna, nga neke va malumi ta mala veala vanadana ghita. Neto ke riva ghini la ianimu manei, da avohi ghu ghita ta age vanadana manei ghatu vahina leghutau ta veha nga.

33?Hei mu ta boka makutu ghitana ghita neto ke faete ghitano God ta mala nona nonina taghonai? Deo hei, vununa taghonai God lamu neto nai va lotoro ghitana. 34?Hei ghu mu ta age makutu ghita ta va kilasa ghitana ghu? E deo hei, vununa Zisas Kraes neke leme vanada ghita neke va tetu doli leghui ghu maladana ghita, ne nohe ghu ka ia malau va vonavona ka ia kame mautuna God tarai fanga mala toka ghini ghitana.

35?Heve ghu mu ta age fota ghitana ghita ka ia namaha Kraes? ?E boka mo ia mamarutana riva ghinina, ba ia lemedodoli, ba ia vari ngovangovala, ba ia lemei mahai, ba ia kuma, ba ia lelemeana, ba ia leme? 36Taghe ta kahei iahi la ka ira Kakangava Ta Maduanana,
“Vununa ghinigho agho na talai ghu ghai ia leme leleghu ravata;
taghe ira sipisipi ta mala atunguri ta ghua ghini ghaina.” ▼

▼8:36 Samu 44:22

37Deo, geta dufu ghita ghu leghu ta muko irahi nga ghe, ghita da age paufuri mo, vununa Kraes e age toka ghini ghita, vununa manei ne namaha ghini ghita.

38Vununa ara na toraina va hohoghonai ta deona ia leme nia ia doli, ta deona ira engizeli nia ira nazahi, ta deona ghatunaina nia keha nareo, ba ira keha mana, 39ta deona ia kolanga fate nia malau iahi peka—e deo heve ka ira leghu ta va vuhari nga ta boka fota ghitana ka ia namaha God ia ta va podoli ka Zisas Kraes ia noda Lod.