Rom 9 | KjiSC | STEP | Ara mu nona Kraes, na kahei ghu ara ia hohoghona—ara e deo ga sesebo ghu; ia Tarunga ta Maduana ne kopu ghinina nganganagu ini ara, ne va kahe ghinagu ghu ta deona ara ga sesebo ghu.

Romans 9

God Ne Faeteri Ira Nonidi Isiraeli

1 Ara mu nona Kraes, na kahei ghu ara ia hohoghona—ara e deo ga sesebo ghu; ia Tarunga ta Maduana ne kopu ghinina nganganagu ini ara, ne va kahe ghinagu ghu ta deona ara ga sesebo ghu. 2 Ne au leghahaina muko hihingo nia vavahagala ta deo ge boka nogha ghu ka hihingogu ini ara. 3 Vununa ara a boka lao hihingogu mo geke va vavahagalau la God mala fotauna ka Kraes, neto boka hio va doliri la ianimu ira nogu nonidi Isiraeli taghogu. 4 Manei neke faeteri ta mala nona rekahana, neke va podolo vanadi ghu ia nona varanga; manei neke riva ghidi ira nona varivehai taremehadi maneri neke vanadi ghu ia vetula; manei neke vanadi ia ghaghahena va totoana ta lotoro; manei neke vanadi haro ira nona naiungene. 5 !Ira faadi maneri mu, Ebarahamu, Aesake nia Zekopu e ghua. Ka maneri lamu ta sukutu vai leghu laona mu ia meha doli noni ka Kraes ia God ka fatedi vahina leghutau nga, ia ta fata mala helahela ghini fuludaina! Amen.

6 Ia naiungene ka God vanadi ira noni Isiraeli mu ne deo ge ghuduvu ghu, e deo ge ghua ghu. Vununa eka ghua ghu ira noni haroharo Isiraeli mu ta nona nonira God! 7 Vununa maneri mu dike pagusu meha ka Ebarahamu, dike toraina rekaha ghu mamu ka Ebarahamu maneri, e deo ge ghua ghu. Vununa ne kahe ghua iahi ka ira Kakangava Ta Maduana, “Ka Aesake ia tuu lamu ta la au mehana ghatu mu ia pagusu ka agho nake naiungene ghinio ara ka agho,” ^{▼▼9:7 Tatanigaina 21:12} ne ghua. 8 Fafahakanana ghu iahi mu, taghe eka ghua ghu ira rekaha ta doli meha leghuina ia lotorona doli meha ka noni mu ta rekahara ka God, nga ira rekaha dike doli meharo ka ia naiungene God mo mu, rekaha ka Ebarahamu ta ghua ghidira. 9 Vununa neke kahe ghua iahi ka ia naiungene: “Ka ia fafatana neke kaheio ka ia take la leghu mehao ara ghatu, Sera e age kurui kaike tuunamane,” ^{▼▼9:9 Tatanigaina 18:10,14} neke ghua.

10 Tuuna mane iahi ghu manei mu ia faada ghita Aesake. Ka ia faa vonana ta varihio ghu ka Rebeka, Rebeka neke sua ghidi palu rekaha. 11 – 12 Ghe dike doli nga, ba, dike rivai leghutau ta veha, ba muko nga maneri palu, Rebeka neke hioi kaike nonomoho ka God. (Nonomoho iahi ne va podoli God ta fafaete leghurira ira nona ngangana taghona, eka leleghu ghu ka ira riva ta veha ba muko.) God neke kahei ghu iahi ka Rebeka, “Ia rekaha mane ta kusu doli ka agho e age riva vanani ia rekaha mane ka agho ta doli leghuna manei,” ^{▼▼9:11-12 Tatanigaina 25:23} neke ghua. 13 Taghe neke kaheio la ka ira Kakangava Ta Maduana, “Ara nake namaha ghini Zekopu, nga nake sokei Iso,” ^{▼▼9:13 Malakae1:2,3} ia ta ghua.

14 ?Heve ghu ta boka kaheina ghita? ?God ne deo ge totonu ghu? !Toraina deo! 15 Vununa God neke kahe ghua iahi ka Mosese,
“Ara a vanani dudumana hei ia ta faeti ara mala vananina ia dudumana, ^{▼▼9:15 Kave 33:19}
nia ara a toka ghini hei ia ta faeti ara mala toka ghinina, e ghua,” neke ghua.

16 Eka va dedeke la ghu ka ia lao hihingo nia gigima ia noni mu ia fafaete ka God, nga e leleghu ka ia nona dudumana God.

17 Vununa ka ira Kakangava Ta Maduana, God neke kahe ghua iahi ka ia mane ginitaukelana Izipi, “Ara nake faetigho agho ta mala ginitaukelana, mala toraina va podolina ia nogu mana ka ia ghaghahena magarigho ara, nia mala turi ghini kavena ia nogu varanga ka malau kamoto iahi peka,” ^{▼▼9:17 Kave 9:16} neke ghua. 18 God mu e dudumana ghidi heiri ira ta kabai dudumana ghidi manei, nia e va kaputuri ira keha noni, ta kabai va kaputuri manei, e ghua.

19 Kaikeu ka ghau o kahe ghua bana iahi, “?Ne heve ghu God ghe, ne soni hadu zea nga ka ghita? Vununa e deo hei ta boka tetu kaputina ia lao nanafa ka manei” 20 ?Nga hei mu agho ia ta suna noni ma, ta vari tuufuai taremehanana God? Ia leghutau neke riva ghinio, e deo ge boka notoho ghua ghu iahi ka ia noni neke riva ghinio leghutau ianimu, “?Neke heve ghe, noke riva ghua ghinagu nga iahi agho?” ^{▼▼9:20 Aesaea 29:16; 45:9} ta ghuana. 21 ?Heve, ia noni ta rivai raro mu, e deoi mana mala riva ghini harona ka kipena kava palaki haro ianimu lama kaike zagi mala va sari, nia kehana mala kai lao penu, ta ghuana? 22 Taghe iala molamo, geta kurui ghu God ia mana mala va podolina ia haala nia mana ka manei ghe, manei ne au vanemoho ma ne au ghu ka heiri ira ta hoto lao haala ani ka manei, ira ta fata mala va mukorira manei. 23 Manei ne riva ghini iahi mala va pelara fegala laoinani ia taghotaghona nona varanga ka heiri ta va podolo vanadi manei ia dudumana; ira neke kusu va tanario taghonai mala hioina ia nona pelarana varanga. 24 Ghita mu da au haro ghu ka giliodi ira noni neke faeteriro manei ka ira Ziu nia ka ira taka Ziu ghu, e ghua. 25 Taghe neke kaheio la God ka ia buka Hosea:
“Ara a age va kudo ghidi nogu noni ira noni dike deoro gedi nogu noni ghu sepao,
Ira noni nake deoro ga namaha ghidi ghu, na namaha ghidi ake ghua ghidi ara.” ^{▼▼9:25 Hosea 2:23}

26 Nia
“Ka ia toraina malau ka neke va kahe ghidiro God,
‘Ghau mu eka nogu noni ghu ara,’ neke ghua ghidiro,
aianimu, ta age va kudo ghidi,
‘ira nona rekaha God ia ta doli,’ ^{▼▼9:26 Hosea 1:10} ta age ghua ghidira.”

27 Nia Aesaea ia porofeti neke kahe ghua iahi ghinina Isiraeli,
“Geta tehi taghe garangana ia tapuruna tahi geta ghua ghu ira noni Isiraeli ghe,
keha teriu ma ta age hio va dolirira ghatu.
28 Vununa ia Lod e magali ma e age riva ghini va hokoto ghu
ia nona varifate ka malau iahi peka.” ^{▼▼9:28 Aesaea 10:22, 23}

29 Taghe neke kaheio la Aesaea sepao:
“Geke to deo la ia Lod ta torai mana
geke va malumu vanada meha ghu keha rekaharani, ghita geala dato meha taghe Sodomu,
nia ghita geala dato meha taghe Gomora.” ^{▼▼9:29 Aesaea 1:9}

Ia Deo Va Hohoghona Ka Ira Noni Isiraeli

30 ?Heve ghu mu tada age kaheina ghita? Ira noni taka Ziu ghu geta dike deo mo gedi hadui ghu God ghe, God neke age nai va lotorori mo maneri ka ia nahalina taghonai ka ia va hohoghonai Kraes. 31 Nga ira noni Ziu dike toraina rigetero va sisiva au va lotoro taremehanana God ka ia sutei ia vetula mu, dike toraina deo kalasu kai gedi ghorevura ghu. 32 ?Neke heve ghe neke deo nga? Vununa maneri dike va sisiva nai va lotorori taghodi ka ia nahalina God ka ia sutei ia vetula mo, nga eka ghua ghu ka ia va hohoghonai God. Maneri dike tutu ghidi ka kaike leghahaina ghahipa ka ia hangana mala ghaghahe maneri. 33 God neke va kahe ghidi ka ira Kakangava Ta Maduana ta balauna, neke kahe ghua ghu iahi,
“Fini, ara na nakaini kaike ghahipa ani Zerusalemu ia ta va sinabereri ira noni,
nia kaike ghahipa ta va riufuri maneri,
nia hei ia ta va hohoghonai manei mu e deo kalasu kai ge age va haghavi ghu ghatu.” ^{▼▼9:33 Aesaea 8:14; 28:16}