Tit 1 | KjiSC | STEP | Leta iahi mu sipana ka ara Polo, ia nona mane varituhu God nia ia nona mane nonomoho Zisas Kraes. Ara mu neke tuhu mehau God ta mala toka ghidira ira noni neke faeterio manei mala nona nonina taghonai. Manei neke tuhu mehau ghu mala toka ghidira ka ia nodi va hohoghona, nia mala va kakahe ghidira ia ghaghahena ta mala avohi maneri ia hohoghona, ta mala va podolo vanadina ghu heve e ghua mu auna ka maneri ka ia ghaghahena ta veha vanani God.

Titus 1

Va Kenuna Pagahaina: Faeteri ira noni babatu malana ia kiloau 1:1-16

Va Kenuna Tuturi

1 Leta iahi mu sipana ka ara Polo, ia nona mane varituhu God nia ia nona mane nonomoho Zisas Kraes. Ara mu neke tuhu mehau God ta mala toka ghidira ira noni neke faeterio manei mala nona nonina taghonai. Manei neke tuhu mehau ghu mala toka ghidira ka ia nodi va hohoghona, nia mala va kakahe ghidira ia ghaghahena ta mala avohi maneri ia hohoghona, ta mala va podolo vanadina ghu heve e ghua mu auna ka maneri ka ia ghaghahena ta veha vanani God. 2 Hohoghona iahi e vanadi rangerange ghinina ia doli soduai, neke naiungene ghinio God vanadio maneri, ghe neke tatanigao nga malau iahi peka. Ghita da avohi mo ta hohoghonana mu naiungene iahi, vununa God mu eka sesebo ghu. 3 Nia ka ia torai fafatana, manei neke va podoli ia Nonomoho Ta Veha ka ira noni ka ia rivai tuturi beana ara. Nia God ia noda Va Doli neke ungene va gigimau ta tuturi beana ghinina heve neke kaheio manei.

4 Leta iahi mu na kangava agei ara ka agho Taetusi taghe kaike toraina tuugu ia ta ghua, vununa ka ia noda va hohoghona ghita.

Ara na tarai fangai God ia Mama nia Kraes Zisas ia noda Va Doli ta age vananighona ia varisute ta vanada kakato nia ia bule.

Faeteri Ira Ta Fata Mala Babatuna

5 Ara nake nai kaigho agho ka ia ghizuna Kiriti, o boka mala va hokotori ghu agho ira noda riva aianimu, nia o mala faete noni babatu malana ghu ia kiloau e ghua ka ira leghu malau leghaha nga, nake ghua, taghe nake va kahe ghinighono. 6 Ia mane babatu mu geala e au ka ia doli ta lotoro. Manei mu e toraina kaike ghaseborona ma, e au hohoghona ghu ka manei, nia ira tuuna gedi rekaha va hohoghonadi ghu e ghua, nga edika muko puhidi ghu nia huhughu ghu, e ghua. 7 Mane babatuna ka ia kiloau mu e au ka ia doli ta kalasa, vununa manei mu e mane pauna ka ia riva God. Manei mu e toraina eka ghua ghu hei ia ta kabai ghini ma ia au doli ka taghonai nia eka tuma hali ghu, e ghua, eka ketuhu gogosu ghu, eka tuma vari ruza ghu nia eka kabakabai rongo ghu, e ghua. 8 Nga manei mu e toraina hio suteri ghedi ira noni ta hio hagheleri ka ia sugana nia e toraina va manemane riva ghidira heve ira ta veha, e ghua. Manei e toraina hadu ngangana ghe ge riva nga, au va lotoro, au ka ia doli ta veha vanani God nia paufuri ira lao hihingo ka ia tini, e ghua. 9 Manei e toraina posi va gima ka ia nonomoho ta hohoghona neke va kakahe ghinio. Ka ghaghahena ianimu ghe, ge boka va gigimari nga manei ira keha noni ka ia vari va kakahei ta hohoghona, e mala age podolo ghu ia zea ka heiri ira ta huhai nonomoho iahi.

Buruari Ira Ta Vari Va Kakahei Sesebo

10 Na kahei nga ara iahi mu, vununa di tehi ira noni ta tetu kaputi ia vari va kakahei ta lotoro. Maneri edi holara ka ira tuturi ta deo lighorodi nia edi vanadi turi ta sesebo ira noni mala hio va hohoghonana maneri, e ghua. Iahi mu e hohoghona, sughavona ghu ka kehara ka ira noni Ziu ta kahei o torai va hohoghona ka Zisas nia o toraina leghui ia vetula ka ira Ziu, ka ia hioi ia papahe va ghilaghila, ira ta ghua. 11 Agho o toraina va nodori noni ta vari va kakahei sesebo irahi ta va kakahe ghidira ira ta va hohoghona, vununa maneri di vari va kakahe ghidi ira leghutau taka mala vari va kakahe ghidi ghu. Maneri di age va ghonari ira kamotodi fototatamana ta va hohoghonana ka vari va kakahei iranimu di age taghuru kairi ghu ira vari va kakahei ta hohoghodi ghini Zisas Kraes. Noni ta vari va kakahei sesebo irahi mu, edi suna kabai hio rongo ma ka ira noni. 12 Sepao laoni, kaikeu ka ira mane doritohoto taghodi ani Kiriti neke kahe ghua iahi ghidira maneri, “Ira noni Kiriti mu, edi turi sebo tudu ma. Au dolira ka maneri mu e toraina muko taghe ira pusi, meusu mauke edi ghua, nia edi toali deona heve ta riva ghinina, ghe gedi mahai fuludu nga, e ghua.” 13 Iahi mu e torai tuturi hohoghonana ghu. Ka va fafahaka iahi lamu ta toraina kahe ghidi va gigimana agho ira noni ta va hohoghonai ia vari va kakahei ta sesebo tadi zeana maneri, edi age leghuri ghu maneri ira vari va kakahei ta hohoghodi ghinina Zisas Kraes. 14 Maneri edi toraina nodo nonomohona ka ira turi sepa ta sesebo ira noni Ziu nia ka ira ungene va gigima ira noni ta huhughi ia vari va kakahei ta hohoghona ghini Zisas Kraes, e ghua.

15 Ka heiri ta kalasa ira hihingodi ka kenuna God mu, e deo ghano ta zeana mahainina. Nga ka heiri ira noni ta muko ta deo gedi va hohoghona ghu ka Zisas mu, e deo heve ka ira ta riva ghidi maneri ta vehana. Ira nganganadi maneri mu edi sota tudu ma nia maneri edika haghava ghedi ghu dito riva ghidi la ira leghutau ta muko, e ghua. 16 Maneri edi kahei ta avohina God, ghe ira riva ka maneri mu edi muko, ne va podoli ghu ta deona maneri gedi avohi ghu God. Maneri mu edi mumukoana, huhughu nia e deo lighorodi ma mala riva ghidira ira leghutau ta veha, e ghua.