Tit 2 | KjiSC | STEP | Nga agho Taetusi mu, o toraina va kakahe ghidi tudu ma ira ta va hohoghona mala leghuina ia hangana ta fata ka heiri ira ta va hohoghonari ira vari va kakahei ta hohoghodi ka God.

Titus 2

Va Paluna Pagahaina: Nakairi Ira Leghutau Ka Ia Papatai Ta Lotoro 2:1–3:15

Va Kakahe Ghidi Ira Noni Ta Va Hohoghonarira Ira Leghutau Ta Hohoghodi

1 Nga agho Taetusi mu, o toraina va kakahe ghidi tudu ma ira ta va hohoghona mala leghuina ia hangana ta fata ka heiri ira ta va hohoghonari ira vari va kakahei ta hohoghodi ka God. 2 O va kakahe ghidi ira mane ta sepa lao edi paufuri ghu ira lao hihingo ka ira tinidi, ta mala fatana ghu maneri va vonavonarira, nia ta auna ka avoavoho, e ghua. Maneri edi toraina auri ia va hohoghona ta gigima, nia edi namaha ghidi ira keha noni, e ghua. Maneri edi au va nadu tudu ma ka ia nodi va hohoghona geta dufuri ghu ghe ira vavahagala nia mamarutana.

3 Taghe iala o ghua molamo, o va kakahe ghidi ghu ira fotati ta sepa lao tadi auna ka ia ghaghahena doli ta fata ka heiri ira ta riva vanani ia Lod. Maneri edika lao meha ghu ungene va mukorira ira keha noni nia edika ketuhu gogosu ghu, e ghua. Nga maneri mu edi toraina vari va kakahei ghidi heve ira ta veha. 4 Fotati ta sepa lao irahi edi toraina tatanganari ira fotati ta foforu ta namaha ghidira ira keradiau nia ira nodi rekaha e ghua, 5 ta mala au vatovatona nia kalasana, nia kopu ghidi va vehara ira nodi suga nia ira fototatamana ka taghodi, ta vari sutena, nia ta ungene nonomohona ka ira keradiau e ghua, e mala deo ghu hei ta ungene va mukoina ia nonomoho ta meha ka God.

6 Taghe iala molamo, kahe ghidi va gigima ira rekaha mane foforu edi paufuri ghu ira lao hihingo ka ira tinidi. 7 Ka ira vahina leghutau nga, agho taghou o riva ghidi ira leghutau ta veha taghe mala fini kadolona ka maneri. Agho o vari va kakahei ka ia ghaghahena ta hohoghona nia ta heheluana e ghua. 8 Agho o kahei ia ta hohoghona, e mala deo ghu heve muko ta va kahe ghinighona ira noni. E ghua ianimu ghe, gedi age haghava ghedi nga ira ta taga tetuigho agho, vununa e deo heve leghutau ta muko, ta boka mala va zutu ghini ghitana maneri.

9 Ira noni ta mala varituhu mu, edi toraina nomohori ira faghinadi, nia edi toraina riva va gigima mala veha vanadina maneri, e ghua. Maneri edika puina ngengene leghu ghu ka maneri, 10 ba edika sikori ghu. Nga maneri edi toraina va podolori taghodi ta vehana nia ta hohoghona tuduna, e ghua. E ghua ianimu ghe, ge boka age kakabaiana nga mu ia vari va kakaheina God ia noda Va Doli ka ira vahina ghaghahedi nga.

11 Heiri ira ta va hohoghona mu edi toraina au ka ghaghahena iahi, vununa God neto ke va podoli ia nona varisute ta va meha kakatoi, ka ia riva ghini ia ghaghahena mala hio va doliri ira leghu noni nga ka ira muko maneri. 12 Vununa ka ia nona varisute, manei ne va kakahe ghini ghita ta nai kairira ira au dolida ta muko ta deo ge veha vanani ghu taghonai, nia ta nodona kuhanai ghidira ira leghutaudi ka malau iahi peka, e ghua. Ghita mu geala da au ghu ka malau iahi peka ka ia doli ta banabana, lotoro nia ka ira doli ta veha vanani God, e ghua. 13 Geala e ghua ghu ianimu auna ka ghita ka ia au afa ghini ghita rangerange ta beana ianimu, ka ia leghu mehana ka malau iahi peka Zisas Kraes ia noda God ta varanga nia Va Doli, ka ia nona varanga ta pelara. 14 Manei neke va malumi taghona ta mala leme vanadana ta hio va doli ghitana ghu ka ira leghu muko nga, nia ta mala va kalasa ghitana e ghua. Manei neke riva ghini iahi mala meha va nona noni ghitana taghonai, ta torai kuhana ghini hohoghonana ghu ia riva ta lotoro.

15 Agho o toraina vari va kakahei ghidi leghutau irahi, nia va gigimari ira noni ta riva ghidira e ghua. O buruari ira taka kabai leghuri ghu vari va kakahei nira ka agho. Vununa agho no batu ghidi maneri, e kuruigho ghu mana mala va kahe ghidira leghutau irahi. Oka va malumi ghu hei noni ta deona ge ngalangadori ghu heve noto ke kaheriro agho.