Tit 3 | KjiSC | STEP | Taetusi, va ngana ghidi leghu tudu ira noni ta mala va vonavonarira ira ta babatu ka ia gaumani nia ka ira malau teri, e ghua. Maneri geala edi nomohori nia va tana tudu riva ghinina heve ia ta veha ka ira leghu ghaghahedi nga.

Titus 3

Riva Ghidi Ma Au Ghu Ira Riva Ta Veha Vananina Ia Lod

1 Taetusi, va ngana ghidi leghu tudu ira noni ta mala va vonavonarira ira ta babatu ka ia gaumani nia ka ira malau teri, e ghua. Maneri geala edi nomohori nia va tana tudu riva ghinina heve ia ta veha ka ira leghu ghaghahedi nga. 2 Maneri edika ungene va mukoi ghu ia keha noni nia edika vari hahala ghu e ghua. Nga maneri geala edi au ka ia bule, edi au unuhu hohoghona ghu taremehadira ira leghu noni nga.

3 Kaike fafata, ghita dake kingo molamo deona gada ke ungene nonomoho ghu ka God. Ghita dake va hohoghonari ira sesebo, dake riva ghidi tudu ghu ira vahina kokolodi leghutau ta muko nga to age paufu ghita ghu ira dake hagalai riva ghidiro, nia va ghazaghaza ghidiro riva ghidira, e ghua. Ira doli ka ghita dike foudui muko nia konokono e ghua. Ira noni dike kikipana ghini ghita nia ghita gada ke kikipana ghidi ghu maneri dake ghua.

4 Ghe God ia noda Va Doli neke va podolo vanada ia nona varisute nia namaha. 5 Vununa ka ia nona dudumana, ghe neke hio va doli ghita nga manei, nga eka ghua ghu ka ira leghutau ta veha dake to riva ghidiro ghita. Manei neke vanada ghita ia Nona Tarunga Ta Maduana ia ta tihi kairi ira muko ka ghita, vanadana ia uraha foforuna nia ia ghaghahena au ta foforu, e ghua. 6 God neke ghasolo vanada meha ghita ia nona Tarunga Ta Maduana mala riva va gigimana ka giliona ia doli ghita, vununa ka heve neke riva ghinio Zisas Kraes ia noda Va Doli. 7 Geta deo ghu ghita gada ke fata ghu, God neto ke kahei ta lotorona mo ghita ka ira nahalina, vununa ka ia nona varisute ta vanada kakato. God neke riva ghini iahi, da boka mala meha nona rekaha ghu ghita neke ghua, nia ta avohina ia ta age vanadana ghatu manei ia doli soduai, e ghua. 8 Leghutau to va kahe ghinigho irahi ara mu, edi hohoghodi haroharo. Ara na kabai ghinigho ghu ta kahe va gigimari tudura, mala maneri ira ta va hohoghona ka God edi banabana ghu mala riva ghidira ira riva ta veha vanadira ira keha noni leleghu fafata. Leghutau irahi mu edi veha nia e kuru lighorodi ka ira noni haroharo.

9 Nga oka holara lao ghu ka ira vari tuufuai ta deo fafahakadi, ba taremehadira ira vari tuufuai ghidi ira pagusudi noni, ba ira vari tuufuai nia ira vari hahala ghini ia vetula ka ira noni Ziu, e ghua. Kokolodi leghutau irahi mu e deo lighorodi ma nia e deo ge vari tokai ghu, e ghua. 10 Taghe palu fafata ma, ta boka ngengene va gigimaina agho hei ia ta rivai fofota ka vari hoataimu ghau. Leghuna ianimu, oka riva ghini lao ghu kaike leghutau ghu ka manei. 11 Vununa agho o boka avohi mo kokolona noni ianimu tato taghuru kainina ia hohoghona. Ira muko ka manei ne va podolina ne zea mamu manei, ta ghuana.

Ira Va Nonoghadi Ngengene Ka Ia Leta

12 Ara na vato ghini ta mala va ghahe ageina ka agho, kaikeu ka Atimasi ghe Tikikasi. To magali sabara la kaikeu ka maneri palu ghu, o toraina riva va gigima agho o magali kadolo meha dufuau ghu ka ia malau leghaha ani Nikopolisi, vununa ara nato nai nganganagu ta mala va fuludina ia rabongi aianimu. 13 Riva ghidi agho vahina leghutau nga ta boka mala toka ghinina Zinasi ia mane ta avoho fikifokori ira vetula ka ia gaumani nia Apolosi e ghua, ka ia ghaghahe maneri palu, edi mala kururi ghu ira vahina leghutau ta deori nga. 14 Agho o va kakahe ghidi ma au ghu ira ta va hohoghona ka ia ghizuna Kiriti ta va hoto laorira ira nganganadi ka ia riva ghidi ira riva ta veha maladi ira noni ta deori leghutau taghe ghanori nia pokori e ghua, leleghu ravata. Maneri geala edika au ghu ka ira doli ta deo lighorodi.

15 Maneri haroharo ira ta va hohoghona ta au taremehagu irahi ara aiahi di va ghahe age nodi ungene veha ka agho. Ungene vehari ira noni ta va hohoghona ta namaha ghini ghita.

Ara na tarai fangai ia varisute ka God ta vanada kakato e age au ka ghau haroharo.