John 18:33-40

33Ianimu tuna ghe, neke haghele leghu lao nga gilio Paelati neke kudo laoi ghu Zisas ka taghona, “?Agho lamu ia Mane Ginitaukela ka ira Ziu?” neke ghua notohina.

34Zisas neke ungene tughui kahe ghuana iahi, “?Notoho iahi mu ne la sipa meha ka taghou, ba kehara dike va kahe ghinighona ghinaguna ara?” neke ghua ghini.

35“Ara mu eka noni Ziu ghu. Ira noni ka taghou nia ira hiama ta kenu e ghua mu dike hio mehaighona agho ka ara. ?Heve noke riva ghinina ghu agho?” neke ghua ghini.

36Ianimu tuna ghe, neke ungene tughu nga Zisas, “Ia ravutu ka ara mu eka nona ghu malau iahi peka. Geke ghua la ianimu, geala ira noni ta leghuau ara edi ke magara mala va nodorira ira ta babatu ka ira Ziu ta sakomo hioauna ara. E deo, ravutu iahi ka ara mu eka nona ghu malau iahi peka,” neke ghua ghini.

37Ke notohi tuna neke ghua Paelati, “?Kaike mane ginitaukela ghu mu agho?” neke ghua ghini.

“Agho mo no kaheina, ara mu mane ginitaukela ta ghuana, ne hoghou ghu mamu,” ne ghua Zisas. “Ara nake doli meha ka malau iahi peka mala va kahe ghidira ira noni ghinina ia hohoghona. Heiri haroharo ta hagala ghini heve ia ta hohoghona mu, edi ungene nonomoho ka ara.”

38“?Heve ghu mu hohoghonana?” neke ghua notohonana Paelati. Ianimu tuna ghe, neke kave laoni nga ka ira noni, neke la va kahe ghidi ghu, “E deo heve muko ne hotoina manei ta boka mala fateina. 39Ghe kaike puhi sepa ka ghau mu, ia ta mala va kave vanamu ara kaike noni pipiliga ka ia Mahai Varighara Nganaleghuna Ia Ghahe Fuludu. ?Heve, ghau no kabai ghini mo ta va kave vanamuna ara ia mane ginitaukeladi ira Ziu?” neke ghua ghidi.

40Ghe maneri dike kudo leghu lao, “!E deo, eka ghua ghu manei, va kave vanamai Barabasi mo!” dike ghua. (Barabasi mu kaike mane neke taga tetuio ia au kopu ka ira noni Romu.)

John 19:1-16

Zisas Di Hio Vonai Ka Vari Sukutuai Mala Va Lemeina

1Ianimu tuna ghe, neke kahe ghidi nga Paelati ira mane magara ta hioina Zisas, ta la puruasiminina ghu. 2Ira mane magara dike fihui kaike tarapae ka lolozo dike va vona ghini lao ghu ka ia belehuna Zisas. Ianimu tuna ghe dike va vona vanani lao nga kaike poko sodu ta omoꞌomo. 3“!Helahela ghini ia mane ginitaukela ka ira Ziu!” dike ghua vela ghinina, ghe dike tapali nga dike au ghu ka ira bakona.

4Paelati neke kave laoni peghuru, neke la va kahe ghidi ghu ira noni, “Fini, ara ato la hio kave vanamu meha Zisas ghatunaina, o mala avohi ghu ghau ta deona ara ga fini ghu ta hotoina muko sasake manei.” 5Ianimu tuna ghe, neke la kave meha nga Zisas va vonaina ia tarapae lolozo nia ia poko sodu ta omoꞌomo, e ghua. Kahe ghua tuna iahi ne ghua Paelati, “!Iahi mu ia mane!” neke ghua ghidi.

6Di fini laoi ghu Zisas ira hiama ta kenu nia ira mane magara ta kopu ka ia Sugana God e ghua, maneri dike kudo lao, “!Tupila ghini ka hekefalahata! !Tupila ghini ka hekefalahata!” dike ghua.

Paelati neke kahe ghua iahi, “O hioi taghomu, o la tupila ghini ghu ka hekefalahata. E deo heve na fininina ara neke va mukoina manei,” neke ghua Paelati.

7Ira mane babatu ka ira Ziu dike ungene tughu lao, “Leghuina ia vetula ka ghai ira Ziu mu, mane iahi e toraina mala va lemei, vununa taghonai mu Tuuna God, ne ghua.”

8Ka ia fafata age nomohina Paelati tuturi iahi, manei neke puina age maughena laoni, ge hohoghona la mamu ta ghuana. 9Manei neke haghele leghu lao gilio ka tolima ginitau ani neke la notohi ghu Zisas, “?Agho mu taniu hae?” neke la ghua ghini. Ghe Zisas e deo geke ungene tughui ghu. 10“?Heve, no pake gheu ngengene mehana ka ara?” neke ghua Paelati. “?E deo go avohi ghu agho mu, ara e kuruau mana ta mala va kaveighona agho ka pipiliga, ba ta mala tupila ghinighona ka hekefalahata, ta ghuana?”

11Ianimu tuna ghe, neke kahe ghua nga iahi Zisas, “Mana ta kuruigho iamu agho ka fategu ara mu, ia mana ta vananigho meha lama God. Taghe ia noni neke nai ageauo ara ka agho mu, e toraina hotoi ghu muko ta toraina faa fuludu lao.”

12Ne nomohi ghu iahi Paelati, manei neke va sisiva hadui kaike ghaghahena mala nai kaveina Zisas. Ghe ira mane babatu ka ira Ziu dike kudo leghu lao, “Noto va malumu kavei la agho mane iahi, agho mu eka nona mane baere ghu Sisa. Hei noni neto kahei la taghonai mu mane ginitaukela ta ghuana, manei mu kaike kana ka Sisa,” dike ghua lao.

13Ka ia fafata kahe ghuadi ianimu maneri, Paelati neke hio kavei Zisas peghuru, ghe neke la nohe hinae nga ka ia nonohe mala varifate ka ia malau ta va kudo ghini ia “Galahena Ta Pata Ghini Ghahipa Leghaha”. Ka ungene Erameiki mu, “Gabata,” e ghua ghini. 14Ka fafata iahi mu neto ke age namo hoatai ravata, ia ravata mala va tana ghini ia Mahai Varighara Nganaleghuna Ia Ghahe Fuludu, ta au meha ka ia keha ravata. Kahe ghua tuna iahi ka ira noni, neke ghua Paelati, “!Iahi ia nomu mane ginitaukela!” neke ghua ghidi.

15Ghe maneri dike kudo leghu lao, “!Atungi! !Atungi! !Tupila ghini ka hekefalahata!” dike ghua.

“?Heve? ?Ghau no kabai ghinagu ta tupila ghinina ka kaike hekefalahata mane ginitaukela iahi ka ghau?” neke ghua notohonana Paelati.

“Ghai mu e deo ghai mane ginitaukela, nga Sisa lama,” dike ghua ungene tughudira ira hiama ta kenu.

16Va nonoghanana, Paelati neke nai vanadi lao maneri, mala tupila ghinina ka hekefalahata.

Ira Mane Magara Di Tupila Ghini Kraes Ka Ia Hekefalahata 19:17-37

Matiu 27:32-38,48,50; Maki 15:21-26,36a,37; Luku 23:26-33,38,46

Hioi tuna Zisas gedi batu ghini ghahe ghu dike ghua ira mane magara.