Luk 12:35-48 | KjiSC | STEP | “O va tana va veha tudu va vonaina ia poko mala riva, nia va helupuri o au ghu ira nomu zuta, e ghua.

Luke 12:35-48

Au Va Tana Ghini Ia Meha Ka Ia Lod

35 “O va tana va veha tudu va vonaina ia poko mala riva, nia va helupuri o au ghu ira nomu zuta, e ghua. 36 taghe ira noniriva ta au afa ghini la ia leghu mehana ia nodi faghina ka kaike mahai varigharana varihio. E ghua ma ianimu ghe, gedi boka age tobehi nga ia makatana ka toraina fafata ianimu, ka ia fafata la dufuna ta la ketaketa ghu manei. 37 E age veha ka noniriva iranimu meha finirina ia faghinadi, ta baghunu nia va tanana maneri ka ia la leghu mehana manei. !A va kahe ghini ghau ghu ara, torai taghonai ta va noherira maneri, va vonaina ia nona poko tini va pepeghuru mala bara sota, nia ta va fafara vanadira ka ia fata nohe ta mahai ghu maneri, e ghua! 38 Haeba manei e la meha ka ia hoatai redu, ba, ka ia namo pagasa vonana ia fugho ba, e ghua. Ghe e puina age veha ka noniriva iranimu meha finirina ia faghinadi ta auna maneri ka ia va tana. 39 O ke avohina iahi: Ia mane ta kutamai suga ta torai avoho va vehai niha ta mehana ia noni ta sisiko mu, e deo ge boka va nanamo vanani ghu nona suga ani ta mala hagheli ta la sisikona ghu noni ianimu. 40 O toraina va tana ghu leleghu fafata, vununa ia Tuuna Noni, e la meha ka ia fafata taka va ghunaghunai ghu agho.”

Ia Ungene Talevarana Ia Maneriva Ta Hohoghona Tudu Ka Ira Riva Manei

Matiu 24:45-51

41 Pita neke notohi, “Lod, ungene talevara iahi mu malamai ma ghai, ba maladi haroma ira leghu noni nga?”

42 Ungene tughui tuna neke ghua ia Lod, “Ara na ngengene lao ka leghu maneriva ngama, ira ta avoavoho nia hohoghona ta vanadi riva ia manefaa mala are ghinina ia nona suga kamoto, nia ta mala valiharira ia butubutu ka taghona, e ghua. 43 Ka ia ke leghu mehana ia manefaa, ta meha finini ghu ia maneriva, riva va vehana ka ia nona riva, e age au mo ghatu kaike tabara malana manei. 44 A va kahe vanamu ghu ara ka ia hohoghona, ia manefaa e age vanani ghatu maneriva ianimu, ia papala ta mala kopu ghidi ira vahina ta taghori nga manei. 45 Nga neto ngana ghua la iahi ia maneriva, ‘Ia manefaagu mu e deo ge boka ke magali la leghu meha ghu,’ neto ghua la, neto tatanigai ruzari ghu ira keha noniriva, ira mane ghe ghase ghu, rivai mahaina ma nia ketuhu gogosuna ma ta ghuana, 46 hohoghonana mu, ia leghu meha ka manefaa iahi e deo ge age kusu turi ghini kave ghu, nia nai ghini fafata ghu, e ghua. Manei e toraina age va kilasi ghatu maneriva iahi, va ghahe taremehadira ira keha noni ta va laolapu. 47 Ia noniriva ta avohi mo heve ne kabai ghinina ia nona faghina, ghe deo tuna ge va tana ghu riva ghinina ia ta ghua mu, e age hioi ghatu ia va kilasa ta toraina muko.

48 “Nga neto deo la ge avohi ghena ghu ia noniriva heve ne kabai ghinina ia nona faghina, neto riva ghidi ghu keha leghutau ta muko, manei e age hioi ma ia va kilasa ta sasanoana. E faa fuludu mu, ta kabai ghinina manei ka ira dike vanadi va faaro, nia e faa fuludu laoni tuna ta kabai ghinina manei ka ira noni dike vanadi va faa fuludu laoroni, e ghua.