Mar 7:1-13 | KjiSC | STEP | Kaike ravata, keha Farisira nia keha mane ta vari va kakahei ghini ia vetula ta maduana ka God, dike sipadi Zerusalemu dike meha au lilohi ghu Zisas mala meha nonomohona.

Mark 7:1-13

Ira Puhi Mala Leghuri Ka Ira Farisi Neke Batu Ghidi Va Zea Ira Noni, Dike Huhughi Ghu Ia Vetula Ka God

Matiu 15:1-20

1 Kaike ravata, keha Farisira nia keha mane ta vari va kakahei ghini ia vetula ta maduana ka God, dike sipadi Zerusalemu dike meha au lilohi ghu Zisas mala meha nonomohona. 2 Maneri dike finiri kehara ka ira mane ta nonofoi Zisas, dike deo gedi leghuri ghu ira puhi ta mala leghuri ka ira noni Ziu, e kusu titihi kamena ghe ge mahai nga, ia ta ghua. 3 (Ka ira noni Ziu, sughavona ghu ira Farisi mu, edika mahai ghu, edi vuhai tihiri ghu ira kamedi, taghe leghurira ira nodi puhi sepa. 4 E ghua haro molamo ira mahai ta la tabarari maneri ka ia makete. Edi toraina kusu tihiri tudu ma ira kamedi ghe, gedi mahairi nga. Nia tehi puhini dike leghuri harona, taghe ira ghaghahedi mala titihi panikeni, raro, disi nia ketolo, e ghua.) 5 Notohi tuna Zisas dike ghua ira Farisi nia ira mane ta vari va kakahe ghini ia vetula ta maduana ka God e ghua, “?Heve di ghua nou mane ta nonofoigho nira agho ghe, dika leghuri nga ira puhi sepa ka ira faada, ta deo idi gedi kusu titihi kame ghu ghe, gedi mahai nga?”

6 Zisas neke ungene tughuri, “!Ghau ta tatangana kobiri! Heve neke kaheio God ka porofeti Aesaea ghini ghauna ghau sepao mu, ne hohoghona mamu ka neke kaheio iahi manei,
7 ‘Noni irahi edi heluhelu ghinagu ara ka ira pepeudi,
ghe ira hihingodi mu edi varihau ka ara.
Ira va totoana ka maneri e deo fafahakadi ma,
vununa di holari ia nogu vetula, ka ira nodi puhi mala leghuri ta va vuhari taghodi,’ ^{▼▼Aesaea 29:13} ia ta ghua.

8 Ghau no nai kairi ira ungene va gigima ka God, no leghuri ma ghu ira nomu puhi sepa taghomu.”

9 Ke kahe ghuani tuna iahi ka maneri neke ghua Zisas, “Ghau no puina avohoa ghini ta sokerira ira ungene va gigima ka God, mala go leghuri mo ira nomu puhi sepa taghomu, no ghua. 10 Taghe iahi la. Mosese neke vanamu vetula iahi ka God ta ia ta kahe ghua iahi: ‘O heluhelu ghidi nou mama ghe nou uke,’ ^{▼▼Kave 20:12; Ngengene 5:16} nia ‘Hei ta ungene va mukoina nona mama ba nona uke mu, e toraina mala va lemei,’ ^{▼▼Kave 21:17; Hiama 20:9} ia ta ghua. 11 Ghe no kaheina ghau mu, ira noni e veha mo ta kahe ghuana iahi ka nodi mamari nodi ukeri no ghua, ‘Dudumana faana, ara e deo boka toka ghini ghauna ghatunaina, vununa heve malamu ghau nake ghua ghidira ara mu, nato ke va bebereana ara ta mala vananina God’ no ghua. 12 Ghau no va malumuri ira noni, taka va ghunaghunarira ghu ira nodi uke nia ira nodi mama ta malanga. 13 Taghe ianimu ghu mu, ghau noto age huhughi ia vetula ta maduana ka God, mala go suteri mo ira nomu puhi sepa taghomu, no ghua. Kaike mo mu iahi ka ira va zezea ghau, nga tehidira mu edi au mo.”