Luk 11 | KoqSC | STEP | Ibwate buya, Zɛzi ajasa bobɔndɔngɔkɔ iyate isi. Usya ya ango ahijɛsɛ bobɔndɔngɔkɔ, imwate yokwɛ mweji mwa himwa ango te: «Ku wamɛ hɛlɛcɛ bɛhɛ nda babɔndɔ, nda Za ahɛlɛsɛ bayokwɛ beji.»

Luke 11

Zɛzi ahɛlɛ bayokwɛ beji nda babɔndɔ

1 Ibwate buya, Zɛzi ajasa bobɔndɔngɔkɔ iyate isi. Usya ya ango ahijɛsɛ bobɔndɔngɔkɔ, imwate yokwɛ mweji mwa himwa ango te: «Ku wamɛ hɛlɛcɛ bɛhɛ nda babɔndɔ, nda Za ahɛlɛsɛ bayokwɛ beji.» 2 Ya Zɛzi asɔhɔ na bango te: «Usya ya bya bɔndɔ, sɔhɔkɔ natɛ: Hangwɛ aho ajibo bya iko, jinɔ jɔbɛ ja jace Pu, yaka o kɔkɛcɛ moto wahajɛ! 3 Mwenhe, wɛcɛ bɛhɛ maja maho minyan mahajɛ! 4 Yɛnɛcɛ bɛhɛ cɛyi ikungwaka mesɛmbɛ myaho, nda bɛhɛ bayɛnɛ bato babeka bɛhɛ bobe cɛyi. Teka jika te bemba bibebe bya kweyace bɛhɛ.»

Himwaka bewɛcɛ bihi

5 Zɛzi amaka sɔhɔ na bango te: «Ijaka te iwate o panga bihi aje na mwanyangwɛ, alwa ikumɛcɛ ango o lebelebe ya epundu, ya ango asɔhɔ na neji te: “Mwanyangwamɛ bɔmɔkɔ mɛ bapɛmbɛ bahanto. 6 Bosina te, majetɛ na iwate mwanyangwɛ amɛ wa ncɛyi amuya osatɛ, maje teka emba ya mewɛcɛ ango.” 7 Nde mwanyangwɛ akasa na neji o katɔ ya Elongwɛ te: “Djikaka imɛ wayɔ, beyata ekucɛ ya Elongwɛ , bɛhɛ na bana bamɛ benanga, makusi yemwa iwɛcɛ ɔbɛ bapɛmbɛ.” 8 Nde matanda bihi te, mwanyangwɛ abiyemwaka na iwɛcɛ ango bemba bya ango himwa byahajɛ, mwajiyemwa na bosina bwango aji mwanyangwɛ, nde eyemwaka na bosina bwango aji na hun. 9 Bosina mɛnɛ bwa imɛ matanda bihi te: Himwaka bewɛcɛ bihi, hakaka byekumɛcɛ, dumɛcɛ ekucɛ bejibwaka bihi. 10 Mombo ahimwa wa bawɛ, ahaka akumɛ, adumɛ ekucɛ wa bajibwa. 11 Bya bihi baji, usya mwana ahimwa fɛ na hangwɛ, hangwɛ, abiwɛcɛ ango taji kate fɛ? 12 Kate, abiwɛcɛ ango kola usya ango ahimwa ango icɛyi? 13 Wɛnɛ bihi bato babobe, byayeba iwɛcɛ bemba bya mbɛ na bana ba bihi, engamucɛ na Zambe wa hangwɛ wa bihi, mwajiwɛ Ekokoyi ya Pu na bato bahimwa ango!»

Zɛzi apepa nkuku

14 Ibwate buya Zɛzi apepa nkuku o nyo ya moto wa nkina. Usya nkuku mwɛ mwapwasa o nyo ya moto wɛ, moto wɛ te asɔhɔ, usɛ lupu ja jasa okate jayecɛ. 15 Ya ibate basɔhɔ te: «Yɛ Bezebuli, wa nɛni mwa menkuku awɛ Zɛzi pizo ya ipepaka menkuku!» 16 Ya ibate bamama Zɛzi, na isɔhɔkɔ neji te: «Bekaka o boho bwaho ndembo yayenga bya iko.» 17 Nde, Zɛzi ayebakasa matemange mango, asɔhɔ na bango te: «Usya bato ba etomba ɛkɔ bayana ibaji bamɛnɛ na bamɛnɛ, etomba yehemanaka, na belongwɛ byetuwaka ukwa ibyate. 18 Wɛnɛ Sata aje o ibaji na Etomba eji, Etomba eji yehimwaka na? Bosina bya ngusɔhɔkɔ te, imɛ mapepa menkuku na pizo ya Bezebuli awɛ imɛ. 19 Ice Bezebuli ewɛ imɛ pizo ya ipepaka menkuku, nde amuwɛ bana ba bihi pizo ya ipepaka menkuku za? Ya ango ya bana ba bihi behɛlɛcɛ te byekwazɔ! 20 Nde wɛnɛ Zambe amuwɛ imɛ pizo ya ipepaka menkuku, usɛ, ihɛlɛcɛ te Etomba ya Zambe yeya wa bya bihi baji.»

21 «Usya moto wa pizo aji na makɔngɔ na bangɔngwɛ ikɔlɔkɔ Elongwɛ , ya hɛlɛ te alonge bokumani ibwɛji utabu. 22 Nde, usya moto ayeka ango pizo buce aya na iyobaka ango, na ipalaka makɔngɔ na bangɔngwɛ mango abukwɛkɛsɛ, na ikabaka bokumani byahajɛ bwango akwasa. 23 Moto aji teka jonga na namɛ, aje na mbyɔlɔ na namɛ, moto aji teka nyamwa imɛ isojɛcɛ bato, ango ahanga bango.»

Ilumye ja nkuku o nyo ya moto

24 «Usya nkuku mwa pwa o nyo ya moto, alwa o isi ya iweya, ihakaka isi ya ijaka, wɛnɛ ango teka kumɛ, ya ango asɔhɔ te: “Mehunwanaka o Elongwɛ amɛ ya mamuja.” 25 Usya ango ahunwana o Elongwɛ ya ango ajasa, akumɛ bekɔmbɔ, beyɛnɛ te yango obwɛji. 26 Ya ango alwa ikwaka imyate menkuku nanyin na hanto myayeka ango bwa, ya bango bakweya o nyo ya moto wɛ, onyate mɛnɛ, njanga mwa moto wɛ, mwayekana mwa bohoboho.»

Mato wa mbɛ

27 Usya ya Zɛzi asɔhɔkɔsɔ nɛ, ya mwehito abesɛ ekɔlu o lebebe ya lupu, na isɔhɔkɔ te: «Mwehito amukɔlɔ ɔbɛ o mwɛnyi na inyanjɛcɛ ɔbɛ aje o mana! 28 Nde, Zɛzi akasa te: Bato bayoka iyɔkɔ ja Zambe na isiswaka jango o menlema, bango baji o mana!»

Bato bahimwa Zɛzi ndembo

29 Usya lupu ja bato jaya ikubaka Zɛzi, ya ango asɔhɔ na bango te: «Bato ba mwenhe bobe, bahimwa ndembo, nde, teka ndembo ya bango beyɛnɛcɛ, ka, ndembo ya yekanasa na Zonasi. 30 Nda Zonasi ajasa ndembo ya bato ba eposi ya Ninivi, etɛ mɛnɛ ya Mwana moto ejaka ndembo ya bato ba mwenhe. 31 O buya bwa mpabo, mwehito aji nkani mwa ncɛ eyemwaka o boho bwa bato ba mwenhe, na ihacɛcɛ bango bombete, bosina te ayenga njɛnja ya mɔngɔ ya hehe ya bopama, iyokaka mayɔkɔ ma bokombo ma Salomɔn. Nde amuyeka salomɔn ajetɛ o panga etɛ! 32 O buya bwa mpabo, bato ba Ninivi beyemwaka o boho bwa bato ba mwenhe ihacɛcɛ bango bombete, bosina te, ba Ninivi bejemi bya bango byekalwana usya bango bayokasa Zonasi. Nde amuyeka Zonasi ajetɛ o panga etɛ!»

Djihɔ jaje moji mwa nyo

33 «Teka moto ayonjɛ elambi ibumɛcɛ yango na lombo, nde bangujikaka yango ukwa etaka, na bosina te bekweyaka o Elongwɛ beyɛnɛcɛ moji. 34 Djihɔ jɔbɛ jaje elambi ya nyo ɔbɛ, wɛnɛ jihɔ jɔbɛ jaje bɔnhu, na nyo ɔbɛ yahajɛ yejaka ngwe, nde, wɛnɛ jaje bobe, na nyo ɔbɛ yahajɛ yaje o epundu. 35 Dzaka na bocɛngu, bosina te moji mwaji na nɔbɛ, mwa tokokalwa epundu. 36 Usya nyo ɔbɛ yahajɛ yaji o moji, teka minɛ iyate ecesa yaji o epundu, yahajɛ yejaka o moji, nda etɛ ya elambi ya yonjɛ ɔbɛ buce.»

Zɛzi ahacɛ bafalizɛ na menlɔnji mya ceko mwa Zambe

37 Usya Zɛzi ahijɛsɛ bosɔhɔkɔ, ya iwate falizɛ, ahimwa ango ijaka maja bya Elongwɛ eji, ya ango akweya na ihulaka hinsi okuna etaka ya baja maja. 38 Ya Falizɛ ayɛnɛ Zɛzi ijaka maja, teka beka ibonhu ja ango ipubɛcɛ mabɔ, ya ango ayecɛ. 39 Ya Ku asɔhɔ na neji te: «Yɛnɛcɛ nda bihi bafalizɛ baji. Byangupubɛcɛ mekɔngɔ mya bepɛlɛ na mya bakala, nde okatɔ melema mya bihi myaje humɔn na matemange ma bwa, na ihingamaka ihibaka. 40 Byayoke nembanemba, Zambe amuhuna mekɔngɔ, ango okayi amuhuna na katɔ ya mwɛnyi. 41 Okate, wɛcɛ mentende bemba byaji o bepɛlɛ na bakala ba bihi, na etɛ yɛ, byahajɛ bya bihi byabijaka pu. 42 Emba ya bohihi yabipundaka bihi bafalizɛ! Ya byanguwɛcɛ na Zambe dimi ^{▼▼dimi Dimi aje usya oji na bemba jonwu, ete owɛ ɛkɔ na Zambe. Yango ya babanga dimi.} wa ndundulu, wa bapɔjɛ ba bakwaka na bapwa o bejici. Nde, byayebijɛ ijaka hongololo na bato na inɔnɔkɔ Zambe. Emba ya byamucobeka boho yɛ, teka yebijɛ ibyate. 43 Emba ya bohihi yabipundaka bihi bafalizɛ! Byangunɔnɔkɔ ijaka o masi maboho o belongwɛ bya membɔndu, na inɔnɔkɔ te basosace bihi o masi ma beluka. 44 Emba ya bohihi yabipundaka bihi! Byaje nda behanda byabaji teka yɛnɛ, na bato ijongaka ukwa byango teka yeba!» 45 Imwate lɔnji mwa ceko mwa Zambe mwa sɔhɔ neji te: «Lɔnji, usya o sɔhɔ nɛ, o lowɛ na bɛhɛ!» 46 Zɛzi ahungwɛ neji te: «Emba ya bohihi yabipundaka bihi! Menlɔnji mya ceko mwa Zambe! Byanguhacɛ ukwa bato byɛlu bya bojilo buce, nde byanyamwe bango ibɛpɛcɛ byɛlu mɛnɛ. 47 Emba ya bohihi yabipundaka bihi! Bayebɛ behanda bya mentɔci, mya bakɔkɔ ba bihi ba bomasa! 48 Usya byabeka nɛ, ihɛlɛcɛ te byehimɛ bemba bya bakɔkɔ ba bihi bamubeka, na bosina bwa te bango beboma mentɔci, ete bihi byayebɛ behanda bya mentɔci mɛnɛ! 49 Bosina mɛnɛ Zambe o bokombo bweji asɔhɔ na bango te: “Melomaka bango mentɔci na batɔtu, babibomaka o panga ango, na indenjɛcɛ ibate.” 50 Bosina mɛnɛ, Zambe abipabaka bato ba mwanga mutɛ na bosina bwa maza ma mentɔci myahajɛ, mya babomasa o itase ja mɔngɔ. 51 Imanyaka maza ma Abɛli, wa na maza ma Zakali wa babomasa opanga etaka ya bawɛ bebuwa na njimba. Matanda bihi mombo, bato ba mutɛ mwanga bejaka o nyanwu mwa malɛlɛ mɛ! 52 Emba ya bohihi yabipundaka bihi, melɔnji mya ceko mwa zambe! Byekwa mesabi myajibwa itulu ja iyeba, bihi mɛnɛ byakweye, nde byanguhimbaka banɔnɔ ikweyaka.» 53 Usya Zɛzi amanyasa o Elongwɛ yɛ, melɔnji mya ceko mwa Zambe na bafalizɛ, basɔnɔ na inganyaka buce amɛnɛ neji, na ihimwaka ango bekana, o mambo mɛ mahajɛ 54 Bajakasa obolamba ango na bekana bya bango bahimwakasa ango, ihakaka bekana bibebe byango esɔhɔkɔ, ete bahacɛ ango ibuza.