Luk 15 | KoqSC | STEP | Bakwe ba bokula, na bato bamɛsɛmbɛ, Basɔnɔ okuna Zɛzi, iyokaka iyɔkɔ ja Zambe.

Luke 15

Lembya mwa endɔmbu yamulapa

1 Bakwe ba bokula, na bato bamɛsɛmbɛ, Basɔnɔ okuna Zɛzi, iyokaka iyɔkɔ ja Zambe. 2 Ya bafalizɛ, na melɔnji mya Iyɔkɔ ja Zambe, bakakwa Zɛzi na isɔhɔkɔ te: «Otɛ moto, ahimɛ bato bamesɛmbɛ, na ijaka bango ango!»

3 Ya Zɛzi asɔhɔ na bango na lembya te: 4 «Ice moto opanga bihi, aje na bendɔmbu tɔsini. Wɛnɛ yɔkɔ yalapa, mwaji jika bendɔmbu basini meboto tanyi na nanyi bite o bɔngɔ, ete alwa, ihakaka yɔkɔ yamulapa ango, ngu na isi yango ekumɛcɛ yango. 5 Usya ango akumɛsɛ yango, ango te aceba, Na ihacɛcɛ yango ukwa bebɛcɛ. 6 Yango aya, na yango bya itona jeji. Na ibangaka bananyangwɛ, na ba bango na bango baji te: “Yakayi, mekumɛ endɔmbu amɛ, yamulapa. Mina cebace na bosina bwa yango!” 7 Yaje, nda moto aji o mesɛmbɛ, usya ango ajika mesɛmbɛ, na ihimɛcɛ Zambe, yaje na ncebo mwa inɛnɛ bya iko, mwayekana ncebo mwa bato basini meboto tanyi na nanyi, baji hongololo ba teka haka ihongɛcɛ bejemi byango.»

Mwehito akumɛ efula eji ya lɔlɔ yalapasa

8 Ya Zɛzi ahuwana bosɔhɔkɔ na bango na imwate lembya te: «Ice mwehito, aje na befula bya balɔlɔ jonwu, alapɛ ɛkɔ, mwaji yonjɛ elambi, na ikɔmbɔ Elongwɛ , na ihakaka obweji ngu na isi ya ango ekumɛcɛ yango? 9 Usya ya ango akumɛ yango, abanga bananyangwɛ, na ba bango na bango baji na isɔhɔkɔ na bango te: “Yakayi minacebace, bosina te mekumɛ efula ya lɔlɔ amɛ yalapasa!” 10 Okate, matanda bihi te, yajɛ etɛ mɛnɛ ɛkɔ, nda usya ya moto wamesɛmbɛ ahimɛ Zambe, bangɛlɛ ba Zambe bya iko bajɛ o ncebo.»

Lembya mwa mwana amulapa

11 Ya Zɛzi asɔhɔ na imwate lembya te: «Moto aje na bana baba. 12 Ya wa isiki asɔhɔ na hangwɛ te: “Hangwɛ amɛ, wɛcɛ imɛ iyamɛ ngabo ya bokumani yaji ejikala amɛ.” Ya hangwɛ akaba ejikala eji opanga bana baba. 13 Usya minyan mayekanasa, ya mwana eji wa isiki ahombasa bejikala ibweji bwahajɛ, na ango ilwaka imwate mɔngɔ mwa bopama. O mɔngɔ mɛnɛ ahema balɔlɔ beji bahajɛ o ma mbambaka, na bemba bibebe. 14 Nde, usya ango ahijɛsɛ balɔlɔ beji bahajɛ, ya za yatuwa o mɔngɔ mwɛ, ajasa teka minɛ nembanemba. 15 Ya ango alwa ijazaka bya iwate moto wa mɔngɔ mwɛ aji, ya moto wɛ, aloma ango ikɔlɔkɔ bangulu beji o mepinji. 16 Mwana wɛ, ahakakasa neji ijaka maja ma bangulu, nde teka moto ewɛcɛ ango. 17 Usɛ, ya ango atemanga na isɔhɔkɔ te: “Bya mboka hangwɛ amɛ aje na bajazi buce, baji na maja mabuce, nde, imɛ byete majetɛ na za! 18 Mehuwanaka bya mboka ya hangwɛ amɛ, metandaka ango te: Hangwɛ amɛ, mebeka sɛmbɛ na Zambe, na nɔbɛ, 19 bosina mɛnɛ, imɛ teka nyeni minibangubwɛ mwana ɔbɛ. Bekaka te majazace nɔbɛ nda imwate njazi.” 20 Ya ango ahuwana bya hangwɛ eji aji.

«Mwana aneci bopama, ya hangwɛ ayɛnɛ ango cɛyi. Ya ango asukwa itakaka na mwana, na isimbɛcɛ ango na ipyɔkɔkɔ ango mama. 21 Okate, ya mwana asɔhɔ na hangwɛ te: “Hangwɛ amɛ, mebeka sɛmbɛ na Zambe, na nɔbɛ, bosina mɛnɛ, imɛ teka nyeni minibangubwɛ mwana ɔbɛ.” 22 Nde, hangwɛ asɔhɔ na menjazi imyeji te: “Kwakwa, yaka na nkanda mya mwa ihɛnwu ihajɛcɛ mwana amɛ, hujɛcɛ ango mɔndɔ o hanyin, na bengwɛngwɛ o mako. 23 Yaka na mwa mwana wa nyate wa inɛnɛ wɛ, bomaka ango, minabekace elɛsi ya inɛnɛ, na ijaka wango, 24 bosina te, mwana mɛ amuja o ilɛlɛ, nde elumya na malonga, ajasa elapa, nde mekumɛ ango.” Ya bango bakoma elɛsi.

25 «O elɔmɔ yɛ, mwana eji wa mboma, ajazakasa bya kuba. Usya ango, alumyasa, ahinyana kunakuna na Elongwɛ ya ango yoka beboka na mabina. 26 Ya ango banga imwate njazi, ihimwaka ango te: “Ya nyoko mwɛ bende?” 27 YA, njazi mwahungwɛ neji te: “Yɛ, zimi ɔbɛ amulumya, ya hɔngwɛ amuboma mwa mwana wa nyate wa inɛnɛ wɛ, bosina bwa ango amukumɛ mwana eji, na nyo ya bɔnhu.” 28 Ya, mwana wa boho anganya, ya ango abena ikweyaka o Elongwɛ . Ya hangwɛ apwa ibɔndɔkɔ ango ikweyaka o Elongwɛ . 29 Nde, mwana eji wa boho ahungwɛ neji te: “Biyoka, moyɛne te, mebeka menkola buce mya majaza na nɔbɛ, matabena mapeko ma ɔbɛ. Nde, motowɛ imɛ mwa mwana wa endɔmbɔ wa isiki ibekaka elɛsi bɛhɛ na bananyangwɛ bamɛ. 30 Mwana obɛ otɛ, eja ejikala eji yahajɛ na bahito, usya ya ango amuya, ɔbɛ te oboma mwa nyate wa inɛnɛ na bosina bweji!” 31 Ya hangwɛ ahungwɛ neji te: “Mwana amɛ, ɔbɛ oje mbɛmbɛyi na namɛ, byaji na namɛ bitɛ byahajɛ ibyɔbɛ. 32 Nde, mejaka teka beka elɛsi na icebaka na? Zimi ɔbɛ aja ewa, nde ekumɛ ndonga, ajasa elapa, nde, bekumɛ ango.”»