Luk 19 | KoqSC | STEP | Zɛzi akweya o eposi ya jinɔ te, Zeliko, ya ango alenanga yango.

Luke 19

Zɛzi na zase

1 Zɛzi akweya o eposi ya jinɔ te, Zeliko, ya ango alenanga yango. 2 Usɛ, yajasa na moto wa jinɔ te Zase, ajasa nɛni mwa bakwe ba bokula, ajasa na bokumani buce. 3 Ahakakasa iyɛnɛcɛ Zɛzi, nde, bato buce ba jibɛkɛsɛ ango, bosina te ajasa mwa ntɛtɛ bunwe. 4 Ya ango sukwa bya boho, na ihakamaka ukwa mwele mwa jinɔ te, Sikɔmɔli, iyɛnɛcɛ Zɛzi, bosina te, eyekanaka o panga mɛnɛ yɛ. 5 Usya Zɛzi apundasa o panga mɛnɛ yɛ, ya ango abesɛ minhɔn na isɔhɔkɔ na Zase te: «Zase, hulaka kwakwa, bosina te mwenhe mutɛ mehulaka bya Elongwɛ ɔbɛ.» 6 Ya Zase ahula kwakwa na ncebo, ya ango ahimɛ Zɛzi bya Elongwɛ eji. 7 Usya bato bahajɛ bayɛnɛsɛ nɛ, bango te bakakwa Zɛzi, na isɔhɔkɔ te: «Taka Zɛzi alwa inangaka bya itona ja moto wamesɛmbɛ!» 8 Ya Zase atɛmɛ ntɛtɛ o boho bwa Ku, na isɔhɔkɔ na Ku te: «Ku, mewɛcɛ ngabo ya bokumani bwamɛ na metende, wɛnɛ majasa mekwa balɔlɔ buce na moto, mewɛcɛ ango mangabo ma nanyi.» 9 Ya Zɛzi asɔhɔ neji te: «Mwenhe mutɛ, ndonga yekweya o Elongwɛ etɛ, bosina te Zase neji aje moto wa buka bwa Abalami. 10 Bosina te, Mwana moto amuya ihakaka, na iyonjɛcɛ bato bamulapa.»

Lembya mwa befula bya lɔli

11 Ya Zɛzi ahunwana bosɔhɔkɔ imwate lembya na bato bayokakasa mayɔkɔ mɛ, bajasa o kunakuna ya Zelizalɛmi, ba temangakasa te etomba ya Zambe yehulangaka osatɛ. 12 Ya Zɛzi asɔhɔ na bango te: «Moto wa buka bwa bakombo, alwa bya imwate mɔngɔ mwa bopama, ihalaka ezaza ya ikɔkɛcɛ, onyate mɛnɛ ango te alumya. 13 Boho na ango ilwaka, ya ango abanga banjazi ibeji jonwu, awɛ moto mɔkɔ mɔkɔ efula ya lɔli ya ibɔmɔ ja inɛnɛ, ya ango asɔhɔ na bango te: “Bekakayi mombongo na byango, na ibujɛcɛ, ngu na isi ya melumyaka.” 14 Nde, bato ba mɔngɔ imweji babena ango, na ilomaka batɔtu o mbiya eji, na itandaka te: “Batahaka te, moto wɛ, ajace nɛni imwaho.” 15 Nde, behajɛ ango ezaza ya ikɔkɛcɛ ango te ahunwana bya mɔngɔ mweji, usya ango alumya, ya ango abanga banjazi ibeji ba ango awɛsɛ befula bya balɔlɔ, ahakakasa iyebaka nyoko mwa bango babujɛsɛ. 16 Ya njazi mwa boho mwaya na isɔhɔkɔ te: “Lɔnji, mamu pojɛ befula bya lɔli jonwu, na efula ya lɔli ya omuwɛ imɛ.” 17 Ya nɛni mwɛ, mwahungwɛ neji te: “Nɛ mbɛ, oje njazi mwa pizo, omuja ekɔsɛ bana bemba bisiki, yango ya mewɛcɛ ɔbɛ ikɔkɛcɛ beposi jonwu.” 18 Wa mba neji te aya, na isɔhɔkɔ te: “Lɔnji, mamuje pojɛ befula bya lɔli bye tanyi, na efula ya lɔli ya omuwɛ imɛ.” 19 Ya nɛni mwahungwɛ neji te: “Obikɔkɛcɛ beposi betanyi.” 20 Ya imwate njazi mwaya, na isɔhɔkɔ neji te: “Lɔnji, taka efula ɔbɛ ya lɔli, mamuje hɔjɛ yango kotekote na ombabo. 21 Mayɛnɛsɛ bɔngɔ bosina te, oje moto wa bwa,” 22 Ya nɛni mwɛ, mwahungwɛ neji te: “Oje njazi mwa ibebe, mepaba ɔbɛ na bekana ibyɔbɛ amɛnɛ. Oyebasa te maje moto wa bwa, makwa emba ya maji teka jika, mahuwa emba ya maji teka kona. 23 Sina ya omuja teka hujɛ balɔlɔ bamɛ o bankibende? Usya, mamuco lumya, mamuco kwa bango na hacɛ.” 24 Onyate mɛnɛ, nɛni mwɛ asɔhɔ na bajasa okate te: “Palaka ango efula ya lɔli yaji neji yɛ, ete byawɛ na aji na jonwu wɛ.” 25 Ya bango bahungwɛ na neji te: “Lɔnji, aje na befula bya lɔli jonwu!” 26 Ya nɛni mwɛ, mwahungwɛ na bango te: “Matanda bihi te, moto aji na emba, bewɛcɛ ango buce, nde, moto aji teka na emba, bejɛlɛcɛ ango na ya ango aji na yango. 27 Na bapala bamɛ, bamubena te imɛ teka kɔkɛ bango, iyaka imɛ na bango biyetɛ, bomaka bango o boho bwamɛ.”»

Zɛzi ahulanga bya Zelizalɛmi

28 Usya ango ahijɛsɛ bosɔhɔkɔ nɛ, ya Zɛzi ajongakasa o boho bwa bato, ilwaka bya Zelizalɛmi. 29 Zɛzi apunda o kunakuna na Bɛtifaze na Betani, bya kunakuna na nkoza mwa mwele mya ba Olivye, ya ango aloma bayokwɛ ibeji baba. 30 Ya ango asɔhɔ na bango te: «Lwaka bya mboka yaji o boho bwa mini yɛ, usya bye hulangaka, bye kumɛcɛ mwa mwana kabala wa bamusinjɛ, wa moto teka bihakama okate. Hundwaka ango ete byaya imɛ na neji biyetɛ. 31 Wɛnɛ moto ahimwa bihi te: “Ya byahundwa angobende?” Hungwɛcɛ neji te: “Ku ahaka.”»

32 Ya bayokwɛ baba balwa, na ikumɛcɛ bemba nda Zɛzi atandasa bango. 33 Usya bango bajakasa obohundwaka mwa kabala wɛ, ya baku mɛnɛ bahimwasa bango te: «Sina ya bya hundwa mwa kabala wɛbende?» 34 Ya bayokwɛ bahungwɛ te: «Ku ahaka.» 35 Ya bango baya na kabala bya Zɛzi aji, ya bango hacɛ bepulupulu byango ukwa kabala, na ihacɛcɛ Zɛzi. 36 Usya ango ahinyanakasa, bato bananjɛkɛsɛ bepulupulu byango o pɛyi. 37 O elɔmɔ ya ango ahinyanakasa bya Zelizalɛmi, o pɛyi ya tɔngɔmɔ bya, nkoza mwa mwele mya ba Olivye, okate, ngabo ya bayokwɛ bajasa o ncebo buce, ya bango bahula iyembaka beboka bya Zambe na bekɔlu bya pizo, na bosina bwa bango bayɛnɛsɛ ango na tuma ibekaka mayambala. 38 Ya bango basɔhɔ te: «Zambe ewɛcɛ ipota na nɛni mwaya na jinɔ ja Ku! Itabu bya iko, kuma na Zambe bya nyangwɛ wa iko!» 39 Mwa ngabo wa bafalizɛ, ajasa o panga bato, ya bango bawɛ masicɛ na Zɛzi te: «Lɔnji, kanjɛcɛ bayokwɛ ibɔbɛ!» 40 Ya Zɛzi ahungwɛ na bango te: «Matanda bihi te, wɛnɛ bango bakanga, mamanya mepotangaka!»

Zɛzi angweya na bosina bwa Zelizalɛmi

41 Usya Zɛzi ahinyana okuna Zelizalɛmi, na iyɛnɛcɛ ango, ango te angweya na bosina ibweji, 42 na isɔhɔkɔ te: «Na nɔbɛ ndi yebaka o mwenhe, nda bakumɛ itabu. Nde, osatɛ bemba byɛ byehɔmɔ na minhon mɔbɛ! 43 Minyan mango aya, ma bapala ibɔbɛ bekubaka ɔbɛ na menkaka mya inɛnɛ, belɔmɔnɔkɔ ɔbɛ, na ikanjɛcɛ ɔbɛ bepɛyi byahajɛ. 44 Usɛ, babi hemaka ɔbɛ bina lupu ijɔbɛ jahajɛ, baji jika ɔbɛ na imanya jɛkɔ ukwa ijate, na bosina te, momu yeba elɔmɔ ya Zambe amuya ipokwaka ɔbɛ!»

Zɛzi apepa babeka mombongo o Elongwɛ ya Zambe

45 Zɛzi akweya o Elongwɛ ya Zambe, ahula ipepaka babeka mombongo, 46 na isɔhɔkɔ na bango te: «Mangwɛli matanda te: “Elongwɛ amɛ, yejaka Elongwɛ ya membɔndu.” Nde, bihi byakahujɛ yango isi ya mibi mya hɔmɔ!» 47 Minyan mahajɛ, ahɛlɛkɛsɛ bato iyɔkɔ ja Zambe, o Elongwɛ ya Zambe. Menɛni mya bawe ba bebuwa, melɔnji mya ceko mwa Zambe, na bakombo ba lupu, bahakakasa iyɔkɔ ja bango benyeni boma Zɛzi. 48 Nde, bango biyebasa, nda bango be nyenibeka, bosina te, lupu jahajɛ ja yokakasa ango na izime ja inɛnɛ.