Luke 21

Nkuwɛ mwa botende mwamuwɛ buce

1Onyate mɛnɛ, Zɛzi atakasa, ya ango ayɛnɛsɛ nda menkumani myasɔmɔkɔsɔ balɔlɔ bango o isi ya bahujɛ. 2Ya ango ayɛnɛ te na nkuwɛ mwa botende buce, ihujɛcɛ bana befula bya balɔlɔ beba. 3Ya Zɛzi asɔhɔ te: «Mombo matanda bihi, nkuwɛ mwa botende buce mutɛ mwewɛ buce iyekaka banɛ bahajɛ. 4Bosina te, banɛ bahajɛ bamuwe balɔlɔ bango bajasa teka nɔnɔ, nde nkuwɛ mwɛ, na botende ibweji bwahajɛ, amuwe, ejikala eji yahajɛ ya ango amuyonga ja na bango.»

Zɛzi atanda te elongwe ya Zambe ye kulwanakasa

5Iyate ngabo ya bato ya pakakasa Elongwɛ ya Zambe, na mamanya mabongɔndɔ ma balongasa Elongwɛ yɛ, na ibyate bemba bya bondonga bya basɔmɔkɔsɔ. Ya Zɛzi asɔhɔ te: 6«Nde o minyan meyakasa mɛ, bya byayɛnɛ byɛ, byaji hisasa na imanya na imanya. Mɛ, mahajɛ mehemanakasa!»

Mandembo ma ihiye ja mɔngɔ

7Ya bango bahimwa ango te: «Lɔnji, meyekanakasa sondi ya? Mandembo ma beyaya mɛnɛ byɛ, mabende?» 8Ya ango ahungwɛ na bango te: «Dzaka na bocɛngu, teka jika te, moto alungace bihi. Bosina te, bato buce beyakasa na jinɔ ijamɛ besɔhɔkɔsɔ te: “Yɛ imɛ!” Ibate, besɔhɔkɔsɔ te: “Elɔmɔ ye hinyana!” Teka hinjɛ bango. 9Usiya byeyokakasa mabaji na mehemako mya ijɛlɛcɛ menɛni, byako jace na bɔngɔ, bosina te, yayace bohoboho, nde ihiye ja mɔngɔ habe jɛ.» 10Ya ango asɔhɔ na bango te: «Lupu na lupu bebomanakasa, betomba na betomba beyanakasa na ibaji. 11Hehe yabi ninganakasa buce, imate masi ma mɔngɔ mejakasa, na mokuku, za, bemba bya bohihi, na mandembo ma minɛnɛ bya iko.»

Be ndenjɛcɛ bayokwɛ ba Zɛzi

12«Nde, boho na bemba byɛ byahajɛ, be bandaka bihi, be ndenjɛcɛ bihi, be lwaka na bihi o belongwɛ bya mebɔndu ipabaka bihi, be hujɛcɛ bihi o njoko, be lwaka na bihi o boho bwa menkani, na menɛni na bosina bwa jinɔ ijamɛ. 13Usɛ, ye jaka elɔmɔ ya bihi itandaka bemba bya byamuyɛnɛ na namɛ. 14Yokakayi obwɛji. Teka temanga bohoboho njanga mwa bekana mwa byenyeni kambɛ manyo ma bihi. 15Bosina te, mabiwɛcɛ bihi mayɔkɔ ma mbɛ na bokombo, bwa bapala ba bihi be jaka teka petwɛ na icɛcɛcɛ. 16Yali ya bihi, ba bihi na bango bayenga mwɛnyi, buka bwa bihi, na bananyangwɛ ba bihi, behombakasa bihi, na ihujɛcɛ buce o panga bihi o nyawun mwa ilɛlɛ. 17Bato bahajɛ be benakasa bihi bosina ibwamɛ. 18Nde, teka na o huwe mɔkɔ bwa myelo mya bihi bwelapakasa. 19Usiya byekangamakasa oyonjɛcɛ ngwanda ɔbe.»

Zelizalɛmi ahemana

20«Usiya byeyɛnɛcɛ bahɔlɛ bakuba Zelizalɛmi, yebakayi te bohemanaka ibweji bwahinyana. 21Okate, bejakasa bya Zude, besukwakasa bya mabete, bejakasa bya lemalema mwa Zelizalɛmi, bapundace ilɔngɔkɔ, na bejakasa bya mepinji, bajace teka kweya o eposi. 22Bosina te, yejakasa minyan ma ngamo. O minyan mɛnɛ mɛ, byahajɛ bya bakwɛlɛsɛ o Buku wa Zambe, bya hulangakasa. 23O minyan mɛnɛ mɛ, yejakasa bohihi, na bayito baji na myɛnyin, na benyanjɛkɛsɛ bana, bosina te, yejakasa na bohulu o hehe, ibuku ja Zambe jejakasa ukwa lupu jɛ. 24Bebomakasa bango na mambɛji, belwakasa na bango menkoma o myɔngɔ myahajɛ, bato ba teka ja Bazufi babi jangakasa Zelizalɛmi, ngu na isi elɔmɔ ya Zambe awɛsɛ bango ye kokakasa.»

Ilumye ja Mwana moto

25«Yejakasa na mandembo o yoyi, o ngɔndɛ, na o myɛsi. lupu je jakasa na bɔngɔ o hehe, usiya zowa ya macemba yehokakasa na bonɛni bwa mapoci. 26Bato bewakasa na bɔngɔ buce usya bango betemangaka bemba byeyakasa o hehe, bosina te, iko jeninganakasa na mapizo mango mahajɛ. 27Usɛ, beyɛnɛkɛsɛ Mwana moto ihulaka o katɔ ya mbici na tuma eji yahajɛ na kuma. 28Usiya byeyɛnɛcɛ itasɛ ja bemba byɛ ihulangaka, tendwakayi, besɛcɛ myolo, bosina te elɔmɔ ya Zambe eyonjɛcɛ bihi ya hinyana.»

Elɔmɔ ya Zambe ekɔkɛcɛ ya hinyana

29Ya Zɛzi asɔhɔ na bango na imwate lembya te: «Yɛnɛcɛ mwele mwa fingi, na imwate myele, 30usiya bye yɛnɛkɛsɛ bokayi bwa ihɛnwu ipwaka, yebakayi te, ntubwaku mwahinyana. 31Etɛ mɛnɛ, na bihi, usiya bye yɛnɛcɛ bemba ihulangaka, yebakayi te etomba ya Zambe ya hinyana. 32Matanda bihi mombo, mwanga mutɛ mwaji yekana bemba byɛ byahajɛ teka hulanga. 33Iko na hehe, beyekanakasa, nde, mayɔkɔ imamɛ maji yekanasa!»

Dzaka na bocɛngu bihi mɛnɛ

34«Dzaka na bocɛngu bihi mɛnɛ! Bosina te, melema mya bihi mya toko jila na iyɔtwɛ, na matemange ma mɔngɔ, bosina te, buya bwɛ bwatoko ya bihi teka yeba. 35Nda kɔ, abanda bafɛ, etɛ mɛnɛ ɛkɔ ya ango eyakasa ukwa bato ba hehe bahajɛ. 36Okate, jaka ngwɛ, na himwaka bekusi byahajɛ, na bosina bwa bye jaka na pizo ya iyongaka na bemba bye usiya bya ango bye hulangaka, na bihi itɛmɛcɛ o boho bwa Mwana moto.»

37Na ekombe Zɛzi ahɛlɛkɛsɛ iyɔkɔ o Elongwɛ ya Zambe, nde, na ikɔ alwa iyejɛcɛ buya o ibete ja ba banga te, «Ibete ja myele mya bolivye.» 38Na kwaji na kwaji, lupu jahajɛ jayakasa bya ango aji bya Elongwɛ ya Zambe iyokaka ango.