Luk 22 | KoqSC | STEP | Usiya elɛsi ya pɛmbɛ mwa teka levɛn, ya jinɔ te Paki, ya hinyanasa,

Luke 22

Yumbu ya nyo ya Zɛzi

1 Usiya elɛsi ya pɛmbɛ mwa teka levɛn, ya jinɔ te Paki, ya hinyanasa, 2 menɛni mya bawe ba bebuwa, na melɔnji mya ceko mwa Zambe, bahakakasa njanga mwa bango benyeni boma Zɛzi, nde, bajasa na bɔngɔ bwa lupu. 3 Okate, Sata akweya o lema mwa Zuda wa ba banga te moto wa Isikaliɔti, ajasa neji o ngabo ya bayokwɛ jonwun na mba. 4 Ya Zuda alwakasa iyokanaka bango na menɛni mya bawe ba bebuwa, na menɛni mya kɔlɔkɔsɔ Elongwɛ ya Zambe, na ihakaka njanga mwa ango enyeni homba Zɛzi. 5 Okate, myajasa o ncebo, ya myango mya himɛ iwɛcɛ ango balɔlɔ. 6 Onyate mɛnɛ, ya ango ahimɛ, na ihakaka elɔmɔ ya mbɛ ya ango nyeni homba Zɛzi lupu teka yeba.

Zɛzi aloma bayokwɛ beji sojɛcɛ ngumba wa elɛsi ya Paki

7 O buya bwa elɛsi ya pɛmbɛ mwa teka levɛn, elɔmɔ ya ba bomakasa endɔmbɔ ya ebuwa ya elɛsi ya Paki ya koka, 8 ya Zɛzi aloma Pyɛli na Za, na isɔhɔkɔ na bango te: «Lwaka osojɛcɛ ngumba ya elɛsi ya Paki, mina jace.» 9 Ya bango ahimwa ango te: «Ohaka te bayambace ango biya?» 10 Ya ango ahungwɛ na bango te: «Usiya byepundaka o eposi, bye yɛnɛcɛ ndomana aya bɛpɛ mbongo ya nso, eyaka itakaka na bihi. Hinjɛcɛ ango bya Elongwɛ ya ango ekweyaka. 11 Ya bya tanda na ku wa elongwɛ te: “Lɔnji ahimwa ɔbɛ te, isi ya Elongwɛ ya ango ejaka elɛsi ya Paki bango na bayokwɛ beji, yabe biya?” 12 Abihɛlɛcɛ bihi isi ya elongwɛ ya iko ya inɛnɛ ya yɛbeyɛbe, yango ya byeyambaka elɛsi ya Paki.» 13 Ya bango alwa, na ikumɛcɛ bemba nda Zɛzi amutanda bango, na iyambaka maja ma elɛsi ya Paki.

Yonga ya ihɛnwun na maza ma Zɛzi

14 Usiya elɔmɔ yɛ ya kokasa, Zɛzi na batɔtu beji, bahula te ijaka maja. 15 Ya ango asɔhɔ na bango te: «Mamuhaka ijaka elɛsi ya Paki otɛ na bihi, boho na imɛ iyɛnɛcɛ mezuku! 16 Bosina mɛnɛ, bwa matanda bihi te, majimaka ja, ngu na isi ya elɔmɔ ya Zambe ikɔkɛcɛ bato beji yehulangaka.» 17 Ya ango akwa dala, abɔndɔngɔ na iwɛcɛ Zambe mambomala, na isɔhɔkɔ te: «Kwaka dala otɛ, kabaka o panga bihi, 18 Bosina mɛnɛ, bwa matanda bihi te, maji makawan minɛ maku ma vinyi matɛ, ngu na isi ya elɔmɔ ya Zambe ikɔkɛcɛ bato beji yehulangaka.» 19 Onyate mɛnɛ, akwa pɛmbɛ, usiya ango ahijɛ ibɔndɔngɔkɔ na iwɛcɛ Zambe mambomala, ya ango buna na iwɛcɛ bango, na isɔhɔkɔ te: «Emba etɛ nyo amɛ, ya mawɛ na bosina bihi, bekaka nɛ iyebwaka imɛ.» 20 Onyate ya maja, ya ango abeka etɛ mɛnɛ ɛkɔ na dala wa maku, ya ango asɔhɔ te: «Dala wa maku otɛ, aje yonga ya ihɛnwu na maza mamɛ maji obohoyaka na bosina bwa bihi. 21 Nde, ngwɛnɛ moto ehombaka imɛ, ajetɛ bojaka maja bɛna eji. 22 Bosina te, Mwana moto abiwaka nda Zambe amusinjɛ, nde emba ya bohihi na moto ehombaka ango!» 23 Ya bayokwɛ batatuba o panga ango, na sɔhɔkɔ te: «Opanga mini, enyeni beka emba ya njanga mwɛ beza?»

Aji moto wa inɛnɛ o panga bihi beza?

24 Ya bayokwɛ ba banda icɛcɛ o panga ango te: «Aji moto wa inɛnɛ opanga mini beza?» 25 Okate, ya Zɛzi asɔhɔ na bango te: «Menkani mya betomba ja ango nda ba ku, na menɛni mya kɔkɛ bato, mya haka te ba bangace bango, bato ba nɔnɔ ibekaka bɔnwu. 26 Nde bihi, byakojace nda bango. Moto wa inɛnɛ o panga bihi ajace nda musiki, moto akɔkɛ ajace nda awɛ. 27 Usɛ, aji moto wa inɛnɛ beza? Aja maja, kate awɛ maja? Hɛbɛ moto aja! Nde, imɛ majetɛ o panga bihi nda awɛ! 28 Bihi byajɛ bato bajasa na namɛ usiya bandenjɛsɛ imɛ, 29 bosina mɛnɛ, bwa mewɛcɛ bihi pizo ya ikɔkɛcɛ, nda Hangwɛ amɛ amuwɛ imɛ. 30 Yango ya byejakasa maja na iwankasa maku o Etomba amɛ, na ihulakasa mehinsi o bekozi bya bonɛni, ipabaka makaka jonwun na mba ma Izahɛli.»

Zɛzi atanda te Pyɛli ecɛcɛcɛ ango

31 Ya Zɛzi sɔhɔ na Pyɛli te: «Simɔn! Simɔn! Sata anguta himwa bihi, inyɛngisɛcɛ bihi nda mambolo na ipatwɛcɛ mango na bepazi. 32 Nde, imɛ himwaka na bosina ibwɔbɛ, bosina te, ibukwɛ ijɔbɛ, ja tokolapa. Usiya o lumyaka bya amɛ aji, wɛcɛ bazimi bɔbɛ pizo.» 33 Ya Pyɛli asɔhɔ neji te: «Ku amɛ, majetɛ ngwɛ, mini ilwaka o njoko, na iwaka mini baba.» 34 Zɛzi ahungwɛ neji te: «Pyɛli, matandɛ ɔbɛ, boho na hoho ihijɛcɛ bolɔngɔkɔ mwenhen ocɛcɛcɛ imɛ bekusi behanto.»

Balɔlɔ, ebɔmbɔ na ngombele

35 Ya Zɛzi amaka sɔhɔ na bango te: «Usiya malomasa bihi teka na lɔlɔ, na ebɔmbɔ, na bengwɛngwɛ, byajasa bepena na emba?» Bahungwɛ neji te: «Hamama!» 36 Ya ango asɔhɔ na bango te: «Nde osatɛ, aji na lɔlɔ akwace, na aji na ebɔmbɔ akwace, nde aji teka ngombele, ahombace epulupulu eji, ihombaka ngombele. 37 Bosina mɛnɛ, bwama atanda bihi te, emba ya bamukwɛlɛ na bosina ibwamɛ o Buku wa Zambe ya bekubwɛce. Mangwɛli mɛnɛ masɔhɔ te: “Bekwa ango nda mbɔnwu.” Mombo, bemba bya bamukwɛlɛ na bosina ibwamɛ, bya bekubwɛce.» 38 Ya bango basɔhɔ te: «Ku, taka bangombele baba.» Ya ango asɔhɔ na bango te: «Yehiya!»

Zɛzi abɔndɔ ukwa ibete ja myele mya ba Olivye

39 Ya ango apunda na ilwaka nda ibonwu ijeji, o ibete ja myele mya ba Olivye, ya bayokwɛ ibeji bahinjɛ ango. 40 Usiya ango apwasa usi mɛnɛ, ya ango asɔhɔ na bango te: «Bɔndɔngɔkɔ bosina te, bya toko tuwa usiya yabe mamaka bihi.» 41 Okate, ya ango dambwa nyo na bango bopama bwa matambi memboto ntoba, na ihumaka mabɔngɔ ibɔndɔngɔkɔ. 42 Ya ango asɔhɔ te: «Hangwɛ amɛ, ice onɔnɔ, pamɛcɛ mɛ mezuku mitɛ na namɛ. Nde, bekaka nda onɔnɔ, habe nda manɔnɔ.» [ 43 Ya ngɛlɛ ayenga bya iko, ahɛlɛ ango nyo, na iwɛcɛ ango pizo. 44 Ya ibonda ja banda ango, ya ango abɔndɔngɔ buce, etuku eji ya kalwana nda maza, na itangaka o hehe.] 45 Usiya ango ahijɛsɛ bobɔndɔngɔkɔ, ya ango aya bya bayokwɛ ibeji baji, na ikumɛcɛ bango benanga na bohulu. 46 Ya ango asɔhɔ na bango te: «Ya bya nanga nɛ nde? Yemwakayi ete bya bɔndɔngɔ, bosina te, bya toko tuwa usiya bemamaka bihi!»

Ibande ja Zɛzi

47 Usiya ango ajakasa obosɔhɔkɔ, ya bato baya, na iwate yokwɛ eji wa jinɔ te Zuda. Ajasa neji o bayokwɛ jonwu na mba, ajongakasa o boho bwango, na ihinyanakasa bya Zɛzi aji, iyaka isimbɛcɛ ango. 48 Ya Zɛzi asɔhɔ neji te: «Zuda, osimbɛ Mwana moto ihombaka ango?» 49 Usiya bato bajasa bango na Zɛzi, bayɛnɛsɛ jambo jɛ nda jango ja yongasa hulanga, ya bango basɔhɔ na neji te: «Ku, bɛhɛ balumanace na bangombele?» 50 Iwate o panga ango, apazɛ njazi mwa nɛni mwa bawe ba bebuwa na iyuwaka ilɔ ja epɛyi ya obɔ bwa hangwɛ. 51 Nde Zɛzi asɔhɔ te: «Dzikaka ye hiya.» Ya ango banda ilɔ ja moto wɛ, na ihakaka ango. 52 O nyate mɛnɛ, Zɛzi asɔhɔ na menɛni mya bawe ba bebuwa, menɛni mya bakɔle ba Elongwɛ ya Zambe, na bakombo bayasa ibandaka ango te: «Bya muya na bangombele, na mebambu te maje mbɔnwu? 53 Minyan mahajɛ mina jasa isi ɛkɔ o Elongwɛ ya Zambe, bihi bibandasa imɛ. Nde, elɔmɔ ya bihi na pizo ya bulu ye koka.»

Pyɛli acɛcɛ Zɛzi

54 Usiya bango bahijɛsɛ ibandaka Zɛzi, balwa neji bya Elongwɛ ya nɛni mwa bawe ba bebuwa, Pyɛli ahinjɛkɛsɛ bango bopama. 55 Bango te bayonjɛ jiyo o lebelebe ya hɛnjɛ ya bango bahula mehinsi okuna jiyo, na Pyɛli neji ahula hinsi o panga ango. 56 Ya njazi mwa mwayito mwa yɛnɛ ango hinsi o kuna jiyo, ya ango asɔzɛ ango na iyembyaka ango, ya ango sɔhɔ te: «Na ndomana otɛ amuja bango eji!» 57 Ya ango acɛcɛ na isɔhɔkɔ te: «Mwayito, imɛ mayebe ango!» 58 Mwa elɔmɔ bosiki, ya iwate ayɛnɛ ango na isɔhɔkɔ neji te: «Nɔbɛ ojɛ moto wa ango!» Ya Pyɛli ahungwɛ na ndomana wɛ te: «Imɛ habe moto wa ango!» 59 O Nyate ya emba ya nda elɔmɔ ɛkɔ, iwate moto te akangama na isɔhɔkɔ te: «Mombo moto otɛ amuja bango na eji, bosina te, aje moto wa Ngalile.» 60 Nde, Pyɛli ahungwɛ te: «Imɛ mayebe emba ya osɔhɔ!» Ibu jɛkɔ, aneci teka bitujɛ iyɔkɔ, hoho te alɔngɔ. 61 Ya Ku, akalwana na itaka Pyɛli. Ango te ayebwa iyɔkɔ ja Ku asɔhɔsɔ na neji te: «Boho na hoho ilɔngɔkɔ mwenhe ocɛcɛcɛ imɛ bekusi behanto.» 62 Pyɛli te apwa bya hɛnjɛ na ngweyaka buce amɛnɛ.

Balowa Zɛzi na ipazɛcɛ ango

63 Bato bakɔlɔkɔsɔ Zɛzi, bajokwɛ ango na ipazɛcɛ ango. 64 Ya bango bajibɛ ango boho, na isɔhɔkɔ na neji te: «Oje ntɔci, sɔlɔkɔ moto amupazɛ ɔbɛ.» 65 Ya bango balowa ango na imate matoci.

Zɛzi o boho bwa bakombo

66 Usiya buya bwa yejɛsɛ, bakombo ba lupu ja bazufi, menɛni mya bawe ba bebuwa, na melɔnji mya ceko mwa Zambe, basɔnɔ na ilwaka neji o mbaza ya ango ya inɛnɛ, ya bango bapaba mambo. 67 Ya bango bahimwa ango te: «Ɔbɛ Kilisitɛ? Bitanda bɛhɛ!» Ya ango ahungwɛ na bango te: «Wɛnɛ matanda bihi, byaji bukwɛ imɛ. 68 Wɛnɛ mahimwa bihi ekana, byaji hujɛ imɛ nkalo. 69 Nde, imanyaka osatɛ, Mwana moto ehulaka epɛyi ya obɔ bwa hangwɛ bwa Zambe wa tuma.» 70 Okate, bahajɛ bahimwa ango te: «Oje Mwana wa Zambe?» Ahungwɛ na bango te: «Bihi mɛnɛ batanda bɛ, te imɛ ka ango.» 71 Ya bango basɔhɔ te: «Ya mine makahaka moto amukumɛ okate bende, mini mɛnɛ behijɛ iyoka nda ango amusɔhɔ na honko imweji amɛnɛ!»