Luk 23 | KoqSC | STEP | Ya bango bahajɛ bayemwa na ilwaka neji o boho bwa Pilati wa nɛni.

Luke 23

Batɛjɛ Zɛzi o boho bwa Pilati

1 Ya bango bahajɛ bayemwa na ilwaka neji o boho bwa Pilati wa nɛni. 2 Okate, ya bango ba koma ihacɛcɛ ango ibuza ja te: «Bɛhɛ amukumɛ moto otɛ isomɛcɛ lupu ijaho, ya ango asɔhɔ na bango te, teka huta bokula bwa Sezali wa nkani, na imɛmɛcɛ te, ango Kilisitɛ, aje te na Nkani.» 3 Ya Pilati ahimwa ango te: «Ɔbɛ Nkani mwa bazufi?» Zɛzi ahungwɛ na neji te: «Atanda ka ɔbɛ.» 4 Pilati asɔhɔ na menɛni mya bawe ba bebuwa na lupu te: «Mata yɛnɛ emba ya ibebe ya moto otɛ amubeka ya nyenihacɛ ango ibuza.» 5 Nde, bango bakangama na isɔhɔkɔ te: «Asomɛkɛsɛ lupu na maheya meji, atasɛsɛ bya njɛnjamɔngɔ ya Ngalile, na bya Zude wa hajɛ, ngu na biyetɛ.»

Zɛzi o boho bwa Elodi wa nkani

6 Usiya Pilati ayokasa nɛ, ya ango ahimwa te: «Moto otɛ abe wa Ngalile?» 7 Usɛ, ya ango ayebasa te, Zɛzi ajasa moto wa njɛnjamɔngɔ ya Elodi pizo ya ikɔkɛkɛsɛ. Ya ango aloma ango bya ango aji. O minyan mɛnɛ mɛ, Elodi ajasa neji bya Zelizalɛmi. 8 Usiya Elodi ayɛnɛsɛ Zɛzi, ajasa o ncebo mwa inɛnɛ. Bosina te, ahakakasa iyɛnɛcɛ ango, na bemba bya batandakasa ukwa eji, ahakakasa iyɛnɛcɛ ango ibekaka iyambala. 9 Ahimwa ango bekana buce, nde Zɛzi abena ihujɛcɛ ango nkalo. 10 Menɛni mya bawe ba bebuwa, na melɔnji mya ceko mwa Zambe, bajasa okate ihacɛcɛ Zɛzi ibuza na bɔnɔ. 11 Ya Elodi, na mehɔnlɛ imweji ba bɛzɛ ango na ijokwɛcɛ, usiya bango bahijɛsɛ ijokwɛcɛ ango, ya bango ahacɛ ango nkanda mwa bondonga na ihujɛcɛ ango bya Pilati aji. 12 Elodi na Pilati bajasa teka yokana, nde, obuya bwɛ baya bananyangwɛ.

Bahujɛ Zɛzi onyawun mwa ilɛlɛ

13 Pilati asojɛ menɛni mya bawe ba bebuwa, bakombo, na lupu, 14 ya ango ahimwa bango te: «Byamuya imɛ na moto otɛ te, ango asomɛ lupu? Nde imɛ mɛnɛ mehimwa ango o boho bwa bihi, mata yɛnɛ te ekwazɔ na bemba bya byamuhacɛ ango ibuza. 15 Na Elodi mwata yɛnɛ te ekwazɔ, sina ya ango amuhujɛ ango bya mina aji yɛ. Teka emba ya ibebe ya moto otɛ amubeka ya benyeni boma ango. 16 Melomaka bahɔlɛ bamɛ ipazɛcɛ ango, onyate mɛnɛ ete mayɛjɛ ango.»[ 17 O belɛsi bya Paki byahajɛ Pilati ayɛjɛkɛsɛ njoko mɔkɔ.] 18 Ya bango bahajɛ potanga yoce te: «Bomaka Zɛzi, yɛjɛcɛ bɛhɛ Balabasi!» 19 Bahujɛsɛ Balabasi o njoko, bosina bwa ango ajasa o ebumba ya lupu o eposi, na moto wa ango abomasa. 20 Ya Pilati ahunwana bohimwa bango ekana mɛnɛ ɛkɔ, bosina te ahakakasa iyɛjɛcɛ Zɛzi. 21 Nde bango te potanga na bɔnɔ te: «Dɔmɛcɛ ango o kuluwa! Dɔmɛcɛ ango o kuluwa!» 22 Ya Pilati ahimwa bango ekusi ya hanto te: «Emba ya ibebe ya ango amubeka bende? Mata kumɛ emba ya ibebe ya ango amubeka ya menyeni boma ango. Meyɛjɛcɛ ango, usiya mehijɛcɛ ilomaka bahɔlɛ ipazɛcɛ ango.» 23 Ya bango bakangama na ipotangaka na pizo na ihimwaka te: «Dɔmɛcɛ ango o kuluwa.» Ya byoce byango byayekana Pilati. 24 Okate, Pilati te ahimɛ ibekaka emba ya bango bahimwasa. 25 Ya ango ayɛjɛsɛ moto akweyasa o njoko bosina bwa ango ajasa o ebumba, na moto wa ango bomasa. Moto mɛnɛ ajasa Balabasi, ango wa bango bahimwasa. Nde, ya ango awɛ bango Zɛzi, ibekaka ango emba ya bango banɔnɔ.

26 Usiya bango balwakasa na Zɛzi ya bango batakana na Simɔn moto wa Silɛni, ayengakasa bya makuba, ya bahacɛ ango kuluwa te abɛpɛce ombiya Zɛzi. 27 Ya lupu ja hinjɛkɛsɛ ango. Na bayito bahinjɛkɛsɛ ango, balwa ngweya na mendandanga na bosina bweji. 28 Okate, ya Zɛzi akalwana bya bango baji, na isɔhɔkɔ te: «Bayito ba Zelizalɛmi, teka ngweya imɛ! Nde, ngweyaka na bosina bwa bihi mɛnɛ, na bana ba bihi! 29 Bosina te, minyan mango aya, mabe sɔhɔkɔ te: “Bayito ba bekomba byaje o mana na myɛyin mya teka bijiya, myaje o mana na mabɛ ma teka binyanjɛ!” 30 Usɛ, besɔhɔkɔsɔ na menkoza te: “Tuwaka ukwa aho!” Na mabete te: “Dzibɛcɛ bɛhɛ!” 31 Wɛnɛ, babeka nɛ, na ekɔkɔ ya teka wa, nde, ya wewe be bekaka na yango na?»

32 O elɔmɔ mɛnɛ ɛkɔ, ba bɛpɛkɛsɛ membɔwu meba, myabe bomaka bango neji. 33 Usiya bango bapundasa usi ya ba banga te: «boka», ba dɔmɛ ango o kuluwa o elɔmɔ ɛkɔ bango na membɔwu meba myɛ, otɛ na epɛyi ya obɔ bwa hangwɛ, onɛ na epɛyi ya obɔ bwa mwaji. 34 Ya Zɛzi asɔhɔ te: «Hangwɛ amɛ, yɛnɛcɛ bango cɛyi na bosina te bayebe emba ya bango abeka.» Bango te bakaba mekanda imyeji ihakaka moto ekwaka mwango. 35 Lupu ja jakasa okate itaka. Nda, menɛni, balɛcɛkɛsɛ Zɛzi na isɔhɔkɔ te: «Eyonjɛ banɛ. Ya ango aji Kilisitɛ, ayonjɛ nyo eji amɛnɛ ice ango wa Zambe amubɔnɔ!» 36 Na bahɔlɛ bahɛcɛkɛsɛ ango, ya bango bahinyana na iwɛcɛ ango maku ma ngayi, 37 na isɔhɔkɔ te: «Wɛnɛ, ɔbɛ nkani mwa bazufi, yonjɛcɛ nyo ɔbɛ amɛnɛ!» 38 Ukwa kuluwa eji bakwɛlɛ te: «Moto otɛ, nkani mwa bazufi.»

39 Ya imwate mbɔnhu mwajasa o kuluwa, mwalowa ango, na isɔhɔkɔ neji te: «Ɔbɛ habe Kilisitɛ? Yonjɛcɛ nyo ɔbɛ, ete o yonjɛ na bɛhɛ!» 40 Ya onɛ awɛ masicɛ na neji na isɔhɔkɔ te: «Na nɔbɛ moto ayɛnɛ mezuku nda eji. Ɔbɛ molɔnge Zambe? 41 Mezuku mya mina yɛnɛ mitɛ myaje sina, na bosina te yajɛ mawuta ma bemba bya ibebe bya mini amubeka, nde, ango mwata beka na emba ɛkɔ ya ibebe.» 42 Okate ya ango asɔhɔ na Zɛzi te: «Zɛzi, teka yebijɛ imɛ usiya okweyka o etomba ɔbɛ.» 43 Zɛzi ahungwɛ neji te: «Mombo, matanda ɔbɛ te, mwenhe mutɛ mini ejaka o isi ya itabu.»

Ilɛlɛ ja Zɛzi

44 Usiya buya bwapwasa nda o lebelebe ya ekombe, epundu ya hula o hehe ya hajɛ, ngu na ikɔ. 45 Okate, yoyi te ya bɔsɔ, na ndɔmbi wa Elongwɛ ya Zambe te nyawana o lebelebe. 46 Ya Zɛzi apota yoce ya inɛnɛ, na isɔhɔkɔ te: «Hangwɛ amɛ, mawɛ ɔbɛ ekokoyi amɛ.» Usiya ango ahijɛsɛ bosɔhɔkɔ nɛ, ango te awa. 47 Usiya nɛni mwa bahɔlɛ mwayɛnɛsɛ bemba byɛ, ya ango akumɛ Zambe na isɔhɔkɔ te: «Moto otɛ amuja ka hongololo mombo!» 48 Lupu ja sɔnɔsɔ okate, na iyɛnɛcɛ bemba byɛ, usiya bango bahajɛ bahijɛsɛ iyɛnɛcɛ balwakasa yololo na ihacɛcɛ mabɔ o mato. 49 Bato bayebakasa ango bahajɛ, na bayito bayengasa na neji bya Ngalile, batɛmɛkɛsɛ bopama itaka nda bemba byɛ, byayekanasa.

Bahujɛ ecenje ya Zɛzi o ehanda

50 Okate, yajasa na moto mɔkɔ wa buka bwa bakombo, wa jinɔ te, Zozɛfi, ajasa ndomana wa mbɛ wa hongololo. 51 Ango muhimɛsɛ bemba bya banɛ bakombo bahakakasa ibekaka, na bya bango ba bekakasa onyate mɛnɛ, ajasa moto wa Alimate wa eposi ya bazufi, abokakasa elɔmɔ ya Zambe eyaka ikɔkɛcɛ mɔngɔ. 52 Ya ango alwa bya Pilati aji, ihimwaka ecenje ya Zɛzi. 53 Ya ango aloma ihulɛcɛ ecenje ya Zɛzi ukwa kuluwa, na ibungwaka yango na ndɔmbi na ihujɛcɛ o ehanda ya batubasa o imanya, bihojɛsɛ na moto okatɔ wa jango. 54 Buya bwa iyɔkɔ ja bazufi bwahinyanasa. Yajasa te na buya bwa bakotakasa ngumba wa buya bwa iyɔkɔ ja bazufi. 55 Bayito bayengasa na Zɛzi bya Ngalile, bahinjɛkɛsɛ Zozɛfi iyɛnɛcɛ ehanda, na etɛ ya bejikaka ecenje ya Zɛzi. 56 Ya bango bahunwana, iyebɛcɛ maji na mandemba. O elɔmɔ ya ja bazufi, bango te bayɔkɔ nda mapeko ma Moyizi matanda.