Luke 24

Zɛzi ayomwa o malonga

1Onyate ya buya bwa iyɔkɔ ja bazufi, ya bayito balwa na kwajakwaji bya ehanda na mandemba ma bango bayebɛsɛ. 2Ya bango akumɛsɛ imanya ja bajibɛsɛ ehanda bebinjɛ, 3usiya bango akweyasa o ehanda, bimakasa kumɛ minɛ ecenje ya Ku Zɛzi. 4Ya bango bayoyamasa na ehezako yɛ, ibujɛkɔ bandomana baba bapwa o boho bwango na mekanda mya ngɛyingɛyi. 5Bango te bayɛnɛ bɔngɔ, na idɔkɔmɔkɔ maho na mahehe. Ya bango bahimwa bayito bɛ te: «Ya byahaka aji na ndonga o panga bawewebende? 6Aje habe biyetɛ, nde, eyemwa na malonga. Usɛ, yebwaka njanga mwa ango asɔhɔkɔsɔ na bihi, usya ya ango ajasa bya Ngalile. 7Asɔhɔkɔsɔ te: “Ya nyɛ Mwana moto bawɛ ango o mabɔ ma bato bamesɛmbɛ, na bango idɔmɛcɛ ango o kuluwa, usya ango ekokasa minyan ma hanto abiyomwaka o malonga.”» 8Ya bango bayebwa mayɔkɔ ma Zɛzi asɔhɔkɔsɔ na bango. 9Usiya bango balumyasa bya ehanda, ya bango atandasa byɛ byahajɛ na bayokwɛ jonwun na mɔkɔ, na ibate bato bajasa okate. 10Bayito bɛ bajasa, Mali wa Mangidala, Zani na Mali wa nyangwɛ wa Zaki. Na ibate bayito bajasa bango ango, balwa ilazɛcɛ mambo mɛ mahajɛ na batɔtu. 11Nde, bango bakwasa mayɔkɔ mɛ nda njokoso, bango bibukwɛsɛ bayito bɛ. 12Ya Pyɛli ayemwa neji, ilwaka na hunla bya ehanda. Ya ango alɔkɔmɔ na ihobɛcɛ ya ango ayɛnɛsɛ menkanda okayi o hehe. O nyate mɛnɛ, ya ango ayecɛ na ihunwanaka bya itona jeji, alwa temanga.

O pɛyi ya Emayusi

13Nde, o buya mɛnɛ bɔkɔ, ibate bayokwɛ ba Zɛzi baba, balwakasa bya mboka ya jinɔ te Emayusi. Yajasa o belɔmɔ beba bya ojonga imanyaka usɛ ilwaka bya Zelizalɛmi. 14Na pɛyi, bango baba basɔhɔkɔsɔ bosina bwa bemba byahajɛ bya yekasa. 15Usiya bango bajakasa obosɔhɔkɔ, na itatubaka, ya Zɛzi amɛnɛ ahinyana na ilandaka bango ango. 16Bayɛnɛkɛsɛ ango nde, emba ya jibɛkɛsɛ bango minhɔn ijaka teka yembya ango. 17Okate, ya Zɛzi ahimwa bango te: «Dzɛ jambo beza ja byaya sɔhɔ usiya byajonga yɛ?» Ya bango batɛmɛ, melema mya bango myajasa na bohulu. 18Ya mɔkɔ opanga ango wa babanga te kleyopasi, ahungwɛ neji te: «Oje moto mɔkɔ bya Zelizalɛmi aji teka yeba emba yamuyekana o minyan matɛ.» 19Ya ango ahimwa bango te: «Yango mɛnɛ yɛ, bende?» Ya bango bahungwɛ neji te: «Emba yamuyekana na Zɛzi wa Nazalɛti, ajasa ntɔci mwa tuma o bemba byango abekasa na o iyɔkɔ o boho bwa Zambe na boho bwa lupu jahajɛ. 20Nda menɛni mya bawe ba bebuwa, na bakombo ba mini bahomba ango, bahujɛ ango onyanhun mwa ilɛlɛ, na idɔmɛcɛ ango o kuluwa, 21bɛhɛ babukwɛsɛ te ango ayongasa ja yonji mwa Izahɛli. Mwenhen yebeka na minyan ma hanto na beyaya byɛ iyekanaka. 22Nde, yamuja na ibate bayito o panga aho, batanda bɛhɛ bemba bya bɛhɛ bamuyecɛ usiya bango bamulwa bya ehanda na kwajakwaji. 23Usiya bango ajasa teka kumɛ ecenje ya Zɛzi, ya bango balumya na itandaka te: “Bɛhɛ bamuje yɛnɛ bangɛlɛ bapwa na itandaka bɛhɛ te: Mwatawa.” 24Ya ibate opanga aho balwa na bango bya ehanda ya Zɛzi, na ikumɛcɛ bemba nda bayito bamutanda, nde bango bikumɛsɛ ecenje eji!» 25Okate, ya Zɛzi asɔhɔ na bango te: «Byaje teka bocɛngu. Yaje buji na bihi ibukwece bemba byahajɛ bya mentɔci mya tandasa! 26Nde, Kilisitɛ mwamuyonga yɛnɛ mezuku boho na ango ikumaka?» 27Okate, ya ango alazɛkɛsɛ bango bemba byahajɛ bya ba kwɛlɛsɛ na bosina bweji, o Mangwɛli mahajɛ ma Zambe, ya tasɛsɛ o babuku ba Moyizi, na ihukwanaka o babuku ba mentɔci.

28Usiya bango bahinyasa o kuna mboka ya bango balwasa, ya Zɛzi abeka nda ihukwanaka pɛyi eji. 29Nde, ya bango bakangama na ihimbaka ango te: «Oko lwace, bosina te, mina jetɛ o ikɔ, buya bwehinda, kweyaka.» Ya ango akweya ijaka bango na ango. 30Usiya bango bahulasa menhisi mya ijaka maja, ya ango akwa pɛmbɛ na iwɛcɛ Zambe mambomala, ya ango abuna pɛmbɛ na ikabaka na bango. 31Okate, ya minhɔn mango majibwana, ya bango bayembya ango na ango ilapaka na bango. 32Ya bango basɔhɔ o panga ango te: «Yamuja na emba ya nda weya, yamuyongaka o melema mya mini, usya ango amuja isɔhɔkɔ na mini na pɛyi, na ilazɛcɛ mini Mangwɛli ma Zambe.»

33O elɔmɔ mɛnɛ yɛ, ya bango bayemwa ihunwanaka bya Zelizalɛmi. Okate ya bango bakumɛ bayokwɛ jonwun na mɔkɔ, besɔnɔ bango na banɛ, 34basɔhɔkɔsɔ na bango te: «Mombo, Ku eyemwa na malonga, amuja ehɛlɛ nyo na Simɔn!» 35Usɛ, ya bayokwa baba bɛ, balazɛ emba yamuyekana na bango na pɛyi, na etɛ ya bango ba yembyasa Zɛzi o elɔmɔ ya ango akabasa pɛmbɛ.

Zɛzi ahɛlɛ nyo na bayokwɛ ibeji

36Usiya bango bajasa obosɔhɔkɔ nɛ, ya Zɛzi apwa o lebebe ya bango, na isɔhɔkɔ na bango te: «Itabu ja jace na bihi!» 37Ya bɔngɔ na monjinji mwa banda bango, batɔkɔsɔ te yɛ, nkuku. 38Nde, Zɛzi ahimwa bango te: «Ya byaji na bɔngɔ na icɛcɛ o melema mya bihi bende? 39Taka mabɔ na mako imamɛ, etɛ ka imɛ, pitaka imɛ ete byasɔzɛ, nkuku mwaje na mehɔnyi na behe nda byayɛnɛ nda maji na byango etɛ.» 40Usiya ango asɔhɔsɔ nɛ, ya ango ahɛlɛ bango mabɔ na mako meji. 41Bajasa o ncebo mwa inɛnɛ, na iyecɛcɛ bemba byɛ, bajasa teka bibukwɛ te eyaya yɛ, yajasa ya mombo, ya Zɛzi ahimwa bango te: «Bihi hamama, emba ya bojaka usɛ?» 42Ya bango bawɛ ango eluku ya fɛ ya kangekange. 43Ya ango kwa na ijaka o boho bwango. 44O nyate mɛnɛ, ya ango asɔhɔ na bango te: «Beyinda bya masɔhɔkɔsɔ na bihi usya mina majasa. Ngwɛnɛ byango: ya nyɛ, Mangwɛli mahajɛ ma bakwɛlɛsɛ na bosina ibwamɛ o babuku ba iyɔkɔ ja Moyizi, o babuku ba mentɔci, na o babuku ba beboka , mahajɛ mahulangace.» 45Okate, ya ango awɛ bango bocɛngu bwa iyebaka Mangwɛli ma Zambe, 46na isɔhɔkɔ na bango te: «Ngwɛnɛ emba ya bamukwɛlɛ te Kilisitɛ eyɛnɛcɛ mezuku, usya ango ekokasa minyan ma hanto abiyomwaka o malonga, 47belwakasa atanda jinɔ jeji o hehe yahajɛ, itasɛcɛ bya Zelizalɛmi, na ibangaka lupu ja ahajɛ ihongɛcɛ bejemi, na bosina bwa Zambe eyɛnɛcɛ cɛyi ya mesɛmbɛ myango. 48Bihi bamukumɛ okate. 49Imɛ mɛnɛ melomaka bihi emba ya Hangwɛ amɛ asijɛsɛ bihi. Nde bihi, jakayi o eposi ngu na isi ya byejaka humɔn na tuma ye yeyengaka bya iko.»

Ibete ja Zɛzi bya iko

50O nyate mɛnɛ, ya Zɛzi amanya na bango o eposi, alwa na bango bya kunakuna na Betani, usɛ, ya ango abesɛ mabɔ na iwɛcɛ bango makombo. 51O elɔmɔ ya ango ajakasa bowɛcɛ bango makombo, ya ango apatwa na bango ibeta bya iko. 52Nde, usiya bango bahijɛsɛ ihumaka mabɔngɔ o boho bwa Zɛzi, ya bango bahunwana bya Zelizalɛmi humɔn na ncebo mwa inɛnɛ. 53Bajakasa minyan mahajɛ o Elongwɛ ya Zambe na isomɛcɛ ango.