Luke 3

Itundu ja Za Batisi

1O menkola jonwu na me tanyin mya Sezali Tibɛli akɔkɛkɛsɛ, Pɔnsi Pilati ajasa nɛni mwa Zude, Elodi nɛni mwa Ngalile, Filipi wa bangwe eji bayenga mwɛnyi ajasa neji nɛni mwa Ituli na Takoniti, Lisanyasi nɛni mwa Abilɛni. 2Hani na Kayifi bajasa menɛni mya bawe ba bebuwa. O nkola mɛnɛ mwɛ Zambe asɔhɔ na Za, mwana wa Zakali, o bɔngɔ. 3Za alandansa o bonga bwa ndɔndɔ ya njɛnja mɔngɔ ya Zudɛn, itandaka bato iyɛbɛcɛ bejɛmi, na ilubaka bango o nso mwa ndonga, bosina bwa Zambe eyɛnɛcɛ cɛyi ya mesɛmbɛ mya bango. 4Ya yekana nda ya ango amukwɛlubwɛ o buku wa Ezayi wa ntɔci te: «Yɛ joyi ja moto apota yoce bya bɔngɔ.» «Yɛbɛcɛ pɛyi ya Zambe Ku wa mini, ijaka hongololo. 5Medɔngɔ myahajɛ mye jibamakasa, mabete na membɔku myahajɛ mye hulakasa, mabunu ma mapɛyi mahajɛ meyakasa hongololo, mapɛyi ma bobe mabiyɛbɛnɛkɛsɛ. 6Buce beyɛnɛcɛ nda Zambe a pokwa.» 7Za asɔkɔsɔ na buce bwa yakasa ikwaka nso mwa ndonga neji te: «Byajɛ ikaka ja bape! Amutanda bihi te; bye bambwaka ibuku ja Zambe ja hinyana za?» 8Bekaka bemba bya ihɛlɛcɛ te bejɛmi bya bihi bye kalwana, teka sɔhɔ o menlema mya bihi te: «Kɔkɔ aho Abalami, mombo ma tanda bihi te Zambe anyeni kahujɛ mamanya matɛ bana ba Abalami. 9Usɛ, eyendo yajetɛ o kuba mwa mwele iyuwaka mekanga mya mwele mwahajɛ, mya teka wɛ bebuma bya mbɛ beyuwaka ete bafa o jiyo.»

10Lupu jahimwa ango te: «Bɛhe bekaka na?» 11Ahungwɛ na bango te: «Moto aji na mengɔhu memba awɛce na moto aji hamama, aji na maja abekace etɛ mɛnɛ yɛko.» 12Ya bato bakwa bokula baya ikweyaka na bango o nso mwa ndonga, ya na bango bahimwa ango te: «Lɔnji bɛhɛ abekace na?» 13Ya ango ahungwɛ na bango te: «Onyate ya ntango mwa bamusinjɛ na bihi, teka mici hacɛ iyate emba.» 14Okate, na bahɔlɛ bahimwa ango te: «Bɛhɛ bekaka na?» Ya ango asɔhɔ na bango te: «Teka kwa nemba nemba na moto, na pizo ice na ebonda, teka hacɛ moto ibuza, jaka na nyoko mwa mawuta mwa bawɛ bihi.»

15Usɛ, lupu jahajɛ ja jasa obobokaka na itemangaka o melema te: «Za otɛ abe Kilisitɛ?» 16Za ahungwɛ na bahajɛ te: «Imɛ maluba bihi o nso mwa ndonga, nde aya wɛ ango aji na tuma ayeka imɛ, imɛ teka nyeni hundwa mekɔji mya bengwɛngwɛ byeji, ango elubaka bihi o Ekokoyi ya Pu na weya. 17Okate, aje na yala o mabɔ, o esasa ya banyɛngɛsɛ, ipatwɛcɛ mambolo ma ikɔlɔkɔ o ingala, na ifaka epazi o weya ya teka bɔsɔ.» 18Za atandakasa itundu ja mbɛ na lupu, na isomɛcɛ bango na ibyate behinda.

19Elodi wa Nkani mwa Ngalile akwa Elodyadi wa mwaji wa mwana wa hangwɛ eji o boba, bosina mɛnɛ bwa Za awɛ ango masicɛ, na ibyate bemba bibebe byango abekasa. 20Ya ango ahunwasa bolukwaka iyate emba ya ibebe, ahujɛ Za o njoko. 21Usya lupu jahajɛ jahijɛsɛ ikwaka nso mwa ndonga, Zɛzi taya neji ikwaka nso mwa ndonga, usya ango ajasa obɔndɔngɔkɔ iko te ja jibwana. 22Okate, Ekokoyi ya Pu yahula te ukwa eji na njanga mwa nyo nda etɛ ya induma. joyi jayenga bya iko te: «Ojɛ mwana mɛ wa manɔnɔ buce, ojɛ ncebo mwamɛ mwahajɛ.»

Ilanda ja buka bwa Zɛzi

23Zɛzi ajasa emba nda mekola memboto mehanto, usiya ango atasɛsɛ ehaji ya Zambe. Ba tɔkɔsɔ te ajasa mwana wa Zozɛfi. Zozɛfi mwana wa Eli. 24Eli mwana wa Matati. Matati mwana wa Lɛvi. Lɛvi mwana wa Mɛleki. Mɛleki mwana wa Zanayi. Zanayi mwana wa Zozɛfi. 25Zozɛfi mwana wa Matatyasi. Matatyasi mwana wa Amɔsi. Amɔsi mwana wa Nahumi. Nahumi mwana wa Esili. Esili mwana wa Nangayi. 26Nangayi mwana wa Mahati. Mahati mwana wa Matatyasi. Matatyasi mwana wa Semɛhi. Semɛhi mwana wa Zoseki. Zoseki mwana wa Yoda. 27Yoda mwana wa Yohanani. Yohanani mwana wa Lesa. Leza mwana wa Zolobabɛli. Zolobabɛli mwana wa Salateli. Salatɛli mwana wa Neli. 28Neli mwana wa Meleki. Meleki mwana wa Adi. Adi mwana wa Kozami. Kozami mwana wa Elimadami. Elimadami mwana wa hɛ. 29Hɛ mwana wa Zɛzi. Zɛzi mwana wa Eliezɛli. Eliezɛli mwana wa Zolimi. Zolimi mwana wa Matya. Matya mwana wa Levi. 30Levi mwana wa Simiyɔn. Simiyɔn mwana wa Zuda. Zuda mwana wa Zozɛfi. Zozɛfi mwana wa Zonami. Zonami mwana wa Elyakimi. 31Eliakimi mwana wa Meleya. Meleya mwana wa Mena. Mena mwana wa Matata. Matata mwana wa Natyami. Natyami mwana wa Davidi. 32Davidi mwana wa Zese. Zese mwana wa Zebedi. Mwana wa Bowazi. Bowazi mwana wa Sala. Sala mwana wa Nahasɔ. 33Nasɔ mwana wa Aminadabi. Aminadabi mwana wa Adimini. Adimini mwana wa Alimini. Alimini mwana wa Esilomi. Esilomi mwana wa Pɛlɛzi. Pelisi mwana wa Zuda. 34Zuda mwana wa Zakɔbi. Zakɔbi mwana wa Izaki. Izaki mwana wa Abalami. Abalami mwana wa Fala. Fala mwana wa Naholi. 35Nahɔli mwana wa Seluki. Seluki mwana wa Lahu. Lahu mwana wa Faleki. Faleki mwana wa Ebɛli. Ebɛli mwana wa Sala. 36Sela mwana wa Keyami. Keyami mwana wa Alipasadi. Alipasadi mwana wa Semi. Semi mwana wa Nowe. Nowe mwana wa Lemɛki. 37Lemɛki Mwana wa Matuzalɛmi. Matusalɛmi mwana wa Enɔki. Mwana wa Yelɛdi. Mwana wa Malaleyɛli. Mwana wa Kayinami. 38Wakyanani mwana wa Enɔsi. Enɔsi mwana wa Sɛti. Sɛti mwana wa Adami. Adami mwana wa Zambe.