Luke 4

Dzabulu a mama Zɛzi

1Usya Zɛzi ayengasa bya zowa ya Zudɛn, ajasa humɔn na Ekokoyi ya Pu, okate, ya yango yahongɛ ango bya bɔngɔ. 2O minya memboto menanyi, Sata amama ango. Mujasa nemba nemba ominya mɛnɛ mɛ, elɔmɔ mɛnɛ te ya yekana ayɛnɛ za. 3Sata asɔhɔ neji te: «Ice ɔbɛ Mwana wa Zambe, sɔhɔkɔ na imanya jitɛ te ja kalwace pɛmbɛ.» 4Zɛzi ahungwɛ neji te: «Mangwɛli ma Zambe matanda te: Ndonga ya moto ya yenge o maja okayi.» 5Dzabulu alwa na neji ukwa ibete, ya ango ahɛlɛ ango ibujɛkɔ betomba bya mɔngɔ byahajɛ. 6Usɛ, Sata asɔhɔ na neji te: «Mewɛcɛ ɔbɛ kuma na tuma yetɛ yahajɛ na bokumani bwa betomba bitɛ byahajɛ. Imɛ wa bamuwɛ, ete mawɛ na wa manɔnɔ. 7Okate, wɛnɛ ohuma mabɔngɔ o boho bwamɛ, bitɛ byahajɛ byabijaka ibyɔbɛ.» 8Zɛzi ahungwɛ neji te: «Mangwɛli ma Zambe ma tanda te: Humaka mabɔngɔ na Zambe Ku ɔbɛ amɛnɛ, ete ojaza behaji byeji okayi.» 9Ya jabulu ahuwana bolwaka neji bya Zelizalɛmi, ahacɛ ango ukwa mwaza mwa Elongwɛ ya Zambe, ya ango asɔhɔ na neji te: «Ice ɔbɛ Mwana wa Zambe, lɛbɛcɛ nyo bya hehe.» 10Ya ango ahungwɛ na neji te: «Mangwɛli ma Zambe ma tanda te: “Zambe abitandaka na bangɛlɛ beji ikɔlɔkɔ ɔbɛ.”» 11Ya ango amici tanda te: «Babibɛpɛcɛ ɔbɛ o mabɔ mango bosina te oko atoko dumanga na imanya.» 12Ya Zɛzi asɔhɔ neji te: «Mangwɛli ma Zambe tanda te: Teka mama Zambe wa Ku ɔbɛ.» 13Usya ango ahijɛsɛ imamaka Zɛzi na mayuwa mɛ mahajɛ, Sata amanya na neji, ibokaka iyate ekusi.

Bato ba cɛcɛ Zɛzi o eposi ya Nazalɛti

14Okate, Zɛzi alumya bya Ngalile, tuma ya Ekokoyi ya Pu yajasa na neji. Bato ba sɔhɔkɔsɔ buce na bosina bweji o eposi ya jɛnja mɔngɔ yɛ. 15Ahɛlɛkɛsɛ bya belongwɛ bya membɔndu byango, moto wahajɛ akumɛkɛsɛ ango. 16Zɛzi ahunwana bya Nazalɛti o eposi ya ango anɛnɛsɛ. Buya bwa iyɔkɔ ja bazufi, akweya o Elongwɛ ya membɔndu yajasa ibonwu jeji. Ya ango alanga Mangwɛli ma Zambe. 17Ya bawɛ ango buku wa Ezayi wa ntɔci. Ya ango ahundwa na ilanganka ekana ya te: 18«Ekokoyi ya Ku wamɛ Zambe yangutɛ na mɛ, amubɔnɔ mɛ bosina bwa itandanka mentende itundu ja mbɛ. Amuloma mɛ itandaka baji o menjoko te bepwa, na itandaka na baji na njimi te: Bye yɛnɛcɛ. Amuloma imɛ ipokwaka na baji o bonyeka. 19Na itandaka nkola mwa Zambe Ku wamɛ ehɛlɛcɛ bondonga bweji.» 20Okate, Zɛzi abungwa buku awɛ na njazi ya ango ahula hinsi. Bajasa o Elongwɛ ya membɔndu bahajɛ mihɔn mango majasa ukweji. 21Okate, ahula botandaka bango te: «Mangwɛli ma Zambe ma byamuyoka mɛ majɛ obo bekubwɛcɛ, mwɛnhɛ.» 22Bahajɛ bakumɛsɛ okate bayecɛ na janga mwa bekana bya bondonga bya pwakasa o honko mweji. Ya bango basɔhɔ te: «Mwana otɛ, hɛbɛ wa Zozɛfi?» 23Zɛzi akalwɛ na bango na lembya te: «Mayeba te, byetɔbɔkɔ imɛ ekaneni ya te: “Nganga ajɛ na pizo ya ihakaka nyo eji amɛnɛ.” Byabihunwaka bolukwaka te: “Bɛhɛ beyoka beyaya byomubeka bya Kapɛnahumi, bekaka yumɛnɛ usatɛ, o eposi ɔbɛ amɛnɛ!”» 24Ahungwɛ na bango te: «Mombo matanda bihi, teka ntɔci mwa myalubwɛ o buka bweji.» 25Matanda bihi mombo te: «O sondi ya Eli yajasa na menkuwɛ buce bya Izahɛli, usya iko ja jibamasa o menkola mehanto ne luku, ya za ya inɛnɛ ya tuwa o mɔngɔ mwahajɛ. 26Okate, Zambe mulomasa Eli iyonjɛcɛ myango myahajɛ, nde, ka mɔkɔ mwaji bya eposi ya Salɛta o mɔngɔ mwa Sidɔni. 27Na o sondi ya Elize wa ntɔci, yajasa na bato ba bejima buce, nde muyonjɛsɛ bahajɛ, ka Nama moto wa Sili.» 28Bato bahajɛ bajasa o Elongwɛ ya membɔndu ba nganya buce, usya bango ayokasa mayɔkɔ mɛ. 29Bahajɛ bayemwa, balwa hizɛ Zɛzi bya ipwe ja eposi jaji na mbɔku mwa balongasa Nazalɛti, ya bango bahakasa ilɛbɛcɛ ango o ndɔngɔ. 30Nde akɔlɔ o panga bango na ilwaka.

Zezi ahaka moto aji na nkuku

31Zezi alwa bya eposi ya Kapenahumi, yaji o njɛnja mɔngɔ ya Ngalile, o buya bwa iyɔkɔ jaba Zufi. 32Ya ango akweya o Elongwɛ ya mebɔndu na ihɛlɛcɛ bato iyɔkɔ ja Zambe, bato bayecɛkɛsɛ njanga mwa iyɔkɔ jango atandakasa, bosina te, «asɔhɔkɔsɔ na pizo. 33Okatɔ ya Elongwɛ , yajasa na moto ajasa na nkuku mwa bobe, ya ango apotanga yoce na pizo te: 34He! Yohaka na bɛhɛ nde? Zezi moto wa Nazaleti! Omuya ihemaka bɛhɛ? Mango ayeba ɔbɛ, ojɛ moto wa Pu wa Zambe amuloma!» 35Ya Zezi apɛmɛ ango te: «Kanganka ete o pwa o nyo ya moto wɛ!» Nkuku mwalɛbɛ te moto mɛnɛ o hehe, o boho bwa bato bahajɛ, mwango mwa pwa teka yucɛ ango. 36Bato bahajɛ te bayecɛ, okate ya bango atatuba o pangango te: «Mutɛ janga mwa iyɔkɔ nde? Moto otɛ asɔhɔ na menkuku na pizo na tuma myango te myapwa!» 37Ya bango balazɛ kuma ya Zɛzi o njɛnja mɔngɔ yahajɛ.

Zɛzi ayonjɛ membɛlu buce

38Zɛzi amanya Elongwɛ ya membɔndu ikweyaka bya elongwɛ ya Simɔn, nyangwɛ wa mwaji wa simɔn ajasa na iwɛzi buce, ya bango ahimwa Zɛzi iyonjɛcɛ ango. 39Alɔkɔmɔ ukwa eji, na ipɛmɛcɛ iwɛzi, jango te ja manya ango na nyo, ibujɛkɔ, ango te ayemwa iwɛcɛ bango maja. 40Okate, utɔngɔmwe ja buya, bato bahajɛ bajasa na membɛlu, myajasa na bemba nganya bya menjanga menjanga, baya na bango bya Zɛzi aji, ango te ahacɛ mabɔ meji ukwa membɛlu myahajɛ ihakaka bango. 41Menkuku mya pwasa o manyo ma membɛlu buce, mya potanga te: «Ɔbɛ Mwana wa Zambe!» Nde Zɛzi te apɛmɛ bango, teka jika te ba sɔhɔce, bosina bango ayebakasa te: Ajɛ Kilisitɛ.

Zɛzi atanda iyɔkɔ ja Zambe o belongwɛ bya membɔndu

42Usya buya bwa bwayasa, Zɛzi apwa o eposi, adambwa nyo ilwaka usya teka bato, lupu ja bato jahaka ango, usya bango akumɛsɛ ango, bahakasa ihimbaka ango, te ango teka maka patwa na bango. 43Nde asɔ na bango te: «Yanyɛ malwa na binɛ beposi, itandaka itundu ja mbɛ, ja Etomba ya Zambe, nyangwa sina ya Zambe amuloma imɛ yɛ.» 44Okate, ya ango atandakasa iyɔkɔ ja Zambe o belongwɛ bya membɔndu bya Zude.