Luk 9 | KoqSC | STEP | Zɛzi asojɛ batɔtu beji jonwu na mba, na iwɛcɛ bango tuma na pizo ya ipepaka menkuku myahajɛ, na ihakaka bato na mempongo myango.

Luke 9

Zɛzi aloma batɔtu jonwu na mba

1 Zɛzi asojɛ batɔtu beji jonwu na mba, na iwɛcɛ bango tuma na pizo ya ipepaka menkuku myahajɛ, na ihakaka bato na mempongo myango. 2 Okate, ya ango aloma bango ilwaka iyengaka myenje mya Itundu ja mbɛ ja Etomba ya Zambe, na iyonjɛcɛ membɛlu. 3 Ya ango asɔhɔ na bango te: «Usya byelwaka, teka kwa nembanemba: na humbe, na ebɔmbɔ, na otɔbɛ, na lɔlɔ teka kwa, moto teka kwa mengɔhu meba. 4 O masi mahajɛ ma bemyalaka bihi, jaka o Elongwɛ mɛnɛ ngu na buya bwa byemanyaka okate. 5 Nde, masi ma bato bebenaka bihi, manyaka o eposi mɛnɛ ete byakukwɛ ihulu ja mako ma bihi, yabijaka isicɛ ja byewɛcɛ bango.» 6 Okate, bayokwɛ te balwa, iyengaka myenje mya Itundu ja mbɛ o mamboka, na ihakaka na membɛlu o masi mahajɛ.

Elodi Antipasi ahakakasa iyɛnɛcɛ Zɛzi

7 Elodi wa nɛni mwa Ngalile ayokakasa mambo ma yekanasa mahajɛ, muyebasa etɛ ya ango enyeni temanga, bosina te ibate bato basɔhɔkɔsɔ te: «Yɛ, Zabatisi amuyemwa o malonga.» 8 Ya ibate basɔhɔ te: «Yɛ, Eli wa ntɔci amupwa.» Ya ibate basɔhɔ te: «Yɛ, ntɔci mwa sondi ya ka mwamulumya o malonga.» 9 Elodi asɔhɔ te: «Imɛ mɛnɛ, majasa melma ihuwaka cingo ya Zabatisi. Nde wɛ moto wa mayoka kuma wɛ beza?» Ahakakasa iyɛnɛcɛ Zɛzi.

Zɛzi abongwa bandomana basini jonwu

10 Ya batɔtu balumya, na ilazɛcɛ Zɛzi bemba byahajɛ bya bango ba bekasa. Ya Zɛzi amɛnɛ alwa na bango bopama bya kunakuna na eposi ya Betayida. 11 Usya lupu ja bato jayokasa, jango te jahinjɛ ango. Zɛzi te ahimɛ bango. Ya ango asɔhɔ na bango jambo ja Etomba ya Zambe, na iyonjɛcɛ bato bahakakasa te bayonjɛcɛ bango na bemba manganya byango. 12 Usya buya bwa lwakasa iyindaka, batɔtu beji jonwu na mba bahinyana okuna eji na isɔhɔkɔ neji te: «Lomaka bato bahunwanace o mamboka na mepinji myaji kunakuna. Usɛ, bekumɛcɛ maja na masi ma inangaka. Bosina te, usetɛ teka bato baji okate.» 13 Nde, asɔhɔ na bango te: «Bihi mɛnɛ wɛcɛ bango maja.» Ya batɔtu basɔhɔ neji te: «Bɛhɛ bajetɛ na bapɛmbɛ ba tanyi na bafɛ baba. Ohaka te bɛhɛ alwace ihombaka maja ma bato bahajɛ?» 14 Usɛ, bandomana bajasa okate emba nda basini jonwu. Ya Zɛzi asɔhɔ na batɔtu beji te: «Sojɛcɛ bango o becita bya bato memboto tɔsini, ete byahulɛ bango mehinsi.» 15 Ya bango abeka yumɛnɛ, bahulɛ bahajɛ mehinsi. 16 Ya Zɛzi akwa bapɛmbɛ mɛnɛ ba tanyi na bafɛ baba, ya ango abesɛ minhɔn bya iko, na iwɛcɛ makombo na Zambe na bosina bwa maja mɛnɛ, abuna bapɛmbɛ na bafɛ. Ya ango awɛ na batɔtu beji, ikabaka na lupu ja bato. 17 Moto wahajɛ te aja na ihulwaka, masika mahisasa balozɛ belunga jonwu na mba.

Pyɛli atanda te Zɛzi aje Kilisitɛ

18 Ibwate buya, bwa Zɛzi ajasa bobɔndɔngɔkɔ iyate isi, na bayokwɛ beji bajasa okate. Ya Zɛzi ahimwa bango te: «Ya lupu jasɔhɔ ukwa imɛ nde?» 19 Ya bayokwɛ bakalwɛ neji te: «Ibate basɔhɔ te, oje Zabatisi. Ibate te, ɔbɛ Eli wa ntɔci. Ibate okayi batanda te ojɛ ntɔci mwa sondi ya ka mwa yenga o malonga.» 20 Zɛzi ahimwa bango te: «Nde bihi, byasɔhɔ te, imɛ za?» Pyɛli te ahungwɛ neji te: «Oje Kilisitɛ.»

Zɛzi atanda jambo ja ilɛlɛ jeji

21 Zɛzi apɛmɛ bango te: «Teka tanda na moto nde moto, te maje Kilisitɛ.» 22 Ya ango ahunwana bosɔhɔkɔ te: «Anyɛ Mwana moto ^{▼▼Mwana moto Mwana moto aje Zɛzi amɛnɛ.} ayɛnɛ mezuku buce. Anyɛ bakombo, na menɛni mya bawe ba bebuwa, na melɔnji mya ceko mwa Zambe babena ango. Anyɛ baboma ango. Nde, buya bwa hanto, eyemwaka.»

23 Ombya mɛnɛ, asɔhɔ na bahajɛ te: «Wɛnɛ moto ahaka ihinjɛcɛ imɛ, ango teka micitemanga ibyeji amɛnɛ, abɛpɛce kuluwa eji minyan mahajɛ, na ihinjɛcɛ imɛ. 24 Okate, moto ahaka iyonjɛcɛ ndonga eji, abilapɛcɛ yango. Nde ahaka ilapɛcɛ ndonga eji na bosina bwamɛ, abikumɛcɛ yango. 25 Wɛnɛ moto, akumɛ bokumani bwa hehe bwahajɛ, nde apɛpɛ ndonga eji, na ihemaka nyo eji amɛnɛ, ya ango amukumɛ okate nde? 26 Moto nde moto eyɛnɛcɛ hɔyi na namɛ, na mayɔkɔ mamɛ, na namɛ wa Mwana moto mabiyɛnɛcɛ hɔyi neji, usya meyaka na kuma amɛ, na kuma ya Zambe Hangwɛ amɛ na bangɛlɛ ba pu. 27 Matanda bihi mombo, ibate bato baji usatɛ, baji wa teka yɛnɛ Etomba ya Zambe.»

Boho bwa Zɛzi bwayawa

28 Usya Zɛzi ahijɛsɛ bosɔhɔkɔ nɛ, ya yekanasa okate emba nda minyan mwambi, akwa Pyɛli, Za, na Zaki, ya bango abeta ukwa ibete, ilwaka ibɔndɔngɔkɔ. 29 Usya Zɛzi ajasa obobɔndɔkɔ, boho te bwayawa ango, mekanda myeji te myaya pu buce amɛnɛ. 30 Ibu jɛkɔ, ngwɛnɛ bato baba baje o bosɔhɔkɔ na neji, yajasa Moyizi na Eli wa ntɔci. 31 Bapwasa na kuma o lebebe ya moji mwa bayima, basɔhɔkɔsɔ neji jambo ja ilɛlɛ jeji, jeyekanaka bya Zelizalɛmi. 32 Pyɛli, na ba bango ango baji, banangasa buce. Usya bango ayemwasa, bayɛnɛ kuma ya Zɛzi na bato baba bajasa bango neji. 33 O elɔmɔ ya Moyizi na Eli bamanya o kuna Zɛzi, Pyɛli asɔhɔ neji te: «Lɔnji, yangwɛ bɔnhu te mini ajace usatɛ, bɛhɛ abekace mebembe mehanto, mɔkɔ imwɔbɛ, mɔkɔ mwa Moyizi, na imwate mwa Eli.» Nde Pyɛli muyebasa emba ya ango asɔhɔkɔsɔ. 34 Usya ango asɔhɔkɔsɔ nɛ, ngutu mwahula ukwa ango, na ikubaka bango. Bayokwɛ bayɛnɛ bɔngɔ, usya mbici mwakubasa bango. 35 Okatɔ ya ngutu, ekɔlu ya punda, na ingɔkɔ te: «Otɛ, Mwana amɛ wa mamubɔnɔ, yokaka ango!» 36 Usya ekɔlu yɛ yakangasa, Zɛzi ajasa amɛnɛ. Bayokwɛ beji, o minyan mɛnɛ mɛ, bakɔlɔkɔsɔ o melema myango eyaya ya bango ayɛnɛsɛ, bi tandasa na moto.

Zɛzi ahaka mwana aji na nkuku

37 Zɛzi na bayokwɛ beji ba hanto bahula na ibete, ombya buya bwa bango bayɛnɛsɛ eyaya mɛnɛ. Ya bato buce baya itakanaka na neji. 38 O lebebe ya bato, moto te apotanga te: «Lɔnji, soso bita imɛ mwana otɛ, aje icika! 39 Yangwɛ na nkuku mwanjibanda ango ibyate bekusi. Ibu jɛkɔ, ya ango apotanga ya mwango mwapukwɛ ango na pizo. Usɛ, indɛzi te pwa mwana wɛ o honko. Nkuku mwɛ mwango abeka ango bobe buce amɛnɛ, mwamanya ango ka na buji. 40 Mamuje himwa bayokwɛ bɔbɛ ipepaka mwango, nde bango teka koka.» 41 Ya Zɛzi asɔhɔ te: «Bihi bato ba mwehe, byaje teka ibukwɛ Bihi byabeka bobe! Mejaka na bihi na ikoka bihi minyan kweya?» Okate, Zɛzi asɔhɔ na moto wɛ te: «Yaka na mwana ɔbɛ, biyetɛ.» 42 O elɔmɔ ya mwana wɛ ahinyanakasa, nkuku mwɛ mwa fa ango o hehe, na ipukwɛcɛ ango na pizo. Usɛ, Zɛzi te apɛmɛ nkuku na iyonjɛcɛ mwana, awɛ ango na hangwɛ. 43 Bato bahajɛ bajasa boyoyamaka na bonɛnɛ bwa Zambe.

Zɛzi amici tanda jambo ja ilɛlɛ jeji

Bato bahajɛ bayecɛkɛsɛ bemba byahajɛ bya Zɛzi abekakasa. Bosina mɛnɛ, bwango asɔhɔkɔsɔ na bayokwɛ beji te: 44 «Djibwaka malɔ ma ikɔlokɔ bemba bya metandaka bihi, na ikɔlɔkɔ byango o melema. Bewɛcɛ Mwana moto o mabɔ ma bato.» 45 Nde, bayokwɛ biyokasa emba ya ango ahakasa itandaka bango. Bosina te, iyɔkɔ jɛ jajasa uswɛ na bango, ya bango bajasa na bɔngɔ bwa ihimwaka Zɛzi sina bekana byɛ. Bosina mɛnɛ, bwa bango ajasa teka yoka iyɔkɔ jɛ.

Moto aji bomɛnɛ za?

46 Usɛ, bayokwɛ bajasa botatubaka o panga ango, na isɔhɔ te: «Aji bonɛnɛ o panga mini za?» 47 Zɛzi ayebakasa matemange mango, ya ango akwa musiki, na itɛjɛcɛ ango o kuna eji. 48 Ya ango asɔhɔ na bango te: «Wɛnɛ moto amyala epaka etɛ na bosina bwamɛ, a myala imɛ mɛnɛ. Amyala imɛ, amyale amuloma imɛ. Nde, moto aji bosiki o panga bihi bahajɛ, ango aji bonɛnɛ.»

Moto aji teka mbyɔlɔ na bihi, aje o ngamo ya bihi

49 Za, wa ntɔtu, akwa iyɔkɔ na isɔhɔkɔ na Zɛzi te: «Lɔnji, bɛhɛ beyɛnɛ moto apepa menkuku na jinɔ jɔbɛ. Bɛhɛ bamuhaka ihimbaka ango. Bosina te, aje habe moto wa mini.» 50 Nde, Zɛzi ahungwɛ na bango te: «Teka himba ango. Na bosina te, moto aji teka mbyɔlɔ na bihi, aje o ngamo ya bihi.»

Iyate mboka ya Samali yabena imyalaka Zɛzi

51 Usya minyan ma Zɛzi ilwaka bya iko mahinyanakasa, ya ango amɛmɛ mombo ilwaka bya Zelizalɛmi. 52 Ya ango aloma bohoboho bato o mboka yaji o njɛnja mɔngɔ ya Samali, ilwaka iyebɛcɛ ango isi. 53 Nde, bihimɛsɛ bango na bosina bwa bango alwakasa bya Zelizalɛmi. 54 Usya, Za na Pyɛli, baji bayokwɛ beji, bayɛnɛsɛ nɛ, bango te basɔhɔ te: «Ku aho, o haka te bɛhɛ balomace weya ya iko ihulaka ukwa ango, na itumbaka bango?» 55 Ya ango akalwana bya bango baji, a wɛ bango masicɛ. 56 Ya bango balwa iyate mboka.

Bato bahaka ihinjɛcɛ Zɛzi

57 Usya bango bajasa obojongaka, na pɛyi, iwate moto te asɔhɔ na Zɛzi te: «Mehinjɛcɛ ɔbɛ masi mahajɛ molwaka.» 58 Zɛzi ahungwɛ na neji te: «Na banganya bangwɛ na mabonga ma inangaka, na bonyoji na malumbu. Nde, Mwana moto teka isi ya ango enanjɛcɛ molo.»

59 Ya ango asɔhɔ na iwate moto te: «Hinjɛcɛ imɛ.» Nde moto wɛ asɔhɔ neji te: «Ku wamɛ, jikaka imɛ mabilwa boho ikonaka hangwɛ amɛ.» 60 Zɛzi te akalwɛ neji te: «Djikaka becenje byakonace becenje byango. Nde ɔbɛ, lwaka itandaka itundu ja Etomba ya Zambe.»

61 Iwate te ahuwana bosɔhɔkɔ te: «Ku wamɛ, mabihinjɛcɛ ɔbɛ. Nde bijika imɛ mabilwa iyangaka na yali amɛ.» 62 Ya Zɛzi asɔhɔ na neji te: «Moto akona na ehanaka o mabɔ, ete amakata mbiya, wɛ habe moto wa Etomba ya Zambe.»