1 Corinthians 1

1He mî̌ Pò̌lu. Cǒmara sò̌phlǒǒ he dě a wû̌lǎ he ta Ye̤shǔkhrî̌stu a pwa̤nophû̌ tapwa̤. He ta pa pṳwè̤ Khrî̌stuphû̌ Sotani khwè̌cû̌ bǎ sî lî̤htǒotabǎ.

2Pa khwè̌cû̌ lî̤htǒo dě Cǒmara pwa̤yṳǎta̤ aprṳ̂ahophû̌ ǒ bǎ Kòrî̌tiawî̤kû toǒ a ǒ, ta kòyò lǒ̤bò htě a sabahtò̌ Běcǎ Ye̤shǔkhrî̌stu dě a ǒ lǒkho gûla̤ pṳ̂̌꤮ tò̤glònu toǒ a ǒ. Ye̤shǔ htǒonu, pa Běcǎ mî̌ amè̤mè̤, asî Běcǎ mî̌ amè̤mè̤. Ye̤shǔkhrî̌stu akhû̌akhî, Cǒmara ma̤wî̤ma̤cahtǐ sî dě a kaǎ sî ta sî glè ǒhtûpwa̤ cahtǐ dû̌htò̌po̤ aya hǒ. ^a

3Papha Cǒmara ta pa Běcǎ Ye̤shǔkhrî̌stu ǐ tû̌ta sî ta̤bwǐta̤sîrî ta sò̌phlǒ ta̤gûjûkabǎ nî̌꤮.

Pò̌lu hî̌bwǐhî̌sîrî bǎ Kòrî̌tia pwa̤yṳǎta̤ aprṳ̂ahophû̌ toǒ aya

4Ye̤shǔkhrî̌stu akhû̌akhî, Cǒmara ǐlò̤ sî abwǐasîrî hǒ. A ǐ sî hǐnu akhû̌akhî, he hî̌bwǐhî̌sîrî bǎ sî Cǒmara pṳ̂̌꤮ taplǎ. 5Ma̤tè̤hî̌dě, sî ta Khrî̌stu htûhtò̌ nû̌û ta̤cǎnǔ꤮ pa akhû̌akhî, Cǒmara howi̤homò̤ sî pṳ̂̌꤮ tacǎ hǒ. Dě sî ta̤hî̌bǎhî̌sho lǒ̤꤮ bò toǒnu bǎbǎ, sî ta̤sî̌khû̌sî̌ya toǒnu bǎbǎ, a howi̤homò̤bò sî hǒ. 6Dě pa pwe̤ǐlṳ bǎ sî Khrî̌stu awi̤akè̌ htǒotoǒnu, a ǒměǒgle te̤mǎ dě sîkû hǒ. 7Hǐnu akhû̌akhî, bǎ sî ǒyṳ̂kè̌shuǐ Běcǎ Ye̤shǔkhrî̌stu hèǒlṳhtò̌ pě htǒonu, sǎcahtǐ asû lǒ̤꤮ bò htě sî nî̤bǎko ta sî lo̤bǎ toǒnu Cǒmara ǐbò sî hǒ. 8Htû̌꤮ pa Běcǎ Ye̤shǔkhrî̌stu hè amṳni̤ pě ti̤ni̤nu, ma̤pûhǐ kò la̤bè̌ ta̤sǔ sîlo̤ ǒpe pûtò̤ ayanu, Běcǎ pṳ̂měpṳ̂gle sî to̤htû̌ a gutṳ pě. 9Cǒmara htǒotapwa̤ mî̌ la̤yṳǎna̤ǎ mè̤mè̤̌. A mî̌ pwa̤ htě a kaǎ sî dě a sò̌yṳ nobǒsû̌khǎkho sî ta aphû̌khû mî̌ pa Běcǎ Ye̤shǔkhrî̌stu htǒotapwa̤nu hǒ.

Pwa̤yṳǎta̤ aprṳ̂ahophû̌ toǒ sò̌phlǒ khlè̌khǒkènû̌û

10Hepṳhewè̤ sî꤮, khònò̤htǒo he kwigwèbǎǐshû̌ sî ta ta̤sîrîshû̌sho htě Běcǎ Ye̤shǔkhrî̌stu ǐ he htǒonuhǒ. He sò̌yṳ kwigwèbǎǐ sî mî̌ hî̌tèhî̌dě, he sò̌yṳ ta sî mo̤klaǐ nû̌û, ǒkhǒma̤khǒ pûma̤ nû̌û tṳ̂prṳ̂ ta tṳ̂prṳ̂ ma̤. He sò̌yṳ tûsû sî ta sî ta̤gènè̤ toǒ bǎbǎ, sî ta̤yè̤lò̤nǎ toǒ bǎbǎ, no sǒsǒpwǎ nû̌û tacǎcǎ pwǎ nî̌꤮. 11Ma̤tè̤hî̌dě, pṳwè̤ sî꤮, Kalò̌e a sû̌kho akla toǒǒ pwe̤ǐlṳphlo he, sîto̤sîklî̌ sîma̤nî̤bò nû̌û tapwa̤ ta tapwa̤ hî̌ lè꤮, 12Sîto̤sîklî̌ kwè̌꤮ nû̌û hî̌tèhî̌dě, tapwa̤ mî̌ a hî̌ ta, “He mî̌ Pò̌lu akhophijaû̌” ahǔwa̤ tapwa̤ lè̌dě a hî̌ ta, “He mî̌ Apò̌lu akhophijaû̌,” tapwa̤ dě a hî̌po̤lè̌ ta, “He mî̌ Kephǎ akhophijaû̌,” ahǔwa̤ tapwa̤ dě a hî̌lè̌ ta, “He mî̌ Khrî̌stu akhophijaû̌,” hǐnu. ^b

13Khrî̌stu ana̤saklû htǒonumî̌ kò ma̤htò̌pò̌ hǎhtò̌ nû̌û tṳgumṳ ta tṳgumṳ hǐnumî̌ anî̤ ya? He mî̌ Pò̌lu htǒonumî̌ a khòsi bǎ nǒ sîya dě nò̌dòhtǔlo̤ ya? Sî plo sîna̤ ta shi dě sî glè htûhtò̌ he khophijaû̌ hǐnu ya? 14He plobǎ pwǎpǒ̤ Kayǔ ta Kǐrǐpǔ sò̌gini̤pwǎ akhû̌akhî, he hî̌bwǐhî̌sîrî Cǒmara. 15Hǐnudě, sî cû̌hî̌ he ta he plo shi ta Pò̌lu ami̤ hǒ, hǐnumî̌ anî̤ dǐpwǎ̤ tò̤ nî̌꤮. 16(Ǒ꤮ a mè̤mè̤̌, he plo bǎ mè̤mè̤̌ Stè̌phano ta a hǐphû̌phòphû̌ toǒ. He to̤mǎǐkè pwǎpǒ̤ htǒotoǒ pwǎ. Dě ahǔwa̤ mî̌ a ǒpe ya, mî̌ a ǒpe tò̤ yanu, he to̤mǎǐpe tò̤ hǒ.) ^c 17Khrî̌stu plûhè he ta he bǎhè plo bǎ kò shi mè̤tò̤. A plû hè he dě he hè dǒhtû̌ǐpwǎ bǎ kò ta ta̤sò̌le̤sò̌lò̤ awi̤akè̌. Dě he dǒhtû̌ǐ bǎ kò ta̤sò̌le̤sò̌lò̤ awi̤akè̌ akhanu, he hî̌bǎnǒ ta pwa̤sî̌pwa̤jòphû̌ toǒ ayo̤ tò̤. Ma̤tè̤hî̌dě he dè nǎla̤ǐ pwa̤sî̌pwa̤jòphû̌ a ta̤hî̌bǎ toǒ hî̌dě, he ma̤phèkèbò Khrî̌stu ata̤si a ta̤po̤ta̤phǎ shû̌sho dě nò̌dòhtǔlo̤ htǒonu hǒ.

Khrî̌stu mî̌ Cǒmara a ta̤po̤ta̤phǎ shû̌sho ta a ta̤sî̌ta̤jò

18Kòyò toǒǒ yṳǎ ta̤ tò̤ akhû̌akhî, Cǒmara cèrò asî pě. Kòyò hǐnu toǒnu, a gènè̤ lǒkho ta Khrî̌stu si nò̌dòhtǔlo̤ awi̤akè̌ htǒonumî̌ a ǒlû̌ǒkhlo pwǎ. Pwǎ̤ta pa nî̤bǎ ta̤ma̤lû̌htò̌ge htǒotoǒ ayanu, ta̤wi̤ta̤kè̌ htǒo a mî̌ Cǒmara a ta̤po̤ta̤phǎ shû̌sho ta paya hǒ. 19Cǒmara ale̤ayo̤ hî̌,

“He ma̤pî̌kè pwa̤sî̌pwa̤jòphû̌ toǒ a ta̤sî̌ta̤jò toǒ pě. He wîkè pwa̤jòpwa̤lîmòphû̌ toǒ a ta̤sî̌khû̌sî̌yanu toǒ pě,” ^d a hî̌ hǐnu.

20Dè ma̤hǐnudě pwa̤sî̌pwa̤jòphû̌ toǒ bǎbǎ, pwa̤sû̌ǐ ta̤sû̌ta̤tòwò asara toǒ bǎbǎ, pwa̤ htě a gègoshǔjò kò toǒ bǎbǎ, pa sî̌ya ta asî ta̤sî̌ta̤jò toǒnu, a ǒlû̌ǒkhlo pwǎ. ^e A dǔlṳpo̤ ta, hǎkhû̌ a ta̤sî̌khû̌sî̌ya htǒotoǒnu a ǒlû̌ǒkhlo pwǎ. ^f 21Cǒmara a ta̤sî̌ta̤jò mî̌ adû̌ayǒ mè̤mè̤̌. Hǐnudě kòyòhǎkhû̌phû̌ htǒotoǒ glè kè̌lǎsî̌yabò̌ Cǒmara ta asî ta̤sî̌khû̌sî̌ya toǒnu, a jò dǐkhò̌꤮ tò̤. Mî̌tanu, Cǒmara sò̌phlǒǒ ta a ma̤lû̌htò̌ge kòyò htě a yṳǎ Khrî̌stu a ta̤sò̌le̤sò̌lò̤ awi̤akè̌ htě pa dǒhtû̌ǐ kò htǒonu toǒ pě. Pwǎ̤ta kòyò htě a yṳǎ ta̤sò̌le̤sò̌lò̤ awi̤akè̌ htǒo tò̤ toǒnu, a gènè̤sǔ lǒkho ta ta̤dǒhtû̌ǐ htǒotoǒ numî̌ a nòdû̌ pwǎ, a gènè̤ lǒkho hǐnu. 22Yṳ̌daphû̌ toǒnu, a dè kè̌shǐ Cǒmara ata̤ma̤ ta̤cǒklî̌kî̌ya toǒ tò̤nu, a yṳǎ lǒkho kò ta̤sò̌le̤sò̌lò̤ awi̤akè̌ htǒonu tò̤. Greek khlilèphû̌ toǒ aya lè̌dě, Khrî̌stu a ta̤sò̌le̤sò̌lò̤ awi̤akè̌ htǒo a htû ta̤ǒlû̌ǒkhlo ta asîya pwǎ. Ma̤tè̤hî̌dě a sò̌yṳ gana̤de lǒkho pwǎ kòyò htě a ǒ ta ta̤sî̌ta̤jò dě a hî̌bǎjòlîmò toǒ a ta̤hî̌bǎ pwǎ. 23Hǐnudě bǎ pa dǒhtû̌ǐ Khrî̌stu si nò̌dòhtǔlo̤ akhanu, Yṳ̌daphû̌ toǒ gènè̤ sò̌phlǒsha mè̤mè̤̌. Yṳ̌daphû̌ mè̤tò̤ toǒ lè̌dě a hî̌ ta amûasǎ ǒ asîya dǐcǎ꤮ tò̤. 24Pò̤̌ta kòyò htě Cǒmara kaǎ nû̌û ta a yṳǎ ta̤sò̌le̤sò̌lò̤ awi̤akè̌ htǒotoǒ ayanu, Yṳ̌daphû̌ toǒ bǎbǎ, Yṳ̌daphû̌ mè̤tò̤ toǒ bǎbǎ, Khrî̌stu si nò̌dòhtǔlo̤ htǒonumî̌ mî̌pwǎ Cǒmara a ta̤po̤ta̤phǎ shû̌sho ta a ta̤sî̌ta̤jò hǒ. 25Ma̤tè̤hî̌dě, bǎ pa dǒhtû̌ǐ kòyò Khrî̌stu ata̤si awi̤akè̌ akhanu, toǒǒmî̌ a hî̌ lǒkho ta Cǒmara ma̤ta̤ htǒonu, a nòdû̌bò hǒ, a gènè̤sǔ lǒkho hǐnu. Cǒmara ma̤ta̤ htǒonu, ajòalîmòkhlope ta kòyòhǎkhû̌phû̌ htě a ta̤jòta̤lîmò dû̌khlo kò pě tapwa̤. Cǒmara a ta̤khû̌ǎyû̌lò̤ htǒonu, a khû̌ǎshû̌sho khlope ta kòyòhǎkhû̌phû̌ htě a khû̌ǎshû̌shokhlo ta kò tapwa̤ pě.

26Pṳwè̤ sî꤮, gènè̤kè̌ tû̌ sîna̤ bǎ Cǒmara kaǎ sî hǒtò̤ akhanu, dè hî̌ ta kòyòhǎkhû̌phû̌ a ta̤kè̌shǐ hî̌dě, sîklanu, pwa̤ htě asî̌ajò toǒ bǎbǎ, pwa̤ htě a ǒ ta a ta̤shû̌ta̤sho toǒ bǎbǎ, kòyò htě akhlialè dû̌yò̤htò̌sa toǒnu bǎbǎ, a ǒnṳpa pî̌tî̌pe pwǎ. 27Ma̤pûhǐ kòyò htě a gènè̤ lǒkho ana̤ ta kòsî̌kòjò toǒ sòwò̤kè ayanu, Cǒmara kaǎ takǎ kòyò htě kò gènè̤ asî ta a nòdû̌nu toǒ pwǎ. Ma̤pûhǐ kòyò htě a gènè̤ lǒkho ana̤ ta a ǒ ta ta̤shû̌ta̤shonu toǒ sòwò̤kè ayanu, Cǒmara kaǎ takǎ kòyò htě kò gènè̤ asî ta a ta̤shû̌ta̤sho ǒ kû̌kò tò̤nu toǒ hǒ. 28Ma̤pûhǐ Cǒmara ma̤pî̌kè ta̤ htě kòyòhǎkhû̌phû̌ gènè̤dû̌nu toǒ ayanudě, a kaǎ pwǎ kòyò htě kò bè̌dû̌ asî tò̤nu toǒ, kò gènè̤pî̌tî̌ asînu toǒ ta kò bè̌ asî ta kòyò nòdû̌nu toǒ pwǎ. 29Hǐnudě, Cǒmara a lo̤mo̤nu, kò phî̌htò̌yî̤jò kòna̤ dǐpwǎ̤꤮ tò̤. 30Cǒmara ma̤htûhtò̌htu sî ta Ye̤shǔkhrî̌stu tacǎnǔ꤮ pa hǒ. A ma̤htû bǎ sî ta Khrî̌stu tacǎnǔ꤮ pa htǒonu, a htûhtò̌ pa ta̤sî̌ta̤jò hǒ. Khrî̌stu akhû̌akhî, Cǒmara bè̌ pa pwǐ kòcǒkòtè̤ toǒnu. Htohǒtò̤ pa htûhtò̌ Cǒmara akòyò cahtǐ dě Khrî̌stu plûhǎhtò̌ pele pa ta ta̤sǔ ajû agûla̤ hǒ. 31Ma̤hǐnudě, pwǐ lî̤cahtǐkû hî̌, “Kòyò htě a sò̌yṳ phî̌htò̌yî̤ ana̤ toǒnu, a to phî̌htò̌yî̤ pwǎpǒ̤ Běcǎ ma̤htobò bǎ nû̌ûnu toǒ pwǎ.” ^g