1 Corinthians 10

Ta̤ǐsè̌rè̌sè̌so ta̤saba pwa̤yo̤ toǒ awi̤akè̌

1He sû̌kho sî꤮! He sò̌yṳ nosî̌ya sî ta paphipaphu htě Mǒ̤jè sûge nû̌û dě wǐkha toǒ awi̤akè̌. Poǒlṳ htě a dǔlṳ ta Cǒmara hèlò̤ ǒkû̌dǒ ta asî htǒoteběnu, a yṳǔge bǎ asîkhû̌. ^a Htodě asî gecû̌ tûlû̌bò̌ wǒadǎbò ta shilî̤dû̌te̤we̤. ^b 2Asî lǒ̤꤮ bò htǒotoǒnu a lò̤ta asî plobò lǒkho shi dě poǒlṳ htǒotebě akû ta dě shidû̌shite̤we̤ htǒo akûnu hǒ, asî htûgebò Mǒ̤jè akhophijaû̌ dě a gû nû̌ûkò toǒ hǒ. 3Asî ǎplǒbò nû̌û mû̌ htě Cǒmara ǐlò̤ asî htǒonu pṳ̂̌꤮ tapwa̤ hǒ. ^c 4Htodě asî oplǒbò nû̌û shi htě Cǒmara ǐ asî htǒonu hǒ. Shi htě asî o htǒonumî̌ a ǒ lo̤kû hǎhtò̌. Lo̤ htǒonumî̌ Ye̤shǔkhrî̌stu hǒ. Asî cû̌ bǎtè꤮ tò̤glò bǎbǎnu, Ye̤shǔ cû̌kû̌dǒ ta asî. ^d 5Cǒmara ma̤jè asî bǎnu pwǎ̤tadě asîkla toǒǒnu, a ma̤ to Cǒmara asò̌phlǒ tò̤nu a ǒplṳ̂. Hǐnudě asî sikèbò lo̤měshǒkla. ^e

6Paphipaphu htǒotoǒ lṳ̂ma̤kû̌ a ta̤sò̌yṳ phû̌mò̤shî̌hto toǒ akhû̌akhî, a htûhtò̌ hǐnu hǒ. Ma̤pûhǐ pa kè̌mò̌mṳ gûma̤kû̌ pû pwǐ asî ma̤nu ta̤ma̤nu, a htûhtò̌ ta̤sû̌ǐ paya tacǎ hǒ. ^f 7Pa bǎ saba pwa̤yo̤ pwǐ asînu tò̤. Ma̤tè̤hî̌dě lî̤cahtǐkû hî̌, “Asî hǎnòò̌ ǎmṳopǒ lǒkho dě kalî̌lò̤we̤lò̤sobò lǒkho.” ^g 8Pa bǎ cû̌sǔnṳ kû̌ mamǔmakhû pwǐ asîkla toǒǒ cû̌ sǔnṳnu tò̤. Asî cû̌sǔnṳ mamǔmakhû akhû̌akhî, ti̤ni̤ akû pwǎnu, asî sikè kòyò ginǐ̤sò̌ ta surî̌. ^h 9Běcǎ mî̌ acǒtè̤ ta a ta̤olò̤ ya, mî̌ acǒtè̤ tò̤ yanu pa bǎ hî̌kè̌ma̤kè̌ Běcǎ pwǐ asî toǒ hî̌kè̌ma̤kè̌nu tò̤. Paphipaphu toǒnu a ma̤kè̌ lǒkho hǐnu akhû̌akhî, wṳ̂ toǒ pè̌siplṳ̂kè asî. ⁱ 10Pa bǎ tṳ̂mṳ̂ta̤ma̤nṳ pwǐ asî toǒǒ tṳ̂mṳ̂ta̤ma̤nu tò̤. Paphipaphu dě wǐkha toǒ tṳ̂mṳ̂ta̤ma̤ lǒkho akhû̌akhî, mǒkhû̌tanaphû̌ ma̤sikè asî. ^j

11Ta̤htǒotoǒ cû̌ htûhtò̌ tǒ̤bò hǐnu ma̤tè̤hî̌dě ma̤pûhǐ kòyò ahǔwa̤ toǒ gû kè̌mò̌mṳ ma̤kû̌ pû hǐnu tò̤nu, a dǔlṳpwǎ bǎ kò. Ma̤pûhǐ kò ǐsè̌rè̌nǎ bǎ pa htě a ǒhtûpwa̤ gutṳ̌lò̤ htǒotuhtu toǒ ayanudě, kò khwè̌mǎnǎkèpwǎ yǎ dě lî̤cahtǐkû htǒo. 12Hǐnudě na gènè̤ nana̤ ta he ta̤yṳta̤nǎsho mè̤mè̤̌ dèhî̌dě, ǒsè̌rè̌ nana̤ nî̌꤮, pěmî̌ na ma̤sǔ hè̌. 13Ta̤htû̌sǒbǎ aphû̌mò̤ lǒ̤bò htě na kè̌shǐ hèbǎ toǒ numî̌ a sǒsǒpwǎ ta kòyòhǎkhû̌phû̌ ahǔwa̤ toǒ kè̌shǐ hèbǎnu toǒ pwǎ. Pwǎ̤ta Cǒmaranu acǒtè̤ ta ayo̤, Ma̤tè̤hî̌dě ta̤htû̌sǒbǎ aphû̌mò̤ htě ashû̌asho dě na khòbò̌ yǎtò̤ toǒnu, a nokhò na tò̤. Bǎ ta̤ma̤kè̌ hèbǎ na akhanu, ma̤pûhǐ na khòsò̌dobò̌ yǎ, htohǒtò̤ ma̤pûhǐ na lû̌htò̌bò̌ ta ta̤htû̌sǒbǎ aphû̌mò̤ htǒo ayanu, Cǒmara bòmo bǎ na klè̌ pě.

14He khobǒsû̌bǒmo̤ sî, saba lǒkho pûma̤ pwa̤yo̤ dî̌kî̌꤮ ma̤ nî̌꤮. 15Sî mî̌ kòyò htě asî̌ajò toǒ. Hǐnudě he hî̌ bǎ sî khònò̤htǒo numî̌ asǔ ya mî̌ ato yanu, gènè̤ te̤mǎ lǒkho nî̌꤮. 16Bǎ pa ǎoplǒnû̌û Běcǎ ta̤ǎocahtǐ lṳmṳhǎ akha dě pa kwihtò̌ Cǒmara ta a glè howi̤homò̤ sobîshiba htǒo akhanu, a dǔlṳ ta Khrî̌stu asǐ akhû̌akhî, pa htûhtò̌ nû̌ûta a tacǎpa hǒ mè̤tò̤ ya? Hǐnudě bǎ pa bî̌phò̌ mû̌ dě pa ǎyǎ akhanu, a dǔlṳ ta pa htûhtò̌ nû̌ûta Khrî̌stu ana̤klû tacǎpa hǒ, mè̤tò̤ ya? ^k 17Pa ǎhtuohtu plǒbò nû̌û mû̌ tomapa. Hǐnudě pa ǒplṳ̂ǒphǎ pwǎ̤ta pa mî̌ na̤ tapwǎ̤pa pwǎ.

18Gènè̤kè̌ lǒkhomò̌ Yṳ̌daphû̌ htě a ǎ lǒkho ta̤yî̌ htě kò lṳhtò̌ yǎta Cǒmara toǒnu. Asî ǎ ta̤lṳtòhtò̌ htǒotoǒ akhû̌akhî, asî sabahtò̌bò Cǒmara htǒonu hǒ. ^l 19Mî̌ he sò̌yṳ hî̌ ta pwa̤yo̤ htě kòyò saba yǎ htǒonumî̌ a ǒta a ta̤shû̌ta̤sho hǐnu ya? Tò̤mî̌ he sò̌yṳ hî̌ ta ta̤ǎta̤o htě kò lṳhtò̌ yǎta pwa̤yo̤ htǒonumî̌ a lo̤bǎdû̌khlo, he sò̌yṳ hî̌ hǐnu ya? 20He sò̌yṳ hî̌ hǐnu dî̌kî̌꤮ tò̤. He sò̌yṳ hî̌ ta ta̤ htě kò lṳhtò̌ yǎta pwa̤yo̤ toǒ numî̌ a lṳhtò̌ lǒkho pwǎ khînǎkhîno pwǎ, a lṳhtò̌ lǒkho Cǒmara mè̤tò̤. Hǐnudě he sò̌yṳ nobǒsû̌khǎkho sî ta khînǎkhîno tò̤. ^m 21Běcǎ ta̤ǎocahtǐ lṳmṳhǎ dě sî cû̌ nṳǎnṳo kû̌ kò, kòyò htě a saba pwa̤yo̤ toǒ bǔǎ ashǎǎshǎo ta khînǎkhîno toǒnu dě sî cû̌nṳ ǎplǒoplǒ kò, sî cû̌ ma̤hǐnu mî̌, anî̤ tò̤. Ma̤tè̤hî̌dě, na dè cû̌ nṳǎnṳo kû̌dǒ hǐnu mî̌ asǒsǒta na bǒsû̌ ta khînǎkhîno hǒ. 22Pa sò̌yṳ nosò̌phlǒdû̌ Cǒmara ta pana̤ ya? Mî̌ pa khû̌ǎshû̌shokhlo ta Cǒmara ya? ⁿ

23Dě sîkla toǒǒnu a hî̌ lǒkho, “Pa ma̤ titètè̌꤮ mî̌ anî̤ pwǎ,” hǐnu. A hî̌ hǐnumî̌ amè̤kǎlè, pwǎ̤ta titètè̌ mî̌ a htûbwǐhtûsîrîbò mè̤tò̤. “Pa ma̤ titètè̌ mî̌ anî̤ pwǎ,” pwǎ̤ta titètè̌꤮ bǎbǎnu, a ǐshû̌ǐshohtò̌jò kò ta̤yṳta̤nǎ tò̤. ^o 24Ta̤ htě a nî̤bwǐnî̤sîrî tû̌pwǎ sî tapwa̤ ayapwǎnu, sî to kè̌lǎ ma̤ dǐpwǎ̤꤮ tò̤. Mî̌tanu, sî to kè̌lǎ ma̤kû̌ ta̤ htě a nî̤bwǐnî̤sîrî ta kòhǔwa̤ ayanu toǒ.

25Dě klǎkûnu, kò shaǎ ǎ ta̤yî̌ titètè̌꤮ bǎbǎ, sî ǎyǎ anî̤bò pwǎ. Ma̤pûhǐ sî sò̌phlǒmo̤ ayanu, ta̤yî̌ htǒomî̌ kò bǔǎhto yǎta pwa̤yo̤ ya, mî̌ tò̤ ya gwèpûma̤ kò ma̤. 26He hî̌ hǐnu ma̤tè̤hî̌dě, “Hǎkhû̌ ta ta̤ htě a ǒ hǎkhû̌ alo̤htǒo pṳ̂̌꤮ tacǎ numî̌ Cǒmara ata lǒ̤꤮ bò pwǎ,” lî̤cahtǐkû hî̌ hǐnu. ^p

27Khrî̌stuphû̌ mè̤tò̤ tapwa̤ kaǎ ǎ na dî dě na dè bè̌ na sò̌phlǒ ta na glè cû̌ ǎ hî̌nu, kò ma̤wî̤ma̤wǒ bè̌lò̤shǔ bǎ na titètè̌꤮ bǎbǎnu, tûrû̌ ǎ yǎ. Ma̤pûhǐ na sò̌phlǒmo̤ ayanu, ta̤yî̌ htǒonumî̌ kò bǔǎhto yǎta pwa̤yo̤ ya mî̌ kò bǔǎhto hǒtò̤ yanu, gwèpe pûma̤ kò ma̤, tûrû̌ ǎnu. 28Pwǎ̤ta kòyò tapwa̤pwa̤ dè hî̌ sî ta, “Ta̤yî̌ htǒonu kò bǔǎhtò̌hto yǎta pwa̤yo̤ hǒ nî̌,” a dè hî̌ sî dě, ma̤pûhǐ sî ma̤jî pû kòyò htě a hî̌ sî htǒotapwa̤ asò̌phlǒ ma̤nu, gènè̤ bǎ aya dě ǎ pûma̤. 29Sî sî̌ya ta sî ǎ ta̤yî̌ mî̌ anî̤ pwǎ akhû̌akhî, sî sò̌phlǒmo̤ pwǎ. Pwǎ̤tadě he gwèbǎǐ kòyò ahǔwa̤ toǒ aya. Hî̌mò̌, dě sîkla tapwa̤pwa̤ gwè ta, “He dè ma̤ titètè̌꤮ mî̌ anî̤ pwǎ, mî̌ma̤tè̤dě he bǎcû̌ gûma̤tǒ̤ kû̌pe kòyò htě a gènè̤mo̤ tò̤ htǒotapwa̤ aya hî̌tè?” a glè hî̌ hǐnu. 30Tò̤hî̌kǎlè̌, dě sîkla ahǔwa̤ tapwa̤pwa̤ a glè gwèlè̌ ta, “Shǎǎshǎo htě he glè ǎ htǒonu, he hî̌bwǐhî̌sîrîhtò̌ Cǒmara dě he dè ǎ hî̌nu, ta̤ǎta̤o hǐnu tokhlǒmî̌ ta̤sǔ ǒ pwǎ kòyò toǒǒ cû̌hî̌tǒ̤ hǐnumî̌ ma̤tè?”

31Hǐnudě, he pwe̤ǐphlo bǎ asî ta, sî ma̤ titètè̌꤮ bǎbǎ, sîǎsîo titètè̌꤮ bǎbǎ, ma̤pû kò htû̌sò̌ǐ lǒkho Cǒmara ayanu. 32Yṳ̌daphû̌ toǒ aya bǎbǎ, Yṳ̌daphû̌ mè̤tò̤ toǒ aya bǎbǎ, Cǒmara a pwa̤yṳǎta̤ aprṳ̂aho toǒ bǎbǎ, sî ma̤ ta̤ titètè̌꤮ nu nohtûhtò̌ pûma̤ ta̤lòkhǔlòpo̤ ta asî aya ma̤. 33Ma̤kû̌ lǒkho pwǐ he ma̤nu. Ma̤pûhǐ kò nî̤bǎ ta̤ma̤lû̌htò̌ge ayanu, he ma̤ titètè̌꤮ bǎbǎ, he jipwi̤ lṳ̂ma̤to bǎ kò sò̌phlǒ a ta̤sò̌yṳ toǒ. He gènè̤ ma̤ pwǎ ta̤ htě he sò̌yṳ ma̤nu toǒ ta ta̤ htě awǒ ta he tapwa̤ aya tû̌nu toǒ mè̤tò̤. He kè̌lǎ ma̤ta̤htě awǒ ta kòyò pṳ̂̌꤮ tapwa̤ ayanu toǒ pwǎ.