1 Corinthians 11

1Hǐnudě, kè̌mò̌mṳ lǒkho he pwǐ he kè̌mò̌mṳ Khrî̌stunu. ^a

Bǎ saba akha ǒsè̌rè̌ lǒkho sî ta̤bè̌ sò̌phlǒsǔshi toǒ

2Sî gènè̤htò̌nṳ he pṳ̂̌꤮ plǎ, htohǒtò̤ sî gûma̤ pwǐ kò sû̌ǐ he dě he sû̌ǐ tṳtṳ bǎ sînu toǒ akhû̌akhî, he htû̌sò̌ǐ mè̤mè̤̌ sî.

3Pò̤̌ta he sò̌yṳ nosî̌yaphlo wǒpo̤ sî ta Khrî̌stu mî̌ makhû toǒ ahǐkǒ. Dě wṳ̂ mî̌ a htû ma ahǐkǒ, dě Cǒmara mî̌ a htû Khrî̌stu ahǐkǒ. 4Hǐnu akhû̌akhî, makhû tapwa̤pwa̤ dè sò̌yṳ kwisaba ta̤sabahǐkû bǎbǎ mè̤tò̤mî̌ a dè sò̌yṳ dǒhtû̌ǐlṳ bǎ kò ta ta̤hî̌bǎ htě Cǒmara nohî̌lṳ nû̌û htǒotoǒ dě ta̤sabahǐkûnu bǎbǎ, a dè kobǐ ahǐkǒ hî̌nu, alò̤ta a bè̌dubè̌na̤ Khrî̌stu tò̤nu hǒ. 5Mamǔ toǒ aya lè̌dě, a dè kwisaba ta̤sabahǐkû bǎbǎ mè̤tò̤mî̌ a dè dǒhtû̌ǐ bǎ kò ta ta̤hî̌bǎ htě Cǒmara nohî̌lṳ nû̌ûnu toǒ ta̤sabahǐkû bǎbǎ, a dè kobǐ ahǐkǒ tò̤ hî̌nu, alò̤ta a bè̌dubè̌na̤ awṳ̂ tò̤ hǒ. Htohǒtò̤ alò̤ta mamǔ htě a dî̌sòlò akhǔlṳ tapwa̤ dě a htûhtò̌ ta̤sòwò̤nu hǒ. 6Mamǔ htě a sò̌yṳ kobǐ a hǐkǒ tò̤ tapwa̤pwa̤nu, a to dî̌sòlòkè akhǔlṳ mî̌ awǒkhlo. Pwǎ̤ta dî̌sòlòkè yǎdě sòwò̤ pwǎ a dèhî̌mî̌, kobǐkè ahǐkǒ mî̌ awǒkhlo. 7Pò̤̌ta makhû lè̌dě bǎ a subusaba kû̌ta kò akhanu, a to kobǐ ahǐkǒ tò̤. Ma̤tè̤hî̌dě Cǒmara bǒlò̤ makhû htǒonu alò̤ta ana̤ akhû̌akhî, makhû mî̌ Cǒmara a sîrîdû̌sîrîhtû, pwǎ̤ta mamǔ mî̌ makhû a sîrîdû̌sîrîhtû. ^b 8Ma̤tè̤hî̌dě bǎ Cǒmara bǒlò̤ makhû akhanu, a phî̌ mamǔ aphwǐaphrû̌ dě a bǒlò̤ nû̌û mè̤tò̤. Pwǎ̤ta bǎ a bǒlò̤ mamǔ akhanu, a phî̌ makhû aphwǐaphrû̌ dě a bǒ nû̌û. ^c 9Hǐnudě mamǔ akhû̌akhî, Cǒmara bǒlò̤ makhû mè̤tò̤. Pwǎ̤ta ma̤pûhǐ makhû nî̤sû̌nî̤kho ayanudě, a bǒlò̤pwǎ mamǔ. 10Ma̤pûhǐ mǒkhû̌tanaphû̌ toǒ sî̌ya ta mamǔ toǒ ǒ lǒkho ta a ta̤shû̌ta̤sho ayanu, a to kobǐ lǒkho ahǐkǒ. Asî kobǐ ahǐkǒ htǒonumî̌ a dǔlṳ ta̤ma̤dòǐ tacǎ dě a kwisaba bǎbǎ, a dǒhtû̌ǐ Cǒmara ale̤ayo̤ bǎbǎ, a ǒta a ta̤shû̌ta̤sho hǐnu.

11Hî̌tètè̌ bǎbǎ, kòyò lǒ̤꤮ bò htě a htûhtò̌ ta Běcǎ tacǎ꤮ pa toǒnu, makhû bǎbǎ, mamǔ bǎbǎ, a lo̤bǎnò nû̌û tapwa̤ ta tapwa̤. 12Pa lo̤bǎ nû̌û tapwa̤ ta tapwa̤ numî̌ a mè̤mè̤̌. Ma̤tè̤hî̌dě Cǒmara phî̌ makhû aphwǐaphrû̌ dě a bǒlò̤ nû̌ûta mamǔ. Pwǎ̤tadě makhûnu, a ǒlò̤kû̌ pwǎ̤ta mamǔ aphukû pṳ̂̌꤮ tapwa̤ pwǎ. Pwa̤ htě a nohtûhtò̌bò ta̤pṳ̂̌꤮ tacǎ htǒotapwa̤ numî̌ Cǒmara pwǎ. 13Sî gènè̤kè̌mò̌, mamǔ tapwa̤ hè saba ta̤sabahǐkû dě a dè kobǐ ahǐkǒ tò̤ hî̌nu, awǒtò̤ numî̌ sî sî̌yatû̌ hǒ. 14Kò la̤klo hî̌ ta, makhû htě a bè̌htû akhǔlṳnu, a htû nû̌ûya ta̤sòwò̤, 15Pwǎ̤ta mamǔ htě a bè̌htû akhǔlṳnu, awî̤awǒ nû̌ûya, kò hî̌ hǐnu mè̤tò̤ya? 16Pwǎ̤tadě, he hî̌ hǐnu dě sîklanu, kòyò htě asò̌phlǒto tò̤nu aǒ toǒ. Ta̤ htě he sò̌yṳ hî̌ asî numî̌ hî̌tèhî̌dě, pa pwa̤nophû̌ toǒ sû̌ǐkî̌ya bǎ kò ta la̤bò̌la̤klo ahǔwa̤nu aǒ dǐcǎ꤮ tò̤. Htohǒtò̤ pwa̤yṳǎphû̌ htě a ǒ wî̤ bǎtè꤮ tî̤wî̤ akû toǒnu bǎbǎ, bǎ asî saba akha, a ma̤sǒsǒbò nû̌û hǐnu.

Bǎ Kòrî̌tiaphû̌ toǒ ǎo lǒkho Běcǎ ta̤ǎo cahtǐ lṳmṳhǎ akha, a ma̤sǔ lǒkho ta̤

17Htodě he sò̌yṳ sû̌ǐpo̤ bǎ sînu aǒpe toǒ. He glè sû̌ǐpo̤ sî htǒonu, he htû̌sò̌ǐ sî ma̤ta̤ htǒotoǒnu a ǒ dǐcǎ꤮ tò̤, ma̤tè̤hî̌dě bǎ sî subusaba plǒnû̌û akhanu, sî toma̤ ta̤ htě awǒkhlo toǒ pwǎ̤tadě sî tǐ̤ ma̤ta̤ htě a phû̌mò̤bò toǒǒ. 18Awǐgutṳ̌ tacǎ mî̌ sî hè subusaba htunû̌û bò̌khòtè꤮ bǎbǎnu, sî sò̌phlǒ khlè̌khǒkè̌khînû̌û, kò hî̌ bǎ he hǐnu. Pwǐ kò hî̌ bǎ henu he yṳǎ ta toǒǒ mî̌ ato pwǎ. 19Ma̤pûhǐ kò kè̌shǐ sî̌ya ta kòyò toǒ a yṳǎ ya, mî̌ ayṳǎ tò̤ yanu, ta̤sò̌phlǒ khlè̌khǒ htǒonu a bǎ ǒhtò̌nò pwǎ. 20Bǎ sî hè ǎo plǒnû̌û Běcǎ ta̤ǎo cahtǐ lṳmṳhǎ akhanu, sî ǎo sǒsǒpe ta kò ǎo Běcǎ ta̤ǎo cahtǐ lṳmṳhǎ tò̤. 21Ma̤tè̤hî̌dě, sî hè ǎo Běcǎ ta̤ǎo cahtǐ lṳmṳhǎ bò̌khòtè꤮ bǎbǎnu, sî hè ǎkǒobe wǐbò shǎǎshǎo toǒ, sî bè̌kè bǎ kò tò̤. Kòyò ǒti̤wi̤ǎnu aǒ toǒ. Kòyò htě a ǎmṳopǒnu aǒ toǒ. 22Sî ǎ lǒkho dě sîhǐ tò̤mî̌ sîhǐ ǒ tò̤ ya? Mî̌ sî sò̌yṳ ma̤mi̤pi̤sidǒ takǎbò pwa̤yṳǎta̤ htǒotoǒ ami̤nu hǒ ya? Mî̌ sî sò̌yṳ ma̤ sòwò̤kè kòyò shuphǔshèwènu toǒ ya? He bǎ hî̌pe sî hî̌tè? He tobǎ htû̌sò̌ǐ sî ya? La̤htû̌sò̌ǐ sînu aǒ dǐcǎ꤮ tò̤.

23Ma̤tè̤hî̌dě, ta̤ htě sî ma̤ toǒnu, alò̤ta pwǐ Běcǎ Ye̤shǔ sû̌ǐ bǎ henu toǒ tò̤. Ta̤ htě a sû̌ǐ bǎ he toǒnumî̌, he sû̌ǐhtobò bǎ sî hǒ. He sû̌ǐ bǎ sî ta, bǎ kò shaǎlò̤kè Běcǎ Ye̤shǔnu tahǎ akha, a phî̌htò̌ mû̌, 24Dě a hî̌bwǐhî̌sîrîhtò̌ Cǒmara, htodě a bî̌phò̌ mû̌ dě a hî̌, “Htǒo mî̌ he na̤klû htě a ǐlò̤kè yǎta sîya. Ma̤pûhǐ sî gènè̤htò̌nṳ he pṳ̂̌꤮ taplǎ nudě, ma̤ lǒkho hǐnu pṳ̂̌꤮ taplǎ nî̌꤮.” 25Asî ǎhto mû̌ dě, a phî̌htò̌lè̌ sobîshiba dě a ma̤sǒsǒ nû̌û pwǐ a ma̤wǐnu, dě a hî̌, “Sobîshi htǒonumî̌ Cǒmara ta̤wṳ̂dò asa a ta̤ma̤dòǐ tacǎ. ^d Cǒmara ma̤měma̤gle lò̤ti̤htokè ta̤wṳ̂dò htǒonu ta hesǐ htě a lò̌lò̤ bǎ sîya htǒonu hǒ. Sî o sobîshi htǒo bò̌khòtè꤮ bǎbǎnu, ma̤pûhǐ sî gènè̤htò̌nṳ he pṳ̂̌꤮ taplǎ nudě, ma̤ lǒkho hǐnu nî̌꤮.” ^e 26Sî ǎ mû̌ dě sî o sobîshi bakûhtǒo bò̌khòtè꤮ bǎbǎnu, sî pwe̤ǐlṳhtò̌ Běcǎ ata̤si awi̤akè̌ to̤htû̌ a hèsǒ pě taplǎnu hǒ.

27Hǐnudě, ûpèpè̌꤮ bǎbǎ a ǎ mû̌htǒo ta a o Běcǎ ashiba dě ta̤bè̌dubè̌na̤ yǎ akû tò̤ toǒnu, a ma̤sǔ Běcǎ ana̤klû ta asǐ htǒonu hǒ. 28Hǐnudě na to gwèlò̤kè̌wǐ tû̌ nana̤, dě na to ǎnǒ mû̌, onǒ sobîshi bakû htǒonu. 29Bǎ sî ǎ mû̌, sî o sobîshi htǒo akhanu, sî bǎ gènè̤ te̤mǎ to̤ Khrî̌stu ana̤klû amûasǎ htǒonu. Sî dè gènè̤ te̤mǎ tò̤ hî̌nu, Cǒmara phlě sî pě. 30Sî gènè̤ te̤mǎ lǒkho hǐnu tò̤ akhû̌akhî, dě sîklanu, kòshǐkòsha toǒ mî̌ aǒ plṳ̂plṳ̂, kòyò khû̌ǎyû̌lò̤ toǒ mî̌ a ǒplṳ̂ǒphǎphǎ, kòyòsi mî̌ aǒ toǒǒ. 31Sî dè gwèlò̤kè̌wǐ tû̌ sîna̤ hî̌mò̌nu, Cǒmara phlě sî tò̤. 32Htû̌꤮ Cǒmara cèrò kòyò htě a yṳǎ nû̌û tò̤nu toǒ akhapěnu, ma̤pûhǐ a cèrò kû̌dǒpe pa ta asî tò̤nu, a sû̌ǐ pa, a phlě pa hè̌o nupwǎ.

33Hǐnudě, he sû̌kho sî꤮, bǎ sî hèǒplǒ nû̌û dě sî glè ǎplǒoplǒnû̌û Běcǎ ta̤ǎo cahtǐ lṳmṳhǎ akhanu, ǒyṳ̂ǐ kû̌nǎ nû̌û tapwa̤ ta tapwa̤ dě ǎplǒoplǒnû̌û. 34Pwǎ̤tadě bǎ sî ǎo Běcǎ ta̤ǎo cahtǐ lṳmṳhǎ akha, dě sîklanu, kòyò tapwa̤pwa̤ dè sǎǎsò̌o lǎ hǒ hî̌dě ma̤pûhǐ Cǒmara phlě sî tò̤nu, sî to ǎo hèwǐ lǒkho dě sîhǐ.

Ta̤ htě he lo̤bǎ sû̌ǐtòwòǐ sînu aǒpe toǒ, pwǎ̤ta he hî̌ bǎ sî htû̌꤮ he hèto̤ dě sî ǒ pě.