1 Corinthians 14

Sû htě awǒgutṳ̌ toǒ numî̌ sû htě a ma̤shû̌ma̤jo kò

1Sî to jipwi̤jili̤ mo̤ǐ kòyò. Htodě sò̌yṳ nî̤bǎkû̌ lǒkho kò sû htě Běcǎ sǎcahtǐ ǐlò̤ko htǒonu toǒ. Nî̤bǎko sû htě awǒkhlo kò mî̌ dǒhtû̌ǐjò bǎ kò ta Cǒmara ale̤ayo̤ pwǐ pwa̤po̤ tapwa̤nu hǒ. 2Ma̤tè̤hî̌dě kòyò tapwa̤pwa̤ dè hî̌bǎ yo̤khěkhǒhtǒo dě kò sî̌yahtû tò̤ htǒotoǒ hî̌nu, a hî̌bǎ ta kòyòhǎkhû̌phû̌ toǒnu mè̤tò̤, a hî̌bǎ ta Cǒmara pwǎ. Kò sî̌yaphlokû̌ nû̌û ta̤ dǐpwǎ̤꤮ tò̤. A hî̌bǎ ta Běcǎ sǎcahtǐ a ta̤po̤ta̤phǎ dě a hî̌bǎ ta̤hî̌bǎ htǒotoǒnu adû̌ayǒ akhû̌akhî, kò sî̌yahtû kû̌ nû̌û tò̤. 3Dè kè̌lè̌ klè̌ ahǔwa̤ tabo hî̌dě, kòyò htě a dǒhtû̌ǐ bǎ kò ta Cǒmara ale̤ayo̤ toǒnumî̌, a hî̌bǎ ta kòyòhǎkhû̌phû̌ toǒ hǒ, dě a htû ta̤ma̤jè ta kòyòhǎkhû̌phû̌ toǒ aya, a ǐkhû̌ǐǎ kòyòhǎkhû̌phû̌, dě a ma̤mo̤htò̌ gesǒ kòyòhǎkhû̌phû̌ toǒ asò̌phlǒ. 4Kòyò htě a hî̌bǎ yo̤khěkhǒ htǒotoǒnu, a ma̤jèlò̤ tû̌pwǎ ana̤. Pwǎ̤ta kòyò htě a dǒhtû̌ǐ bǎ kò ta Cǒmara ale̤ayo̤ toǒnu, a ma̤jèbò pwa̤yṳǎta̤ aprṳ̂ahophû̌ pṳ̂̌꤮ tapwa̤. 5He sò̌yṳ ta sî pṳ̂̌꤮ tapwa̤ nî̤bǎbò yo̤khěkhǒhtǒo asû toǒ, pò̤̌ta he sò̌yṳbò ta sî pṳ̂̌꤮ tapwa̤ glè dǒhtû̌ǐ bǎ kò ta Cǒmara ale̤ayo̤ toǒ. Ma̤tè̤hî̌dě kòyò htě a nî̤bǎ sû htě a dǒhtû̌ǐ bǎ kò ta Cǒmara ale̤ayo̤ pwǐ pwa̤po̤ toǒnu, a lo̤bǎdû̌khlo dě a nî̤bwǐnî̤sîrîkhlo ta kòyò htě a nî̤bǎ yo̤khěkhǒ asû htǒotoǒ. Pwǎ̤tadě kòyò htě a hî̌bǎ yo̤khěkhǒ htǒotoǒ tapwa̤nu, kòyò tapwa̤pwa̤ dě a glè pwe̤ǐlṳphlo tèplè̌htò̌jò bǎ kò ta a hî̌bǎ yo̤khěkhǒ htǒo amûasǎ dè ǒ hî̌mî̌, a nî̤bwǐnî̤sîrî ta pwa̤yṳǎta̤ aprṳ̂ahophû̌ toǒ aya pwǎ.

6Hǐnudě he sû̌kho sî, he hè hî̌bǎ sî ta yo̤khěkhǒ htǒo dèhî̌dě a glè nî̤bwǐnî̤sîrî ta sîya hî̌tè? Pò̤̌ta, he dè phî̌hènṳ bǎ sî ta̤wi̤ta̤kè̌ htě Cǒmara dǔlṳ he toǒnu bǎbǎ, ta̤sî̌khû̌sî̌ya toǒnu bǎbǎ, ta̤hî̌po̤hî̌phǎnǎ toǒnu bǎbǎ, ta ta̤sû̌ǐtòwòǐ toǒnu bǎbǎ, dèhî̌mò̌nu, a htûbwǐhtûsîrî ta sîya pě. 7Kè̌kû̌nǎ lǒkho ta̤dǒta̤ǔ a ta̤kî̌ta̤kû̌ htě a shodo sò̌phlǒ htǒotoǒnu, kòyò tapwa̤ dè ǔtî̌lû̌, mè̤tò̤mî̌ a dè dǒtǐtu pwǎ̤ta a dǒpo̤ nû̌ûyo̤ htǒonu a dè po̤totò̤ dèhî̌dě a sò̌yṳ dǒpo̤ kwè̌꤮ hî̌tènu, a sû̌kho toǒ cû̌ sî̌yaphlojò nû̌û ta̤dǒpo̤ ayo̤ po̤nî̤po̤nè̤ htǒonu hî̌tè? 8A sǒsǒ hǐnuakho, hî̌kû̌nǎ, kliphû̌ tapwa̤ dè sò̌yṳ ǐsî̌ya akho toǒ ta asî to htò̌shěta̤ dě a dè ǔpo̤htò̌ bǎ asî tǔ, pwǎ̤tadě a ǔ ǐsî̌ya kò htǒonu, a ǔ po̤phlowǒ tǔ tò̤ dèhî̌mî̌ ûpè tapwa̤ cû̌ sî̌yajò a ta̤ǐsî̌ya kò htǒonu ta kò bǎ htò̌shěta̤ hî̌tè? 9Hǐnuakho na dè hî̌bǎ kò ta yo̤khěkhǒ htě kò sî̌ya amûasǎ tò̤ htǒonu hî̌dě kò cû̌ sî̌yajò amûasǎ hî̌tè? Na dè hî̌bǎ hǐnu hî̌dě, a lò̤pwǎ ta na hî̌bǎbò nòdû̌ na gili̤. 10Dě hǎkhû̌ bǎonu, yo̤khǒnû̌ûnu a ǒplṳ̂ pwǎ̤ta tacǎ ta tacǎnu amûasǎ ǒ kî̌yatû̌ ata. 11Pò̤̌ta kòyò tapwa̤pwa̤ hî̌bǎ he dě he dè sî̌ya ayo̤ tò̤ hî̌mò̌nu, amî̌ a lò̤kèta heya ta shigahǔwa̤phû̌ tapwa̤ hǒ, dě henu, a lò̤kè nû̌ûya ta shigahǔwa̤phû̌ tapwa̤ hǒ. 12Sî dè sò̌yṳ mè̤mè̤̌ Běcǎ sǎcahtǐ ǐko sû htǒo hî̌nu, wû̌lǎphî̌ lǒkho sû htě a ma̤ dû̌htò̌htûhtò̌jè pwa̤yṳǎta̤ aprṳ̂aho toǒnu.

13Hǐnudě kòyò htě a hî̌bǎjò yo̤khěkhǒ htǒotapwa̤nu, a tobǎ kwi Cǒmara ta a ǐ nû̌û ta̤sî̌ta̤jò dě a glè pwe̤ǐlṳphlo tèplè̌htò̌jòge bǎ kò ta a ta̤hî̌bǎ toǒ. 14Ma̤tè̤hî̌dě, he dè kwisaba ta yo̤khěkhǒ htǒo hî̌dě, he sò̌phlǒ htǒonu a sî̌ya ta he kwisaba Cǒmara pwǎ̤ta he gènè̤phlo amûasǎ tò̤. 15Dè hî̌hǐnudě, he glèbǎ ma̤ hî̌tè? He kwisaba pwǐ Běcǎ sǎcahtǐ yṳ̂klè̌nè̌klò he sò̌phlǒnu pwǎ, htohǒtò̤ he kwisaba ta yo̤ htě kò sî̌ya kû̌ henu toǒ pwǎ. Bǎ he sò̌po̤ akhanu, he sò̌po̤ pwǐ Běcǎ sǎcahtǐ yṳ̂klè̌nè̌klò he sò̌phlǒnu pwǎ, htohǒtò̤ he sò̌po̤ ta yo̤ htě kò sî̌ya kû̌ henu toǒ pwǎ. 16Hî̌kû̌nǎ, na dè hî̌bwǐhî̌sîrî htû̌sò̌ǐ pwǎpǒ̤ Cǒmara ta yo̤khěkhǒ htǒo dèhî̌mò̌nu, kòyò htě a hèsaba kû̌ na htǒotoǒ akla tapwa̤pwa̤ sî̌ya kû̌ nayo̤ tò̤ akhû̌akhî, a hî̌bwǐhî̌sîrîhtò̌jò kû̌ na Cǒmara tò̤. 17Na ta̤kwisaba htû̌sò̌ǐ Cǒmara htǒonu, awǒle pwǎ̤tadě a htûbwǐhtûsîrî ta kòyòya dǐcǎ꤮ tò̤.

18Ta̤hî̌bǎ yo̤khěkhǒ htǒotoǒnu, he hî̌bǎjòkhlo ta sî akhû̌akhî, he hî̌bwǐhî̌sîrî Cǒmara. 19Pwǎ̤ta pwa̤yṳǎta̤ aprṳ̂aho akûnu, he hî̌bǎ ta yo̤khěkhǒ htǒotoǒ tò̤. Ma̤tè̤hî̌dě, wǐ꤮ ta he hî̌bǎ kò ta yo̤khěkhǒ htǒo amû tòsò̌nu, tò̤nò̌ he sû̌ǐ pwǎ kò ta yo̤ htě kò sî̌yajò htǒo yè̤̌mû pwǎnu awǒkhlope heya.

20He sû̌kho sî, gènè̤ lǒkho pûma̤ pwǐ phijaû̌phû̌ toǒ gènè̤nu ma̤. Pò̤̌ta abǎkhwè̌ ta ta̤phû̌mò̤shî̌hto tukǔnu, htûhtò̌ sǒsǒkû̌ta phijaû̌ ǒsa dě asî̌ya kû̌kò ta̤phû̌mò̤shî̌hto tò̤nu toǒ nî̌. Pwǎ̤tadě ta̤ htě he khwè̌ bǎ sî htǒotoǒnu, gènè̤ lǒkho pwǐ kòyòdû̌pwa̤ tapwa̤ a ta̤gènè̤nu. 21Lî̤cahtǐkû hî̌,

“He nohè shigakhlophû̌ toǒ glè hè hî̌bǎ hekòyò toǒ ta shigakhlo ayo̤ toǒ pě. He hî̌bǎ asî hǐnupě pwǎ̤ta asî gana̤de he yo̤ pě tò̤,” ^a Běcǎ hî̌ hǐnu.

22Hǐnu akhû̌akhî, yo̤khěkhǒ htǒotoǒ numî̌ ta̤ma̤dòǐ ta pwa̤yṳǎphû̌ toǒ ayanu mè̤tò̤. Yo̤khěkhǒ htǒotoǒ numî̌ a dǔlṳ ta Cǒmara glè cèrò kòyò htě a yṳǎna̤ǎ kû̌kò tò̤nu toǒ aya pwǎ. Pwǎ̤tadě ta̤hî̌po̤phǎ Cǒmara ale̤ayo̤ toǒnu a dǔlṳ ta Cǒmara sò̌phlǒǒ pwa̤yṳǎphû̌ toǒ pwǎ. Ta̤hî̌po̤phǎnǎ htǒonumî̌ pwa̤ htě a yṳǎ kû̌kò tò̤ toǒ ayanu mè̤tò̤. 23Hî̌kû̌nǎ, sî hè subusaba plǒbò nû̌û dě sî dè hî̌bǎ ta yo̤khěkhǒ htǒotoǒ pṳ̂̌꤮ tapwa̤ dèhî̌mò̌nu, kòyò ahǔwa̤ toǒ, mè̤tò̤mî̌ kòyò htě a yṳǎ kû̌kò Khrî̌stu hǒtò̤ toǒ hèsaba kû̌dǒ sî hî̌dě asî dè gana̤denǒ kû̌ yo̤ htǒotoǒ dǐkhò̌꤮ tò̤ dèhî̌nu asî hî̌ lǒkho sî ta kòyò kicǐ pě. 24Pwǎ̤tadě, hî̌kû̌nǎ, kòyò ahǔwa̤ htě a gana̤denǒ kû̌kò yo̤ htǒotoǒ dǐkhò̌꤮ tò̤ toǒ, mè̤tò̤mî̌ kòyò htě a yṳǎ kû̌kò Khrî̌stu tò̤ toǒ hèsaba kû̌ sî hî̌dě sî dè hî̌po̤phǎ Cǒmara ale̤ayo̤ pṳ̂̌꤮ tapwa̤ hî̌nu, asî sî̌yalò̤ lǒkho ana̤ ta asî mî̌ ta̤ma̤sǔphû̌ toǒ pě. Dě sî hî̌po̤phǎ htǒo akhû̌akhî, asî sò̌yṳ yò̤lò̤ge lǒkho asò̌phlǒ pě. 25Htǒotaplǎdě, ta̤ htě asî sî̌yahtûtò̤ dě a sò̌phlǒkû toǒnu, a gènè̤phlohtò̌ pě. Dě a gene̤lò̤ sabahtò̌ Cǒmara dě a hî̌, “Cǒmara a sîrîpo̤phǎ shû̌sho ǒmě mè̤mè̤̌ ta kòyò htǒotoǒ hǒ,” a hî̌ lǒkho hǐnu pě.

Pò̌lu sû̌ǐtòwòǐ kò ta subusaba plǒnû̌û awi̤akè̌

26He sû̌kho sî, hǐnudě bǎ sî hèsaba plǒnû̌û akhanu, sî to ma̤ hî̌tè? Toǒǒnu a glè sò̌po̤ htû̌sò̌ǐ Cǒmara, toǒǒnu a sû̌ǐtòwòǐ kò ta Cǒmara ale̤ayo̤, toǒǒnu a pwe̤ǐlṳhtò̌ bǎ kò ta Cǒmara dǔlṳ nû̌û toǒ, toǒǒ lè̌dě a glè hî̌bǎ ta yo̤khěkhǒ toǒ, toǒǒ lè̌dě a hî̌lṳphlo tèplè̌htò̌ bǎ kò yo̤khěkhǒ htǒotoǒ amûasǎ. Sî ma̤ lǒkho htǒo mî̌ awǒpwǎ. Pwǎ̤ta sî ma̤ ta̤titètè̌ bǎbǎnu, nonî̤khû̌nî̤ǎ, nohtûbwǐhtûsîrî bǎ pwa̤ htě a gana̤de ta̤ toǒ ayanu. 27Kòyò tapwa̤pwa̤ dè sò̌yṳ hî̌bǎ ta yo̤khěkhǒ htǒotoǒ dèhî̌dě, a to hî̌bǎ plṳ̂khlo ta sò̌gini̤ tò̤mî̌ sò̌su tò̤. Pwǎ̤ta asî tobǎ hî̌bǎ tapwa̤ hto tapwa̤. Dě asîkla tapwa̤nu, a to sî̌yaphlo amûasǎ dě a tobǎ pwe̤ǐlṳphlo tèplè̌htò̌gesǒ bǎ kò. 28Pwǎ̤tadě, kòyò htě a hî̌bǎ ta yo̤khěkhǒ htǒotoǒnu, pwa̤pwe̤ǐlṳphlo tèplè̌htò̌ bǎ nû̌û amûasǎ dè ǒ dǐpwǎ̤꤮ tò̤ hî̌mò̌nu, pwǎpwǎ noǒkè asî dě sî pwa̤yṳǎta̤ aprṳ̂aho akûnu, dě nokwisaba hǔtû̌ yǎta Cǒmaranu.

29Hǐnudě, kòyò htě a hî̌po̤phǎ Cǒmara ale̤ayo̤ toǒnu, a to hî̌po̤phǎ pwǎ sò̌gini̤ tò̤mî̌ sò̌su pwǎ. Asî hî̌po̤phǎ htǒotoǒ numî̌ Cǒmara nohî̌po̤phǎ asî ya, mè̤tò̤ yanu, kòyò htě a ǒkè toǒ tobǎ gana̤de dě gènè̤kè̌ te̤mǎ lǒkho asî ata̤hî̌po̤phǎ htǒotoǒ. 30Pwǎ̤tadě, kòyò hǎnòò̌gana̤de ta̤ akla toǒnu, kòyò tapwa̤pwa̤ nî̤bǎ yo̤sǎ dě Cǒmara ǒ tûmûmû dèhî̌dě, kòyò htě a hî̌po̤phǎta̤nu tapwa̤ tobǎ ǒkǔkè, kòyò htǒotapwa̤ bǎ hî̌bǎ dǒlè̌. 31Hǐnuakho, ma̤pûhǐ kò pṳ̂̌꤮ tapwa̤ nî̤bǎ ta̤sî̌khû̌sî̌ya ta ta̤shû̌ta̤sho ayanu, kòyò lǒ̤꤮ bò htě a hî̌po̤phǎ ta̤ toǒnu, a tobǎ hî̌po̤phǎ tapwa̤ hto tapwa̤. 32Kòyò htě a sò̌yṳ hî̌po̤phǎ ta̤ toǒnu, a hî̌po̤phǎ bǎbǎ, a hî̌po̤phǎtò̤ bǎbǎ, a to khòǐbò̌jò lǒkho ana̤. 33Ma̤tè̤hî̌dě, bǎ sî hè subusaba plǒnû̌û akhanu, sî hî̌po̤phǎ pi̤ti̤pṳ̂tṳ̂bò nû̌û taplǎpa hǐnu, Cǒmara sò̌phlǒ ǒ tò̤. Cǒmara sò̌yṳ htě sî hî̌ sî ma̤ lǒkho ta aklè̌aklò tapwa̤ hto tapwa̤ hǐnu.

34Bǎ pwa̤yṳǎta̤ aprṳ̂ahophû̌ ǒhtuhî̌bǎplǒ nû̌û akhanu, asî la̤klo ǒta pwa̤yṳǎta̤ aprṳ̂aho akû htǒonu, mamǔ toǒ tobǎ ǒsî̌tukǔ. Asî tobǎ hî̌bǎ tò̤. Pwǎ̤ta pwǐ Yṳ̌daphû̌ ta̤sû̌ta̤tòwò ǒnu, kò tobǎ bè̌dubè̌na̤ asî. 35Asî dè sò̌yṳ sî̌ya ta̤tacǎcǎ hî̌dě, a bǎ ge gwèpwǎ awṳ̂ dě hǐ. Pwa̤yṳǎta̤ aprṳ̂aho akûnu, mamǔ tapwa̤pwa̤ dè hî̌bǎkû̌ ta̤ hî̌nu, a htûhtò̌ ta̤sòwò̤ tacǎ.

36Cǒmara ale̤ayo̤ a kòshî̌kòtṳ mî̌ a ǒ pwǎpǒ̤ sî Kòrî̌tiaphû̌ pwa̤yṳǎta̤ aprṳ̂aho akû dě a hè pwǎ ya? Mè̤tò̤mî̌ a hè pwǎ dě sî htǒotoǒ a ǒ pwǎ ya? 37Kòyò tapwa̤pwa̤ gènè̤ ana̤ ta, he mî̌ pwa̤ htě a hî̌po̤phǎ bǎ Cǒmara a ta̤wi̤ta̤kè̌ tapwa̤, mè̤tò̤mî̌ he mî̌ kòyò htě a nî̤bǎ sû sû̌sò̌ tokho tapwa̤ dèhî̌mî̌ he khwè̌ ta̤ htǒotoǒnu Běcǎ a ta̤mǎlò̤ pwǎnu a bǎ sî̌ya pwǎ. 38Pwǎ̤ta lǒ̤꤮ bò he hî̌ yǎ htǒotoǒnu, a dè bè̌dubè̌na̤ tò̤ hî̌dě bè̌dubè̌na̤ pûma̤ yǎ dǐpwǎ̤꤮ ma̤.

39Ma̤hǐnudě, he sû̌kho sî, bè̌htu lǒkho sî sò̌phlǒ ta ta̤hî̌po̤phǎ htǒotoǒ. Pwǎ̤tadě cû̌ noǒkǔ pûma̤ kòyò htě a hî̌bǎ ta yo̤khěkhǒnu toǒ ma̤. 40Sî ma̤ titètè̌꤮ bǎbǎnu, sî tobǎ ma̤ te̤bǎte̤to yǎ dě tobǎ cû̌ ta aklè̌aklò.