1 Corinthians 15

Khrî̌stu si htûpwa̤gesǒ

1He sû̌kho sî, khònò̤dě he sò̌yṳ ǐ sî̌yahtò̌bǎ gesǒ sî ta ta̤sò̌le̤sò̌lò̤ awi̤akè̌ htě he dǒhtû̌ǐhto sî dě sî nî̤bǎhto ta sî bè̌shû̌bè̌shohtò̌ sî ta̤yṳta̤nǎ dě alo̤ htǒonu awi̤akè̌ pwǎ. 2Htǒonumî̌ ta̤sò̌le̤sò̌lò̤ awi̤akè̌ htě he dǒhtû̌ǐ bǎhto sînu. Sî yṳǎ dě sî dè pṳ̂gleměwǒ ta̤sò̌le̤sò̌lò̤ awi̤akè̌ htǒotukǔ hî̌numî̌, sî nî̤bǎ ta̤ma̤lû̌htò̌ge hǒ. Sî dè ma̤ hǐnutò̤ hî̌dě, sî ta̤yṳ htǒotoǒ numî̌ ta̤yṳ htě a mè̤na̤cè̌ mè̤tò̤.

3Ta̤wi̤ta̤kè̌ htě a lo̤bǎdû̌khlo kò dě he nî̤bǎ ta he ǐlò̤ tṳtṳ bǎ sî htǒonumî̌ mè̤hǒ, ma̤pûhǐ pa lû̌htò̌ ta ta̤cèrò pa ta̤sǔ htǒonudě, Khrî̌stu khòsi asò̌ hǒ, lî̤cahtǐkû hî̌ hǐnu. ^a 4Htohǒtò̤ lî̤cahtǐkû hî̌po̤, kò lǔhto Khrî̌stu dě suni̤ ti̤ni̤nu a htûpwa̤gesǒ ta ta̤si. ^b 5A htûpwa̤ge htodě a ǒlṳhtò̌ bǎ Petru, ^c ta a ǒlṳhtò̌dǒ bǎ pwa̤nophû̌ shǐsò̌gini̤. ^d 6Htodě nǒkònu, a ǒlṳhtò̌po̤ bǎ akhophijaû̌ yè̤̌ya̤ taplǎpa. Kòyò htě a kè̌shǐ nû̌û htǒotoǒnu, toǒǒ mî̌ a sihtohǒ pwǎ̤tadě toǒǒnu, a ǒhtûpwa̤ to̤pe khònò̤kha htǒonu a ǒ plṳ̂khlope ta a sihtonu toǒ. 7Htodě a ǒlṳhtò̌hto bǎ Jǎgomo̤ dě a cû̌ ǒlṳhtò̌bò bǎlè̌ pwa̤nophû̌nu toǒ. 8Gutṳ̌lò̤ dě a ǒlṳhtò̌dǒ bǎlè̌ he asǒsǒta phijaû̌ htě a ǒlabe kû̌kò tò̤ htǒotapwa̤. ^e

9Dě pwa̤nophû̌ lǒ̤꤮ bò aklanu, he mî̌ kòyò htě atoagwa kû̌kò pwǐ pwa̤nophû̌ ahǔwa̤nu toǒ dî̌kî̌꤮ tò̤ tapwa̤, ma̤tè̤ bǎ he yṳǎ Ye̤shǔkhrî̌stu hǒtò̤ akhanu, he ma̤jîma̤jû kòyò htě a yṳǎ Ye̤shǔkhrî̌stu toǒ akhû̌akhî, kò glè kaǎ he ta pwa̤nophû̌ tapwa̤pwǎnu a gwa dî̌kî̌꤮ tò̤. ^f 10Pwǎ̤ta, Běcǎ abwǐasîrî akhû̌akhî, khònò̤dě he htûhtò̌ pwa̤nophû̌ tapwa̤hǒ. Ta̤bwǐta̤sîrî htě Cǒmara ǐlò̤ he htǒonu a nòdû̌ tò̤. Ma̤tè̤hî̌dě he jipwi̤ htǒkhû̌htǒǎ ma̤khlo ta pwa̤nophû̌ ahǔwa̤ toǒ hǒ. He ma̤bò̌ hǐnu numî̌ hekhû̌heǎ tû̌ mè̤tò̤. Cǒmara abwǐasîrî ma̤ kû̌dǒ ta he akhû̌akhî, he ma̤bò̌ pwǐhè̌onu pwǎ. 11Hǐnudě, he dǒhtû̌ǐ bǎ sî htǒotoǒnu bǎbǎ, asî dǒhtû̌ǐ bǎ sî toǒnu bǎbǎ, sî yṳǎ sǒsǒbò nû̌û hǐnu hǒ.

Pa htûpwa̤ge ta ta̤si

12Pa dǒhtû̌ǐhto bǎ sî ta Khrî̌stu htûpwa̤gesǒ ta ta̤si pwǎ̤ta sîkla toǒǒnu, “Kòyò sihto tûkûdě a htûpwa̤gejòpe dǐkhò̌꤮ tò̤,” a cû̌hî̌ lǒkho hǐnumî̌ ma̤tè? 13Pwǐ sî hî̌nu a dè mè̤mè̤̌ hî̌dě, Khrî̌stunu, a si htûpwa̤ge tò̤, amûasǎ hè hǐnu. 14Khrî̌stu si htûpwa̤ge mè̤mè̤̌ tò̤ dèhî̌dě, pa dǒhtû̌ǐ bǎ sî htǒonumî̌ a nî̤bwǐnî̤sîrî tò̤. Sî yṳǎnu꤮ mî̌ a nî̤bwǐnî̤sîrî tò̤tò̤. 15Tǒ̤htǒonu mè̤tò̤, sî hî̌ ta kòyò sihtonu a htûpwa̤ge jòpetò̤ htǒonu a dè mè̤mè̤̌ hî̌dě, a lò̤te̤ ta sî hî̌ Cǒmara ma̤htûpwa̤gesǒ Khrî̌stu mè̤tò̤ hǐnu. A dè mè̤mè̤̌ mò̌nu, pa mî̌ kòyò htě a cû̌ dǒhtû̌ǐ lòhǎlòhobò bǎ kò ta Cǒmara awi̤akè̌ toǒ hǒ. Ma̤tè̤hî̌dě pa dǒhtû̌ǐ bǎ kò ta Cǒmara ma̤htûpwa̤gesǒ Khrî̌stu hǐnu nǔ꤮. Pwǎ̤tadě sî hî̌ htǒotoǒ numî̌ ato dǐcǎ꤮ tò̤. 16Kòyò si toǒ dè htûpwa̤ge tò̤ hî̌dě, Khrî̌stunu mî̌ Cǒmara ma̤ htûpwa̤ge nû̌û ta ta̤si tò̤tò̤. 17Khrî̌stu si htûpwa̤ge ta ta̤si tò̤ dèhî̌dě, sî yṳǎ Khrî̌stunu a nòdû̌bò hǒ. Htohǒtò̤ ta̤sǔ toǒ coklomě pepwǎ sî pwǎ, a bòlû̌ sî hǒtò̤. 18Sî hî̌htǒo a dè to hî̌dě, kòyò htě a yṳǎ Khrî̌stu dě a sihto toǒnu, a to̤bò dě ta̤pî̌ta̤lṳ̂ hǒ. 19Pa yṳǎ Khrî̌stu dě a ǒhtûpwa̤pe khònò̤htǒo toǒnu, pa yṳǎ Khrî̌stu dě pa dè kè̌shuǐ pwǎpǒ̤ htǒotuhtu aya pwǎ, pa kè̌shuǐ ta a ma̤lû̌htò̌ge pa htû̌꤮ nǒkòpě tuhtu ayanu a dè ǒtò̤ hî̌nu, kòyò lǒ̤bò dě hǎkhû̌ htǒonu, pa htǒo toǒnu mî̌ to gwèbǎǐgutṳ̌ yǎhǒ.

20Pwǎ̤tadě, Khrî̌stu si htûpwa̤gesǒ htǒonumî̌ a mè̤mè̤̌. Dě a si htûpwa̤ge wǐgutṳ̌ kò ta ta̤si akhû̌akhî, a dǔlṳ sî̌ya te̤mǎ bǎ pa ta kòyò htě a si tûlû̌hto toǒnu, a htûpwa̤gebò ta ta̤si pě. 21Kòyò tapwa̤pwa̤ htě amî̌ papha Ada ma̤ta̤sǔ akhû̌akhî, kòyòhǎkhû̌phû̌ pṳ̂̌꤮ tapwa̤ bǎ sibò. Hǐnudě, kòyò tapwa̤pwa̤ mî̌ Ye̤shǔ htǒo ma̤ ta̤ akhû̌akhî, kòyò si lǒ̤꤮ bò toǒ htûpwa̤gebòsǒ ta ta̤si pě. 22Kòyòhǎkhû̌phû̌ pṳ̂̌꤮ tapwa̤ akhlialè hǎte̤gilò̤ tṳtṳ ta papha Ada ǒ akhû̌akhî, kòyò pṳ̂̌꤮ tapwa̤ bǎ sibò pwǎ. Hǐnudě, kòyò htě a htû ta Khrî̌stu tacǎ꤮ pa toǒnu, Khrî̌stu ma̤htûpwa̤gesǒ yǎ pě. 23Pwǎ̤tadě ta̤htûpwa̤ge htǒonu a htûhtò̌ tacǎ hto tacǎ pě. Pa pṳ̂̌꤮ tapwa̤ tobǎ ǒpo̤to̤htû̌ mṳni̤ to ihtǒnu ti̤ni̤ pě. Běcǎ Ye̤shǔ htûpwa̤ wǐgutṳ̌ pě. Htodě htû̌꤮ Běcǎ Ye̤shǔkhrî̌stu hèlò̤ gesǒ pěnu a ma̤ htûpwa̤gesǒ kòyò htě a yṳǎ nû̌ûnu toǒ pě. 24Htopědě, hǎkhû̌ gutṳkè pě. Bǎnukha pě, Khrî̌stu ma̤pî̌kèbò pwa̤pǒta̤ toǒ, ta̤sîrîpo̤phǎ toǒ ta ta̤shû̌ta̤shonu toǒ pě. Dě a ǐlò̤kè shigahtǒo dě pha Cǒmara a cǔdekû pě. 25Ma̤tè̤hî̌dě Khrî̌stu bǎ pǒǐ to̤ ta̤ htû̌꤮ Cǒmara ma̤pè̤ mṳ̂tî̤glîhtobò pwa̤ htě a sò̌khě Khrî̌stu htǒotoǒnu, dě a bè̌lò̤bò asî dě Khrî̌stu a khò̌lopo̤la̤ pě. ^g 26Ta̤shû̌ta̤sho gutṳ̌lò̤ tacǎ htě Cǒmara bǎ ma̤pî̌kè yǎ numî̌ ta̤si htǒonu hǒ. 27“Cǒmara bè̌lò̤bò ta̤pṳ̂̌꤮ tacǎ dě akhò̌lopo̤la̤ pě,” ^h lî̤cahtǐkû hî̌hǐnu. Pwǎ̤ta ta̤hî̌bǎ htǒotûmûnu mî̌, a sò̌yṳ hî̌ ta Cǒmara ǒ dě Khrî̌stu a sîrîpo̤phǎ shû̌sho ala̤ hǐnu mè̤tò̤, ma̤tè̤hî̌dě, pwa̤ htě a nopǒǐ Ye̤shǔkhrî̌stu mî̌ Cǒmara pwǎ. 28Ma̤pûhǐ Cǒmara pǒǐ mṳ̂tî̤glîbò ta̤pṳ̂̌꤮ tacǎ ayanu, htû̌꤮ Ye̤shǔkhrî̌stu pǒǐ ta̤lǒ̤꤮ bò pě akhanu, a gana̤de a pha Cǒmara htě a nopǒǐ nû̌û htǒotapwa̤ ayo̤ pě.

29He sò̌yṳ hî̌po̤ sî tacǎ. Kòyò sihto toǒnu a dè htûpwa̤gepe tò̤ hî̌mò̌nu, kòyò toǒǒ cû̌plotǒ̤ shi ta kòyò si toǒ aya mî̌ a nî̤bwǐnî̤sîrî asîya hî̌tè? Kòyò sihto toǒnu, a dè htûpwa̤gejòpe tò̤ dèhî̌dě, kòyònu toǒ cû̌plotǒ̤ asî shi ma̤tè? 30Pa lè̌lè꤮, kòyò sihto toǒ dè htûpwa̤gepe tò̤ hî̌dě, pa cû̌ khòtǒ̤ ta̤jîta̤jû htǒotoǒ pṳ̂̌꤮ ti̤ni̤ ma̤tè? 31He sû̌kho sî꤮, he kè̌shǐbǎ ta ta̤si pṳ̂̌꤮ ti̤ni̤. Dě sî yṳǎ Běcǎ Ye̤shǔkhrî̌stu akhû̌akhî, sî ma̤sò̌le̤sò̌lò̤ mè̤mè̤̌ he numî̌ Cǒmara sî̌ya pwǎ. Htohǒtò̤, he khòbǎ mè̤mè̤̌ ta̤jîta̤jû numî̌ Cǒmara sî̌ya pwǎ. 32Bǎ Ephè̌shiawî̤kû htǒonu, he khòbǎ mè̤mè̤̌ ta̤jîta̤jû, ma̤tè̤hî̌dě kòyò htě a sò̌khěkhû̌khwè he toǒnu, a sò̌yṳ ǎ heyî̌ numî̌ alò̤ta ta̤mi̤ta̤mò̤ toǒnu hǒ. Hǐnudě, he yṳǎ ta kòyò sihto toǒ dè htûpwa̤gepe tò̤ hî̌mò̌nu, he cû̌ sò̌phlǒhtû, khòjîkhòjû gètè̤̌ htǒo ma̤tè? Kò dè si htûpwa̤gepe tò̤ hî̌dě, awǒgutṳ̌ mî̌ pa ma̤phima̤mo̤ pana̤ dě pa hî̌dǒ pwǐ kò hî̌ ta̤hî̌bǎ tûmû ta,

“Pe̤wo̤pě mî̌ pa si pě ya꤮, dě paǎpao hò̌꤮, ma̤phima̤mo̤ pana̤ hò̌꤮.” ⁱ Ta̤hî̌bǎ dǒhtû̌ǐ ǒ hǐnu.

33Yṳǎ pûma̤ kòyò htě a hî̌ hǐnu toǒ ma̤. Pwǐ kò hî̌ ta, “Sî dè bǒsû̌ sî sû̌kho htě a ma̤ ta̤phû̌mò̤shî̌hto toǒ dě a gènè̤ ta̤phû̌mò̤shî̌hto toǒnu, a wa̤nî̤ sî pě dě sî htûhtò̌ sǒsǒta kòyò phû̌mò̤shî̌hto pwǐ asînu pě.” 34Gènè̤ te̤bǎte̤to gesǒ lǒkho sî sò̌phlǒ dě wîkè sî ma̤ta̤sǔnu toǒ. Ma̤tè̤hî̌dě sîkla toǒǒnu, tǒ̤lò̤khònò̤ a sî̌ya te̤mǎ kû̌kò Cǒmara awi̤akè̌ hǒtò̤. Ta̤ǒhtûhtò̌ hǐnu numî̌ sî to sòwò̤ mè̤mè̤̌.

Pa si htûpwa̤ge pěnu pa na̤klûhtǒo alò̤ta hî̌tè pě

35Hî̌kû̌nǎ, kòyò tapwa̤pwa̤ dè gwè ta, “Kòyò sihtonu, a cû̌ htûpwa̤gejò hî̌tè? A dè htûpwa̤ge hî̌dě, ana̤klû htǒo a htûhtò̌ na̤klû hî̌tè tacǎtè pě?” a gwè hǐnu. 36Kòyò ǒlû̌ǒkhlo sî꤮, sî lǔlò̤ ta̤khlinu, a dè phěsoûwǐ tò̤ hî̌dě a phǎhtò̌jò tò̤. 37Bǔkû̌lǎphlǒ bǎbǎ, ta̤khli titètè̌꤮ bǎbǎ, amṳ htě a glè phǎhtò̌ htǒo pěnu ayo̤agî sǒsǒta ta̤khli aphlǒ htǒonu pě mè̤tò̤. 38Ta̤khli tacǎ ta tacǎnu a tobǎ phlǒhǎhtò̌ ma̤ hî̌tènu, Cǒmara ma̤wǒnǎhtobò tû̌ hǒ jǔ asò̌phlǒ sò̌yṳ ma̤nu. Ta̤khli tacǎ ta tacǎnu, amṳ tobǎ ma̤kî̌ya hî̌tènu, Cǒmara ma̤wǒnǎhtobò pwǐ a sò̌yṳ ma̤nu hǒ. 39Hǐnudě, Cǒmara bǒlò̤ ta̤htûpwa̤ toǒ ana̤klû phěyî̌ tacǎ ta tacǎnu a sǒsǒnû̌û tò̤. Kòyò toǒ ana̤klû phěyî̌ bǎbǎ, ta̤phû̌ta̤li̤ toǒ ana̤klû phěyî̌ bǎbǎ, htû̌phû̌ toǒ ana̤klû phěyî̌ bǎbǎ, tò̤phû̌ toǒ ana̤klû phěyî̌ bǎbǎ, tacǎ ta tacǎnu a kî̌yanû̌û. 40Hǐnudě na̤klûphěyî̌ htě mǒkhû̌ ayanu a kî̌yatû̌, dě hǎkhû̌ ayanu a kî̌yatû̌. Mǒkhû̌ ana̤klû phěyî̌ a ta̤wî̤ta̤wǒ htǒonu awî̤ kî̌yatû̌ tacǎ, hǎkhû̌akhû̌ ana̤klû phěyî̌ a ta̤wî̤ta̤wǒ htǒonu awî̤ kî̌yatû̌ tacǎ. 41Lṳmṳ a ta̤wî̤ta̤wǒ bǎbǎ, la a ta̤wî̤ta̤wǒ bǎbǎ, shǎ a ta̤wî̤ta̤wǒ bǎbǎ, tacǎ ta tacǎnu, awî̤ kî̌ya nû̌û. Shǎ tama ta tama a ta̤wî̤ pwǎnu a kî̌yatû̌ nû̌û.

42Hǐnudě htû̌꤮ kò si htûpwa̤gesǒ pě ti̤ni̤nu, pana̤klû htǒo a kî̌yatû̌ ta pana̤klû khònò̤ htǒonu pě. Kòyò si tapwa̤ ana̤klûnu a sokè pwǎ̤ta htû̌꤮ a si htûpwa̤gesǒ pě ti̤ni̤nu, ana̤klû htǒonu a sijòpe tò̤, a sojòpe tò̤ hǒ. 43Bǎ kòyò tapwa̤ ǒhtûpwa̤pe akhanu, ana̤klû phěyî̌htǒo a dǔlṳhtò̌ nû̌û ta̤sò̌phlǒpî̌ ta ta̤khû̌ǎyû̌lò̤ toǒ pwǎ. Pò̤̌ta htû̌꤮ a si htûpwa̤gesǒ pě ti̤ni̤nu, ana̤klû phěyî̌htǒo a lǒbe ta ta̤sîrîdû̌sîrîhtû ta ta̤shû̌ta̤sho pě. 44Pa hǎkhû̌akhû̌ ana̤klû htǒonu, kò lǔlò̤kè yǎ pě. Pwǎ̤ta htû̌꤮ pa si htûpwa̤gesǒ pěnu pa nî̤bǎ kî̌yatû̌ na̤klû asa htě a ǒhtûpwa̤bò̌jò mǒkhû̌ dě a sijòpe tò̤ htǒonu pě.

Pwǐ pa ǒta na̤klû htě a ǒhtûpwa̤bò̌jò hǎkhû̌ htǒonu, pa ǒ ta na̤klû htě a ǒhtûpwa̤bò̌jò dě mǒkhû̌nu pě. 45“Kòyòhǎkhû̌phû̌ awǐgutṳ̌ tapwa̤ htě kò kaǎ yǎta Ada htǒonu Cǒmara ǐ nû̌û ta̤htûpwa̤,” ^j lî̤cahtǐkû hî̌hǐnu. Pwǎ̤ta Ye̤shǔkhrî̌stu htě kò kaǎ yǎta Ada gutṳ̌lò̤ htǒotapwa̤nu, a ǐlò̤ tṳtṳ kòyòhǎkhû̌phû̌ toǒ a ta̤ǒhtûpwa̤ asa ta Běcǎ sǎcahtǐ hǒ. 46Pana̤klû htě a sijò htǒonu a hè wǐkhlo, htodě pa na̤klû htě a sijòtò̤ htǒonu a hènǒpwǎ nǒkò. 47Kòyòhǎkhû̌phû̌ Ada awǐgutṳ̌ tapwa̤nu, kò bǒpwǎ yǎta lo̤hǎ. Pwǎ̤ta Ye̤shǔkhrî̌stu htě kò kaǎ yǎta Ada ginǐ̤pwa̤ tapwa̤ htǒotapwa̤nu a ǒ dě mǒkhû̌ hèlò̤. 48Kòyòhǎkhû̌phû̌ lǒ̤꤮ bònu a ǒta ana̤klû dě asǒsǒta kòyòhǎkhû̌phû̌ awǐgutṳ̌ htě kò bǒlò̤ yǎta lo̤hǎnu tapwa̤ hǒ. Pwǎ̤ta kòyò htě a gû Ye̤shǔkhrî̌stu akò toǒnu, htû̌꤮ mǒkhû̌ pě, ana̤klû sǒsǒta kòyò ǒ dě mǒkhû̌ hèlò̤nu tapwa̤ pě. 49Pa pṳ̂̌꤮ tapwa̤ pa ǒta pana̤klû htě asǒsǒta Ada ana̤klûnu. Pwǎ̤ta nǒkò pě pana̤klû htǒonu a sǒsǒta Khrî̌stu htě a ǒ mǒkhû̌ hèlò̤ htǒonu tapwa̤ ana̤klû pě.

50Sû̌kho sî꤮, khònò̤htǒo he sò̌yṳ hî̌ bǎ sî ta pana̤klû phěyî̌ htě a ǒta sǐ ta shi htǒonu a cû̌nṳ ǒhtûpwa̤jò dě Cǒmara ashiaga tò̤. Ma̤tè̤hî̌dě pana̤klû htě asoalṳ̂jòkè tûjûpwa̤ htǒonu, a ǒhtûpwa̤ khòyî̤bò̌ tûjûpwa̤ tò̤. 51Khònò̤htǒo he sò̌yṳ hî̌ sî ta̤ htě kò sî̌ya hǒtò̤nu toǒ. Pa sibò pṳ̂̌꤮ tapwa̤ pěnu mè̤tò̤. Pwǎ̤ta pana̤klû htǒonu a htû̌lè̌ tèplè̌kèbò pṳ̂̌꤮ tapwa̤ pě. ^k 52Htû̌꤮ a htûhtò̌ pěnu, aphwè mè̤mè̤̌ pě, a phwèkhlope ta pa htè̌pi̤ pami̤sǎnu pě. Mṳni̤ gutṳ̌lò̤ pě ti̤ni̤nu, pa gana̤de tǔ po̤htò̌ pě. Bǎ tǔ po̤htò̌ akhanu, ma̤pûhǐ kòyò htě a si toǒ htûpwa̤ge lǒkho tûjûpwa̤ ayanu, asî htûpwa̤ge ta ta̤si pě. Pwǎ̤ta kòyò htě a ǒhtûpwa̤ to̤pe bǎnu ti̤ni̤ pě toǒnu, ana̤klû toǒ htû̌lè̌ tèplè̌bò pě. 53Pana̤klû htě a soûjò htǒonu, a bǎ htû̌lè̌ tèplè̌kè ta na̤klû htě a soûjòtò̤ htǒonu pě. Pana̤klû htě a sijò htǒonu, a bǎ htû̌lè̌ tèplè̌kè ta na̤klû htě a sijòtò̤ htǒonu pě. 54Htû̌꤮ pana̤klû htû̌lè̌ tèplè̌kè ta na̤klû htě a sijòtò̤ htǒo pě akhanu, a lǒbehtò̌ sǒsǒta lî̤cahtǐkû hî̌, “Ta̤si lò̤jûkè hǒ, kò ma̤pè̤ phlǔ yǎ hǒ.” ^l

55“Kǒ꤮ ta̤si, na ma̤pè̤jòpe kò tò̤. Na ta̤wè̌ta̤htò ashû̌asho htě a glè ma̤pò̤ma̤sha kò toǒnu a ǒ dě bǎtè?” ^m

56Ta̤si a ta̤shû̌ta̤sho htě a glè ma̤pò̤ma̤sha kò numî̌ a nî̤bǎ ta̤sǔta̤plě alo̤ dě ta̤sǔta̤plě a ta̤shû̌ta̤sho htǒonumî̌ a nî̤bǎpwǎ ta̤sû̌ta̤tòwò alo̤. 57Pò̤̌ta pa hî̌bwǐhî̌sîrî jòjî̌꤮ Cǒmara tò̤, Běcǎ Ye̤shǔkhrî̌stu ma̤pè̤hto ta̤ ta paya akhû̌akhî, Cǒmara ǐ pa ta̤ma̤pè̤ ta̤sǔ a ta̤shû̌ta̤sho ta ta̤si a ta̤shû̌ta̤sho htǒotoǒ hǒ.

58Hǐnudě, he sû̌kho sî, khònò̤dě ihtǒ tònòwǒ lǒkho dě ǒměǒgle lǒkho ta sî ta̤yṳ akûnu nî̌꤮. Ma̤shosho lǒkho Cǒmara ata̤ma̤ pṳ̂̌꤮ taplǎ nî̌꤮, ma̤tè̤hî̌dě sî ma̤ Běcǎ ata̤ma̤nu a nòdû̌ sîya tò̤.