1 Corinthians 16
Kû ta̤ma̤lṳma̤tò̌ ta Cǒmara akòyò toǒ aya
1Khònò̤htǒo, he sò̌yṳ hî̌ sî ta sî kûplǒ wû ta̤ma̤lṳ dě sî glè ma̤jo yǎta pwa̤yṳǎ htě a shuphǔshèwè dě a ǒ bǎ Yṳ̌dagakûnu toǒ awi̤akè̌. He sò̌yṳ hî̌ sî ta gûma̤kû̌ pwǐ he hî̌ Galatǐa pwa̤yṳǎta̤ aprṳ̂ahophû̌nu toǒ bǎma̤nu. a 2Pṳ̂̌꤮ plǎplǎ mṳni̤dǔ ▼▼Yṳ̌daphû̌ a mṳni̤dǔ mî̌ mṳgòtò̤. Běcǎ si htûpwa̤ge amṳni̤ mî̌ mṳgòtò̤htonu ti̤ni̤
bǎ hǒnu, sî tapwa̤ ta tapwa̤ to bè̌plǒkhǒ sî wûnṳ toshodè ta toshodè akûnu. Sî dè bè̌plǒhtubò yǎ hǐnu hî̌dě htû̌꤮ he hèto̤ akhapěnu, sî lo̤bǎcû̌ kûplǒpe tò̤ hǒ. 3Htû̌꤮ he hèto̤ pěnu, sî to wû̌lǎ kòyò toǒ htě a bǎ cû̌sû bǎ kò wû dě Ye̤rǔshèlèwî̤ pě. Dě ma̤pûhǐ kòyò htě a phî̌shǔ wû toǒ sî̌ya ta kò ǐ wû htǒonu ta ta̤wi̤ta̤kè̌ hî̌tè ayanu, he khwè̌ cû̌nṳ bǎ pwa̤phî̌shǔ wûnu toǒ lî̤pě tabǎ, dě he nophî̌cû̌ǐ yǎta asî pě. 4Bǎnukha pě, he to lo̤bǎ cû̌ kû̌ta asî pě dèhî̌dě asî cû̌htu kû̌ta he pěmî̌ anî̤ pwǎ. Pò̌lu a ta̤yè̤lò̤nǎ
5He lo̤bǎ cû̌nṳwǐ Makedò̌niaga akhû̌akhî, htû̌꤮ he cû̌nṳhto Makedò̌niaga pěnu, He hè tṳtṳ sî ǒ pě. c 6He hè ǒlèyî̤kû̌ sî tîkî̌pě kǎlè. Kǎlè̌mî̌ he ǒplǒ tûlû̌kû̌ sî ta gawo̤kha htǒo pě. Htopědě, he cû̌ sělěpo̤ klè̌ pě. Dě he cû̌ sělěpo̤ klè̌ bǎtè꤮ tò̤glò pěnu bǎbǎ, he kè̌shuǐpwǎ ta sî ma̤jèbò̌ he. 7Hè ǒlèpwǎ teděsǎphû̌ dě he sò̌yṳ hè ǒlètò̤. Běcǎ dè ta̤sò̌yṳǒ hî̌dě, he sò̌yṳ hè ǒlèyî̤kû̌ sî tîkî̌. 8He cû̌ ǒ bǎ Ephè̌shiawî̤kûnu pě dě he ǒ to̤htû̌ pwè htě kò kaǎ yǎta Pètèkò̌sètèhtonu pě. d 9Kòyò htě a sò̌khěkhû̌khwè he toǒnu a ǒplṳ̂ pwǎ̤ta he cû̌ǒ bǎ Ephè̌shiawî̤kû htǒonu, a le̤dû̌pwî̤htû mè̤mè̤̌ ta heya hǒ, ma̤tè̤hî̌dě kòyò htě a sò̌yṳ gana̤de Cǒmara ale̤ayo̤ toǒnu a ǒplṳ̂pe. 10Htû̌꤮ Timò̤̌te hè to̤kû̌ sî pě akhanu, kè̌ǐkhwè̌ǐ wǒ yǎ nî̌꤮, ma̤tè̤hî̌dě a mî̌ Běcǎ apwa̤ma̤ta̤ tapwa̤ dě a sǒsǒta he htǒonu hǒ. e 11Sî bǎ gènè̤pî̌tî̌ yǎ dǐpwǎ̤꤮ tò̤. Ma̤pûhǐ a geto̤bò̌sǒ he ǒ, htohǒtò̤ ma̤pûhǐ a cû̌ sělě mo̤mo̤wǒwǒpo̤ klè̌ alo̤mo̤ tokho ayanu, sî bǎ ma̤jè yǎ, ma̤tè̤hî̌dě he ǒyṳ̂kè̌shuǐ yǎta akho pṳwè̤ Khrî̌stuphû̌ ahǔwa̤ toǒ geto̤ plǒbò nû̌û dě he ǒ. 12Apò̌lu mî̌ pa pṳwè̤ Khrî̌stuphû̌ tapwa̤. A lè̌dě he noshû̌ mè̤mè̤̌ yǎ dě a glè cû̌ǒlèkû̌ sî dě a gûcû̌kû̌ ta pa pṳwè̤ Khrî̌stuphû̌ htě a cû̌ǒlè sînu toǒ, pwǎ̤ta a hî̌ ta khònò̤dě a sò̌yṳ cû̌ǒlè hǒtò̤, htû̌꤮ ashuakhwè ǒ pě dě a cû̌ǒlè kû̌nǒ sî pě a hî̌ hǐnu.Ta̤hî̌bǎ gutṳ̌lò̤ toǒ
13He pṳwè̤ sî꤮, ǒsòklò lǒkho sîna̤ pṳ̂̌꤮ taplǎ nî̌꤮, ihtǒ tònòmě lǒkho dě sî ta̤yṳǎ Khrî̌stu htǒo akûnu nî̌꤮, bè̌ khuha lǒkho sî sò̌phlǒ nî̌꤮, bè̌shû̌bè̌sho lǒkho sî sò̌phlǒ dě ta̤yṳ akûnu nî̌꤮. 14Sî ma̤ ta̤titètè̌꤮ bǎbǎ, mo̤ǐ kò dě ma̤ lǒkho nî̌꤮. 15Stè̌phano ta a hǐphû̌phòphû̌ awi̤akè̌ numî̌ sî sî̌yabò tû̌ hǒ. Dě Akhayagakû numî̌, pwa̤ htě a yṳǎna̤ǎ gewǐgutṳ̌ kò Khrî̌stu mî̌ asînu toǒ. Dě asî ma̤jè Cǒmara akòyònu toǒ pṳ̂̌꤮ taplǎ hǒ. f 16He pṳwè̤ sî꤮, he kwigwèbǎǐ sî꤮, kòyò htě a htû hǐkǒdû̌ sǒsǒta Stè̌phano ta akho pwa̤ma̤htu nû̌û ta̤ toǒ hî̌ sî dě gana̤de lǒkho asînu toǒ ayo̤ nî̌꤮. 17Sîkho dokûphû̌ Stè̌phano, Photunatǔ ta Akhayakǔ toǒ hèto̤ dě he sò̌le̤sò̌lò̤ mè̤mè̤̌. Sî ǒyî̤ dě sî hè kè̌shǐbò̌ he tò̤ pwǎ̤ta khònò̤htǒo asî hè kè̌shǐ hî̌mo̤hî̌wǒbò̌ he akhû̌akhî, a sǒsǒta sî hè kè̌shǐshǔ hî̌mo̤hî̌wǒ he hǒ. 18Pwǐ asî ma̤ sò̌le̤sò̌lò̤ sînu, asî ma̤ sò̌le̤sò̌lò̤ mè̤mè̤̌ he. Dě bè̌dubè̌na̤ lǒkho kòyò hǐnu toǒ nî̌꤮. 19Pwa̤yṳǎta̤ aprṳ̂ahophû̌ htě a ǒ Ashǎgakû htǒotoǒ sûhè bǎ sî ata̤hî̌mo̤hî̌wǒ toǒ. Akǔlǎ ta ama Prî̌kǐlǎ ta pwa̤yṳǎta̤ aprṳ̂ahophû̌ htě a hèsaba nû̌ûhǐ toǒ sûhèdǒ bǎ sî asîta̤ hî̌mo̤hî̌wǒ ta Khrî̌stu akû. g 20Pa pṳwè̤ Khrî̌stuphû̌ htě a ǒbò bǎo toǒnu bǎbǎ, a sûhèdǒ bǎ sî ata̤hî̌mo̤hî̌wǒ toǒ. Sî ǒ lǒkho bǎnu toǒ bǎbǎ, hî̌mo̤hî̌wǒ nû̌û tapwa̤ ta tapwa̤ dě dǔlṳ lǒkho sî ta̤mo̤ǐ nû̌û tapwa̤ ta tapwa̤ nunî̌꤮. 21He mî̌ Pò̌luhtǒo, hesana̤ khwè̌cû̌ bǎ sî lî̤tòkrò hǒ. He khwè̌cû̌ bǎ sî dě he hî̌ hè̌o, “Hî̌mo̤hî̌wǒ sî pṳ̂̌꤮ tapwa̤,” he khwè̌ hǐnu. 22Ûpèpè̌ bǎbǎ, a mo̤ǐ Běcǎ tò̤nu, ta̤ǐsho bǎtû̌ta nû̌û nî̌꤮. “Maranǎsa” kǒ꤮ pa Běcǎ! hèmò̌ nî̌꤮. 23Běcǎ Ye̤shǔ abwǐasîrî ǒkû̌ tû̌ta sî nî̌꤮. 24Kòyò lǒ̤bò htě a yṳǎ Khrî̌stu dě a htû nû̌û tacǎ꤮ pa toǒnu, he ta̤mo̤ǐ ǒkû̌ tû̌ta asî nî̌꤮.
Copyright information for
KxfSCKRC