1 Corinthians 2
Khrî̌stu khòsi ana̤ nò̌dòhtǔlo̤ awi̤akè̌
1He sû̌kho sî, bǎ he hè dǒhtû̌ǐ sî ta Cǒmara ale̤ayo̤ akhanu, lî̤phlǒ htě kò sî̌yahtû tò̤ pwǎ̤tadě kòyò gènè̤dû̌ lò̤ lǒkho ana̤ toǒ noǎ a toǒnu, he hî̌bǎnǒ bǎ sî dǐplǎ꤮ tò̤. 2Ma̤tè̤, he bè̌lò̤hto he sò̌phlǒ ta he dǒhtû̌ǐ pwǎpǒ̤ Ye̤shǔkhrî̌stu htǒotapwa̤ awi̤akè̌ ta ata̤si nò̌dòhtǔlo̤ awi̤akè̌ htǒonu pwǎ. 3Bǎ he hè sî ǒ bǎnu taplǎ akhanu, he sî̌ya ta he khû̌ǎyû̌lò̤ dě he ǐsha gònò̤gèglè. a 4Htohǒtò̤ bǎ he dǒhtû̌ǐ sî akhanu, he hî̌bǎ plò̤ǎnǒ sî ta kòyòhǎkhû̌phû̌ a ta̤sî̌ta̤jò dǐkhò̌꤮ tò̤. Pò̤̌ta sî yṳǎ lǒkho ta̤ htě he pwe̤ǐ sî htǒonu toǒ, ma̤tè̤hî̌dě Běcǎ sǎcahtǐ htǒonu a po̤phǎshû̌sho dě a ǐsî̌yaphlo bǎ sî dě sî yṳǎ hǒ. 5Hǐnudě, sî ta̤yṳta̤nǎ htǒotoǒnu, a nǎla̤ǐ kòyòhǎkhû̌phû̌ a ta̤sî̌ta̤jò toǒ alo̤nu mè̤tò̤. A nǎla̤ǐ Cǒmara a ta̤po̤ta̤phǎshû̌sho htǒo alo̤ hǒ.Cǒmara a ta̤sî̌ta̤jò mî̌ adû̌ayǒ
6Kòyò htě a ta̤yṳsho toǒnu, he sû̌ǐ asî ta ta̤sî̌ta̤jò awi̤akè̌ toǒ. Ta̤sî̌ta̤jò htǒotoǒnu, a hè dě kòyòhǎkhû̌phû̌ a ǒ mè̤tò̤. A hè dě kòyòhǎkhû̌phû̌ htě a ǒ ta a ta̤shû̌ta̤shonu toǒ a ǒ mè̤tò̤tò̤. Ma̤tè̤hî̌dě ta̤htǒotoǒnu a pî̌kèbò pě. 7He dǒhtû̌ǐ bǎ kò ta Cǒmara a ta̤sî̌ta̤jò htě adû̌ayǒ toǒ. Děwǐkhanu, Cǒmara dǔlṳ bǎ kò ta ta̤sî̌ta̤jò htǒotoǒ hǒtò̤. Dě꤮ Cǒmara bǒlò̤ hǎkhû̌ hǒtò̤ akhapenu, a ta̤yè̤lò̤ǒnǎhto dě a ma̤ bǎ pa ta̤sîrîdû̌sîrîhtû htǒotoǒ hǒ. 8Ta̤sî̌ta̤jò htǒonu, kòyò htě a htû hǐkǒdû̌ hǎkhû̌ bǎotoǒ sî̌ya dǐpwǎ̤꤮ tò̤. Asî dè sî̌ya htǒo hî̌dě, asî htǎwa̤si Běcǎ htě a ǒ ta a ta̤sîrîdû̌sîrîhtû htǒotapwa̤ dě nò̌dòhtǔlo̤ dǐkhò̌꤮ tò̤. 9Pwǐ lî̤cahtǐ hî̌kè děnukha ta, “Ta̤ htě Cǒmara tîwî̌tòwònǎ ta ama̤ bǎ kòyò htě a mo̤ǐ nû̌û toǒ ayanu, kò kè̌shǐnǒ dǐpwǎ̤꤮ hǒtò̤, kò gana̤de nǒ dǐpwǎ̤꤮ hǒtò̤, kò gènè̤to̤nǒ yǎ dǐpwǎ̤꤮ hǒtò̤.” b 10Pwǎ̤ta, Cǒmara ǐsî̌ya tṳtṳ bǎ pa ta̤htǒotoǒ ta Běcǎ sǎcahtǐ. Běcǎ sǎcahtǐ htǒonu a sî̌yabò ta̤pṳ̂̌tacǎ. A sî̌ya to̤bò Cǒmara a ta̤gènè̤ htě adû̌ayǒ toǒ hǒ. 11Hǐnudě, kòyò tapwa̤ a ta̤gènè̤ lǒ̤bò toǒnu, a sana̤ sî̌ya tû̌ pwǎ. Ta̤pwǎ̤꤮ kò sî̌yahtû kû̌ nû̌û tò̤. A sǒsǒta hǐnuhǒ, tǒ̤pwǎ Cǒmara a sǎcahtǐ sî̌ya lǒ̤꤮ bò Cǒmara a ta̤gènè̤ toǒ. Kòyò ahǔwa̤ toǒ sî̌yahtûto̤ dǐpwǎ̤꤮ tò̤. 12Cǒmara ǐ pa a sǎcahtǐ, dě Cǒmara a sǎcahtǐ htǒonu, a hè dě kòyòhǎkhû̌phû̌ a ǒnu mè̤tò̤. Ma̤pûhǐ pa sî̌yaphlobò ta̤ htě Cǒmara ǐlò̤ko pa htǒotoǒ ayanu, pa nî̤bǎ Běcǎ sǎcahtǐ htě a hè dě Cǒmara a ǒ htǒonu hǒ. 13Hǐnudě, bǎ pa sû̌ǐ bǎ kòyò htě Běcǎ sǎcahtǐ ǒ nû̌ûkû toǒ akhanu, pa noǎ kòyòhǎkhû̌phû̌ htě a sî̌jò toǒ a ta̤hî̌bǎ dǐmû̌꤮ tò̤. Pa hî̌bǎ pwǐ Běcǎ sǎcahtǐ sû̌ǐtòwòǐpwǎ panu. Pa hî̌phlo bǎ kòyò htǒotoǒ ta ta̤te̤ta̤mǎ pwǐ Běcǎ sǎcahtǐ sû̌ǐ panu pwǎ. 14Pò̤̌ta ûpèpè̌ bǎbǎ, a nî̤bǎ kû̌kò Běcǎ sǎcahtǐ dě a sò̌phlǒkû tò̤ toǒnu, a phî̌shǔ kû̌kò Cǒmara a sǎcahtǐ a ta̤sû̌ǐtòwòǐ tò̤. Kòyò hǐnu toǒnu, a sî̌yaphlobò̌ kû̌kò amûasǎ tò̤, a gènè̤ lǒkho pwǎ ta a nòdû̌ pwǎ, ma̤tè̤, pwa̤ htě a hî̌phlobò̌ bǎ asî numî̌, tǒ̤pwǎ Běcǎ sǎcahtǐ tapwǎ̤pa. 15Kòyò lǒ̤꤮ bò htě a nî̤bǎ Běcǎ sǎcahtǐ htǒotoǒnu, a sî̌yabò̌phlǒ wǐbòhto ta̤sû̌ǐtòwòǐ htǒotoǒ hǒ. Pwǎ̤ta kòyò htě a nî̤bǎ kû̌kò Běcǎ sǎcahtǐ tò̤ toǒnu, a sî̌yaphlobò̌ kû̌ kòyò htě a ǒ ta Běcǎ sǎcahtǐ toǒ a ta̤gènè̤ toǒ tò̤. 16Pwǐ lî̤cahtǐkû hî̌ ta, “Ûpè tapwa̤ sî̌yahtûbò̌ Běcǎ asò̌phlǒ pè? Kòyò htě a ǐsî̌yajèbò̌ Běcǎ ta a ta̤gènè̤ toǒ numî̌ a ǒ tapwa̤pwa̤ ya?” Pò̤̌ta pa htǒotoǒnu, pa nî̤bǎhto Khrî̌stu asò̌phlǒ a ta̤gènè̤ toǒ hǒ. c
Copyright information for
KxfSCKRC