1Cor 3 | KxfSCKRC | STEP | Pṳwè̤ sî꤮, he ǒkû̌dǒ ta sî dě awǐkha numî̌, he sû̌ǐ sî pwǐ he sû̌ǐ bǎ kòyò htě a jûle̤phî̌yo̤ gana̤de Běcǎ sǎcahtǐ ayo̤ toǒ numî̌ anî̤ hǒtò̤. He bǎ sû̌ǐ sî pwǐ kòyòhǎkhû̌phû̌ htě a lṳ̂ma̤kû̌ pepwǎ a ta̤sò̌yṳ toǒnu toǒ pwǎ. Ma̤tè̤hî̌dě sî ta̤yṳǎ Khrî̌stunu ashû̌asho hǒtò̤ akhû̌akhî, sî sǒsǒpepwǎ ta phijaû̌ htě a onû̌penu toǒ pwǎ.

1 Corinthians 3

Cǒmara apwa̤ma̤ta̤ toǒ

1 Pṳwè̤ sî꤮, he ǒkû̌dǒ ta sî dě awǐkha numî̌, he sû̌ǐ sî pwǐ he sû̌ǐ bǎ kòyò htě a jûle̤phî̌yo̤ gana̤de Běcǎ sǎcahtǐ ayo̤ toǒ numî̌ anî̤ hǒtò̤. He bǎ sû̌ǐ sî pwǐ kòyòhǎkhû̌phû̌ htě a lṳ̂ma̤kû̌ pepwǎ a ta̤sò̌yṳ toǒnu toǒ pwǎ. Ma̤tè̤hî̌dě sî ta̤yṳǎ Khrî̌stunu ashû̌asho hǒtò̤ akhû̌akhî, sî sǒsǒpepwǎ ta phijaû̌ htě a onû̌penu toǒ pwǎ. 2 Sî ǎshǎ htě apwi̤ayè toǒ numî̌ anî̤ hǒtò̤ akhû̌akhî, he bǎ ǐopwǎ sî pṳ̂nṳ̂shi sǒsǒta phijaû̌ tapwa̤nu pwǎ. Tǒ̤lò̤khònò̤htǒo bǎbǎ, a sǒsǒ pepwǎ ta sî ǎ shǎǎ a pwi̤ dě a nî̤hǒtò̤nu. He dè sû̌ǐ sî ta ta̤ htě adû̌ayǒ toǒ hî̌dě sî sî̌yaphlo hǒtò̤. ^a 3 Ma̤tè̤hî̌dě sî ǒhtûpwa̤ sǒsǒ pepwǎ ta kòyòhǎkhû̌phû̌ htě a gûma̤ pepwǎ lǒkho pwǐ a ta̤sò̌yṳ ǒnu toǒ pwǎ. Sî sò̌khě kè̌khînû̌û tapwa̤ ta tapwa̤, sîgèsîgo kè̌khînû̌û numî̌, a dǔlṳhtò̌ ta sî sǒsǒ pepwǎ ta kòyòhǎkhû̌phû̌nu toǒ pwǎ mè̤tò̤ya? Sî ma̤ sǒsǒ pepwǎ ta kòyò htě a yṳǎ kû̌kò Khrî̌stu tò̤nu toǒ pwǎ. 4 Bǎ sî hî̌ kè̌khînû̌û ta, he mî̌ Pò̌lu akhophijaû̌, he mî̌ Apò̌lu akhophijaû̌ akhanu, sî ma̤ sǒsǒ pepwǎ pwǐ kòyòhǎkhû̌phû̌ ala̤klo ma̤nu pwǎ mè̤tò̤ya? ^b

5 Dèhî̌bòbò mò̌nu, Apò̌lu mî̌ ûpè? Pò̌lu mî̌ ûpè? Pa mî̌ kòyò lṳmṳhǎlṳmṳlîphû̌ htě a ma̤ Cǒmara ata̤ma̤ toǒ pwǎ. Dě pa dǒhtû̌ǐlṳ bǎ sî akhû̌akhî, sî yṳǎna̤ǎge lǒkho Běcǎ Ye̤shǔkhrî̌stu. Pwǐ Cǒmara ǐlò̤ pa ta̤ma̤ tapwa̤ ta tapwa̤nu, pa ma̤ tû̌ pwǐ a noma̤ pa htǒonu pwǎ. 6 He mî̌ pwa̤wi̤lò̤ ta̤khli. Apò̌lu mî̌ pwa̤lò̌shi. ^c Pò̤̌ta pwa̤ htě a nophǎhtò̌dû̌htò̌ ta̤khlita̤lè numî̌ Cǒmara pwǎ. ^d 7 Pwa̤wi̤lò̤ ta̤khlita̤lè ta pwa̤lò̌shi htǒonumî̌ a lo̤bǎdû̌ mè̤tò̤. A lo̤bǎdû̌khlo kò numî̌ pwa̤ htě a nophǎhtò̌dû̌htò̌ ta̤khli htǒotapwa̤nu hǒ. 8 Pwa̤ htě a wi̤lò̤ ta̤khli htǒo ta pwa̤ htě a lò̌shi htǒo sò̌gini̤bònu, a ta̤yè̤lò̤ kè̌shuǐnǎ toǒ numî̌ a sǒsǒpwǎ nû̌û, akî̌ya nû̌û tò̤. Pwǐ asî tapwa̤ ta tapwa̤ jipwi̤ ma̤hto ta̤toǒnu Cǒmara ǐ asî ta̤ma̤ nî̤khû̌kǎ pě. 9 Pa mî̌ pwa̤ma̤plǒnû̌ûta̤ ta Cǒmara aya toǒ pwǎ. Sî mî̌ asǒsǒta Cǒmara a we̤te̤we̤ dě pa la̤ma̤ǎ agûla̤. Htohǒtò̤ sî mî̌ asǒsǒta hǐ htě Cǒmara ma̤htò̌ yǎ tama.

10 He lè̌dě asǒsǒta pwa̤ma̤htò̌ hǐ htě ajò tapwa̤nu. Ma̤tè̤hî̌dě, Cǒmara ǐko he sû dě he bǒlò̤ hǐtṳkòkhǒ ta lo̤ toǒ. Dě kòyò ahǔwa̤ toǒǒnu, a hè ma̤htò̌ tṳtṳlè̌ hǐtṳkòkhǒ htě he bǒlò̤hto yǎta lo̤htǒonu alo̤. Pwǎ̤ta, asî tobǎ ma̤htò̌ hî̌tènu, a bǎ ma̤te̤mǎ lǒkho. 11 Hǐtṳkòkhǒ htě he bǒlò̤hto yǎta lo̤ numî̌ Ye̤shǔkhrî̌stu htǒonu a ǒ pwǎ tò̤glò̌pa. Ta̤ htě pa to yṳǎ numî̌ pwǎpǒ̤ Ye̤shǔkhrî̌stu htǒotapwǎ̤pa. Kò bǒlò̤ kî̌ya ahǔwa̤nu a ǒpe dǐglò̌꤮ tò̤. 12 Kòyò toǒǒ htě a sû̌ǐ te̤mǎ kò ta ta̤te̤ta̤mǎ toǒnu, a lò̤ta a hè ma̤htò̌ tṳtṳ hǐtṳkòkhǒ htě kò bǒlò̤ yǎta lo̤ htǒo alo̤nu hǒ. A lò̤ta a ma̤htò̌ tṳtṳ nû̌ûta hta, wû, mè̤tò̤mî̌ lo̤le̤dû̌pwî̤htû toǒnu hǒ. Pò̤̌ta kòyò ahǔwa̤ toǒ lè̌dě, a hè ma̤htò̌ tṳtṳ nû̌ûta sǒ, mi̤mṳ mè̤tò̤mî̌ îlo̤ toǒ dě alo̤ htǒonu hǒ. 13 Kòyò tapwa̤ ta tapwa̤ a ta̤ma̤htò̌ hǐ a ta̤sî̌ta̤jò htǒonu, a ǒlṳhtò̌ htû̌꤮ Běcǎ Khrî̌stu hè amṳni̤nu ti̤ni̤ pě. Kòyò pṳ̂̌꤮ tapwa̤ ma̤ta̤ toǒnu, kò ma̤kè̌ yǎta mî̌ pě. Tapwa̤ ta tapwa̤ a ta̤sî̌ta̤jò ata̤ma̤ htǒonu, mî̌lěgèkè̌bò pě dě a dǔlṳhtò̌bò pě. 14 Ta̤kî̌ta̤kû̌ htě kò hè ma̤htò̌ yǎ dě hǐtṳkòkhǒ htǒo alo̤ toǒnu, a dè khòbò̌ mî̌lěgè hî̌dě a ta̤ma̤htò̌ hǐ htǒonu a nî̤bǎ ta̤ma̤khû̌kǎ pě. 15 Pwǎ̤ta, mî̌ dè gèkè ata̤ma̤ htǒotoǒ hî̌mò̌nu, a lò̤jûkè pě. Pò̤̌ta, asana̤ tû̌ htǒonu a nî̤bǎ ta̤ma̤lû̌htò̌ge sǒsǒta kòyò lû̌htò̌kè ta mî̌gènu pě.

16 Sî mî̌ Cǒmara a ta̤lṳhtò̌ho dě Cǒmara a sǎcahtǐ htě a ǒ Cǒmara ǒ htǒotapwa̤ hènṳ ǒhtûpwa̤ sîkû numî̌ sî sî̌yanǒ tò̤ ya? ^e 17 Kòyò tapwa̤pwa̤ a ma̤pî̌kè Cǒmara a ta̤lṳhtò̌ho htǒonu, Cǒmara ma̤pî̌kè nû̌û pě. Ma̤tè̤hî̌dě Cǒmara a ta̤lṳhtò̌ho mî̌ a cahtǐ dě sî sana̤ numî̌ Cǒmara la̤ǒ a ta̤lṳhtò̌ho hǒ.

18 Lòholò̤ pûma̤ sîna̤ dǐpwǎ̤꤮ ma̤. Kòyò tapwa̤pwa̤ dè gènè̤lò̤ ana̤ ta he mî̌ pwa̤sî̌pwa̤jòphû̌ tapwa̤ hî̌nu, a bǎ htûhtò̌ kòyò nòdû̌ tapwa̤. He sò̌yṳ hî̌numî̌ hî̌tèhî̌dě, a dè gènè̤ ana̤ ta he mî̌ pwa̤sî̌pwa̤jòphû̌ tapwa̤ htǒonu asǒsǒta kòyò htě a sî̌ya kû̌kò Cǒmara tò̤ toǒ a ta̤gènè̤nu hǒ. Ma̤pûhǐ a htûhtò̌ mè̤mè̤̌ pwa̤sî̌pwa̤jòphû̌ dě Cǒmara alo̤mo̤ tapwa̤nu, a bǎ htûhtò̌ kòyò nòdû̌ tapwa̤ dě kòyòhǎkhû̌phû̌ toǒ a lo̤mo̤. 19 Kòyòhǎkhû̌phû̌ toǒ gènè̤ ta htǒomî̌ ta̤sî̌ta̤jò toǒnu, Cǒmara alo̤mo̤ numî̌ a mî̌pwǎ ta̤ǒlû̌ǒkhlo pwǎ. Lî̤cahtǐkû hî̌, “Pwa̤sî̌pwa̤jòphû̌ toǒ gènè̤ lǒkho ana̤ ta pa sî̌jò hǒ, pwǎ̤ta Cǒmara pṳ̂nṳkè asî ta asî ata̤sî̌jò htǒonuhǒ. Asî ata̤ma̤sî̌jò toǒ numî̌ mî̌pwǎ htò̌glo pwǎ.” ^f 20 Lî̤cahtǐ ahǔwa̤ tûmû hî̌po̤, “Cǒmara sî̌ya ta pwa̤sî̌pwa̤jòphû̌ toǒ a ta̤yè̤lò̤nǎ toǒnu, anòdû̌ pwǎ.” ^g 21 Hǐnudě, sî gûkû̌ ta ûpèpè̌ bǎbǎ, sî to phî̌htò̌yî̤ sîna̤ dǐpwǎ̤꤮ tò̤. Dè hî̌ mè̤mè̤̌ mî̌, ta̤lǒ̤꤮ bò numî̌ sî ta pwǎ. 22 Pò̌lu bǎbǎ, Apò̌lu bǎbǎ, Petru bǎbǎ, hǎkhû̌teběbò bǎbǎ, ta̤si ta ta̤htûpwa̤ bǎbǎ, htukha khònò̤kha htǒobǎbǎ, htû̌꤮ nǒkòpě tuhtu bǎbǎ, Cǒmara ǐlò̤bò ta̤htǒotoǒ dě a glè htûbwǐhtûsîrî pwǎ ta sîya. 23 Sî mî̌ Khrî̌stu ata, dě Khrî̌stu mî̌ Cǒmara ata.