1Cor 4 | KxfSCKRC | STEP | Sî to bè̌ lǒkho pa pwǐ Ye̤shǔkhrî̌stu apwa̤ma̤ta̤ toǒnu. Sî to bè̌ lǒkho pa pwǐ pwa̤ma̤ta̤ toǒ dě a sû̌ǐtòwòǐ pwe̤ǐphlo bǎ kò ta ta̤te̤ta̤mǎ htě kò sî̌yanǒ hǒtò̤ děwǐkha toǒ. Dě Cǒmara ǐlò̤ pa ta̤ma̤ ta pa glè ma̤ htǒo aya hǒ.

b Kòrî̌tiaphû̌ awǐlǒ tabǎ 11:1; Phǐlǐpiaphû̌ 3:17

1 Corinthians 4

Khrî̌stu a pwa̤nophû̌ toǒ

1 Sî to bè̌ lǒkho pa pwǐ Ye̤shǔkhrî̌stu apwa̤ma̤ta̤ toǒnu. Sî to bè̌ lǒkho pa pwǐ pwa̤ma̤ta̤ toǒ dě a sû̌ǐtòwòǐ pwe̤ǐphlo bǎ kò ta ta̤te̤ta̤mǎ htě kò sî̌yanǒ hǒtò̤ děwǐkha toǒ. Dě Cǒmara ǐlò̤ pa ta̤ma̤ ta pa glè ma̤ htǒo aya hǒ. 2 Kòyò htě kò ǐlò̤ nû̌û ta̤ma̤ toǒnu, a tobǎ cǒtè̤ ta ata̤ma̤. 3 Sî dè hî̌ he ta, Pò̌lu numî̌ wǒ̤yṳǎjò a ya, mî̌ wǒ̤yṳǎ tò̤ yanu, la̤hî̌ǒ nǒtò̤. Kòyò ahǔwa̤ toǒ dè hî̌ he bǎbǎ, a la̤hî̌ǒ nǒtò̤tò̤, ma̤tè̤hî̌dě he sana̤ tû̌ dě he hî̌lò̤nǒ hena̤ pwǐ sî hî̌ henu dǐkhò̌꤮ tò̤. 4 He sò̌phlǒ htǒonu mo̤mo̤ a mo̤pwǎ, he sò̌phlǒ htǒo a bè̌gesǒ nǒ he ta̤sǔ dǐcǎ꤮ tò̤. He sò̌phlǒ htǒo a hî̌ he hî̌tètè̌ bǎbǎ, ala̤hî̌ǒ dǐcǎ꤮ tò̤. He ma̤ta̤ htǒonu asǔ ya, mî̌ ato yanu, pwa̤ htě a sî̌ya hewi̤hekè̌ dě a cèrò he pě tapwa̤numî̌ pǒ̤pwǎ Běcǎ tapwǎ̤pa. 5 Hǐnudě ta̤cèrò akhîakha hèto̤ hǒtò̤nu, cû̌ cèrò pûma̤ kò dǐpwǎ̤꤮ ma̤. Ǒpo̤ to̤ lǒkho dě Běcǎ hè cèrò kò pě taplǎnu. Ta̤ǒhǔ dě ta̤khǐta̤lo̤ akû toǒnu, a dǔlṳhtò̌ nû̌û pě. Dě kòyòhǎkhû̌phû̌ a ta̤gènè̤ ǒhǔ htě a noma̤ nû̌û toǒnu, Cǒmara dǔlṳ sî̌ya pě. Bǎnukha pě, pwǐ kòyò tapwa̤ ta tapwa̤ ma̤ta̤nu, Cǒmara htû̌sò̌ǐ asî pě.

6 He pṳwè̤ sî, ma̤pûhǐ a htûbwǐhtûsîrî ta sîya dě he pwe̤ǐlṳ bǎ sî hewi̤hekè̌ ta Apò̌lu awi̤akè̌ pwǐ ta̤ dǔlṳkè̌mò̌mṳ tacǎnu hǒ. Ta̤ htě he sò̌yṳ hî̌ bǎ sî amûasǎ numî̌ pwǐhè̌o: “Ma̤ tûlû̌khlo lǒkho pûma̤ pwǐ lî̤cahtǐ khwè̌nu ma̤.” Hǐnudě htǒotapwa̤nu awǒkhlo ta děnu tapwa̤, cû̌ htû̌sò̌ǐ lǒkho kò hǐnu dǐpwǎ̤꤮ ma̤. 7 Mî̌ûpè tapwa̤ hî̌ na ta nasî̌najò kî̌yakhlo ta kò hǐnu tapwa̤ pè? Ta̤ lǒ̤꤮ bò htě aǒta sîtoǒ numî̌ Cǒmara ǐ sî mè̤tò̤ ya? Hǐnudě, sî cû̌jîdû̌ tû̌ sîna̤ sǒsǒta Cǒmara ǐlò̤ko sî mè̤tò̤nu hî̌tètè?

8 Sî gènè̤ ta ta̤ lǒ̤꤮ bò htě sî lo̤bǎ toǒnu a ǒbò hǒ, Cǒmara olò̤ lǒ̤꤮ bò toǒnu sî nî̤bǎbò hǒ, Sî gènè̤ lǒkho dòdû̌ hǐnu. Sî gènè̤ lǒkho ta sî htûdòdû̌tû̌ Khwǐ dě Cǒmara ashiaga hǒ, pwǎ̤ta pa dě pa htûbò̌ kû̌kò Khwǐ hǒtò̤. Ma̤pûhǐ pa htû kû̌dǒ Khwǐ ta sî dě, he sò̌yṳ nohtû sî Khwǐ hǒ. 9 He hî̌ pwǐhè̌o ma̤tè̤hî̌dě, alò̤ta pa pwa̤nophû̌ toǒnu, Cǒmara bè̌phǔlò̤khlo pa dě kòhǔwa̤ toǒ ala̤. Htohǒtò̤ asǒsǒta kòyò lò̤te̤ apo̤kû toǒ dě kò glè ma̤si asî bǎ kòyò tṳ̂prṳ̂taphǎ a lo̤mo̤nu. Dě asǒsǒta mǒkhû̌tanaphû̌ lǒ̤꤮ bò toǒ, ta kòyòhǎkhû̌phû̌ toǒ kè̌hèbò panu. 10 Ma̤tè̤hî̌dě pa gû Khrî̌stu akò akhû̌akhî, kò hî̌ pa ta kòyò kicǐ. Pwǎ̤ta sî lè̌dě, sî htûhtò̌ ta Khrî̌stu tacǎnǔ꤮ pa akhû̌akhî, sî gènè̤ lǒkho sîna̤ ta pwa̤sî̌pwa̤jòphû̌ toǒ hǒ. Pa dě pa khû̌ǎyû̌lò̤ tû̌pwǎ paya, sî dě sî khû̌ǎshû̌sho mè̤mè̤̌ dòdû̌ nî. Kò gènè̤ pî̌tî̌ tû̌pwǎ pa. Sî dě kò bè̌dû̌bè̌htû tû̌ dòdû̌ sî nî. 11 Tǒ̤lò̤khònò̤ pa ǒti̤wi̤ǎ, pa ǒti̤wi̤oshi, pakûpasǒ tû̌pwǎ hǐdohǐyò̤htò̌lè̌ pwǎ. Pa khòbǎ tû̌ paya ta kòphlěkòpo̤ pa. Pa shodohǐ shodophò tû̌pwǎ paya. 12 Ma̤pûhǐ pa ǎhtò̌ohtò̌ ayanu, pa bǎ jipwi̤jili̤ ǎwè̤ tû̌ ta̤. Bǎ kò ǐsho pa akhanu, pa howi̤ geshǔ kò. Bǎ kò ma̤jîma̤jû pa akhanu, pa khòsò̌doshǔ pwǎ kò. ^a 13 Bǎ kò hî̌ tukutakǎ pa akhanu, pa hî̌ geshǔwǒ pwǎ kò. Tǒ̤lò̤khònò̤htǒo, pa mî̌ asǒsǒ sadapepwǎ ta kò cû̌ wîkè hǎkhû̌ ta̤sota̤û toǒ ta ta̤wè̤ta̤sǒnu toǒ pwǎ.

14 He sò̌yṳ nosòwò̤ sî dě he khwè̌ cû̌ bǎ sî lî̤ htǒonu mè̤tò̤. He mo̤ǐ sî pwǐ hephû̌ ta hena̤nu dě he sû̌ǐtòwòǐ cû̌pwǎ sî. 15 Sara htě a sû̌ǐtòwòǐ sînu a ǒ apwa̤ tòsò̌ pwǎ̤ta sîpha mî̌ a ǒpwǎ tapwǎ̤pa pwǎ. Bǎ he dǒhtû̌ǐ bǎ sî ta̤sò̌le̤sò̌lò̤ awi̤akè̌ dě sî yṳǎhè Khrî̌stu akhanu, he htû sîpha hǒ. 16 Hǐnudě he kwigwèbǎǐ sî ta sî gû kè̌mò̌mṳ he ta̤ǒhtûpwa̤ htǒo. ^b 17 Ta̤wi̤ta̤kè̌ htǒo akhû̌akhî, he nohè Timò̤̌te dě sî ǒ hǒ. A mî̌ asǒsǒta hephû̌ ta hena̤ htě he mo̤ǐ yǎdě acǒatè̤ ta ayo̤ dě Běcǎ akû tapwa̤. Kòyò htě a gû Khrî̌stu akò toǒnu, a to ǒhtûpwa̤ lǒkho hî̌tènu, a ǐ sî̌yahtò̌sǒ sî pwǐ he ǒhtûpwa̤ htǒonu pě. Htǒonumî̌ ta̤ htě he sû̌ǐ bǎ kòyò htě a yṳǎna̤ǎ Ye̤shǔkhrî̌stu toǒ gûla̤ pṳ̂̌꤮ tò̤glò toǒnu hǒ.

18 Sî gènè̤ lǒkho ta he hè ǒlè kû̌pe sî tò̤ akhû̌akhî, dě sîkla toǒǒnu a phî̌dû̌ lǒkho ana̤. 19 Pò̤̌ta Běcǎ dè sò̌phlǒǒ he dě he bǎ cû̌ǒlèkû̌ sî hî̌mò̌nu, he hè ǒlè sî pě. Htû̌꤮ he hèto̤kû̌ sî pě dě, kòyò htě a phî̌dû̌ ana̤nu toǒ a ma̤kwè̌꤮ titènu he hè kè̌lǎsî̌yato tû̌ta hena̤ pě. Mî̌ asî nî̤bǎ mè̤mè̤̌ ta̤sîrîpo̤phǎ dě Cǒmara a ǒ ya, mè̤tò̤mî̌ a ǒnòdû̌pwǎ akhû̌phě tabǎ a ta̤hî̌bǎpwǎ yanu he hè kè̌lǎsî̌yato tû̌ta hena̤ pě. 20 Kòyò htě a ǒ Cǒmara ashiaga toǒnumî̌, a ǒ pwǎpǒ̤ khû̌phě tabǎ a ta̤hî̌bǎ mè̤tò̤. Cǒmara htû̌lè̌ tèplè̌htobòkè asî ata̤bè̌sû̌bè̌sǎ toǒ ta a ta̤po̤ta̤phǎ hǒ. 21 Sî dè wîkè sî ta̤ma̤ htě a phû̌mò̤shî̌hto htǒotoǒ tò̤ hî̌numî̌, he glè hèsǎhtǎshû̌ sî hǒ. Sî dè wîkè hî̌dě he hè hî̌bǎbî̌hî̌bǎyṳ pwǎ sî pě dě he mo̤ǐ sî pě. Hǐnudě, sî sò̌yṳkhlo lǒkho bǎtè tacǎtè.