1 Corinthians 6
Pṳwè̤ Khrî̌stuphû̌ ta Khrî̌stuphû̌ ma̤ nû̌û ta̤mû̌ dě pûkǎ hǐ
1Sî dè to̤klî̌nû̌û hî̌dě sî cû̌ kaǎhtò̌ cèròtǒ̤ nû̌û tapwa̤ ta tapwa̤ dě pûkǎ htě a yṳǎ Khrî̌stu tò̤ toǒ ahǐ ma̤tè? Sî ta sî kaǎ hî̌bǎphlo tû̌ nû̌û dě sî nocèrò ta Cǒmara akòyò toǒ tò̤ ma̤tè? 2Cǒmara akòyò toǒnu, a cèrò kòyòhǎkhû̌phû̌ pěnumî̌ sî sî̌ya tò̤ ya? Sî mî̌ kòyò toǒ dě a bǎ cèrò kòyòhǎkhû̌phû̌ ǒ hǎkhû̌ htǒoteběbò pě akhû̌akhî, ta̤wi̤ta̤kè̌ pî̌tî̌phû̌ htǒotoǒ pwǎ dě sî tobǎ hî̌bǎphlo bǎ kòyò tò̤ ya? 3Dě mǒkhû̌ pěnu, pa bǎ cèrò mǒkhû̌tanaphû̌ pě toǒ numî̌ sî sî̌ya tò̤ ya? Hǐnudě hǎkhû̌akhû̌ a ta̤to̤klî̌nû̌û hǐnu toǒ pwǎ dě pa cû̌ cèrònî̤ tò̤ ma̤tè? 4Ta̤to̤klî̌nû̌û hǐnu dè ǒhtûhtò̌ dě, sî cû̌to kòyò htě a htû kû̌ pwa̤yṳǎta̤ aprṳ̂aho tò̤ toǒ a ǒ dě sî cû̌ nocèròtǒ̤ asî ma̤tè? 5Sòwò̤ jî̌꤮ le pwǎ. Dě sî pwa̤yṳǎta̤ aprṳ̂aho akla tû̌nu kòyò htě aǒta ta̤gènè̤jò dě a hî̌bǎ cèròjò bǎ Khrî̌stuphû̌ toǒ a ta̤to̤klî̌ nû̌û htǒo bǎ aplǎkûnu pî̌tî̌gutṳ̌ tapwa̤ numî̌ a ǒlòtṳ̌ pwǎ. 6Sî cû̌ma̤ khǒtû̌ lǒkho sîya hî̌tè. Sî ta sî cû̌ma̤tǒ̤ nû̌û ta̤mû̌ pûkǎ hǐ dě cû̌ nocèròtǒ̤ nû̌ûta kòyò htě a yṳǎ kû̌kò Khrî̌stu tò̤ htǒotoǒ lè! 7Dě sî ta sî cû̌ma̤ nû̌û ta̤mû̌ pûkǎ hǐ akhû̌akhî, a dǔlṳ ta sî lò̤jû bòmṳ̂sîglîkè hǒ. Wǐ꤮ ta sî ma̤hǐnu, sî khòsò̌dokè bǎ sî pṳwè̤ htě a ma̤sǔ sî htǒonumî̌ awǒkhlo tò̤ ya? Wǐ꤮ ta sî ma̤ta̤mû̌ dě sî pṳwè̤ Khrî̌stuphû̌ pûkǎ ahǐnu, sî khòlò̤jûkè sî ta̤kî̌ta̤kû̌ toǒ numî̌ awǒkhlo. 8Pwǎ̤ta sî ma̤ tò̤. Sî cû̌ma̤sǔ kè̌khînû̌û tapwa̤ ta tapwa̤. Htohǒtò̤ sî cû̌ phî̌sigwi we̤saphǎ kè̌khînû̌û tapwa̤ ta tapwa̤. Sî Khrî̌stuphû̌ ta Khrî̌stuphû̌ cû̌ma̤tû̌ kè̌khînû̌û hî̌tè. 9Kòyòkhu kòyòhî, kòyò phû̌mò̤shî̌hto toǒnu a htû kû̌kò Cǒmara a shiphû̌gaphû̌ dě ashiagakû tò̤ numî̌ sî sî̌ya tò̤ ya? Ma̤pûhǐ sî ma̤sǔ lǒkho pû tò̤nu, gènè̤ te̤mǎ lǒkho he hî̌ sî htǒonu. Kòyò htě a gûma̤ ta̤sò̌yṳ putupatǎ toǒ, kòyò htě a saba pwa̤yo̤ toǒ, kòyò htě a cû̌sǔnṳ kòphû̌kòma toǒ, makhû ta makhû cû̌sǔnṳ kè̌khînû̌ûnu toǒ, 10Htohǒtò̤ kòyò ǎhǔǎkě toǒ, kòyò htě a sò̌yṳkè̌tû̌ aya toǒ, kòyò ǎmṳopǒ toǒ, kòyò htě a dǒmi̤shǐyo̤ kò, ta kòyò htě a lǒǎplò̤ǎ kò wû toǒnu a htûjò kû̌kò Cǒmara a shiphû̌gaphû̌ dě ashiagakû tò̤. 11Sîkla toǒǒnu, dě wǐkha mî̌ a htûhto kòyòjî kòyòphû̌mò̤ sǒsǒta hǐnuhǒ pwǎ̤ta Cǒmara shǔbòhto sî ta̤sǔ hǒ. Dě khònò̤htǒo sî htû Cǒmara ata hǒ. Běcǎ Ye̤shǔkhrî̌stu ta Cǒmara a sǎcahtǐ akhû̌akhî, khònò̤htǒo, Cǒmara bè̌ sî pwǐ kòcǒkòtè̤ toǒnu hǒ.Ǐnoǎ sî na̤klû htǒonu ta Cǒmara ta̤sîrîdû̌sîrîhtû aya
12Sîkla toǒǒnu, a hî̌ ta, “He ma̤ titètè̌꤮ mî̌ anî̤ pwǎ,” a hî̌ hǐnu mî̌ a mè̤hǒ pwǎ̤ta titètè̌꤮ mî̌ awǒbò ta sîya mè̤tò̤. He ma̤ titètè̌꤮ mî̌ anî̤ pwǎ pò̤̌ta he nohtû hena̤ ta ta̤ lǒ̤꤮ bò htě he sò̌yṳ ma̤nu toǒ ajû tò̤. a 13“Shǎǎ mî̌ phukû aya, phukû mî̌ shǎǎ aya,” kòyò toǒǒ hî̌ hǐnu. Amè̤kǎ, pwǎ̤ta htǒoginǐ̤kǔnu Cǒmara ma̤pî̌bòkè pě. Na̤klû htǒomî̌ la̤noǎ ta ta̤putupatǎ aya mè̤tò̤. La̤noǎ ta Běcǎ a ta̤sò̌yṳ noma̤ pa toǒ aya pwǎ. Běcǎ htǒo akhû̌akhî, htû̌꤮ nǒkòpě a ma̤ htûpwa̤gesǒ pa na̤klû htǒonu pě. 14Cǒmara htě a ma̤htûpwa̤gesǒ Běcǎ ta ta̤si htǒotapwa̤nu, a ma̤htûpwa̤gesǒ pa ta ta̤si ta a ta̤po̤ta̤phǎ htǒonu pě. 15Sî na̤klû htǒonu, a mî̌ Khrî̌stu ana̤klû aphwǐaphrû̌ toǒ numî̌ sî sî̌ya tò̤ ya? He phî̌ Khrî̌stu aphwǐaphrû̌ htǒo dě he nohǎmoǒplǒ yǎta mamǔpò̤lò̤ mî̌ a gwa ya? Dè ma̤hǐnumî̌ anî̤ dî̌kî̌꤮ tò̤. 16Kòyò tapwa̤pwa̤ a hǎmoǒhtu ta mamǔpò̤lò̤nu, a htûhtò̌ ta mamǔpò̤lò̤ htǒo sǐtacǎpa yî̌tacǎpa numî̌ sî sî̌ya tò̤ ya? “Asî htǒosò̌gini̤nu a htûhtò̌ nû̌û sǐtacǎpa yî̌tacǎpa hǒ” b lî̤cahtǐkû hî̌ hǐnu. 17Pwǎ̤ta kòyò htě a htûhtò̌ kû̌ta Běcǎ tacǎnǔ꤮ pa toǒnu, a htûhtò̌ kû̌ta Běcǎ sû̌sò̌ tokhonu tacǎ꤮ pa hǒ. 18Cû̌ tephekè lǒkho ta ta̤cû̌sǔnṳ mamǔmakhûnu toǒ nî̌꤮. Ta̤sǔ ahǔwa̤ titètè̌꤮ bǎbǎnu a ma̤shadǒ kòyò ana̤klû pwǐ cû̌sǔnṳ mamǔmakhû ata̤sǔ htǒonu tò̤. Kòyò htě a cû̌sǔnṳ mamǔmakhû toǒnu a ma̤sǔlò̤ tû̌ ana̤klû hǒ. 19– 20Sî na̤klû htǒonumî̌ Běcǎ sǎcahtǐ htě Cǒmara ǐlò̤ bǎ sî htǒotapwa̤ ala̤ǒ a ta̤lṳhtò̌ho numî̌ sî sî̌ya tò̤ ya? Ma̤tè̤hî̌dě Cǒmara pwî̤le̤dû̌pwî̤hto sî akhû̌akhî, sî na̤klû htǒonu sîta mè̤pe tò̤ hǒ. A htûhtò̌kè Cǒmara ata hǒ. Hǐnudě noǎ lǒkho sî na̤klû htǒonu ta Cǒmara asîrîdû̌sîrîhtû ayanu nî̌꤮. c
Copyright information for
KxfSCKRC