1 Corinthians 7

Ta̤gwè ta̤phî̌maphî̌wṳ̂ awi̤akè̌

1Khònò̤dě, he khwè̌pwe̤ǐphlo geshǔ bǎ sî ta sî gwè he dě sî lî̤kûnu toǒ. Sî gwè he ta dè phî̌maphî̌wṳ̂ tò̤ mî̌ awǒkhlo kò̌ sî hî̌ hǐnu. Makhû dè phî̌ ama tò̤ mî̌ awǒkhlo. 2Pò̤̌ta kòyò htě a cû̌sǔnṳ kòphû̌kòma, a cû̌sǔnṳ mamǔmakhû toǒ ǒplṳ̂ tûlû̌shû̌ akhû̌akhî, makhû pṳ̂̌꤮ tapwa̤ to phî̌ lǒkho ama, dě mamǔ pṳ̂̌꤮ tapwa̤ to phî̌ lǒkho awṳ̂. 3Makhû tobǎ hǎmoǒhtu ta ama. Bǎ wṳ̂ sò̌yṳ hǎmoǒhtu ta ama akhanu, ma to yṳǐ tò̤, hǐnudě, bǎ ma sò̌yṳ hǎmoǒhtu ta a wṳ̂ akhanu, wṳ̂ to yṳǐ tò̤. 4Ma ana̤klû htǒonumî̌ ata tû̌ mè̤tò̤, wṳ̂ ata dò̌ǔ. Hǐnudě wṳ̂ ana̤klû htǒonu a tatû̌ mè̤tò̤tò̤, ma ata dò̌ǔ pwǎ. 5Ma ta wṳ̂ a ta̤sò̌yṳ tapwa̤ ta tapwa̤nu, bǎ yṳǐ yǎ tò̤. Pwǎ̤ta bǎ sî sò̌yṳ kwisaba sî̌tukǔ tû̌ akhanu, sî dè sò̌phlǒto nû̌û dě sî hǎmoǒ tephe khǒyî̤ nû̌û tò̤ dèhî̌mò̌nu anî̤ pwǎ. Pò̤̌ta sî kwisabahtonu, sî bǎ hǎmoǒhtu kè̌khînû̌û, ma̤tè̤hî̌dě sî dè khòǐpè̤ sî sò̌phlǒ tò̤ hî̌nu, khînǎmo̤pha hǐkǒdû̌ lǒǎplò̤ǎ sî pě. 6He hî̌ sî hè̌onumî̌ he noshû̌ sî mè̤tò̤. He ǐsî̌yajè pwǎ sî. 7Dè hî̌mè̤mè̤̌mî̌ he sò̌yṳ noǒpelebò sî pwǐ hehtǒo. Pwǎ̤ta Cǒmara ǐlò̤ tapwa̤ ta tapwa̤ numî̌ a sǒsǒnû̌û tò̤. Htǒotapwa̤ mî̌ a ǐlò̤ nû̌û sû htǒotacǎ děnu tapwa̤ mî̌ a ǐlò̤ khǒnû̌û sû ahǔwa̤ tacǎlè̌ a ma̤ hǐnu.

8Hǐnudě kòyò htě a ǒ ta hǐphò tò̤ sî toǒ, ta mamǔǒkhwè̌ sî toǒnu, awǒmî̌ ǒpele sělě lǒkho pwǐ he htǒonu. 9Pwǎ̤tadě sî dè khòǐpè̤ sî sò̌phlǒ tò̤ hî̌dě, tûrû̌ phî̌ lǒkho phû̌maphû̌wṳ̂nu. Ǒ ta hǐphò mî̌ awǒkhlope ta sò̌phlǒ gènè̤ putupatǎ phû̌mò̤nu toǒ.

10Kòyò htě a ǒta phû̌maphû̌wṳ̂ toǒnu, he sò̌yṳ sû̌ǐlò̤ asî yo̤ tûmû. Ta̤sû̌ǐ htǒonumî̌ he ta̤sû̌ǐ mè̤tò̤, Běcǎ sû̌ǐ ta ana̤. Dě a hî̌ ta ma bǎ bè̌kè awṳ̂ tò̤. ^a 11Pwǎ̤ta a dè bè̌kè mò̌nu a bǎphî̌ tèplè̌pe awṳ̂ tò̤. A dè ǒtû̌ mî̌ anî̤ pwǎ, mè̤tò̤mî̌ a hî̌bǎphlo gesǒ ta a wṳ̂ dě a dè geǒplǒsǒ ta a hî̌numî̌ anî̤ pwǎ. Wṳ̂ mî̌ a bǎ bè̌kè ama tò̤tò̤.

12He sò̌yṳ hî̌po̤ kòyò ahǔwa̤ dě sîklanu toǒ. (Pò̤̌ta, htǒomî̌ Běcǎ hî̌ mè̤tò̤.) He ta̤sû̌ǐ tû̌ pwǎ. He sò̌yṳ sû̌ǐ wṳ̂ htě a htû Khrî̌stuphû̌ dě ama dè yṳǎ kû̌kò Khrî̌stu hǒtò̤ pwǎ̤ta ama htǒo dè sò̌yṳ ǒsělě kû̌pe ta awṳ̂ hî̌nu, awṳ̂ bǎ bè̌kè ama tò̤. 13Hǐnuakho ma htě a htû Khrî̌stuphû̌ dě a wṳ̂ dè yṳǎna̤ǎ kû̌ Ye̤shǔkhrî̌stu hǒtò̤ pwǎ̤ta awṳ̂ dè sò̌yṳ ǒsělě kû̌pe ta a hî̌nu, a bǎ bè̌kè awṳ̂ tò̤. 14Ma̤tè̤hî̌dě, sî yṳǎ pa Běcǎ Ye̤shǔ toǒnu, sîma bǎbǎ, mè̤tò̤mî̌ sîwṳ̂ bǎbǎ, a dè yṳǎkû̌ pa Běcǎ Ye̤shǔ hǒtò̤ dèhî̌dě, sî yṳǎ ta̤ akhû̌akhî, Cǒmara howi̤ asî pě. Dě a howi̤dǒ sîphû̌sîli̤ toǒ pě. Cǒmara dè howi̤ sîphû̌ toǒ tò̤ hî̌nu, sî phû̌ toǒnu a sǒsǒbò ta kòyò htě a yṳǎ Běcǎ tò̤nu toǒ aphû̌ali̤nu pě.

15Pwǎ̤tadě ma bǎbǎ, wṳ̂ bǎbǎ a yṳǎ Khrî̌stu tò̤ htǒotapwa̤nu a dè sò̌yṳ bè̌kèwǐ hî̌dě a bè̌kè tû̌. A dè ma̤hǐnu hî̌mî̌, kòyò htě a yṳǎ Khrî̌stu htǒotapwa̤nu a tobǎ ǒhtu ta kòyò htě a yṳǎ Khrî̌stu tò̤ htǒonu tapwa̤ tò̤. Ma̤tè̤hî̌dě Cǒmara kaǎ sî dě sî glè ǒpwǎ nû̌ûta ta̤pè̤ta̤dû. 16Ma htě a htû pwa̤yṳǎphû̌ toǒ sî꤮, sîkhû̌sîkhî dě wṳ̂ htûhtò̌jò pwa̤yṳǎphû̌ tò̤ sî hî̌jò tò̤. Hǐnuakho wṳ̂ htě a htû pwa̤yṳǎphû̌ toǒ sî꤮, sîkhû̌sîkhî dě sîma htûhtò̌jò pwa̤yṳǎphû̌ tò̤ sî hî̌jò tò̤.

Ǒhtûpwa̤ pwǐ Cǒmara kaǎ nanu

17Sî pṳ̂̌꤮ tapwa̤ tobǎ ǒhtûpwa̤ sělě lǒkho pwǐ Cǒmara ǐlò̤ sî bǎ a kaǎ sî akhanu. A ma̤nǎhtobò ta pa glè ǒhtûpwa̤ pwǐhè̌o hǒ. Ta̤sû̌ta̤tòwò hè̌onu, he sû̌ǐlò̤bòhto dě pwa̤yṳǎta̤ aprṳ̂aho akû pṳ̂̌꤮ tò̤glò hǒ. 18Kòyò htě a dǔtṳhto phě dě Cǒmara kaǎ nû̌û toǒnu, a tobǎ ma̤hǎmǎkè a ta̤dǔtṳphě a ta̤ma̤dòǐ htǒonu tò̤. Kòyò htě a dǔtṳ kû̌kò phě tò̤ toǒnu, Cǒmara dè kaǎ asî hî̌dě a lo̤bǎ dǔtṳpe phě tò̤. 19Ma̤tè̤hî̌dě, dǔtṳphě bǎbǎ, dǔtṳphě tò̤ bǎbǎ a lo̤bǎdû̌ tò̤. Ta̤ htě a lo̤bǎdû̌khlo kò tacǎmî̌ ta̤gana̤de Cǒmara ta̤mǎlò̤ toǒ htǒonu hǒ. 20Bǎ Cǒmara kaǎ kòyò tapwa̤pwa̤ akhanu, a htû kòyò hî̌tè tapwa̤nu a tobǎ ǒhtûpwa̤ sělě hǐnu. 21Bǎ Cǒmara kaǎ na akhanu, na htûjû bǎbǎ, a la̤hî̌ǒnǒ tò̤. Pò̤̌ta naběcǎ dè hî̌ na ta sò̌yṳcû̌ bǎtè mî̌ anî̤ hǒ a dè hî̌ dě hǎhtò̌cû̌nu. 22Ma̤tè̤hî̌dě na htûjû pwǎ̤tadě, bǎ na yṳǎ Běcǎ Ye̤shǔ akhanu, a bè̌ na pwǐ kòyò tapwa̤ htě a nî̤ ta̤pelesesǎnu hǒ. Hǐnuakho kòyò htě a htûnǒ jû tò̤ tapwa̤nu, bǎ a yṳǎ Běcǎ Ye̤shǔkhrî̌stu akhanu, a htû Běcǎ Ye̤shǔkhrî̌stu ajû hǒ. 23Cǒmara pwî̤dû̌phî̤shǐ mè̤mè̤̌ sî akhû̌akhî, cû̌ htûpe lǒkho pûma̤ kòyòhǎkhû̌phû̌ ajû ma̤. 24Hǐnudě pṳwè̤ sî꤮, bǎ Cǒmara kaǎ na akhanu, na htû kòyò hî̌tè, na ma̤ ta̤ma̤ titènu, tûrû̌ ǒhtûpwa̤, bǒsû̌ sělě Cǒmara ta na ta̤ma̤ htǒonu.

Kògwè kòyò htě aǒ ta hǐtaphò hǒtò̤ toǒ ta mamǔǒkhwè̌ toǒ awi̤akè̌

25Khònò̤dě he dǒhtû̌ǐphlo bǎ sî ta kòyò ǒ ta hǐtaphò hǒtò̤ toǒ awi̤akè̌. Ta̤wi̤ta̤kè̌ htǒonumî̌, Běcǎ mǎnǎnǒ ta̤hî̌bǎ tò̤. Pò̤̌ta he sò̌yṳ ǐsî̌ya sî ta he ta̤kè̌shǐ. Ma̤tè̤hî̌dě Cǒmara gwèbǎǐ he akhû̌akhî, yṳǎ lǒkho henu. 26Ma̤tè̤hî̌dě, pa htukha khònò̤htǒo, ta̤pò̤ta̤sha, ta̤ma̤jîma̤jû ǒ ta pwa̤yṳǎphû̌ toǒ akhû̌akhî, kòyò htě a ǒ ta hǐtaphò hǒtò̤ toǒnu, ǒsělěhè lǒkho hǐnumî̌ awǒkhlo he gènè̤ hǐnu. 27Sîma ǒ ya? A dè ǒ hî̌dě gènè̤ ta bè̌kè pûma̤ yǎ ma̤. Sî phû̌sǎ ya? Sî dè phû̌sǎpe lǒkho hî̌dě kè̌lǎphî̌ lǒkho pûma̤ sîmasîwṳ̂ ma̤ nî̌꤮. 28Pò̤̌ta sî dè phî̌ sîmasîwṳ̂ hî̌dě sî ma̤sǔ ta̤ mè̤tò̤. Mamǔ ǒpele tapwa̤ dè phî̌ awṳ̂ hî̌dě a ma̤sǔ ta̤ mè̤tò̤. Pwǎ̤ta pwǐ matawṳ̂ bǎ kè̌shǐbǎ ta ta̤pò̤ta̤sha dě a ta̤ǒhtûpwa̤ hǎkhû̌akhû̌ toǒnu, he sò̌yṳ nokè̌shǐ sî tò̤.

29Sû̌kho sî꤮, he sò̌yṳ hî̌ sî mî̌ hǐnu: mṳni̤ gutṳ phǔhè hǒ. Sahtò̌ khònò̤htǒo tǒ̤hè, kòyò htě amaǒ awṳ̂ǒ toǒnu, a tobǎ ǒhtûpwa̤ lǒkho pwǐ kòyò htě ama ǒtò̤ awṳ̂ ǒtò̤ toǒnu. 30Kòyò htě ahǎawo toǒnu, a to ma̤ lǒkho pwǐ asî sǎpla̤ tò̤nu. Kòyò htě a sò̌le̤sò̌lò̤ toǒnu, a to ma̤ lǒkho pwǐ asî sò̌le̤sò̌lò̤ tò̤nu. Htohǒtò̤ kòyò htě a pwî̤ ta̤ toǒnu, atobè̌ pwǐ ahtû nû̌û tanu mè̤tò̤. 31Kòyò htě a noǎ ta̤kî̌ta̤kû̌ hǎkhû̌ bǎotoǒnu, a bǎ gènè̤dû̌ ta̤kî̌ta̤kû̌ dě hǎkhû̌ bǎotoǒ tò̤. Ma̤tè̤hî̌dě ta̤ lǒ̤꤮ bò htě a ǒ hǎkhû̌bǎo toǒnu, a ǒměǒgle yî̤ tûjûpwa̤ mè̤tò̤ akhû̌akhî, he hî̌ pwǎ sî hǐnu.

32Hǎkhû̌ a ta̤kî̌ta̤kû̌ htǒotoǒnu, he sò̌yṳ nogunogè sî tò̤. Kòyò htě ama ǒtò̤ tapwa̤nu, a sò̌yṳ gû ma̤to Běcǎ asò̌phlǒ akhû̌akhî, a bè̌ cahtǐ a ta̤gènè̤ toǒ ta Běcǎ aya. 33Pwǎ̤ta, kòyò htě ama ǒ tapwa̤nu, aguagè ta hǎkhû̌ a ta̤phî̌ta̤ma̤ toǒ aya. Ma̤tè̤hî̌dě a sò̌yṳ gû ma̤to pwǎ ama sò̌phlǒ. 34Hǐnuakho, kòyò htě ama ǒ tapwa̤nu, asò̌phlǒ ǒ ginǐ̤kho. Mamǔ htě awṳ̂ ǒnǒ dǐkhò̌꤮ tò̤ tapwa̤, mè̤tò̤dě mamǔǒkhwè̌ tapwa̤nu, a bè̌cahtǐ a ta̤gènè̤ toǒ ta Běcǎ a ta̤phî̌ta̤ma̤ toǒ aya. Ma̤tè̤hî̌dě a sò̌yṳ ǐlò̤bò ana̤klû ta asò̌phlǒ ginǐ̤cǎbò ta Cǒmara aya. Pwǎ̤ta mamǔ htě awṳ̂ ǒ tapwa̤nu, a bǎgubǎgè ta hǎkhû̌akhû̌ a ta̤phî̌ta̤ma̤ toǒ. Ma̤tè̤hî̌dě a sò̌yṳ gû ma̤to awṳ̂ sò̌phlǒ. 35Ma̤pûhǐ a htûbwǐhtûsîrî ta sîya dě he hî̌pwǎ hǐnu. He cû̌ ma̤dǐdò sî mè̤tò̤. Ma̤pûhǐ sî ǒhtûpwa̤ te̤bǎte̤to lǒkho, htohǒtò̤ ma̤pûhǐ sî ǐlò̤ lǒ̤sû̌lǒ̤sò̌ lǒkho sîna̤ ta Běcǎ a ta̤phî̌ta̤ma̤ ayanudě, he sò̌yṳ ma̤jèpwǎ sî hǐnu.

36Hî̌kû̌nǎ, mamǔ htě na hèhtû̌dèhto yǎ htǒotapwa̤nu, na sò̌yṳshû̌ mè̤mè̤̌ yǎ dě na gènè̤ cè̌cè̌pwǎ ta na glè phî̌yǎ dèhî̌dě, phî̌kè yǎnu. Na dè ma̤hǐnumî̌ ta̤sǔ ǒ tò̤. 37Pò̤̌ta makhû htǒotapwa̤ dè bè̌lò̤hto asò̌phlǒ ta a phî̌pe mamǔ htǒotapwa̤ tò̤, htodě a dè khòǐpè̤ asò̌phlǒ hǒ dèhî̌dě, a phî̌pe ama tò̤ dě a dèǒ hǐnu hî̌numî̌ awǒ pwǎ. 38Hǐnu akhû̌akhî, makhû htě a phî̌ amanu awǒ mè̤mè̤̌, pwǎ̤ta makhû htě a phî̌ ama tò̤nu awǒkhlope.

39Mamǔ tapwa̤nu, awṳ̂ dè sihǒtò̤ hî̌dě a phî̌tèplè̌ awṳ̂ hî̌numî̌ anî̤ tò̤. Pwǎ̤ta awṳ̂ dè sihto hî̌dě a dè sò̌yṳ phî̌tèplè̌ makhû ahǔwa̤tapwa̤ hî̌mò̌nu anî̤ hǒ. Pwǎ̤ta a tobǎ phî̌pwǎ makhû htě a yṳǎ Běcǎ Ye̤shǔkhrî̌stunu pwǎ. 40Pò̤̌ta a dè phî̌pe awṳ̂ tò̤ hî̌nu, a mo̤khlo nû̌û. Htǒomî̌ he ta̤kè̌shǐ ta he ta̤gènè̤ toǒ. He ta̤hî̌bǎ htǒonu, he yṳǎpwǎ ta Cǒmara a sǎcahtǐ dǔlṳ he.