1 John 2

1Hephû̌heli̤ Khrî̌stuphû̌ sî꤮, ma̤pûhǐ sî ma̤pepû ta̤sǔ tò̤ ayanu, he khwè̌ bǎ sî hǐnu hǒ. Pwǎ̤ta kòyò tapwa̤pwa̤ dè ma̤ta̤sǔ hî̌dě, pa pwa̤cǒpwa̤tè̤ Ye̤shǔkhrî̌stu htě a kwigwèbǎǐ bǎ paya dě pha Cǒmara a ǒnu, a ǒ tapwa̤. 2Ma̤pûhǐ Cǒmara bòlû̌kè pa ta̤sǔta̤plě htǒonudě Khrî̌stu khòsihto asò̌ hǒ. Pwǎ̤ta tǒ̤pwǎ pa ta̤sǔta̤plě tû̌ ayanu mè̤tò̤, a bòlû̌bò dǒbǎ hǎkhû̌phû̌ toǒ a ta̤sǔta̤plě.

3Dě pa jûle̤phî̌yo̤ Cǒmara ta̤mǎlò̤ akhû̌akhî, pa sî̌ya te̤mǎ ta pa sî̌yahè Cǒmara hǒ. 4Kòyò tapwa̤pwa̤ dèhî̌ta he sî̌ya Cǒmara a hî̌ pwǎ̤tadě a dè jûle̤phî̌yo̤ nû̌û ta̤mǎlò̤ tò̤ hî̌nu, a mî̌ kòyò lòho dě ta̤te̤ta̤mǎ ǒ nû̌ûkû dǐcǎ꤮ tò̤. 5Pwǎ̤tadě ûpè tapwa̤ bǎbǎ, a dè jûle̤phî̌yo̤ nû̌ûyo̤ hî̌nu, ta̤mo̤ǐ Cǒmara lǒhtò̌behtò̌ mè̤mè̤̌ akû hǒ. Dě pa jûle̤phî̌yo̤ ayo̤ akhû̌akhî, pa sî̌ya te̤mǎ ta pa htûhtò̌ ta Cǒmara tacǎnǔ꤮ pa hǒ. 6Ûpè tapwa̤ bǎbǎ a dè hî̌htò̌lṳ ana̤ ta a htûhtò̌ ta Cǒmara tacǎ꤮ pa hî̌mò̌nu, a tobǎ gûkha yî̤htò̌kû̌ Ye̤shǔkhrî̌stu khò̌lopo̤ gûla̤.

Ta̤mǎlò̤ asa

7He khobǒsû̌ sî꤮, ta̤mǎlò̤ htě he khwè̌ bǎ sî htǒonumî̌ asa mè̤tò̤, mî̌ ta̤mǎlò̤ ali̤ htě sî nî̤bǎhto dě sî htûsakhû̌lû̌ Khrî̌stuphû̌ akhapenu tûmû pwǎ. Ta̤mǎlò̤ ali̤ htǒotama numî̌ ta̤wi̤ta̤kè̌ htě sî gana̤de bǎhtonu toǒ hǒ. ^a 8Pò̤̌ta ta̤mǎlò̤ htě he khwè̌ bǎ sî khònò̤htǒo numî̌ asa mè̤mè̤̌, ma̤tè̤hî̌dě ta̤khǐ glè hǎmǎ dě ta̤lî na̤cè̌ htǒo lîhtò̌ akhû̌akhî, ta̤mǎlò̤ asahtǒo numî̌ acǒatè̤ dě sî kè̌shǐjò yǎ dě Khrî̌stu akû ta dě sîkû.

9Kòyò tapwa̤pwa̤ dèhî̌ta a ǒ dě ta̤lî akûhǒ pwǎ̤tadě a dè sò̌khěpe kòyò yṳǎ Khrî̌stu ahǔwa̤toǒ hî̌numî̌ tǒ̤lò̤khònò̤nu a ǒpepwǎ dě ta̤khǐ akû pwǎ. 10Kòyò htě a mo̤ǐ kò tapwa̤pwa̤nu, a ǒhtûpwa̤ ta̤lî akû, dě ta̤ htě a la̤topho lòkhǔpo̤ cû̌ dě ta̤sǔ akûnu a ǒpe dǐcǎ꤮ tò̤ hǒ. 11Pwǎ̤tadě kòyò tapwa̤pwa̤nu, a dè sò̌khěpe kòyò htě a yṳǎ Khrî̌stu ahǔwa̤ hî̌mò̌nu, a ǒ dě ta̤khǐ akû. Dě a glè cû̌to̤ bǎtè tò̤glòtènu a sî̌yaǐ ana̤ tò̤, ma̤tè̤hî̌dě ta̤khǐ ma̤lakè nû̌û mi̤sǎphlǒ.

12Hephû̌heli̤ sî꤮, he khwè̌ bǎ sî lî̤htǒotabǎ, ma̤tè̤hî̌dě Ye̤shǔkhrî̌stu akhû̌akhî, Cǒmara bòlû̌kèbò sî ta̤sǔta̤plě lǒ̤bò hǒ.

13Pha sî꤮, he khwè̌ bǎ sî lî̤htǒo, ma̤tè̤hî̌dě kòyò htě a ǒnǎpe dě mǒkhû̌hǎkhû̌ htûhtò̌ hǒtò̤ akhanu tapwa̤nu, sî sî̌yahto yǎ hǒ.

Makhûphû̌sǎ sî꤮, sî ma̤pè̤hto khînǎmo̤pha hǐkǒdû̌ akhû̌akhî, he khwè̌ bǎ sî lî̤htǒotabǎ.

Hephû̌heli̤ sî꤮, sî sî̌yahto pha Cǒmara akhû̌akhî, he khwè̌ bǎ sî lî̤htǒo.

14Phasî꤮, he khwè̌ bǎ sî lî̤htǒo, ma̤tè̤hî̌dě kòyò htě a ǒnǎpe dě mǒkhû̌hǎkhû̌ htûhtò̌ hǒtò̤ akha tapwa̤nu, sî sî̌yahto yǎ hǒ.

Makhûphû̌sǎ sî, he khwè̌ bǎ sî lî̤htǒo, ma̤tè̤hî̌dě Cǒmara ale̤ayo̤ ǒhtûpwa̤ sîkû dě sî sò̌phlǒshû̌ sò̌phlǒsho dě sî ma̤pè̤kè khînǎmo̤pha hǐkǒdû̌nu tado hǒ.

15Hǎkhû̌akhû̌ a la̤klola̤bò̌ phû̌mò̤shî̌hto lǒ̤꤮ bò toǒnu bǎbǎ, ta̤ ǒ dě hǎkhû̌ htǒotebě alo̤ lǒ̤bònu toǒ bǎbǎ, mo̤ǐ pûma̤ yǎ ma̤ nî̌. Ta̤ titètè̌ bǎbǎ htě a ǒ dě hǎkhû̌bǎo toǒnu, sî dè mo̤ǐ yǎ hî̌numî̌, sî mo̤ǐ pha Cǒmara tò̤. 16Ma̤tè̤hî̌dě, ta̤ lǒ̤꤮ bò htě a tucu ta hǎkhû̌nu toǒ mî̌ pana̤klû a ta̤sò̌yṳ ta̤ htě awǒtò̤, pa mi̤sǎphlǒ kè̌wî̤ ta̤ htě a phû̌mò̤shî̌hto toǒ, ta̤bè̌htò̌yî̤ na̤ ta ta̤dû̌yò̤htò̌sa ta ta̤pṳ̂̌꤮ tacǎnu toǒ hǒ. Ta̤ lǒ̤꤮ bò htǒotoǒ numî̌ a ǒ dě pha Cǒmara a ǒ hè mè̤tò̤, a ǒ dě hǎkhû̌htǒo a hè pwǎ. 17Hǎkhû̌htǒo ta titètè̌꤮ bǎbǎ a ǒbò nû̌ûkû dě kòyò sò̌yṳ nû̌û toǒnu, a hǎmǎkèbò pě, pwǎ̤ta kòyò htě a ma̤to Cǒmara asò̌phlǒ toǒnu a ǒhtûpwa̤ tûjûpwa̤ talakhǎ pě.

Pwa̤ sò̌khě Khrî̌stu toǒ

18Hephû̌heli̤ sî꤮, mṳni̤ gutṳ phǔhèhǒ, kò dǒhtû̌ǐhto bǎ sî ta pwa̤sò̌khě Khrî̌stunu tapwa̤ hè pě. Dě khònò̤htǒo pwa̤sò̌khě Khrî̌stu htǒotoǒnu a hèǒlṳhtò̌ plṳ̂ akhû̌akhî, pa sî̌ya ta mṳni̤ gutṳ phǔhèhǒ. 19Asî hǎhtò̌cû̌kè dě pakla hǒ. Asî htǒotoǒ numî̌ a ǒkû̌dǒ lǒkho ta pa bǒsû̌khǎkho nû̌û htǒonu mè̤tò̤. Asî dè ǒpadǒ lǒkho ta pa hî̌numî̌ asî ǒkû̌dǒ lòtṳ̌pwǎ ta pa. Pwǎ̤ta asî hǎhtò̌cû̌kè pakla dě asî ata̤hǎhtò̌cû̌kè htǒonu, a dǔlṳ lîtîklî̌kè ta asî ǒkû̌dǒ mè̤mè̤̌pe ta pa dǐpwǎ̤꤮ tò̤ hǒ.

20Pwǎ̤tadě Ye̤shǔkhrî̌stu ǐlò̤ Běcǎ sǎcahtǐ dě sîlo̤ akhû̌akhî, sî lǒ̤bò htǒotoǒ numî̌ sî sî̌ya ta̤te̤ta̤mǎ hǒ. 21Sî sî̌yakû̌ ta̤te̤ta̤mǎ tò̤ akhû̌akhî, he khwè̌ bǎ sî hǐnu mè̤tò̤. Sî sî̌ya ta̤te̤ta̤mǎ dě he khwè̌pwǎbǎ sî. Htohǒtò̤ ta̤lòhǎlòhonu a hè ǒ htò̌jò dě ta̤cǒta̤tè̤ akû dǐkhò̌꤮ tò̤nu sî sî̌yatû̌ hǒ. 22Dèhî̌hǐnudě kòyò htě a lòho tû̌aya tapwa̤ mî̌ ûpè? Kòyò tapwa̤pwa̤ dè hî̌ ta Ye̤shǔ numî̌ Khrî̌stu mè̤tò̤ hî̌mò̌nu, a mî̌ pwa̤sò̌khě Khrî̌stunu tapwa̤ hǒ. Htohǒtò̤ a mî̌ kòyò htě a wîkèbò pha ta phû̌khû sò̌gini̤ lǒ̤bò hǒ. 23Kòyò htě a wîkè phû̌khû htǒonumî̌ a wîkè pha Cǒmara hǒ. Kòyò htě a kaǎshǔ phû̌khû htǒonumî̌ a kaǎshǔ pha Cǒmara hǒ.

24Ma̤hǐnudě, sî htûhtò̌sakhû̌lû̌ Khrî̌stuphû̌ akhanu, shû̌nṳ ǒměǒglewǒ lǒkho ta̤wi̤ta̤kè̌ htě sî gana̤dehto htǒonu toǒ dě sî sò̌phlǒkû. Sî dè ma̤mò̌hî̌numî̌ sî ǒměǒgle dě phû̌khû ta pha akû hǒ. 25Htodě Khrî̌stu sana̤ olò̤ ta a ǐ pa pě numî̌ yolahtûpwa̤ tûjûpwa̤ talakhǎ htǒonu.

26He khwè̌ bǎ sî htǒonumî̌, kòyò htě a cû̌ lǒǎplò̤ǎ sělě kònu toǒ awi̤akè̌ pwǎ. 27Sîya lè̌dě, Khrî̌stu ǐlò̤hto a Běcǎ sǎcahtǐ dě sîlo̤ hǒ, dě a sǎcahtǐ ǒměǒgle dě sîkû akhû̌akhî, kò lo̤bǎ sû̌ǐpe sî dǐpwǎ̤꤮ tò̤, ma̤tè̤hî̌dě a sǎcahtǐ sû̌ǐ sî ta̤pṳ̂̌꤮ tacǎ hǒ. Htohǒtò̤ a sû̌ǐ sî htǒonumî̌ ta̤te̤ta̤mǎ, ta̤lòhǎlòho mè̤tò̤. Hǐnudě ǒměǒgle lǒkho dě Khrî̌stu akû pwǐ a sǎcahtǐ sû̌ǐhto sînu nî̌.

28Dě khònò̤htǒo hephû̌heli̤ sî꤮, htû̌꤮ Běcǎ Khrî̌stu hè gesǒ amṳni̤ pě ti̤ni̤nu, ma̤pûhǐ sî ǐsha ǒhǔpû tò̤, htohǒtò̤ ma̤pûhǐ sî sòwò̤pû tò̤nu, ǒměǒgle lǒkho dě Khrî̌stu akû nî̌꤮.

29Sî sî̌ya ta Khrî̌stu mî̌ kòcǒkòtè̤ tapwa̤. Hǐnudě sî to sî̌ya ta kòyò htě a ma̤tota̤ toǒ numî̌, Cǒmara aphû̌ali̤ toǒ hǒ.