1 John 3
Cǒmara aphû̌ali̤ toǒ
1Pha Cǒmara mo̤ǐhto pa pwî̌tènu, kè̌ lǒkho mò̌, a mo̤ǐ pa htǒo, to̤htû̌ kò bǎ kaǎ pa ta Cǒmara aphû̌ali̤ toǒ. Pa htû mè̤mè̤̌ Cǒmara aphû̌ali̤ toǒ hǒ. Kòyòhǎkhû̌phû̌ toǒ sî̌ya Cǒmara tò̤ akhû̌akhî, a sî̌ya pa tò̤. a 2He khobǒsû̌bǒmo̤ sî, khònò̤htǒo pa htû Cǒmara aphû̌ toǒ pwǎ̤ta pa htûhtò̌ kòyò hî̌tè pě tacǎtènu, kò ǐsî̌yanǎ pa dǐcǎ hǒtò̤. Pwǎ̤ta, ta̤htǒonu pa sî̌yahto ta, htû̌ Běcǎ Ye̤shǔkhrî̌stu hèǒlṳhtò̌ akha pěnu, pa sǒsǒta a pě, ma̤tè̤hî̌dě pa kè̌shǐ a pwǐ a mè̤mè̤̌nu pě. 3Kòyò htě a ǒpo̤kè̌shuǐ lǒkho ta a htûhtò̌ sǒsǒta Ye̤shǔkhrî̌stu pě toǒnu, pwǐ Khrî̌stu cahtǐnu, a bè̌cahtǐdǒ ana̤ hǐnu pě. 4Kòyò lǒ̤bò htě a ma̤ ta̤sǔta̤plě toǒnu, a cû̌tûlû̌khatî̤lî̤ Cǒmara a ta̤sû̌ta̤tòwò hǒ. Ma̤tè̤hî̌dě ta̤sǔta̤plě mî̌ ta̤cû̌tûlû̌khatî̤lî̤ Cǒmara a ta̤sû̌ta̤tòwò htǒonu hǒ. 5Pwǎ̤ta ma̤pûhǐ Khrî̌stu phî̌cû̌kè pa ta̤sǔta̤plě toǒ ayanu, a hèlò̤hto dě hǎkhû̌bǎo numî̌ sî sî̌yahto tû̌ hǒ. Htohǒtò̤ sî sî̌ya ta Ye̤shǔkhrî̌stu htǒonumî̌ a ta̤sǔta̤plě ǒkû̌kò dǐcǎ tò̤. b 6Ma̤hǐnudě kòyò lǒ̤bò htě a ǒměǒgle dě Ye̤shǔkhrî̌stu akû toǒnu, a bǎ ma̤ sělěpe ta̤sǔta̤plě tò̤. Pwǎ̤ta kòyò tapwa̤pwa̤ dě a ma̤ sělěpe ta̤sǔta̤plě hî̌numî̌, kòyò htě a kè̌shǐnǒ Ye̤shǔkhrî̌stu dǐkhò̌ tò̤, htodě a sî̌yanǒ Ye̤shǔkhrî̌stu dǐplǎ tò̤. 7Phû̌li̤ sî, nolǒǎplò̤ǎ cû̌ pûma̤ kò ta sîna̤ dǐpwǎ̤ ma̤ nî̌. Kòyò tapwa̤pwa̤ dě a ma̤ ta̤cǒta̤tè̤ numî̌ kòyò htě acǒatè̤ sǒsǒta Ye̤shǔkhrî̌stu cǒtè̤ htǒonu hǒ. 8Kòyò tapwa̤pwa̤ dě a ma̤ sělěpe ta̤sǔta̤plě hî̌numî̌, khînǎmo̤pha hǐkǒdû̌ pǒǐpepwǎ nû̌û, ma̤tè̤hî̌dě khînǎmo̤pha hǐkǒdû̌ htǒonu, a ma̤nò ta̤sǔta̤plě dě akòshî̌kha pe, dě a ma̤ sělě to̤pe khònò̤. Ma̤pûhǐ Cǒmara aphû̌khûhtǒo ma̤pî̌kè ta̤ htě khînǎmo̤pha hǐkǒdû̌ ma̤htonu toǒ ayanudě, a hèlò̤ dě hǎkhû̌bǎo hǒ. 9Ûpè tapwa̤ bǎbǎ, a dè htû Cǒmara aphû̌ali̤ hî̌nu, a ma̤ sělěpe ta̤sǔta̤plě tò̤, ma̤tè̤hî̌dě ta̤ǒhtûpwa̤ asa htě Cǒmara ǐ htǒonu a ǒměǒgle nû̌ûkû hǒ. Dě Cǒmara mî̌ apha akhû̌akhî, a ma̤ sělějòpe ta̤sǔta̤plě tò̤. 10Cǒmara aphû̌ali̤ toǒ ta khînǎmo̤pha hǐkǒdû̌ aphû̌ali̤ toǒnu, pa sî̌ya te̤mǎjò a pwǐhè̌o dě, ûpèpè̌ bǎbǎ a dè ma̤ sělě sadape ta̤ htě a totò̤ toǒ, tò̤mî̌ a mo̤ǐ apṳawè̤ Khrî̌stuphû̌ toǒ tò̤ hî̌numî̌, Cǒmara aphû̌ali̤ mè̤tò̤.Cǒmara aphû̌ali̤ mî̌ a mo̤ǐ kè̌khînû̌û tapwa̤ ta tapwa̤
11Ta̤wi̤ta̤kè̌ htě sî gana̤de dě sî htûhtò̌sakhû̌lû̌ Khrî̌stuphû̌ akhanumî̌ pa tobǎ mo̤ǐ nû̌û tapwa̤ ta tapwa̤ htǒonu hǒ. c 12Pa tobǎ sǒsǒta Kaî̌no htě khînǎmo̤pha hǐkǒdû̌ pǒǐ nû̌û dě a ma̤si apṳnu tapwa̤ tò̤. A cû̌ ma̤si tǒ̤ apṳ ma̤tè̤hî̌dě a ma̤ta̤ toǒ numî̌ a phû̌mò̤shî̌hto dě apṳ ma̤ta̤ toǒ numî̌, a cǒtè̤ akhû̌akhî, a ma̤sikèpwǎ apṳ. d 13Hǐnudě he pṳwè̤ Khrî̌stuphû̌ sî, kòyò htě a ma̤ ta̤cǒta̤tè̤ tò̤ toǒ dè sò̌khě sî hî̌dě sû̌pi̤sò̌pi̤ lǒkho pûma̤ nî̌. 14Dě wǐkha numî̌, pa sǒsǒta kòyòsinu toǒ pwǎ. Pò̤̌ta khònò̤htǒo pa mo̤ǐ pa pṳwè̤ Khrî̌stuphû̌ toǒ akhû̌akhî, pa sî̌ya ta pa htûhtò̌ kòyò htě a htûpwa̤ toǒ hǒ. Kòyò htě a mo̤ǐ apṳwè̤ Khrî̌stuphû̌ tò̤ toǒ numî̌, a ǒměǒgle pepwǎ dě ta̤si akû pwǎ. e 15Ûpèpè̌ bǎbǎ a dè sò̌khě kòyò yṳǎ Khrî̌stu ahǔwa̤ tapwa̤pwa̤ hî̌numî̌, a ma̤si kòyò hǒ. Dě sî sî̌ya ta kòyò htě a ma̤si kòyò tapwa̤pwa̤nu, a nî̤bǎ kû̌kò yolahtûpwa̤ tûjûpwa̤ talakhǎ tò̤. 16Ta̤mo̤ǐnu pa sî̌yajò a hî̌tè hî̌dě, Ye̤shǔkhrî̌stu ǐlò̤kè a ta̤htûpwa̤ ta paya, dě pa tobǎ ǐlò̤kèdǒ pa ta̤htûpwa̤ ta pa pṳwè̤ Khrî̌stuphû̌ toǒ aya. 17Kòyò htě a ǒta hǎkhû̌ a ta̤dû̌yò̤htò̌sa tapwa̤pwa̤nu, a dè kè̌shǐ apṳwè̤ Khrî̌stuphû̌ lo̤bǎ ta̤tacǎcǎ hǐnudě a dè gwèbǎǐ nû̌û tò̤ hî̌numî̌, Cǒmara ata̤mo̤ǐ ǒ nû̌ûkû tò̤. 18Hephû̌heli̤ sî, pa ta̤mo̤ǐ htǒonu nopwe̤hǎhtò̌ tû̌pwǎ pûma̤ yǎ dě sî khû̌phělo̤nu ma̤ nî̌. Sî tobǎ ma̤jè mè̤mè̤̌ kò pwǐ Cǒmara mo̤ǐ mè̤mè̤̌ panu. 19Pa dè mo̤ǐ nû̌û tapwa̤ ta tapwa̤ hǐnu hî̌dě, pa sî̌ya ta pa ǒkû̌ ta ta̤te̤ta̤mǎ tokho hǒ. Dě pa glè sò̌phlǒmo̤, sò̌phlǒ gûjûkabǎ dě Cǒmara a lo̤mo̤ hǒ. 20Pa sò̌phlǒ dè hî̌lò̤ pa ta pa ma̤sǔ ta̤ bò̌khòtè bǎbǎnu, pa sî̌ya ta Cǒmara mî̌ adû̌khlo ta pa sò̌phlǒ dě a sî̌yabò ta̤pṳ̂̌tacǎ. 21Hǐnudě khobǒsû̌bǒmo̤ sî, pa sò̌phlǒ htǒo, a dè hî̌lò̤ pa ta pa ta̤sǔ ǒtò̤ hî̌dě, pa hènṳ dě Cǒmara a lo̤mo̤ pěnu, pa ǐshape dǐcǎ tò̤ hǒ. 22Htohǒtò̤ pa jûle̤phî̌yo̤ ata̤mǎlò̤ dě pa ma̤to yǎ sò̌phlǒ akhû̌akhî, pa kwi ta̤ titètè̌ bǎbǎnu, pa nî̤bǎ ta̤ dě a ǒnu toǒ pě. 23Cǒmara mǎnǎ ayo̤ dě a hî̌, pa bǎ yṳǎ phû̌khû Ye̤shǔkhrî̌stu ami̤ dě pa bǎ mo̤ǐ kè̌khînû̌û tapwa̤ ta tapwa̤ pwǐ a mǎnǎhto ayo̤ ta pa htǒonu. f 24Kòyò htě a jûle̤phî̌yo̤ Cǒmara ta̤mǎlò̤ htǒotoǒ numî̌ a ǒměǒgle dě Cǒmara akû hǒ, dě Cǒmara ǒměǒgle dǒ asîkû hǒ. Cǒmara ǐhto pa Běcǎ sǎcahtǐ akhû̌akhî, a ǐsî̌yahto pa ta a ǒměǒgle dě pakû hǒ.
Copyright information for
KxfSCKRC