1Jo 4 | KxfSCKRC | STEP | He khobǒsû̌bǒmo̤ sî, kòyò lǒ̤bò htě a hî̌ ta pa ǒ ta Běcǎ sǎcahtǐ toǒnu, yṳǎ bǐaǒ lǒkho pûma̤. Ma̤pûhǐ sî sî̌ya ta sò̌phlǒhtǒo numî̌ a hè mè̤mè̤̌ dě Cǒmara a ǒ ya, mî̌ a hè mè̤tò̤ yanu sèlèkè̌wǐ lǒkho asî nî̌, ma̤tè̤hî̌dě bǎ hǎkhû̌bǎonu, pwa̤po̤ lòho ǒlṳhtò̌plṳ̂ hǒ.

1 John 4

Sò̌phlǒ acǒatè̤ ta sò̌phlǒ lòhǎlòho

1 He khobǒsû̌bǒmo̤ sî, kòyò lǒ̤bò htě a hî̌ ta pa ǒ ta Běcǎ sǎcahtǐ toǒnu, yṳǎ bǐaǒ lǒkho pûma̤. Ma̤pûhǐ sî sî̌ya ta sò̌phlǒhtǒo numî̌ a hè mè̤mè̤̌ dě Cǒmara a ǒ ya, mî̌ a hè mè̤tò̤ yanu sèlèkè̌wǐ lǒkho asî nî̌, ma̤tè̤hî̌dě bǎ hǎkhû̌bǎonu, pwa̤po̤ lòho ǒlṳhtò̌plṳ̂ hǒ. 2 Kòyò htě a nî̤bǎ Cǒmara a sǎcahtǐ tapwa̤nu, pa sî̌yajò a hî̌tèhî̌dě, a dè hî̌ ta Ye̤shǔkhrî̌stunu, a hèlò̤ pwǐ kòyòhǎkhû̌phû̌ tapwa̤ a dè hî̌ hǐnu hî̌numî̌, pa sî̌yajò ta a mî̌ a nî̤bǎ Běcǎ sǎcahtǐ htě a ǒ dě Cǒmara a ǒ hè htǒonu hǒ. 3 Pwǎ̤ta, kòyò htě a hî̌ ta Ye̤shǔ numî̌ a hèlò̤ pwǐ kòyòhǎkhû̌phû̌ tapwa̤ mè̤tò̤ toǒnu, a nî̤bǎ sò̌phlǒ htě a ǒ dě Cǒmara a ǒ hè htǒonu mè̤tò̤. Sò̌phlǒ hǐnu mî̌ a ǒ dě pwa̤sò̌khě Khrî̌stunu tapwa̤ a ǒ hè pwǎ. Sî gana̤dehto ta a hè pě, dě khònò̤htǒo a hè ǒhtò̌ dě hǎkhû̌bǎonu hǒ.

4 Pwǎ̤ta phû̌li̤ sî, sî mî̌ Cǒmara akòyò toǒ dě sî ma̤pî̌kè pwa̤po̤ lòho toǒ hǒ, ma̤tè̤hî̌dě Cǒmara htě a ǒ dě sîkû htǒotapwa̤nu adû̌khlo ta khînǎmo̤pha hǐkǒdû̌ htě a ǒdǒkû̌ ta kòyòhǎkhû̌phû̌ dě a ma̤ ta̤cǒta̤tè̤ tò̤nu toǒ akû htǒotadonu. 5 Hǎkhû̌ la̤klo phû̌mò̤ pǒǐ pwa̤po̤ lòho htǒotoǒ akhû̌akhî, asî gû hî̌bǎ sǒsǒkû̌pwǐ hǎkhû̌phû̌ htě ala̤klo hî̌bǎ phû̌mò̤shî̌hto tû̌ htǒonu toǒ dě Cǒmara akòyò mè̤tò̤ toǒ gû gana̤dekû̌bò asîyo̤. 6 Pò̤̌ta pa mî̌ Cǒmara akòyò toǒ. Ûpè tapwa̤ bǎbǎ a sî̌ya Cǒmara tapwa̤nu, a gûgana̤de kû̌ payo̤. Pwǎ̤ta Cǒmara akòyò mè̤tò̤ toǒnu, a gûgana̤de kû̌ payo̤ tò̤. Hǐnu akhû̌akhî, kòyò htě a nî̤bǎ Běcǎ sǎcahtǐ dě a hî̌bǎ ta̤te̤ta̤mǎ htǒotapwa̤ toǒ numî̌ ûpè, ta kòyò htě a nî̤bǎ sò̌phlǒ dě a hî̌bǎ lòhǎlòho tû̌ tado toǒ numî̌ ûpènu, pa sî̌ya mèpa̤jò tû̌ pwǎ.

Cǒmara mî̌ ta̤mo̤ǐ

7 Khobǒsû̌bǒmo̤ sî, pa tobǎ mo̤ǐ kè̌khînû̌û tapwa̤ ta tapwa̤, ma̤tè̤hî̌dě ta̤mo̤ǐnu mî̌ a hè dě Cǒmara a ǒ. Ûpè tapwa̤ bǎbǎ a mo̤ǐ kò numî̌ Cǒmara aphû̌ali̤ hǒ, dě a sî̌ya Cǒmara hǒ. 8 Ûpè tapwa̤ bǎbǎ a mo̤ǐ kû̌kò tò̤ toǒnumî̌, a sî̌ya kû̌kò Cǒmara tò̤, ma̤tè̤hî̌dě Cǒmara mî̌ ta̤mo̤ǐ. 9 Cǒmara mo̤ǐ pa pwî̌tènu a dǔlṳ bǎ pa ta a nohèlò̤ aphû̌khû htě a ǒ tû̌pwǎ tapwǎ̤pa htǒonu dě hǎkhû̌bǎonu hǒ. Ma̤pûhǐ pa nî̤bǎ kû̌ tṳtṳ ta̤htûpwa̤ dě aphû̌khû alo̤ htǒonu dě, a nohè bǎ pa hǒ. 10 Ta̤mo̤ǐ amûasǎ mè̤mè̤̌ mî̌ Cǒmara mo̤ǐ pa dě ma̤pûhǐ pa ta̤sǔta̤plě lǒ̤bò bòlû̌kè ayanu, a nohèlò̤ khòsi aphû̌khû ta paya. Pwǎ̤ta pa ta̤mo̤ǐ Cǒmaranu adû̌ sǒsǒta ata̤mo̤ǐ pa htǒonu tò̤. 11 Khobǒsû̌bǒmo̤ sî, Cǒmara dè mo̤ǐ pa pwǐhè̌o hî̌dě, pa to mo̤ǐtû̌ nû̌û tapwa̤ ta tapwa̤. 12 Kò kè̌shǐ Cǒmara dǐpwǎ̤tò̤. Pa dè mo̤ǐ nû̌û tapwa̤ ta tapwa̤ hî̌numî̌, Cǒmara ǒměǒgle pakû dě ata̤mo̤ǐ ǒlǒǒbe dě pakû hǒ. ^a

13 Pa sî̌ya te̤mǎ ta Cǒmara ǐlò̤hto pa Běcǎ sǎcahtǐ akhû̌akhî, pa ǒměǒgle akû dě a ǒměǒgle dě pakû hǒ. 14 Pa kè̌shǐhto hǒ, dě pa pwe̤ǐlṳ bǎ kòhǔwa̤ toǒ ta ma̤pûhǐ Cǒmara aphû̌khûhtǒo hè htûbǎ kò pwa̤ma̤lû̌htò̌ge kòyòhǎkhû̌phû̌ toǒ ayanu, pha Cǒmara nohèlò̤ nû̌û dě hǎkhû̌ bǎonu hǒ. 15 Kòyò tapwa̤ glè pwe̤ǐhtò̌lṳ ta Ye̤shǔ numî̌ Cǒmara aphû̌khû tapwa̤ dèhî̌numî̌ Cǒmara ǒměǒgle akû dě a ǒměǒgle dě Cǒmara akû hǒ. 16 Hǐnu akhû̌akhî, pa sana̤nu pa sî̌yahǒ, dě pa yṳǎ ta Cǒmara mo̤ǐ pa.

Cǒmara mî̌ ta̤mo̤ǐ. Ûpè tapwa̤ bǎbǎ a ǒměǒgle dě ta̤mo̤ǐ akûnu, a ǒměǒgle Cǒmara akû dě Cǒmara ǒměǒgle akû hǒ. 17 Pa dè mo̤ǐ kòhǔwa̤ hǐnu hî̌numî̌, Cǒmara ata̤mo̤ǐ ǒlǒǒbe dě pakû hǒ. Hǐnudě htû̌ ta̤cèrò amṳni̤ hèto̤ pěnu, pa sò̌phlǒkhu sò̌phlǒha pě, ma̤tè̤hî̌dě pa ta̤ǒhtûpwa̤ bǎ hǎkhû̌bǎonu, a sǒsǒta Khrî̌stu a ta̤ǒhtûpwa̤ akhû̌akhî, pa sò̌phlǒkhu sò̌phlǒha pě. 18 Dě ta̤mo̤ǐ hǐnu akû numî̌ ta̤sò̌gònò̤ ǐsha ǒtò̤. Cǒmara ata̤mo̤ǐ htě a ma̤lǒma̤be bǎ pakû htǒonu, a wṳ̂hǎhtò̌kè bǎ pa ta̤sò̌gònò̤ ǐshanu toǒ hǒ, ma̤tè̤hî̌dě ta̤sò̌gònò̤ ǐsha htǒonumî̌, amî̌ ta̤cèrò pwǎ. Kòyò tapwa̤pwa̤ dè ǐshape tû̌pwǎ hî̌numî̌, Cǒmara ata̤mo̤ǐ ǒlǒǒbe akû tò̤.

19 Cǒmara mo̤ǐwǐ pa akhû̌akhî, pa mo̤ǐ nû̌û tapwa̤ ta tapwa̤ hǒ. 20 Kòyò tapwa̤pwa̤ dè hî̌ ta, “He mo̤ǐ Cǒmara,” hǐnudě a dè sò̌khě tû̌ apṳwè̤ Khrî̌stuphû̌ hî̌numî̌, a mî̌ kòyò lòho pwǎ, ma̤tè̤hî̌dě a kè̌shǐ apṳwè̤ Khrî̌stuphû̌ ta ami̤sǎ tû̌ hǐnudě a dè mo̤ǐ tò̤ hî̌numî̌, Cǒmara htě a kè̌shǐbǎnǒ dǐplǎ tò̤, htǒotapwa̤nu, “He mo̤ǐ Cǒmara,” a cû̌ hî̌jò hî̌tè? 21 Ta̤mǎlò̤ htě pa nî̤bǎ dě Ye̤shǔkhrî̌stu a ǒ htǒonumî̌ a hî̌ ta kòyò htě a mo̤ǐ Cǒmara toǒnu, a tobǎ mo̤ǐdǒ apṳawè̤ Khrî̌stuphû̌ toǒ.