1Jo 5 | KxfSCKRC | STEP | Ûpè tapwa̤ bǎbǎ a dè yṳǎ ta Ye̤shǔ mî̌ Khrî̌stu hî̌nu, a htû Cǒmara aphû̌ali̤ tapwa̤hǒ, htohǒtò̤ ûpè tapwa̤ bǎbǎ a dè mo̤ǐ pha numî̌, a mo̤ǐdǒ aphû̌ali̤ toǒ hǒ.

1 John 5

Pa ta̤ma̤pè̤ hǎkhû̌

1 Ûpè tapwa̤ bǎbǎ a dè yṳǎ ta Ye̤shǔ mî̌ Khrî̌stu hî̌nu, a htû Cǒmara aphû̌ali̤ tapwa̤hǒ, htohǒtò̤ ûpè tapwa̤ bǎbǎ a dè mo̤ǐ pha numî̌, a mo̤ǐdǒ aphû̌ali̤ toǒ hǒ. 2 Bǎ pa mo̤ǐ Cǒmara dě pa jûle̤phî̌yo̤ a ta̤mǎlò̤ akhanu, pa sî̌ya ta pa mo̤ǐ Cǒmara aphû̌ali̤ toǒ hǒ. 3 Ma̤tè̤hî̌dě ta̤mo̤ǐ Cǒmara amûasǎ mî̌ ta̤jûle̤phî̌yo̤ a ta̤mǎlò̤ htǒotoǒ hǒ. Dě pa gûma̤kû̌bò a ta̤mǎlò̤nu toǒ hî̌numî̌ apò̤nǒ tò̤. ^a 4 Ma̤tè̤hî̌dě Cǒmara aphû̌ pṳ̂̌ tapwa̤nu a ma̤pè̤bò hǎkhû̌ la̤klo phû̌mò̤ toǒ hǒ. Pa ma̤pè̤ hǎkhû̌ la̤klo phû̌mò̤ toǒ ta pa ta̤yṳta̤nǎ akò hǒ. 5 Ûpè tapwa̤ glè ma̤pè̤bò̌ hǎkhû̌ ala̤klo phû̌mò̤ htǒotoǒ pè? Tû̌pwǎ kòyò htě a yṳǎ ta Ye̤shǔ numî̌ Cǒmara aphû̌khû tapwa̤nu toǒ ma̤pè̤ pě.

Cǒmara khòlṳ asò̌ ta aphû̌khû Ye̤shǔkhrî̌stu awi̤akè̌

6 Ye̤shǔkhrî̌stu hèlò̤ hǎkhû̌bǎo dě a hèplo ana̤ ta shi, a hè khòsi ana̤ dě asǐ bǎmèlò̤. A hè pwǎpǒ̤ ta shi tacǎpa mè̤tò̤. A hèbò sǐ ta shi ginǐ̤cǎbò. Běcǎ sǎcahtǐ sana̤ khò asò̌ ta htǒonumî̌ a tohǒ, ma̤tè̤hî̌dě Běcǎ sǎcahtǐ mî̌ acǒatè̤. 7 Ta̤khòsò̌ numî̌ a ǒ sucǎ. 8 A ǒ kwè̌ hî̌tè hî̌numî̌ Běcǎ sǎcahtǐ ta sǐ ta shi, htě htǒosucǎbònu a sò̌phlǒto sǒsǒkè̌khînû̌û tacǎpa. 9 Pa yṳǎ kòyòhǎkhû̌phû̌ a ta̤khòsò̌ pwǎ̤tadě Cǒmara a ta̤khòsò̌ numî̌ a tokhlo ta hǐnu, ma̤tè̤hî̌dě htǒonumî̌ ta̤khòsò̌ htě Cǒmara ǐ pa ta aphû̌khû awi̤akè̌ hǒ. 10 Hǐnudě kòyò htě a yṳǎ Cǒmara aphû̌khû htǒotoǒnu, a sî̌ya te̤mǎ ta Cǒmara khòlṳ asò̌ htǒonumî̌ ato mè̤mè̤̌. Pwǎ̤ta kòyò htě a yṳǎ Cǒmara tò̤ toǒnu, a hî̌ Cǒmara ta kòyò lòho, ma̤tè̤hî̌dě a yṳǎ kû̌ Cǒmara khò asò̌ ta aphû̌khû awi̤akè̌ htǒonu tò̤ akhû̌akhî, a hî̌ lǒkhopwǎ hǐnu. 11 Dě ta̤khòsò̌ mî̌ titètè hî̌dě, Cǒmara ǐlò̤ bǎ pa yolahtûpwa̤ tûjûpwa̤ talakhǎ dě yolahtûpwa̤ a kòshî̌kòtṳ htǒonumî̌ a ǒ dě aphû̌khû akûnu. ^b 12 Ûpè tapwa̤ bǎbǎ a nî̤bǎ aphû̌khû htǒonumî̌, a nî̤bǎ ta̤htûpwa̤ htǒonu hǒ. Pwǎ̤ta ûpè tapwa̤ bǎbǎ a nî̤bǎ kû̌kò Cǒmara aphû̌khûhtǒo tò̤ numî̌, a nî̤bǎ kû̌kò ta̤htûpwa̤ tò̤.

Ta̤htûpwa̤ tûjûpwa̤ talakhǎ

13 Ta̤ htě he khwè̌ bǎ sî htǒonumî̌, ma̤pûhǐ sî yṳǎ Cǒmara aphû̌khû ami̤ htǒotoǒ glè sî̌ya tû̌ sîna̤ ta sî nî̤bǎ yolahtûpwa̤ tûjûpwa̤ talakhǎ ayanudě, he khwè̌pwǎ bǎ sî. 14 Dě Cǒmara alo̤mo̤nu, pa yṳǎlò̤ tû̌ pana̤ ta pa kwi titètè̌ bǎbǎ, a dè to nû̌ûsò̌phlǒ hî̌numî̌, a gana̤de lòtṳ̌ pa ta̤kwisaba hǒ. 15 Pa sî̌ya ta a gana̤de pa ta̤kwisaba htǒo akhû̌akhî, pa yṳǎ ta a ǐlò̤ pa ta̤ htě pa kwi yǎnu toǒ pě.

16 Kòyò tapwa̤pwa̤ dè kè̌shǐ apṳwè̤ Khrî̌stuphû̌ tapwa̤pwa̤ ma̤ta̤sǔ dě a glè ǐ htûhtò̌ nû̌û ta̤si mè̤tò̤ hî̌nu, a kwita̤ Cǒmara a ǒ dě Cǒmara ǐ kòyò htě a ma̤ta̤sǔ htǒonu tapwa̤ ta̤htûpwa̤ pě. Pwǎ̤ta ta̤sǔ htě a glè ǐ htûhtò̌ nû̌û ta ta̤si hî̌numî̌, he sò̌yṳ hî̌ sî ta ta̤sǔ hǐnu toǒnu sî to kwisabahtò̌ bǎ aya dě Cǒmara a ǒ tò̤. 17 ma̤ ta̤phû̌mò̤shî̌hto lǒ̤bò toǒ numî̌ ta̤sǔ hǒ hǐnudě ta̤sǔ htě a sûcû̌ kòyò ta ta̤si mè̤tò̤nu a ǒ pwǎ.

18 Pa sî̌ya ta Cǒmara aphû̌ali̤ toǒ numî̌, a ma̤ sělěpe ta̤sǔta̤plě dǐkhò̌ tò̤. Ma̤tè̤hî̌dě Cǒmara aphû̌khû Ye̤shǔ htǒonu a ma̤kwa dǐdòǐ asî dě khînǎmo̤pha hǐkǒdû̌ htě a ma̤ ta̤phû̌mò̤ htǒotadonu a ma̤shajò asî tò̤. 19 Pa sî̌ya ta pa htǒotoǒ numî̌ Cǒmara aphû̌ali̤ toǒ hǐnudě bò kòyò ahǔwa̤ toǒ numî̌ a ǒ lǒkho dě khînǎmo̤pha hǐkǒdû̌ htě a ma̤ ta̤phû̌mò̤ htǒotado a ta̤pǒ ala̤. 20 Ma̤pûhǐ pa sî̌ya kû̌kò Cǒmara htě ato htǒotapwa̤nu, pa sî̌ya ta Cǒmara aphû̌khûhtǒo hè ǐ sî̌yaphlo bǎ pa hǒ. Pa ǒ dě Cǒmara htě ato htǒotapwa̤ ta aphû̌khû Ye̤shǔkhrî̌stu htǒotapwa̤ akû hǒ. A mî̌ Cǒmara htě ato tapwa̤, htohǒtò̤ Cǒmara htě a ǐ kò yolahtûpwa̤ tûjûpwa̤ tapwa̤.

21 Hephû̌heli̤ sî saba lǒkho pûma̤ Cǒmara ahǔwa̤nu toǒ ma̤ nî̌.