1Jo 1 | KxfSCKRC | STEP | Pa khwè̌cû̌ bǎ sî Ye̤shǔ awi̤akè̌, a mî̌ ta̤le̤ta̤yo̤ htě a ǐ kò ta̤htûpwa̤ tapwa̤. Ahtǒo a ǒnǎhto dě hǎkhû̌ htûhtò̌ hǒtò̤ akha pe. Pa gana̤dehto dě pa kè̌shǐhtotû̌ yǎta pami̤sǎ hǒ. Pa kè̌ a dě pa pṳ̂bǎhto yǎta pa cǔde hǒ.

1 John 1

1 Pa khwè̌cû̌ bǎ sî Ye̤shǔ awi̤akè̌, a mî̌ ta̤le̤ta̤yo̤ htě a ǐ kò ta̤htûpwa̤ tapwa̤. Ahtǒo a ǒnǎhto dě hǎkhû̌ htûhtò̌ hǒtò̤ akha pe. Pa gana̤dehto dě pa kè̌shǐhtotû̌ yǎta pami̤sǎ hǒ. Pa kè̌ a dě pa pṳ̂bǎhto yǎta pa cǔde hǒ. ^a 2 Bǎ ta̤ǒhtûpwa̤ htǒo ǒlṳhtò̌ akhanu, pa kè̌shǐ yǎ akhû̌akhî, a awi̤akè̌ mî̌ yolahtûpwa̤ tûjûpwa̤ talakhǎ htǒonu, pa dǒhtû̌ǐlṳjòbò bǎ sî hǒ. Yolahtûpwa̤ tûjûpwa̤ talakhǎ htǒonu, a ǒkû̌ ta papha Cǒmara htodě a hè ǒ lṳhtò̌ bǎ pa hǒ. ^b 3 Ma̤pûhǐ sî bǒsû̌khǎkho kû̌dǒ ta pa ayanu, pa pwe̤ǐ bǎ sî ta̤ htě pa kè̌shǐhto dě pa gana̤debǎhtonu toǒ hǒ. Pa bǒsû̌khǎkho kè̌khînû̌û htǒonumî̌, pa bǒsû̌ pana̤ ta pha Cǒmara ta aphû̌khû Ye̤shǔkhrî̌stu. 4 Ma̤pûhǐ pa ta̤sò̌le̤sò̌lò̤ lǒhtò̌behtò̌ ayanudě, pa khwè̌ ta̤htǒotoǒ hǒ.

Cǒmara mî̌ ta̤lî

5 Ta̤wi̤ta̤kè̌ htě pa gana̤dehto dě aphû̌khû ǒnu, pa sò̌yṳ pwe̤ǐlṳdǒ sî ta, Cǒmara mî̌ ta̤lî dě ta̤khǐ ǒ nû̌ûkû dǐcǎ꤮ tò̤. 6 Pa dè hî̌ ta pa bǒsû̌khǎkho ta a pwǎ̤tadě pa dè ǒhtûpwa̤ sělěpepwǎ ta̤khǐ akla dě pa dè ma̤ sayè̤pepwǎ ta̤sǔ hî̌numî̌, pa mî̌ kòyò lòhǎlòho dě pa ǒhtûpwa̤ ta ta̤te̤ta̤mǎ akû tò̤. 7 Pwǎ̤ta pa dè ǒhtûpwa̤ ta̤lî akû pwǐ Cǒmara ǒ dě ta̤lî akû hî̌numî̌, pa ǒ ta ta̤bǒsû̌khǎkho kè̌khînû̌û tapwa̤ ta tapwa̤, htodě Cǒmara aphû̌khû Ye̤shǔkhrî̌stu asǐnu, a glè shǔbòkèbò pa ta̤sǔta̤plě toǒ hǒ.

8 Pa dè hî̌ ta pa ma̤nǒ ta̤sǔta̤plě dǐkhò̌꤮ tò̤ hî̌mò̌nu pa lòholò̤tû̌ pana̤, dě ta̤te̤ta̤mǎ ǒ pakû dǐcǎ꤮ tò̤. 9 Pwǎ̤tadě pa dè pwe̤ǐlṳ Cǒmara ta pa ma̤ ta̤sǔta̤plě toǒ hî̌numî̌ Cǒmara htǒonu acǒatè̤ ta a ta̤olò̤ dě a ma̤toma̤bǎ ta̤, htohǒtò̤ a bòlû̌kè pa ta̤sǔ lǒ̤꤮ bò dě a ma̤mṳ̂plî gebòsǒ pa ma̤tota̤ tò̤nu toǒ pě. 10 Pa dè hî̌ ta pa ma̤nǒ ta̤sǔ dǐkhò̌꤮ tò̤ hî̌mò̌nu, pa nohtû Cǒmara sǒsǒta kòyò lòhǎlòho ta̤ tapwa̤ dě ale̤ayo̤ ǒ pakû dǐmû̌꤮ tò̤.