1Pe 1 | KxfSCKRC | STEP | He khwè̌cû̌bǎ kò lî̤htǒo dě kòyò htě Cǒmara wû̌lǎ nû̌û dě a cû̌ǒkǔ teděsǎ, a cû̌htû shǐtè̤mè̤ kòshikòga, dě a ǒ pîshîcû̌bò agûla̤ pṳ̂̌꤮ tò̤glò bǎ Pòtǔga, Galatǐaga, Kapadakǐga, Ashǎga ta Bitunǐgakûnu toǒ a ǒ. He mî̌ Petru, he mî̌ Ye̤shǔkhrî̌stu a pwa̤nophû̌ tapwa̤.

1 Peter 1

1 He khwè̌cû̌bǎ kò lî̤htǒo dě kòyò htě Cǒmara wû̌lǎ nû̌û dě a cû̌ǒkǔ teděsǎ, a cû̌htû shǐtè̤mè̤ kòshikòga, dě a ǒ pîshîcû̌bò agûla̤ pṳ̂̌꤮ tò̤glò bǎ Pòtǔga, Galatǐaga, Kapadakǐga, Ashǎga ta Bitunǐgakûnu toǒ a ǒ.

He mî̌ Petru, he mî̌ Ye̤shǔkhrî̌stu a pwa̤nophû̌ tapwa̤. 2 Pha Cǒmara wû̌lǎ sî pwǐ a ta̤yè̤lò̤nǎ tû̌nu dě Běcǎ sǎcahtǐ ma̤wî̤ma̤cahtǐhtò̌ sî, ma̤pûhǐ sî gana̤de Ye̤shǔkhrî̌stu ayo̤ dě asǐ akhû̌akhî, a ma̤mṳ̂plî bǎ sî. Cǒmara abwǐasîrî ta sò̌phlǒ ta̤gûjûkabǎ ǒlǒǒbekû̌ tû̌ta sî nî̌꤮.

Ta̤kè̌shuǐ ate̤amǎ

3 Pa hî̌bwǐhî̌sîrîhtò̌ plǒnû̌û pa Běcǎ Ye̤shǔkhrî̌stu apha Cǒmara hò̌꤮. Mî̌ htě a ta̤gwèbǎǐ tûlû̌shû̌ pa htǒo, ta Ye̤shǔkhrî̌stu ata̤si htûpwa̤ge akhû̌akhî, a ǐlò̤ pa ta̤htûpwa̤ asa hǒ. Dě htǒo akhû̌akhî, pa nî̤bǎ hènè pa ta̤kè̌shuǐ dě pa ta̤ǒhtûpwa̤ akû hǒ. 4 Dě a ǐlò̤ pa ta̤htûpwa̤ asa akhû̌akhî, Cǒmara bè̌nǎ bǎ sî û̌cata̤ya̤ htě a pî̌jòtò̤, a sojòtò̤, anoakhwejòtò̤ htǒotoǒ dě mǒkhû̌nu hǒ. 5 Dě sî yṳǎ Khrî̌stu akhû̌akhî, bǎ sî nî̤bǎ ta̤ma̤lû̌htò̌ge ^{▼▼Cǒmara ma̤lû̌htò̌ge pa khònò̤ hǐnumî̌ htû̌mṳni̤ gutṳ pěnu, a ma̤lǒbebò ta̤ htě a ma̤wǒnǎ bǎ akòyònu toǒ pě.} hǒtò̤nu, Cǒmara ǒpo̤ǐ bǎ sî ta ata̤po̤ta̤phǎ. Cǒmara ma̤wǒnǎ ana̤ ta htû̌꤮ akhîakha gutṳ pěnu, a dǔlṳ ta̤ma̤lû̌htò̌ge htǒonu pě. 6 Hǐnudě sò̌le̤sò̌lò̤ lǒkho ta ta̤ lǒ̤꤮ bò htǒotoǒ nî̌, pwǎ̤ta khònò̤htǒo teděsǎ akûnu ta̤pò̤ta̤sha ǒhtò̌plṳ̂ dě a ma̤guma̤gè sî pě. 7 Dě sî ta̤yṳta̤nǎ htǒonumî̌ a mè̤mè̤̌ ya, mî̌ a mè̤tò̤ yanu, ta̤pò̤ta̤sha khòlṳ asò̌ pě. Hta htě a pî̌jò htǒonu, kò tobǎ ma̤kè̌pe yǎta mî̌, hǐnuakhû̌akhî, sî ta̤yṳta̤nǎ htě ale̤dû̌pwî̤htûkhlo ta htahtǒo, ma̤pûhǐ a dǔlṳ mè̤mè̤̌ ta ta̤yṳ ayanu, kò tobǎ ma̤kè̌dǒ yǎ hǐnu. Htodě htû̌꤮ Ye̤shǔkhrî̌stu hè dǔlṳhtò̌ ana̤ akha pěnu, sî nî̤bǎ ta̤htû̌sò̌ǐ, ta̤sîrîdû̌sîrîhtû ta ta̤bè̌dû̌bè̌htû sî pě. 8 Sî kè̌shǐnǒ yǎ tò̤ pwǎ̤ta sî mo̤ǐ yǎ. Sî kè̌shǐ yǎ khònò̤ hǒtò̤ pwǎ̤tadě sî yṳǎ yǎ. Hǐnuakhû̌akhî, sî sò̌le̤sò̌lò̤ mè̤mè̤̌ dě sî sò̌le̤ pwî̌꤮ tènu hî̌jòpe tò̤. 9 Ma̤tè̤hî̌dě sî yṳǎna̤ǎ Ye̤shǔ akhû̌akhî, sî nî̤bǎ sî ta̤htûpwa̤ htǒotoǒ a ta̤lû̌htò̌ hǒ.

10 Ta̤ma̤lû̌htò̌ge awi̤akè̌ htǒonu, pwa̤po̤ toǒ kè̌lǎsî̌ya dě gwèsèlè te̤mǎhto hǒ. Htodě ta̤bwǐta̤sîrî asû htě Cǒmara ǐlò̤ sî pě htǒonu, pwa̤po̤ toǒ hî̌po̤phǎnǎhto awi̤akè̌ hǒ. 11 Khrî̌stu a sǎcahtǐ ǒ pwa̤po̤ toǒ a sò̌phlǒkû dě a hî̌nǎwǐ Khrî̌stu awi̤akè̌ ta a khòbǎwǐ ta̤jîta̤jû toǒ pě. Htodě ta̤sîrîdû̌sîrîhtû toǒ hènǒ anǒkò pě, asî kè̌lǎsî̌ya lǒkho ta akhîakha bǎ bò̌khòtè pě, htodě a ma̤ ana̤ hî̌tè pě hǐnu. 12 Dě Cǒmara dǔlṳ bǎ pwa̤po̤ htǒotoǒ ta asî ma̤ta̤ htǒotoǒ numî̌ asîyatû̌ mè̤tò̤. Hî̌ mè̤mè̤̌mî̌ sîya pwǎ. Khònò̤htǒo ta̤ htǒotoǒnu a hî̌ sî dě sî gana̤de hǒ. Dě Cǒmara nohè Běcǎ sǎcahtǐ a ta̤po̤ta̤phǎ htě a ǒ mǒkhû̌ hèdě, a hè ma̤ta̤htǒo akhû̌akhî, asî hè pwe̤ǐ bǎ sî ta ta̤sò̌le̤sò̌lò̤ awi̤akè̌ htǒo hǒ. Mǒkhû̌tanaphû̌ toǒnu a sò̌yṳ kè̌lǎsî̌ya te̤mǎkû̌ mè̤mè̤̌ ta̤wi̤ta̤kè̌ htǒotoǒ.

Cǒmara kaǎ pa ta pa glè ǒhtûpwa̤ cahtǐ

13 Ma̤hǐnudě ma̤wǒnǎ lǒkho sî ta̤gènè̤ toǒ ta sî la̤ma̤ta̤ ayanu. Jîsapwa̤ lǒkho sîna̤ dě bè̌htò̌ lǒkho sî ta̤kè̌shuǐ ta ta̤bwǐta̤sîrî htě Cǒmara ǐ sî htû̌꤮ Ye̤shǔkhrî̌stu hè gesǒ pě htǒo alo̤nu. 14 Sî mî̌ kòyò htě a gana̤de Cǒmara ayo̤ sǒsǒta phijaû̌phû̌ toǒnu akhû̌akhî, ǒhtûpwa̤ lǒkhope pûma̤ ta̤sò̌yṳ phû̌mò̤ toǒ akû pwǐ dě awǐanǒ bǎ sî sî̌ya Khrî̌stu hǒtò̤ akhanu toǒ ma̤ nî̌. 15 Cǒmara htě a wû̌lǎ sî htǒotapwa̤ numî̌ acahtǐ akhû̌akhî, sî ma̤ta̤ titètè̌꤮ bǎbǎnu, ǒhtûpwa̤ cahtǐ lǒkho. 16 Ma̤tè̤hî̌dě lî̤cahtǐ hî̌, “Ǒhtûpwa̤ cahtǐ lǒkho, ma̤tè̤ he mî̌ pwa̤cahtǐ.” ^b

17 Bǎ sî kwisabahtò̌ Cǒmara akhanu, “Pha” sî kaǎ lǒkho yǎ hǐnu. Kòyò pṳ̂̌꤮ tapwa̤ ma̤hto ta̤titètè̌꤮ bǎbǎnu, Cǒmara cèrò cǒtè̤ pwǎ, a kè̌dû̌kè̌pî̌tî̌ tò̤. Hǐnudě bǎ sî ǒhtûpwa̤pe pwǐ shǐtè̤mè̤ dě hǎkhû̌bǎo akhanu, ǒhtûpwa̤ lǒkho ta ta̤ǐsha bè̌duna̤ Cǒmara akû nî̌꤮. 18 Ma̤tè̤hî̌dě sî sî̌ya ta Cǒmara pwî̤ge sî ta wûhta htě apî̌alṳ̂jònu toǒ mè̤tò̤. Ma̤pûhǐ sî lû̌htò̌ hǎhtò̌bò̌ ta sîmo̤sîpha phiphu dě꤮ wǐnu toǒ ǐlò̤kè sî ta̤ǒhtûpwa̤ htě abwǐasîrî ǒkû̌kò tò̤nu toǒ ayanudě, a pwî̤ge sî hǒ. 19 Dě Khrî̌stu pwî̤ge sî ta asǐ htě ale̤dû̌pwî̤htû htǒo akhû̌akhî, sî nî̤bǎ ta̤pelesesǎ hǒ. Khrî̌stu mî̌ alò̤ta sophû̌ htě kò kè̌shǐ a ta̤phû̌mò̤ ǒ dǐcǎ꤮ tò̤ tado tapwa̤ hǒ. 20 Bǎ Cǒmara bǒlò̤ hǎkhû̌ hǒtò̤ akhanu, a wû̌lǎnǎhto Khrî̌stu htǒohǒ. Pwǎ̤ta mṳni̤mṳsa gutṳ̌lò̤ mî̌ khònò̤kha htǒotoǒnu, Cǒmara dǔlṳ bǎ sî ta Khrî̌stu hǒ. 21 Khrî̌stu akhû̌akhî, sî yṳǎna̤ǎ Cǒmara htě a ma̤htûpwa̤ gesǒ Khrî̌stu ta ta̤si dě a bè̌dû̌bè̌htû nû̌û htǒotapwa̤ hǒ. Hǐnudě sî ta̤yṳ ta sî ta̤kè̌shuǐ htǒonu, a ǒ dě Cǒmara alo̤hǒ.

22 Khònò̤dě sî jûle̤phî̌yo̤ Cǒmara a ta̤sû̌ǐ a ta̤te̤ta̤mǎ toǒ akhû̌akhî, sî ma̤mṳ̂plî sî sò̌phlǒ dě sî htû kòyò htě a mo̤ǐ mè̤mè̤̌ pṳwè̤ Khrî̌stuphû̌ htǒotoǒ hǒ. Ma̤hǐnudě mo̤ǐ lǒ̤sû̌lǒ̤sò̌ kè̌khînû̌û tapwa̤ ta tapwa̤ nî̌꤮. 23 Ma̤tè̤hî̌dě Cǒmara ale̤ayo̤ htǒonu, a htûpwa̤ dě a ǒměgle tûjûpwa̤ talakhǎ akhû̌akhî, sî ǒphijaû̌lò̤ gesǒ taplǎ hǒ. Sî ta̤ǒhtûpwa̤ asa htǒonumî̌, a hè dě sîmo̤sîpha htě a sijò htǒotoǒ a ǒnu mè̤tò̤. Mî̌tanu, sî ta̤ǒhtûpwa̤ asa htǒonumî̌, a hè dě Cǒmara htě a sijò dǐkhò̌꤮ tò̤ htǒotapwa̤ a ǒ. 24 Pwǐ lî̤cahtǐ hî̌ ta,

“Kòyòhǎkhû̌phû̌ lǒ̤꤮ bònu alò̤ta mi̤sǎwû̌pho toǒnu pwǎ. A ta̤sîrîdû̌sîrîhtû toǒ ta a ta̤wî̤ta̤wǒ toǒnu, alò̤ta ta̤phota̤gî dǒhtò̌ dě ya̤dakhû̌nu toǒ pwǎ. Mi̤ sî toǒnu a khwesibò pě dě ta̤phota̤gî sî toǒnu a lòsukèbò pě. 25 Pwǎ̤ta Běcǎ ale̤ayo̤ htǒonu, a ǒměǒgle tûjûpwa̤ talakhǎ.” ^c

Ale̤ayo̤ htǒonumî̌ mî̌pwǎ ta̤sò̌le̤sò̌lò̤ awi̤akè̌ htě kò dǒhtû̌ǐ bǎ sî htǒonu hǒ.